Read Chichewa Buku Lopatulika Bible 2014 AGALATIYA 5 Bible Online

AGALATIYA 5 - Chichewa Buku Lopatulika Bible 2014 bible

AGALATIYA 5

¹ Khristu anatisandutsa mfulu, kuti tikhale mfulu; chifukwa chake chilimikani, musakodwenso ndi goli la ukapolo.

²Taonani, ine Paulo ndinena ndi inu, kuti, ngati mulola akuduleni, Khristu simudzapindula naye kanthu.

³Ndichitanso umboni kwa munthu yense wolola amdule, kuti ali wamangawa kuchita chilamulo chonse.

⁴Mulibe kanthu ndi Khristu, inu amene muyesedwa olungama ndi lamulo; mudagwa posiyana nacho chisomo.

⁵Pakuti ife mwa Mzimu, kuchokera m'chikhulupiriro, tilindira chiyembekezo cha chilungamo.

⁶Pakuti mwa Khristu Yesu kapena mdulidwe kapena kusadulidwa kulibe mphamvu; komatu chikhulupiriro, chakuchititsa mwa chikondi.

⁷Munathamanga bwino; anakuletsani ndani kuti musamvere choonadi?

⁸Kukopa kumene sikuchokera kwa Iye anakuitanani.

⁹Chotupitsa pang'ono chitupitsa mtanda wonse.

¹⁰Ine ndikhulupirira inu mwa Ambuye, kuti simudzakhala nao mtima wina; koma iye wakuvuta inu, angakhale ali yani, adzasenza chitsutso chake.

¹¹Koma ine, abale, ngati ndilalikiranso mdulidwe, ndizunzikanso bwanji? Pamenepo chikhumudwitso cha mtanda chidatha.

¹²Mwenzi atadzidula, iwo akugwedezetsani inu.

¹³Pakuti adakuitanani inu, abale, mukhale mfulu; chokhacho musachite nao ufulu wanu chothandizira thupi, komatu mwachikondi chitiranani ukapolo.

¹⁴Pakuti mau amodzi akwaniritsa chilamulo chonse ndiwo; Uzikonda mnzako monga udzikonda iwe mwini.

¹⁵Koma ngati mulumana ndi kudyana, chenjerani mungaonongane.

¹⁶Koma ndinena, Muyendeyende ndi Mzimu, ndipo musafitse chilakolako cha thupi.

¹⁷Pakuti thupi lilakalaka potsutsana naye Mzimu, ndi Mzimu potsutsana nalo thupi; pakuti izi sizilingana; kuti zimene muzifuna musazichite.

¹⁸Ngati Mzimu akutsogolerani, simuli omvera lamulo.

¹⁹Ndipo ntchito za thupi zionekera, ndizo dama, chodetsa, kukhumba zonyansa,

²⁰kupembedza mafano, nyanga, madano, ndeu, kaduka, zopsa mtima, zotetana, magawano, mipatuko,

²¹njiru, kuledzera, mchezo, ndi zina zotere; zimene ndikuchenjezani nazo, monga ndachita, kuti iwo akuchitachita zotere sadzalowa Ufumu wa Mulungu.

²²Koma chipatso cha Mzimu ndicho chikondi, chimwemwe, mtendere, kuleza mtima, chifundo, kukoma mtima, chikhulupiriro,

²³chifatso, chiletso; pokana zimenezi palibe lamulo.

²⁴Koma iwo a Khristu Yesu adapachika thupi, ndi zokhumba zake, ndi zilakolako zake.

²⁵Ngati tili ndi moyo ndi Mzimu, ndi Mzimunso tiyende.

²⁶Tisakhale odzikuza, outsana, akuchitirana njiru.