Read Chichewa Buku Lopatulika Bible 2014 MARKO 15 Bible Online

MARKO 15 - Chichewa Buku Lopatulika Bible 2014 bible

MARKO 15

¹Ndipo pomwepo mamawa anakhala upo ansembe aakulu, ndi akulu a anthu, ndi alembi, ndi akulu a milandu onse, namanga Yesu, namtenga, nampereka kwa Pilato.

²Ndipo Pilato anamfunsa Iye, Kodi ndiwe mfumu ya Ayuda? Ndipo anayankha, nanena naye, Mwatero.

³Ndipo ansembe aakulu anamnenera Iye zinthu zambiri.

⁴Ndipo Pilato anamfunsanso, nanena, Suyankha kanthu kodi? Taona, akunenera Iwe zinthu zambiri zotere.

⁵Koma Yesu sanayankhenso kanthu; kotero kuti Pilato anazizwa.

⁶Ndipo ankawamasulira pachikondwerero wandende mmodzi, amene iwo anampempha.

⁷Ndipo analipo wina dzina lake Barabasi, wamangidwa pamodzi ndi opanduka, amene anapha munthu mumphandumo.

⁸Ndipo khamu la anthu anabwera nayamba kupempha kuti achite monga anali kuwachitira nthawi zonse.

⁹Ndipo Pilato anawayankha, nanena nao, Kodi mufuna kuti ndikumasulireni mfumu ya Ayuda?

¹⁰Pakuti anazindikira kuti ansembe aakulu anampereka Iye mwanjiru.

¹¹Koma ansembe aakulu anasonkhezera khamulo, kuti makamaka awamasulire Barabasi.

¹²Ndipo Pilato anawayankhanso, nati kwa iwo, Pamenepo ndidzachita chiyani ndi Iye amene mumtchula mfumu ya Ayuda?

¹³Ndipo anafuulanso, Mpachikeni pamtanda.

¹⁴Ndipo Pilato ananena nao, Pakuti Iye anachita choipa chotani? Koma iwo anafuulitsatu, Mpachikeni Iye.

¹⁵Ndipo Pilato pofuna kuwakhazika mtima anthuwo, anawamasulira Barabasi, napereka Yesu, atamkwapula, akampachike pamtanda.

¹⁶Ndipo asilikali anachoka naye nalowa m'bwalo, ndilo Pretorio; nasonkhanitsa gulu lao lonse.

¹⁷Ndipo anamveka Iye chibakuwa, naluka korona waminga, namveka pa Iye;

¹⁸Ndipo anayamba kumlankhula Iye, kuti, Tikuoneni, mfumu ya Ayuda!

¹⁹Ndipo anampanda Iye pamutu pake ndi bango, namthira malovu, nampindira maondo, namlambira.

²⁰Ndipo atatha kumnyoza anamvula chibakuwacho namveka Iye zovala zake. Ndipo anatuluka naye kuti akampachike Iye pamtanda.

²¹Ndipo anakakamiza wina wopitirirapo, Simoni wa ku Kirene, alikuchokera kuminda, atate wao wa Aleksandro ndi Rufu, kuti anyamule mtanda wake.

²²Ndipo anamtenga kunka naye kumalo Gologota, ndiwo, osandulika, Malo a Bade.

²³Ndipo anampatsa vinyo wosanganiza ndi mure; koma Iye sanamlandire.

²⁴Ndipo anampachika Iye, nagawana zovala zake mwa iwo okha, ndi kuchita maere pa izo, kuti adziwe yense adzatenga chiyani.

²⁵Ndipo panali ora lachitatu, ndipo anampachika Iye.

²⁶Ndipo lembo la mlandu wake linalembedwa pamwamba, MFUMU YA AYUDA.

²⁷Ndipo anapachika pamodzi ndi Iye achifwamba awiri; mmodzi kudzanja lake lamanja ndi wina kulamanzere.[5]

²⁸

²⁹Ndipo iwo akupitirirapo anamchitira mwano, napukusa mitu yao, nanena, Ha! Iwe wakupasula Kachisi, ndi kummanga masiku atatu,

³⁰udzipulumutse mwini, nutsike pamtanda.

³¹Moteronso ansembe aakulu anamtonza mwa iwo okha pamodzi ndi alembi, nanena, Anapulumutsa ena; sakhoza kudzipulumutsa yekha.

³²Atsike tsopano pamtanda, Khristu mfumu ya Israele, kuti tione, ndi kukhulupirira. Ndipo iwo akupachikidwa naye anamlalatira.

³³Ndipo pofika ora lachisanu ndi chimodzi, panali mdima pa dziko lonse, kufikira ora lachisanu ndi chinai.

³⁴Ndipo pa ora lachisanu ndi chinai Yesu anafuula ndi mau okweza, Eloi, Eloi, lama sabakitani? ndiko kusandulika, Mulungu wanga, Mulungu wanga mwandisiyiranji Ine?

³⁵Ndipo ena akuimirirapo, pakumva, ananena, Taonani, aitana Eliya.

³⁶Ndipo anathamanga wina, nadzaza chinkhupule ndi vinyo wosasa, nachiika pabango, namwetsa Iye, nanena, Lekani; tione ngati Eliya adza kudzamtsitsa.

³⁷Ndipo Yesu anatulutsa mau okweza, napereka mzimu wake.

³⁸Ndipo chinsalu chotchinga cha m'Kachisi chinang'ambika pakati, kuyambira kumwamba kufikira pansi.

³⁹Ndipo pamene kenturiyo, woimirirapo popenyana ndi Iye, anaona kuti anapereka mzimu kotero, anati, Zoonadi, munthu uyu anali Mwana wa Mulungu.

⁴⁰Ndipo analinso kumeneko akazi akuyang'anira kutali; mwa iwo anali Maria wa Magadala, ndi Maria amake wa Yakobo wamng'ono ndi wa Yosefe, ndi Salome;

⁴¹amene anamtsata Iye, pamene anali m'Galileya, namtumikira; ndi akazi ena ambiri, amene anakwera kudza ndi Iye ku Yerusalemu.

⁴²Ndipo atafika tsono madzulo, popeza mpa tsiku lokonzekera, ndilo la pambuyo pa Sabata,

⁴³anadzapo Yosefe wa ku Arimatea, mkulu wa milandu womveka, amene yekha analikuyembekezera Ufumu wa Mulungu; nalimba mtima nalowa kwa Pilato, napempha mtembo wake wa Yesu.

⁴⁴Ndipo Pilato anazizwa ngati adamwaliradi; naitana kenturiyo, namfunsa ngati adamwalira kale.

⁴⁵Ndipo pamene anachidziwa ndi kenturiyo, anamninkha Yosefe mtembowo.

⁴⁶Ndipo anagula bafuta, namtsitsa Iye, namkulunga m'bafutamo, namuika m'manda osemedwa m'thanthwe; nakunkhunizira mwala pakhomo la manda.

⁴⁷Ndipo Maria wa Magadala ndi Maria amake wa Yosefe anapenya pomwe anaikidwapo.