Read Chichewa Buku Lopatulika Bible 2014 1 TIMOTEO 5 Bible Online

1 TIMOTEO 5 - Chichewa Buku Lopatulika Bible 2014 bible

1 TIMOTEO 5

¹Mkulu usamdzudzule, komatu umdandaulire ngati atate; anyamata ngati abale;

²akazi akulu ngati amai; akazi aang'ono ngati alongo, m'kuyera mtima konse.

³Chitira ulemu amasiye amene ali amasiye ndithu.

⁴Koma ngati wamasiye wina ali nao ana kapena adzukulu, ayambe aphunzire iwo kuchitira ulemu a m'banja lao, ndi kubwezera akuwabala; pakuti ichi ncholandirika pamaso pa Mulungu.

⁵Koma iye amene ali wamasiye ndithu, nasiyidwa yekha, ayembekezera Mulungu, nakhalabe m'mapembedzo ndi mapemphero usiku ndi usana.

⁶Koma iye wakutsata zomkondweretsa, adafa pokhala ali ndi moyo.

⁷Ndipo izi ulamulire, kuti akhale opanda chilema.

⁸Koma ngati wina sadzisungiratu mbumba yake ya iye yekha, makamaka iwo a m'banja lake, wakana chikhulupiriro iye, ndipo aipa koposa wosakhulupirira.

⁹Asawerengedwe wamasiye ngati sanafikire zaka makumi asanu ndi limodzi, atakhala mkazi wa mwamuna mmodzi,

¹⁰wa mbiri ya ntchito zabwino; ngati walera ana, ngati wachereza alendo, ngati adasambitsa mapazi a oyera mtima, ngati wathandiza osautsidwa, ngati anatsatadi ntchito zonse zabwino.

¹¹Koma amasiye ang'ono uwakane; pakuti pamene ayamba kumchitira Khristu chipongwe afuna kukwatiwa;

¹²pokhala nacho chitsutso, popeza adataya chikhulupiriro chao choyamba.

¹³Ndipo aphunziraponso kuchita ulesi, aderuderu; koma osati ulesi wokha, komatunso alankhula zopanda pake, nachita mwina ndi mwina, olankhula zosayenera.

¹⁴Chifukwa chake nditi akwatiwe amasiye ang'ono, nabale ana, naweruzire nyumba, osapatsa chifukwa kwa mdaniyo chakulalatira;

¹⁵pakuti adayamba ena kupatuka ndi kutsata Satana.

¹⁶Ngati mkazi wina wokhulupirira ali nao amasiye, iye awathandize, ndipo Mpingowo usalemedwe; kuti uthandize iwo amene ali amasiye ndithu.

¹⁷Akulu akuweruza bwino ayesedwe oyenera ulemu wowirikiza, makamaka iwo akuchititsa m'mau ndi m'chiphunzitso.

¹⁸Pakuti malembo ati, Usapunamiza ng'ombe yopuntha tirigu. Ndipo Wogwira ntchito ayenera kulipira kwake.

¹⁹Pa mkulu usalandire chomnenera, koma pakhale mboni ziwiri kapena zitatu.

²⁰Iwo akuchimwa uwadzudzule pamaso pa onse, kuti otsalawo achite mantha.

²¹Ndikuchitira umboni pamaso pa Mulungu, ndi Khristu Yesu, ndi angelo osankhika, kuti usunge izi kopanda kusankhiratu, wosachita kanthu monga mwa tsankho.

²²Usafulumira kuika manja pa munthu aliyense, kapena usayanjana nazo zoipa za eni; udzisunge wekha woyera mtima.

²³Usakhalenso wakumwa madzi okha, komatu uchite naye vinyo pang'ono, chifukwa cha mimba yako ndi zofooka zako zobwera kawirikawiri.

²⁴Zochimwa za anthu ena zili zooneka kale, zitsogola kunka kumlandu; koma enanso ziwatsata.

²⁵Momwemonso pali ntchito zokoma zinaonekera kale; ndipo zina zosati zotere sizikhoza kubisika.