Read Chichewa Buku Lopatulika Bible 2014 DEUTERONOMO 27 Bible Online

DEUTERONOMO 27 - Chichewa Buku Lopatulika Bible 2014 bible

DEUTERONOMO 27

¹Ndipo Mose ndi akulu a Israele anauza anthu, nati, Sungani malamulo onse ndikuuzani lero.

²Ndipo kudzali, tsiku lakuoloka inu Yordani kulowa dziko limene Yehova Mulungu wanu akupatsani, kuti mudziutsire miyala yaikulu, ndi kuimata ndi njeresa;

³ndipo mulemberepo mau onse a chilamulo ichi, mutaoloka; kuti mulowe m'dziko limene Yehova Mulungu wanu akupatsani, dziko moyenda mkaka ndi uchi ngati madzi, monga Yehova Mulungu wa makolo anu ananena ndi inu.

⁴Ndipo kudzali, mutaoloka Yordani, muutse miyala iyi ndikuuzani lero, m'phiri la Ebala, ndi kuimata ndi njeresa.

⁵Ndipo komweko mumangire Yehova Mulungu wanu guwa la nsembe, guwa la nsembe lamiyala; musakwezepo pangizo chachitsulo.

⁶Mumange guwa la nsembe la Yehova Mulungu wanu lamiyala yosasema; ndi kuperekapo nsembe zopsereza kwa Yehova Mulungu wanu;

⁷ndi kuphera nsembe zoyamika, ndi kudyapo, ndi kukondwera pamaso pa Yehova Mulungu wanu.

⁸Ndipo mulembere pa miyalayi mau onse a chilamulo ichi mopenyeka bwino.

⁹Ndipo Mose, ndi ansembe Alevi ananena ndi Israele wonse, ndi kuti, Khalani chete, imvanitu, Israele; lero lino mwasanduka mtundu wa anthu wa Yehova Mulungu wanu.

¹⁰Potero muzimvera mau a Yehova Mulungu wanu, ndi kuchita malamulo ake ndi malemba ake, amene ndikuuzani lero lino.

¹¹Ndipo Mose anauza anthu tsiku lomwelo, ndi kuti,

¹²Aimirire awa pa phiri la Gerizimu kudalitsa anthu, mutaoloka Yordani: Simeoni ndi Levi, ndi Yuda, ndi Isakara, ndi Yosefe, ndi Benjamini.

¹³Naimirire awa pa phiri la Ebala, kutemberera: Rubeni, Gadi, ndi Asere, ndi Zebuloni, Dani ndi Nafutali.

¹⁴Ndipo ayankhe Alevi ndi kunena kwa amuna onse a Israele, ndi mau omveka.

¹⁵Wotembereredwa munthu wakupanga fano losema kapena loyenga, lonyansidwa nalo Yehova, ntchito ya manja a mmisiri, ndi kuliika m'malo a m'tseri. Ndipo anthu onse ayankhe ndi kuti, Amen.

¹⁶Wotembereredwa iye wakupeputsa atate wake kapena mai wake. Ndi anthu onse anene, Amen.

¹⁷Wotembereredwa iye wakusendeza malire a mnansi wake. Ndi anthu onse anene, Amen.

¹⁸Wotembereredwa wakusokeretsa wakhungu m'njira. Ndi anthu onse anene, Amen.

¹⁹Wotembereredwa iye wakuipsa mlandu wa mlendo, mwana wamasiye, ndi mkazi wamasiye. Ndi anthu onse anene, Amen.

²⁰Wotembereredwa iye wakugona ndi mkazi wa atate wake; popeza wavula atate wake. Ndi anthu onse anene, Amen.

²¹Wotembereredwa iye wakugona ndi nyama iliyonse. Ndi anthu onse anene, Amen.

²²Wotembereredwa iye wakugona ndi mlongo wake, mwana wamkazi wa atate wake, kapena mwana wamkazi wa make. Ndi anthu onse anene, Amen.

²³Wotembereredwa iye wakugona ndi mpongozi wake. Ndi anthu onse anene, Amen.

²⁴Wotembereredwa iye wakukantha mnansi wake m'tseri. Ndi anthu onse anene, Amen.

²⁵Wotembereredwa iye wakulandira chamwazi chakuti akanthe munthu wosachimwa. Ndi anthu onse anene, Amen.

²⁶Wotembereredwa iye wosavomereza mau a chilamulo ichi kuwachita. Ndi anthu onse anene, Amen.