Read Chichewa Buku Lopatulika Bible 2014 AEFESO 5 Bible Online

AEFESO 5 - Chichewa Buku Lopatulika Bible 2014 bible

AEFESO 5

¹Chifukwa chake khalani akutsanza a Mulungu, monga ana okondedwa;

²ndipo yendani m'chikondi monganso Khristu anakukondani inu, nadzipereka yekha m'malo mwathu, chopereka ndi nsembe kwa Mulungu, ikhale fungo lonunkhira bwino.

³Koma dama ndi chidetso chonse, kapena chisiriro, zisatchulidwe ndi kutchulidwa komwe mwa inu, monga kuyenera oyera mtima;

⁴kapena chinyanso, ndi kulankhula zopanda pake, kapena zopusa zimene siziyenera; koma makamaka chiyamiko.

⁵Pakuti ichi muchidziwe kuti wadama yense, kapena wachidetso, kapena wosirira, amene apembedza mafano, alibe cholowa m'ufumu wa Khristu ndi Mulungu.

⁶Asakunyengeni inu munthu ndi mau opanda pake, pakuti chifukwa cha izi umadza mkwiyo wa Mulungu pa ana a kusamvera.

⁷Chifukwa chake musakhale olandirana nao;

⁸pakuti kale munali mdima, koma tsopano muli kuunika mwa Ambuye; yendani monga ana a kuunika,

⁹pakuti chipatso cha kuunika tichipeza m'ubwino wonse, ndi chilungamo, ndi choonadi,

¹⁰kuyesera chokondweretsa Ambuye nchiyani;

¹¹ndipo musayanjane nazo ntchito za mdima zosabala kanthu, koma makamakanso muzitsutse;

¹²pakuti zochitidwa nao m'tseri, kungakhale kuzinena kuchititsa manyazi.

¹³Koma zinthu zonse potsutsika ndi kuunika, zionekera; pakuti chonse chakuonetsa chili kuunika.

¹⁴Mwa ichi anena, Khala maso wogona iwe, nuuke kwa akufa, ndipo Khristu adzawala pa iwe.

¹⁵Potero, penyani bwino umo muyendera, si monga opanda nzeru, koma monga anzeru;

¹⁶akuchita machawi, popeza masiku ali oipa.

¹⁷Chifukwa chake musakhale opusa, koma dziwitsani chifuniro cha Ambuye nchiyani.

¹⁸Ndipo musaledzere naye vinyo, m'mene muli chitayiko; komatu mudzale naye Mzimu,

¹⁹ndi kudzilankhulira nokha ndi masalmo, ndi mayamiko, ndi nyimbo zauzimu, kuimbira ndi kuimba m'malimba Ambuye mumtima mwanu;

²⁰ndi kuyamika Mulungu Atate masiku onse, chifukwa cha zonse, m'dzina la Ambuye wathu Yesu Khristu;

²¹ndi kumverana wina ndi mnzake m'kuopa Khristu.

²²Akazi inu, mverani amuna anu a inu eni, monga kumvera Ambuye.

²³Pakuti mwamuna ndiye mutu wa mkazi, monganso Khristu ndiye mutu wa Mpingo, ali yekha Mpulumutsi wa thupilo.

²⁴Komatu monga Mpingo amvera Khristu, koteronso akazi amvere amuna ao m'zinthu zonse.

²⁵Amuna inu, kondani akazi anu, monganso Khristu anakonda Mpingo, nadzipereka yekha m'malo mwake;

²⁶kuti akampatule, atamyeretsa ndi kumsambitsa madzi ndi mau;

²⁷kuti Iye akadziikire yekha Mpingo wa ulemerero, wopanda banga, kapena khwinya, kapena kanthu kotere; komatu kuti akhale woyera, ndi wopanda chilema.

²⁸Koteronso amuna azikonda akazi ao a iwo okha monga ngati matupi a iwo okha. Wokonda mkazi wa iye yekha, adzikonda yekha;

²⁹pakuti munthu sanadana nalo thupi lake ndi kale lonse; komatu alilera nalisunga, monganso Khristu Mpingo;

³⁰pakuti tili ziwalo za thupi lake.

³¹Chifukwa cha ichi munthu azisiya atate ndi amai, nadzaphatikizana ndi mkazi wake; ndipo iwo awiri adzakhala thupi limodzi.

³²Chinsinsi ichi nchachikulu; koma ndinena ine za Khristu ndi Mpingo.

³³Komanso inu, yense pa yekha, yense akonde mkazi wake wa iye yekha, monga adzikonda yekha; ndipo mkaziyo akumbukire kuti aziopa mwamuna.