Read Chichewa Buku Lopatulika Bible 2014 DEUTERONOMO 6 Bible Online

DEUTERONOMO 6 - Chichewa Buku Lopatulika Bible 2014 bible

DEUTERONOMO 6

¹Ndipo awa ndi malamulo, malemba, ndi maweruzo, amene Yehova Mulungu wanu analamulira kukuphunzitsani, kuti muziwachita m'dziko limene muolokerako kulilandira;

²kuti muope Yehova Mulungu wanu, kusunga malemba ake onse ndi malamulo ake, amene ndikuuzani inu ndi ana anu, ndi zidzukulu zanu, masiku onse a moyo wanu, ndi kuti masiku anu achuluke.

³Potero imvani, Israele, musamalire kuwachita, kuti chikukomereni ndi kuti muchuluke chichulukire, monga Yehova Mulungu wa makolo anu anena ndi inu, m'dziko moyenda mkaka ndi uchi ngati madzi.

⁴Imvani, Israele; Yehova Mulungu wathu, Yehova ndiye mmodzi;

⁵ndipo muzikonda Yehova Mulungu wanu ndi mtima wanu wonse, ndi moyo wanu wonse, ndi mphamvu yanu yonse.

⁶Ndipo mau awa ndikuuzani lero, azikhala pamtima panu;

⁷ndipo muziwaphunzitsa mwachangu kwa ana anu, ndi kuwalankhula awa pokhala pansi m'nyumba zanu, ndi poyenda inu panjira, ndi pogona inu pansi, ndi pouka inu.

⁸Ndipo muziwamanga padzanja panu ngati chizindikiro, ndipo akhale ngati chapamphumi pakati pa maso anu.

⁹Ndipo muziwalembera pa mphuthu za nyumba zanu, ndi pa zipata zanu.

¹⁰Ndipo kudzakhala, Yehova Mulungu wanu atakulowetsani m'dziko limene analumbirira makolo anu, Abrahamu, Isaki, ndi Yakobo, kuti adzakupatsani ili; midzi yaikulu ndi yokoma, imene simunaimanga;

¹¹ndi nyumba zodzala nazo zokoma zilizonse, zimene simunazidzaza, ndi zitsime zosema, zimene simunazisema, minda yampesa, ndi minda ya azitona, zimene simunazioka, ndipo mutakadya ndi kukhuta;

¹²pamenepo mudzichenjere mungaiwale Yehova, amene anakutulutsani m'dziko la Ejipito, m'nyumba ya akapolo.

¹³Muziopa Yehova Mulungu wanu; ndi kutumikira Iyeyu; ndipo polumbira muzitchula dzina lake.

¹⁴Musamatsata milungu ina, milungu ina ya mitundu ya anthu akuzinga inu;

¹⁵pakuti Yehova Mulungu wanu ali pakati panu, ndiye Mulungu wansanje; kuti ungapse mtima wa Yehova Mulungu wanu, ndi kukuonongani, kukuchotsani pankhope pa dziko lapansi.

¹⁶Musamayesa Yehova Mulungu wanu, monga munamyesa m'Masa.

¹⁷Muzisunga mwachangu malamulo a Yehova Mulungu wanu, ndi mboni zake, ndi malemba ake, amene anakulamulirani.

¹⁸Ndipo muzichita zolunjika ndi zokoma pamaso pa Yehova; kuti chikukomereni, ndi kuti mulowe kukalandira dziko lokomali Yehova analumbirira makolo anu,

¹⁹kuingitsa adani anu onse pamaso panu, monga Yehova adanena.

²⁰Akakufunsani ana anu m'tsogolomo, ndi kuti, Mbonizo, ndi malemba, ndi maweruzo, zimene Yehova Mulungu wathu anakulamulirani, zitani?

²¹Pamenepo muzinena kwa ana anu, Tinali akapolo a Farao m'Ejipito; ndipo Yehova anatitulutsa m'Ejipito ndi dzanja lamphamvu.

²²Ndipo Yehova anapatsa zizindikiro ndi zozizwa zazikulu ndi zowawa m'Ejipito, pa Farao, ndi pa nyumba yake yonse, pamaso pathu;

²³ndipo anatitulutsa komweko, kuti atilowetse, kutipatsa dzikoli analumbirira makolo athu.

²⁴Ndipo Yehova anatilamulira tizichita malemba awa onse, kuopa Yehova Mulungu wathu, kuti tipindule nako masiku onse, kuti atisunge amoyo, monga lero lino.

²⁵Ndipo kudzakhala kwa ife chilungamo, ngati tisamalira kuchita malamulo awa onse pamaso pa Yehova Mulungu wathu, monga anatilamulira ife.