Read Chichewa Buku Lopatulika Bible 2014 YOSWA 13 Bible Online

YOSWA 13 - Chichewa Buku Lopatulika Bible 2014 bible

YOSWA 13

¹Ndipo Yoswa anakalamba, wa zaka zambiri; ndipo Yehova ananena naye, Wakalamba, wa zaka zambiri, ndipo latsala dziko lalikulukulu, alilandire cholowa chao.

²Dziko lotsala ndilo: malire onse a Afilisti, ndi Agesuri onse,

³kuyambira Sihori wokhala chakuno cha Ejipito mpaka malire a Ekeroni kumpoto, loyesedwa la Akanani; akalonga asanu a Afilisti, a ku Gaza, ndi a ku Asidodi, a ku Asikeloni, a ku Gati, ndi a ku Ekiro, ndi Avimu;

⁴kumwera dziko lonse la Akanani, ndi Meara ndiwo wa Asidoni, mpaka ku Afeki, mpaka ku malire a Aamori;

⁵ndi dziko la Agebala, ndi Lebanoni, lonse kum'mawa, kuyambira Baala-Gadi pa tsinde la phiri la Heremoni, mpaka polowera pake pa Hamati;

⁶nzika zonse za kumapiri kuyambira Lebanoni, mpaka Misirefoti-Maimu, Asidoni onse; ndidzawainga pamaso pa ana a Israele, koma limeneli uwagawire Aisraele, likhale cholowa chao, monga ndinakulamulira.

⁷Ndipo tsopano uwagawire mafuko asanu ndi anai, ndi fuko la Manase logawika pakati, dziko ili likhale cholowa chao.

⁸Pamodzi ndi iye Arubeni ndi Agadi analandira cholowa chao, chimene Mose adawapatsa tsidya ilo la Yordani kum'mawa, monga Mose mtumiki wa Yehova anawapatsa;

⁹kuyambira pa Aroere, wokhala m'mphepete mwa chigwa cha Arinoni, ndi mudzi uli pakati pa chigwa, ndi chidikha chonse cha Medeba mpaka ku Diboni;

¹⁰ndi midzi yonse ya Sihoni mfumu ya Aamori, wakuchita ufumu m'Hesiboni, mpaka malire a ana a Amoni;

¹¹ndi Giliyadi, ndi malire a Agesuri, ndi Amaakati, ndi phiri lonse la Heremoni, ndi Basani lonse mpaka ku Saleka;

¹²ufumu wonse wa Ogi m'Basani, wa kuchita ufumu m'Asitaroti, ndi m'Ederei (yemweyo anatsala pa otsala a Arefaimu); pakuti Mose anakantha awa, nawainga.

¹³Koma ana a Israele sanainge Agesuri kapena Amaakati; koma Gesuri, ndi Maakati amakhala pakati pa Israele, mpaka lero lino.

¹⁴Koma fuko la Levi sanalipatse cholowa; nsembe za Yehova Mulungu wa Israele, zochitika ndi moto, ndizo cholowa chake, monga Iye adanena naye.

¹⁵Ndipo Mose anapatsira fuko la ana a Rubeni monga mwa mabanja ao.

¹⁶Malire ao anayambira ku Aroere wokhala m'mphepete mwa chigwa cha Arinoni, ndi mudzi uli pakati pa chigwa ndi chidikha chonse cha ku Medeba;

¹⁷Hesiboni ndi midzi yake yonse yokhala pachidikha; Diboni, ndi Bamoti-Baala ndi Bete-Baala-Meoni;

¹⁸ndi Yahazi ndi Kedemoti, ndi Mefaati;

¹⁹ndi Kiriyataimu, ndi Sibima, ndi Zeretisahara, m'phiri la kuchigwa;

²⁰ndi Betepeori, ndi matsikiro a Pisiga, ndi Beteyesimoti;

²¹ndi midzi yonse ya kuchidikha, ndi ufumu wonse wa Sihoni mfumu ya Aamori, wochita ufumu m'Hesiboni, amene Mose anamkantha pamodzi ndi akalonga a Midiyani, Evi, ndi Rekemu, ndi Zuri, ndi Huri ndi Reba, akalonga a Sihoni, nzika za m'dziko.

²²Ana a Israele anaphanso ndi lupanga Balamu mwana wa Beori, mlauli uja, pamodzi ndi ena adawaphawo.

²³Ndipo malire a ana a Rubeni ndiwo Yordani ndi malire ake. Ndicho cholandira cha ana a Rubeni monga mwa mabanja ao, midzi yake ndi milaga yake.

²⁴Ndipo Mose anapatsira fuko la Gadi, ana a Gadi, monga mwa mabanja ao.

²⁵Ndipo malire ao ndiwo Yazere, ndi midzi yonse ya Giliyadi, ndi dziko la ana a Amoni logawika pakati, mpaka ku Aroere, wokhala chakuno cha Raba;

²⁶ndi kuyambira Hesiboni mpaka Ramati-Mizipe, ndi Betonimu; ndi kuyambira Mahanaimu mpaka malire a Debiri;

²⁷ndipo m'chigwa Beteharamu, ndi Betenimura, ndi Sukoti, ndi Zafoni, chotsala cha ufumu wa Sihoni mfumu ya Hesiboni, Yordani ndi malire ake, mpaka malekezero a nyanja ya Kinereti, tsidya lija la Yordani kum'mawa.

²⁸Ichi ndi cholowa cha ana a Gadi, monga mwa mabanja ao, midzi yake ndi milaga yake.

²⁹Mose anaperekanso cholowa kwa fuko la Manase logawika pakati, ndicho cha fuko la Manase logawika pakati monga mwa mabanja ao.

³⁰Ndipo malire ao anayambira ku Mahanaimu, Basani lonse, ufumu wonse wa Ogi mfumu ya ku Basani, ndi midzi yonse ya Yairi, yokhala m'Basani, midzi makumi asanu ndi limodzi;

³¹ndi Giliyadi logawika pakati, ndi Asitaroti ndi Ederei, midzi ya ufumu wa Ogi m'Basani, inali ya ana a Makiri mwana wa Manase, ndiwo ana a Makiri ogawika pakati, monga mwa mabanja ao.

³²Izi ndi zolowazi Mose anazigawira m'zidikha za Mowabu, tsidya ilo la Yordani ku Yeriko, kum'mawa.

³³Koma fuko la Levi, Mose analibe kulipatsa cholowa: Yehova Mulungu wa Israele, ndiye cholowa chao, monga ananena nao.