Read Chichewa Buku Lopatulika Bible 2014 1 AKORINTO 16 Bible Online

1 AKORINTO 16 - Chichewa Buku Lopatulika Bible 2014 bible

1 AKORINTO 16

¹Koma za chopereka cha kwa oyera mtima, monga ndinalangiza Mipingo ya ku Galatiya, motero chitani inunso.

²Tsiku loyamba la sabata yense wa inu asunge yekha, monga momwe anapindula, kuti zopereka zisachitike pakudza ine.

³Ndipo pamene ndifika, ndidzatuma iwo amene mudzawayesa oyenera, ndi akalata, apite nayo mphatso yanu ku Yerusalemu.

⁴Ndipo ngati kuyenera kwa ine kupitanso, adzapita nane.

⁵Koma ndidzadza kwa inu, nditapyola Masedoniya; pakuti ndidzapyola Masedoniya;

⁶ndipo kapena ndidzakhalitsa ndi inu, kapenanso kugonera nyengo yachisanu kuti mukandiperekeze ine kumene kulikonse ndipitako.

⁷Pakuti sindifuna kukuonani tsopano popitirira; pakuti ndiyembekeza kukhala ndi inu nthawi, ngati alola Ambuye.

⁸Koma ndidzakhala ku Efeso kufikira Pentekoste.

⁹Pakuti panditsegukira pa khomo lalikulu ndi lochititsa, ndipo oletsana nafe ndi ambiri.

¹⁰Koma akadza Timoteo, penyani kuti akhale ndi inu wopanda mantha; pakuti agwira ntchito ya Ambuye, monganso ine;

¹¹chifukwa chake munthu asampeputse. Koma mumperekeze mumtendere, kuti akadze kwa ine; pakuti ndimuyembekezera pamodzi ndi abale.

¹²Koma za Apolo, mbaleyo, ndamuumiriza iye, adze kwa inu pamodzi ndi abale; ndipo sichinali chifuniro chake kuti adze tsopano, koma adzafika pamene aona nthawi.

¹³Dikirani, chilimikani m'chikhulupiriro, dzikhalitseni amuna, limbikani.

¹⁴Zanu zonse zichitike m'chikondi.

¹⁵Koma ndikupemphani inu, abale, (mudziwa banja la Stefanasi, kuti ali chipatso choundukula cha Akaya, ndi kuti anadziika okha kutumikira oyera mtima),

¹⁶kuti inunso muvomere otere, ndi yense wakuchita nao, ndi kugwiritsa ntchito.

¹⁷Koma ndikondwera pa kudza kwao kwa Stefanasi, ndi Fortunato, ndi Akaiko; chifukwa iwo anandikwaniritsa chotsalira chanu.

¹⁸Pakuti anatsitsimutsa mzimu wanga ndi wanu; chifukwa chake muzindikire otere.

¹⁹Mipingo ya ku Asiya ikupatsani moni. Akupatsani moni ndithu inu mwa Ambuye, Akwila ndi Prisika, pamodzi ndi Mpingo wa m'nyumba yao.

²⁰Akupatsani moni abale onse. Mupatsane moni ndi kupsompsona kopatulika.

²¹Ndikupereka moni ine Paulo ndi dzanja langa.

²²Ngati wina sakonda Ambuye, akhale wotembereredwa. Akudza Ambuye.

²³Chisomo cha Ambuye Yesu Khristu chikhale ndi inu.

²⁴Chikondi changa chikhale ndi inu nonse mwa Khristu Yesu. Amen.