Read Chichewa Buku Lopatulika Bible 2014 3 YOHANE 1 Bible Online

3 YOHANE 1 - Chichewa Buku Lopatulika Bible 2014 bible

3 YOHANE 1

¹Mkuluyo kwa Gayo wokondedwayo, amene ndikondana naye m'choonadi.

²Wokondedwa, ndipemphera kuti pa zonse ulemere, nukhale bwino, monga mzimu wako ulemera.

³Pakuti ndinakondwera kwakukulu, pofika abale ndi kuchita umboni za choonadi chako, monga umayenda m'choonadi.

⁴Ndilibe chimwemwe choposa ichi, chakuti ndimva za ana anga kuti alikuyenda m'choonadi.

⁵Wokondedwa, uchita chokhulupirika nacho chilichonse, uwachitira abale ndi alendo omwe;

⁶amene anachita umboni za chikondi chako pamaso pa Mpingo; ngati uwaperekeza amenewo pa ulendo wao koyenera Mulungu, udzachita bwino:

⁷pakuti chifukwa cha dzinali anatuluka, osalandira kanthu kwa amitundu.

⁸Chifukwa chake ife tiyenera kulandira otere, kuti tikakhale othandizana nacho choonadi.

⁹Ndalemba kanthu kwa Mpingo; komatu Diotrefe uja, wofuna kukhala wamkulu wa iwo, satilandira ife.

¹⁰Momwemo, ndikadza ine, ndidzakumbutsa ntchito zake zimene achitazi, zakunena zopanda pake pa ife ndi mau oipa; ndipo popeza izi sizimkwanira, salandira abale iye yekha, ndipo ofuna kuwalandira awaletsa, nawataya kunja powatulutsa mu Mpingo.

¹¹Wokondedwa, usatsanza chili choipa komatu chimene chili chokoma. Iye wakuchita chokoma achokera kwa Mulungu; iye wakuchita choipa sanamuona Mulungu.

¹²Demetrio, adamchitira umboni anthu onse, ndi choonadi chomwe; ndipo ifenso tichita umboni; ndipo udziwa kuti umboni wathu uli woona.

¹³Ndinali nazo zambiri za kukulembera, komatu sindifuna kukulembera ndi kapezi ndi peni;

¹⁴koma ndiyembekeza kukuona iwe msanga, ndipo tidzalankhula popenyana.

¹⁵Mtendere ukhale nawe. Akupereka moni abwenzi. Upereke moni kwa abwenzi ndi kutchula maina ao.