Read Chichewa Buku Lopatulika Bible 2014 DEUTERONOMO 2 Bible Online

DEUTERONOMO 2 - Chichewa Buku Lopatulika Bible 2014 bible

DEUTERONOMO 2

¹Pamenepo tinabwerera, ndi kuyenda kunka kuchipululu, kutsata njira ya Nyanja Yofiira, monga Yehova adanena ndi ine; ndipo tinapaza phiri la Seiri masiku ambiri.

²Ndipo Yehova ananena ndi ine, ndi kuti,

³Yakwanira nthawi yakupaza inu phiri ili; tembenukani kunka kumpoto.

⁴Ndipo uuze anthu, ndi kuti, Mukapite kubzola malire a abale anu, ana a Esau okhala m'Seiri; ndipo adzakuopani; muchenjere ndithu;

⁵musalimbana nao; popeza sindikupatsakoni dziko lao, pangakhale popondapo phazi lanu ai; pakuti ndapatsa Esau phiri la Seiri likhale lakelake.

⁶Mugulane nao chakudya ndi ndalama, kuti mudye; mugulane naonso madzi kuti mumwe.

⁷Pakuti Yehova Mulungu wanu anakudalitsani mu ntchito zonse za manja anu; anadziwa kuyenda kwanu m'chipululu ichi chachikulu; zaka izi makumi anai Yehova Mulungu wanu anakhala ndi inu; simunasowa kanthu.

⁸Potero tinapitirira abale athu, ana a Esau okhala m'Seiri, njira ya chidikha, ku Elati ndi ku Eziyoni-Gebere. Pamenepo tinatembenuka ndi kudzera njira ya chipululu cha Mowabu.

⁹Ndipo Yehova anati kwa ine, Usavuta Mowabu, kapena kuutsana naye nkhondo; popeza sindidzakupatsako dziko lake likhale lakolako; pakuti ndinapatsa ana a Loti Ari likhale laolao.

¹⁰(Aemimu anakhalamo kale, ndiwo anthu akulu, ndi ambiri, ndi ataliatali, ngati Aanaki.

¹¹Anawayesa iwonso Arefaimu, monga Aanaki; koma Amowabu awatcha Aemimu.

¹²Ndipo Ahori anakhala m'Seiri kale, koma ana a Esau analanda dziko lao, nawaononga pamaso pao, nakhala m'malo mwao; monga Israele anachitira dziko lakelake, limene Yehova anampatsa).

¹³Ukani tsopano, olokani mtsinje wa Zeredi. Ndipo tinaoloka mtsinje wa Zeredi.

¹⁴Ndipo masiku amene tinayenda kuchokera ku Kadesi-Baranea, kufikira tidaoloka mtsinje wa Zeredi, ndiwo zaka makumi atatu mphambu zisanu ndi zitatu; kufikira utatha mbadwo wonse wa amuna ankhondo m'chigono, monga Yehova adawalumbirira.

¹⁵Komanso dzanja la Yehova linatsutsana nao, kuwaononga m'chigono, kufikira adawatha.

¹⁶Ndipo kunali, atatha kufa amuna onse ankhondo mwa anthu,

¹⁷Yehova ananena ndi ine, ndi kuti,

¹⁸Lero lomwe utumphe malire a Mowabu, ndiwo Ari.

¹⁹Ndipo pamene uyandikiza popenyana ndi ana a Amoni, usawavuta, kapena kuutsana nao; popeza sindidzakupatsako dziko la ana a Amoni likhale lakolako; popeza ndinapatsa ana a Loti ili likhale laolao.

²⁰(Ilinso aliyesa dziko la Arefaimu; Arefaimu anakhalamo kale; koma Aamoni awatcha Azamzumimu;

²¹ndiwo anthu akulu, ndi ambiri, ndi atalitali, monga Aanaki; koma Yehova anawaononga pamaso pao; ndipo analanda dziko lao, nakhala m'malo mwao;

²²monga Iye anachitira ana a Esau, akukhala m'Seiri, pamene anaononga Ahori pamaso pao; ndipo analanda dziko lao, nakhala m'malo mwao kufikira lero lomwe.

²³Kunena za Aavimu akukhala m'midzi kufikira ku Gaza, Akafitori, akufuma ku Kafitori, anawaononga, nakhala m'malo mwao).

²⁴Uka, yenda ulendo wako, ndi kuoloka mtsinje wa Arinoni; taonani, ndapereka Sihoni mfumu ya Hesiboni, Mwamori, ndi dziko lake m'dzanja lako; yamba kulilandira, ndi kuutsana naye nkhondo.

²⁵Tsiku lino ndiyamba kuopsetsa nawe ndi kuchititsa mantha nawe anthu a pansi pa thambo lonse, amene adzamva mbiri yako, nadzanjenjemera, nadzawawidwa chifukwa cha iwe.

²⁶Ndipo ndinatuma amithenga ochokera ku chipululu cha Kedemoti kwa Sihoni mfumu ya Hesiboni ndi mau a mtendere, ndi kuti,

²⁷Ndipitire m'dziko mwako; ndidzatsata mseu, osapatuka ine ku dzanja lamanja kapena kulamanzere,

²⁸Undigulitse chakudya ndi ndalama, kuti ndidye; ndi kundipatsa madzi kwa ndalama, kuti ndimwe; chokhachi ndipitire choyenda pansi;

²⁹monga anandichitira ana a Esau akukhala m'Seiri, ndi Amowabu akukhala m'Ari; kufikira nditaoloka Yordani kulowa dziko limene Yehova Mulungu wathu atipatsa.

³⁰Koma Sihoni mfumu ya Hesiboni sanatilole kupitira kwao; popeza Yehova Mulungu wanu anaumitsa mzimu wake, nalimbitsa mtima wake, kuti ampereke m'dzanja lanu, monga lero lino.

³¹Ndipo Yehova anati kwa ine, Taona, ndayamba kupereka Sihoni ndi dziko lake pamaso pako; yamba kulandira dziko lake likhale lakolako.

³²Pamenepo Sihoni anatuluka kukomana nafe, iye ndi anthu ake onse, kugwirana nafe nkhondo ku Yahazi.

³³Ndipo Yehova Mulungu wathu anampereka iye pamaso pathu; ndipo tinamkantha, iye ndi ana ake amuna ndi anthu ake onse.

³⁴Ndipo muja tinalanda midzi yake yonse; ndipo tinaononga konse midzi yonse, amuna ndi akazi ndi ana; sitinasiyapo ndi mmodzi yense.

³⁵Zoweta zokha tinadzifunkhira, pamodzi ndi zofunkha za midzi tidailanda.

³⁶Kuyambira ku Aroere, ndiko kumphepete kwa mtsinje wa Arinoni, ndi kumudzi wokhala kumtsinje kufikira ku Giliyadi, kunalibe mudzi wakutitalikira malinga ake; Yehova Mulungu wathu anapereka yonse pamaso pathu.

³⁷Ku dziko la ana a Amoni lokha simunayandikiza; dera lonse la mtsinje wa Yaboki, ndi midzi ya kumapiri, ndi kwina kulikonse Yehova Mulungu wathu anatiletsa.