Read Chichewa Buku Lopatulika Bible 2014 DEUTERONOMO 14 Bible Online

DEUTERONOMO 14 - Chichewa Buku Lopatulika Bible 2014 bible

DEUTERONOMO 14

¹Inu ndinu ana a Yehova Mulungu wanu; musamadzicheka, kapena kumeta tsitsi pakati pa maso chifukwa cha akufa.

²Popeza ndinu mtundu wa anthu opatulikira Yehova Mulungu wanu, ndipo Yehova anakusankhani mukhale mtundu wa anthu wa pa wokha wa Iye yekha, mwa mitundu yonse ya anthu okhala pankhope pa dziko lapansi.

³Musamadya chonyansa chilichonse.

⁴Nyamazi muyenera kumadya ndi izi: ng'ombe, nkhosa, ndi mbuzi,

⁵ngondo, ndi nswala ndi mphoyo, ndi mphalapala, ndi ngoma, ndi nyumbu, ndi mbalale.

⁶Ndipo nyama iliyonse yogawanika chiboda, nikhala yogawanikadi chiboda, nibzikula, imeneyo muyenera kudya.

⁷Koma izi zokha simuyenera kuzidya mwa zobzikulazo, kapena zogawanika chiboda: ngamira, ndi kalulu, ndi mbira, popeza zibzikula, koma zosagawanika chiboda, muziyese zodetsa;

⁸ndi nkhumba, popeza igawanika chiboda koma yosabzikula, muiyese yodetsa; musamadya nyama yao, musamakhudza mitembo yao.

⁹Mwa zonse zili m'madzi muyenera kumadya izi: zilizonse zili nazo zipsepse ndi mamba, zimenezi muyenera kumadya;

¹⁰koma zilizonse zopanda zipsepse kapena mamba musamadya; muziyese zonyansa.

¹¹Mbalame zosadetsa zonse muyenera kumadya.

¹²Koma izi ndi zimene simuyenera kumadya: mphungu, ndi nkhwazi, ndi chikambi,

¹³ndi kamtema, ndi mphamba, ndi muimba monga mwa mtundu wake;

¹⁴ndi khungubwi aliyense monga mwa mtundu wake;

¹⁵ndi nthiwatiwa, ndi chipudo, ndi kakowa, ndi kabawi monga mwa mtundu wake;

¹⁶ndi nkhutukutu, ndi manchichi, ndi tsekwe;

¹⁷ndi vuwo, ndi dembo, ndi nswankhono;

¹⁸ndi indwa, ndi chimeza, monga mwa mtundu wake, ndi sadzu, ndi mleme.

¹⁹Ndipo zokwawa zonse zakuuluka muziyesa zonyansa; musamazidya.

²⁰Mbalame zonse zosadetsa muyenera kumadya.

²¹Musamadya chinthu chilichonse chitafa chokha; muzipereka icho kwa mlendo ali m'mudzi mwanu, achidye ndiye; kapena uchigulitse kwa mlendo; popeza ndinu mtundu wa anthu wopatulika wa Yehova Mulungu wanu. Musamaphika mwanawambuzi mu mkaka wa make.

²²Muzipereka ndithu limodzi la magawo khumi la zipatso zonse za mbeu zanu, zofuma kumunda, chaka ndi chaka.

²³Ndipo muzidye pamaso pa Yehova Mulungu wanu, m'malo m'mene asankhamo Iye, kukhalitsamo dzina lake; limodzi la magawo khumi la tirigu wanu, la vinyo wanu, ndi la mafuta anu, ndi oyamba kubadwa a ng'ombe zanu ndi a nkhosa ndi mbuzi zanu; kuti muphunzire kuopa Yehova Mulungu wanu masiku onse.

²⁴Ndipo ikakutalikirani njira kotero kuti simukhoza kulinyamula, popeza malo amene Yehova Mulungu wanu adzasankha, kuikapo dzina lake, akutanimphirani; atakudalitsani Yehova Mulungu wanu;

²⁵pamenepo mulisinthe ndalama, ndi kumanga ndalama ikhale m'dzanja mwanu, ndi kupita ku malo amene Yehova Mulungu wanu adzasankha;

²⁶ndipo mugule ndi ndalamazo chilichonse moyo wanu ukhumba, ng'ombe kapena nkhosa, kapena vinyo, kapena chakumwa cholimba, kapena chilichonse moyo wanu ukufunsani; nimudye pomwepo pamaso pa Yehova Mulungu wanu, ndi kukondwera, inu ndi a pabanja panu.

²⁷Koma Mlevi wokhala m'mudzi mwanu, musamamtaya, popeza alibe gawo kapena cholowa pamodzi ndi inu.

²⁸Pakutha pake pa zaka zitatu muzitulutsa magawo onse a magawo khumi a zipatso zanu za chaka icho, ndi kuwalinditsa m'mudzi mwanu;

²⁹ndipo abwere Mlevi, popeza alibe gawo kapena cholowa pamodzi ndi inu, ndi mlendo, ndi ana amasiye, ndi mkazi wamasiye, okhala m'mudzi mwanu, nadye nakhute; kuti Yehova Mulungu wanu akakudalitseni mu ntchito zonse za dzanja lanu muzichitazi.