Read Chichewa Buku Lopatulika Bible 2014 TITO 2 Bible Online

TITO 2 - Chichewa Buku Lopatulika Bible 2014 bible

TITO 2

¹Koma iwe, lankhula zimene ziyenera chiphunzitso cholamitsa:

²okalamba akhale odzisunga, olemekezeka, odziletsa, olama m'chikhulupiriro, m'chikondi, m'chipiriro.

³Momwemonso akazi okalamba akhale nao makhalidwe oyenera anthu oyera, osadierekeza, osakodwa nacho chikondi cha pavinyo, akuphunzitsa zokoma;

⁴kuti akalangize akazi aang'ono akonde amuna ao, akonde ana ao,

⁵akhale odziletsa, odekha, ochita m'nyumba mwao, okoma, akumvera amuna a iwo okha, kuti mau a Mulungu angachitidwe mwano.

⁶Momwemonso anyamata uwadandaulire akhale odziletsa;

⁷m'zonse udzionetsere wekha chitsanzo cha ntchito zabwino; m'chiphunzitso chako uonetsere chosavunda, ulemekezeko,

⁸mau olama osatsutsika; kuti iye wakutsutsana achite manyazi, posakhala nako kanthu koipa kakutinenera ife.

⁹Akapolo amvere ambuye ao a iwo okha, nawakondweretse m'zonse; osakana mau ao;

¹⁰osatapa pa zao, komatu aonetsere chikhulupiriko chonse chabwino; kuti akakometsere chiphunzitso cha Mpulumutsi wathu Mulungu m'zinthu zonse.

¹¹Pakuti chaonekera chisomo cha Mulungu chakupulumutsa anthu onse,

¹²ndi kutiphunzitsa ife kuti, pokana chisapembedzo ndi zilakolako za dziko lapansi, tikhale ndi moyo m'dziko lino odziletsa, ndi olungama, ndi opembedza;

¹³akulindira chiyembekezo chodala, ndi maonekedwe a ulemerero wa Mulungu wamkulu ndi Mpulumutsi wathu Yesu Khristu;

¹⁴amene anadzipereka yekha m'malo mwa ife, kuti akatiombole ife kuzoipa zonse, nakadziyeretsere yekha anthu akhale ake enieni, achangu pa ntchito zokoma.

¹⁵Izi lankhula, ndipo uchenjeze, nudzudzule ndi ulamuliro wonse. Munthu asakupeputse.