Read Chichewa Buku Lopatulika Bible 2014 LUKA 1 Bible Online

LUKA 1 - Chichewa Buku Lopatulika Bible 2014 bible

LUKA 1

¹Popeza ambiri anayesa kulongosola nkhani ya zinthu zinachitika pakati pa ife,

²monga anazipereka kwa ife iwo amene anakhala mboni ndi atumiki a mau,

³kuyambira pachiyambi, ndinayesa nkokoma inenso, amene ndinalondalonda mosamalitsa zinthu zonse kuyambira pachiyambi, kulembera kwa iwe tsatanetsatane, Teofilo wabwinotu iwe;

⁴kuti udziwitse zoona zake za mau amene unaphunzira.

⁵Masiku a Herode, mfumu ya Yudeya, kunali munthu wansembe, dzina lake Zekariya, wa gulu la ansembe la Abiya; ndi mkazi wake wa ana akazi a fuko la Aroni, dzina lake Elizabeti.

⁶Ndipo onse awiri anali olungama mtima pamaso pa Mulungu, namayendabe m'malamulo onse ndi zoikika za Ambuye osachimwa.

⁷Ndipo analibe mwana, popeza Elizabeti anali wouma, ndipo onse awiri anakalamba.

⁸Ndipo panali, pakuchita iye ntchito yakupereka nsembe m'dongosolo la gulu lake, pamaso pa Mulungu,

⁹monga mwa machitidwe a kupereka nsembe, adamgwera maere akufukiza zonunkhira polowa iye m'Kachisi wa Ambuye.

¹⁰Ndipo khamu lonse la anthu linalikupemphera kunja nthawi ya zonunkhira.

¹¹Ndipo anamuonekera iye mngelo wa Ambuye, naimirira kudzanja lamanja la guwa la nsembe la zonunkhira.

¹²Ndipo Zekariya anadabwa pamene anamuona, ndipo mantha anamgwira.

¹³Koma mngelo anati kwa iye, Usaope Zekariya, chifukwa kuti lamveka pemphero lako, ndipo mkazi wako Elizabeti adzakubalira mwana wamwamuna, ndipo udzamutcha dzina lake Yohane.

¹⁴Ndipo udzakhala nako kukondwera ndi msangalalo; ndipo anthu ambiri adzakondwera pa kubadwa kwake.

¹⁵Pakuti iye adzakhala wamkulu pamaso pa Ambuye, ndipo sadzamwa konse vinyo kapena kachasu; nadzadzazidwa ndi Mzimu Woyera, kuyambira asanabadwe.

¹⁶Ndipo iye adzatembenuzira ana a Israele ambiri kwa Ambuye Mulungu wao.

¹⁷Ndipo adzamtsogolera Iye, ndi mzimu ndi mphamvu ya Eliya, kutembenuzira mitima ya atate kwa ana ao, ndi osamvera kuti atsate nzeru ya olungama mtima; kukonzeratu Ambuye anthu okonzeka.

¹⁸Ndipo Zekariya anati kwa mngelo, Ndidzadziwitsa ichi ndi chiyani? Pakuti ndine nkhalamba, ndipo zaka zake za mkazi wanga zachuluka.

¹⁹Ndipo mngelo anayankha, nati kwa iye, Ine ndine Gabriele, woimirira pamaso pa Mulungu; ndipo ndinatumidwa kwa iwe kudzalankhula nawe, ndi kuuza iwe uthenga uwu wabwino.

²⁰Ndipo taona, udzakhala wotonthola ndi wosakhoza kulankhula, kufikira tsiku limene zidzachitika izi, popeza kuti sunakhulupirira mau anga, amene adzakwanitsidwa pa nyengo yake.

²¹Ndipo anthu analikulindira Zekariya, nazizwa ndi kuchedwa kwake m'Kachisimo.

²²Koma m'mene iye anatulukamo, sanatha kulankhula nao; ndipo anazindikira kuti iye adaona masomphenya m'Kachisimo. Ndipo iye analinkukodola iwo, nakhalabe wosalankhula.

²³Ndipo kunali, pamene masiku a utumiki wake anamalizidwa, anamuka kunyumba kwake.

²⁴Ndipo atatha masiku awa, Elizabeti mkazi wake anaima; nadzibisa miyezi isanu, nati,

²⁵Ambuye wandichitira chotero m'masiku omwe Iye anandipenyera, kuchotsa manyazi anga pakati pa anthu.

²⁶Ndipo mwezi wachisanu ndi chimodzi mngelo Gabriele anatumidwa ndi Mulungu kunka kumudzi wa ku Galileya dzina lake Nazarete,

²⁷kwa namwali wopalidwa ubwenzi ndi mwamuna, dzina lake Yosefe, wa fuko la Davide; ndipo dzina lake la namwaliyo ndilo Maria.

²⁸Ndipo pakulowa mngelo anati kwa iye, Tikuoneni, wochitidwa chisomo, Ambuye ali ndi iwe.

²⁹Koma iye ananthunthumira ndi mau awa, nasinkhasinkha kulonjera uku nkutani.

³⁰Ndipo mngelo anati kwa iye, Usaope, Maria; pakuti wapeza chisomo ndi Mulungu.

³¹Ndipo taona, udzakhala ndi pakati, nudzabala mwana wamwamuna, nudzamutcha dzina lake Yesu.

³²Iye adzakhala wamkulu, nadzatchedwa Mwana wa Wamkulukulu: ndipo Ambuye Mulungu adzampatsa Iye mpando wachifumu wa Davide atate wake:

³³ndipo Iye adzachita ufumu pa banja la Yakobo kunthawi zonse; ndipo ufumu wake sudzatha.

³⁴Koma Maria anati kwa mngelo, Ichi chidzachitika bwanji, popeza ine sindidziwa mwamuna?

³⁵Ndipo mngelo anayankha, nati kwa iye, Mzimu Woyera adzafika pa iwe, ndi mphamvu ya Wamkulukulu idzakuphimba iwe: chifukwa chakenso Choyeracho chikadzabadwa, chidzatchedwa Mwana wa Mulungu.

³⁶Ndipo taona, Elizabeti mbale wako, iyenso ali ndi pakati pa mwana wamwamuna m'ukalamba wake; ndipo mwezi uno uli wachisanu ndi chimodzi wa iye amene ananenedwa wouma.

³⁷Chifukwa palibe mau amodzi akuchokera kwa Mulungu adzakhala opanda mphamvu.

³⁸Ndipo Maria anati, Onani, mdzakazi wa Ambuye; kukhale kwa ine monga mwa mau anu. Ndipo mngelo anachoka kwa iye.

³⁹Ndipo Maria ananyamuka masiku amenewa, namuka ndi changu kudziko la mapiri kumudzi wa Yuda;

⁴⁰nalowa m'nyumba ya Zekariya, nalonjera Elizabeti.

⁴¹Ndipo panali pamene Elizabeti anamva kulonjera kwake kwa Maria, mwana wosabadwayo anatsalima m'mimba mwake; ndipo Elizabeti anadzazidwa ndi Mzimu Woyera;

⁴²nakweza mau ndi mfuu waukulu, nati, Wodalitsika iwe mwa akazi, ndipo chodalitsika chipatso cha mimba yako.

⁴³Ndipo ichi chichokera kuti kudza kwa ine, kuti adze kwa ine amake wa Ambuye wanga?

⁴⁴Pakuti ona, pamene mau a moni wako analowa m'makutu anga, mwana anatsalima ndi msangalalo m'mimba mwanga.

⁴⁵Ndipo wodala ali iye amene anakhulupirira; chifukwa zidzachitidwa zinthu zimene Ambuye analankhula naye.

⁴⁶Ndipo Maria anati, Moyo wanga ulemekeza Ambuye,

⁴⁷ndipo mzimu wanga wakondwera mwa Mulungu Mpulumutsi wanga,

⁴⁸chifukwa Iye anayang'anira umphawi wa mdzakazi wake; pakuti taonani, kuyambira tsopano, anthu a mibadwo yonse adzanditchula ine wodala.

⁴⁹Chifukwa Iye Wamphamvuyo anandichitira ine zazikulu; ndipo dzina lake lili loyera.

⁵⁰Ndipo chifundo chake chifikira anthu a mibadwomibadwo pa iwo amene amuopa Iye.

⁵¹Iye anachita zamphamvu ndi mkono wake; Iye anabalalitsa odzitama ndi mlingaliro wa mtima wao.

⁵²Iye anatsitsa mafumu pa mipando yao yachifumu, ndipo anakweza aumphawi.

⁵³Anawakhutitsa anjala ndi zinthu zabwino, ndipo eni chuma anawachotsa opanda kanthu.

⁵⁴Anathangatira Israele mnyamata wake, kuti akakumbukire chifundo,

⁵⁵(Monga analankhula kwa makolo athu) kwa Abrahamu ndi kwa mbeu yake kunthawi yonse.

⁵⁶Ndipo Maria anakhala ndi iye ngati miyezi itatu, nabweranso kunyumba kwake.

⁵⁷Ndipo inakwanira nthawi ya Elizabeti, ya kubala kwake, ndipo anabala mwana wamwamuna.

⁵⁸Ndipo anansi ake ndi abale ake anamva kuti Ambuye anakulitsa chifundo chake pa iye; nakondwera naye pamodzi.

⁵⁹Ndipo panali tsiku lachisanu ndi chitatu iwo anadza kudzadula kamwanako; ndipo akati amutche dzina la atate wake Zekariya.

⁶⁰Ndipo amake anayankha, kuti, Iai; koma adzatchedwa Yohane.

⁶¹Ndipo iwo anati kwa iye, Palibe wina wa abale ako amene atchedwa dzina ili.

⁶²Ndipo anakodola atate wake, afuna amutche dzina liti?

⁶³Ndipo iye anafunsa cholemberapo, nalemba, kuti, Dzina lake ndi Yohane. Ndipo anazizwa onse.

⁶⁴Ndipo pomwepo panatseguka pakamwa pake, ndi lilime lake linamasuka, ndipo iye analankhula, nalemekeza Mulungu.

⁶⁵Ndipo panagwa mantha pa iwo onse akukhala oyandikana nao; ndipo analankhulalankhula nkhani izi zonse m'dziko lonse la mapiri a Yudeya.

⁶⁶Ndipo onse amene anazimva anazisunga m'mtima mwao, nanena, Nanga mwana uyu adzakhala wotani? Pakuti dzanja la Ambuye linakhala pamodzi ndi iye.

⁶⁷Ndipo atate wake Zekariya anadzazidwa ndi Mzimu Woyera, nanenera za Mulungu, nati,

⁶⁸Wolemekezeka Ambuye, Mulungu wa Israele; chifukwa Iye anayang'ana, nachitira anthu ake chiombolo.

⁶⁹Ndipo Iye anatikwezera ife nyanga ya chipulumutso, mwa fuko la Davide mwana wake.

⁷⁰Monga Iye analankhula ndi m'kamwa mwa aneneri ake oyera mtima, akale lomwe,

⁷¹chipulumutso cha adani athu, ndi pa dzanja la anthu onse amene atida ife.

⁷²Kuchitira atate athu chifundo, ndi kukumbukira pangano lake lopatulika;

⁷³chilumbiro chimene Iye anachilumbira kwa Abrahamu atate wathu.

⁷⁴Kutipatsa ife kuti titalanditsidwa kudzanja la adani athu, tidzamtumikira Iye, opanda mantha,

⁷⁵m'chiyero ndi chilungamo pamaso pake, masiku athu onse.

⁷⁶Eya, ndipo iwetu kamwanawe, udzanenedwa mneneri wa Wamkulukulu; pakuti udzatsogolera Ambuye, kukonza njira zake.

⁷⁷Kuwapatsa anthu ake adziwitse chipulumutso, ndi makhululukidwe a machimo ao,

⁷⁸chifukwa cha mtima wachifundo wa Mulungu wathu. M'menemo mbandakucha wa kumwamba udzatichezera ife.

⁷⁹Kuwalitsira iwo okhala mumdima ndi mthunzi wa imfa; kulunjikitsa mapazi athu mu njira ya mtendere.

⁸⁰Ndipo mwanayo anakula, nalimbika mu mzimu wake, ndipo iye anali m'mapululu, kufikira masiku akudzionetsa yekha kwa Israele.