Read Chichewa Buku Lopatulika Bible 2014 DEUTERONOMO 19 Bible Online

DEUTERONOMO 19 - Chichewa Buku Lopatulika Bible 2014 bible

DEUTERONOMO 19

¹Pamene Yehova Mulungu wanu ataononga amitundu, amene Yehova Mulungu wanu akupatsani dziko lao, ndipo mutalilandira lanulanu, ndi kukhala m'midzi mwao, ndi m'nyumba zao;

²pamenepo mudzipatulire midzi itatu pakati pa dziko lanu, limene Yehova Mulungu wanu akupatsani likhale lanulanu.

³Mudzikonzere njira, ndi kugawa malire a dziko lanu, limene Yehova Mulungu wanu akupatsani likhale lanulanu, patatu; kuti wakupha munthu athawireko.

⁴Ndipo mlandu wa munthu wakupha mnzake wakuthawirako nakhala ndi moyo ndiwo: wakupha mnzake osati dala, osamuda kale lonse;

⁵monga ngati munthu analowa kunkhalango ndi mnzake kutema mitengo, ndi dzanja lake liyendetsa nkhwangwa kutema mtengo, ndi nkhwangwa iguluka m'mpinimo, nikomana ndi mnzake, nafa nayo; athawire ku wina wa midzi iyi, kuti akhale ndi moyo;

⁶kuti wolipsa mwazi angalondole wakupha mnzake, pokhala mtima wake watentha, nampeza, popeza njira njaitali, namkantha kuti wafa; angakhale sanapalamule imfa, poona sanamude kale lonse.

⁷Chifukwa chake ndikuuzani ndi kuti, Mudzipatulire midzi itatu.

⁸Ndipo Yehova Mulungu wanu akakulitsa malire anu, monga analumbirira makolo anu, ndi kukupatsani dziko lonse limene ananena kwa makolo anu kuwapatsa ili;

⁹ukadzasunga lamulo ili lonse kulichita, limene ndikuuzani lero lino, kukonda Yehova Mulungu wanu, ndi kuyenda m'njira zake masiku onse; pamenepo mudzionjezere midzi itatu ina pamodzi ndi itatu iyi;

¹⁰kuti angakhetse mwazi wosachimwa pakati pa dziko lanu, limene Yehova Mulungu wanu akupatsani likhale cholowa chanu, pangakhale mwazi pa inu.

¹¹Koma munthu akamuda mnzake, namlalira, ndi kumuukira ndi kumkantha moyo wake, kuti wafa; nakathawira ku wina wa midzi iyi;

¹²pamenepo akulu a mudzi wake atumize ndi kumtengako ndi kumpereka m'manja mwa wolipsa mwazi, kuti afe.

¹³Diso lanu lisamchitire chifundo, koma muchotse mwazi wosachimwa m'Israele, kuti chikukomereni.

¹⁴Musamasendeza malire a mnansi wanu, amene adawaika iwo a kale lomwe, m'cholowa chanu mudzalandirachi, m'dziko limene Yehova Mulungu wanu akupatsani likhale lanulanu.

¹⁵Mboni imodzi isamaukira munthu pa mphulupulu iliyonse, kapena tchimo lililonse adalichimwa; pakamwa pa mboni ziwiri, kapena pakamwa pa mboni zitatu mlandu utsimikizike.

¹⁶Mboni yachiwawa ikaukira munthu kumneneza ndi kuti analakwa;

¹⁷pamenepo anthu onse awiri, pakati pao pali makaniwo, aziima pamaso pa Yehova, pamaso pa ansembe ndi oweruza okhala m'masiku awa;

¹⁸ndipo oweruza afunsitse bwino; ndipo taonani, mboniyo ikakhala mboni yonama, yomnamizira mbale wake;

¹⁹mumchitire monga iye anayesa kumchitira mbale wake; motero muchotse choipacho pakati panu.

²⁰Ndipo otsalawo adzamva, nadzaopa, ndi kusachitanso monga choipacho pakati panu.

²¹Ndipo diso lanu lisachite chifundo, moyo kulipa moyo, diso kulipa diso, dzino kulipa dzino, dzanja kulipa dzanja, phazi kulipa phazi.