Read Chichicapan Zapotec San Mateo 16 Bible Online

San Mateo 16 - Chichicapan Zapotec bible

San Mateo 16

¹Bwiinn fariseu raꞌ cun saduceu raꞌ gwabiiga raꞌ ba hasta zuu Jesuhs, laasii xclaaꞌdzi raꞌ ba guunn raꞌ ba prehba laꞌh Ñiꞌh gu zahca guunn Ñiꞌh tuhbi sehn nin guinaaba raꞌ ba, ziga tuhbi sehn nin dxiinloh nez dxibaaꞌ,

²ya chiꞌchi rahbi Jesuhs loh raꞌ ba: ―Gudxyih nin rwaꞌha tu rahca naxñaa llaaꞌndxibaaꞌ chiꞌchi rahbi tu: “Bayinnahsihn ayi dxiaaba ñihsadxiah guillii laasii naxñaa dxibaaꞌ”,

³ya ziga chin rwaꞌha tu naxñaa rñah rsiiyi chiꞌchi rahbi tu: “Nadxyih ziaaba ñihsadxiah, laasii neezaa nuu raꞌ xcahyi llaaꞌndxibaaꞌ.” Pwihsi sidela laꞌh tu chaꞌyi tu rahcabwaꞌ tu sehn raꞌ nin rwaꞌha tu llaaꞌndxibaaꞌ, ¿xixnaa chiꞌh sehn xteenn raꞌ dxyih riiꞌ ayi rahcabwaꞌ tu?

⁴Nee ¿xixnaa ayi nnaa tu guunn tu nin xclaaꞌdzi Dxiohs gaca sino que nin xclaaꞌdzi si tu nee nnah canaaba tu tuhbi sehn? Per ayi guniꞌhihn sehn chi laꞌh tu. Sola sehn xteenn guehtu Jonahs guniꞌhihn. Ya chin guyaꞌloh niꞌchi cun basiaꞌhan Ñiꞌh laꞌh si raꞌ ba, ya zee chiꞌh Ñiꞌh stuhbi nehza. Xcweenta xlevaduhra raꞌ bwiinn fariseu (Mr. 8.14‑21)

⁵Ya chin gudiiꞌdxicaa raꞌ xpwiinn Ñiꞌh stuhbi lahdu rwaaꞌ laguhn biaꞌldastoꞌ raꞌ ba ñahnee raꞌ ba pahn nin ñahw raꞌ ba nez chi,

⁶chiꞌchi rahbi Jesuhs loh raꞌ ba: ―Gulguiaꞌha dziꞌtsi, nee gulgahca nasiin tin ayi gariaꞌcaa tu ziga naa xlevaduhra raꞌ bwiinn fariseu cun bwiinn saduceu raꞌ.

⁷Chiꞌchi guzoꞌbaloh raꞌ ba cayuhnn raꞌ ba lligaaba: ―Dee guñiꞌ Jesuhs loh nuꞌh laasii ayi chyu nuꞌa pahn.

⁸Ya chin guhcabwaꞌ Jesuhs cuun lligaaba nin nuu raꞌ ba chiꞌchi rahbi Ñiꞌh loh raꞌ ba: ―¡Lliꞌballaa gulliaaꞌha riachiistoꞌ tu xchiꞌdxyi Dxiohs!

⁹¿Tayi rahcabwaꞌtiiꞌ tu, nee ta nin ayi za riagannahstoꞌ tu xcweenta gagaꞌyu pahn nin gudxiꞌziꞌhn loh gaꞌyu mihyi raꞌ bwiinn, ya paaldaa tipi guhca nin biaꞌhancah?

¹⁰Nee ¿ta nin gagaadzii pahn nin gudxiꞌziꞌhn loh tahpa mihyi raꞌ bwiinn ayi riagannastoꞌ tu, ta nin paaldaa tipi nin biaꞌhancah ayi riagannastoꞌ tu?

¹¹¿Xixnaa chiꞌh ayi rahcabwaꞌ tu dxyiꞌdxyi nin cañiꞌn ayi naan pur pahn? Nin rñiꞌn loh tu naa gulgahca nasiin tin ayi gariaꞌcaa tu ziga naa xlevaduhra raꞌ bwiinn fariseu cun saduceu raꞌ.

¹²Chiꞌchi guhcabwaꞌ raꞌ ba ayi levaduhra pahn dxiꞌh bazeꞌta Jesuhs sino que ziga naa dxyiꞌdxyi raꞌ nin ruluuꞌyi raꞌ bwiinn fariseu raꞌ cun saduceu raꞌ. Guñiꞌ Pehdru Jesuhs naa Crixtu (Mr. 8.27‑30; Lc. 9.18‑21)

¹³Ya chin badzihn Jesuhs loh guihdxyi Cesarea xteenn Filipu, gunaabadxyiꞌdxyi Jesuhs loh raꞌ xpwiinn Ñiꞌh rahbi Ñiꞌh: ―¿Chyu niꞌca rahbi raꞌ bwiinn naahn?

¹⁴Ya chiꞌchi rahbi raꞌ ba loh Ñiꞌh: ―Nuu raꞌ bwiinn rahbi raꞌ ba yiꞌh naa luꞌh Jwahn nin ruroꞌbañihsa, ya snuhn raꞌ ba rahbi Elías naa luꞌh, ya snuhn raꞌ ba rahbi naa luꞌh Jeremías o chyuulla stuhbi raꞌ guehtu daada raꞌ nin guñiꞌ xchiꞌdxyi Dxiohs.

¹⁵Chiꞌchi rahbi Ñiꞌh: ―Ya laꞌh xchiꞌh tu, ¿xi nnaa tu chyu naꞌh?

¹⁶Chiꞌchi rahbi Simohn Pehdru loh Ñiꞌh: ―Yiꞌh naa luꞌh Crixtu Lliiꞌn Dxiohs nin nuu nabahan dziꞌtsi llaaꞌndxibaaꞌ.

¹⁷Ya chiꞌchi rahbi Jesuhs loh Pehdru: ―Dichohsa luꞌh, Simohn lliiꞌn Jonahs, laasii ayi guhca bwiinn zi nin basiaꞌñih loh xigaaba luꞌh cuun ziga guñiꞌ luꞌh, sino que naan Xtaaꞌdahn nin nuu dxibaaꞌ.

¹⁸Ya naꞌh rñiꞌn Pehdru laa luꞌh, (ziga laa “Dxiah biꞌtiꞌhn”), per yihca dxiah rooꞌ riiꞌ gunnchaꞌyiꞌhn xquidoꞌn nin naa ziga xpwiinn raꞌn, ya nin guelrnabwaꞌ xteenn gabihldxyi ayi guunn gahn gutsihyi laꞌhan,

¹⁹ya zuniꞌhihn guelrnabwaꞌ yiꞌh tin guluuꞌyi luꞌh laꞌh raꞌ bwiinn nin gwachii stoꞌ ñiꞌh xchiꞌdxyiꞌhn; nee xi chiꞌhzi nin gusaaꞌn luꞌh guunn raꞌ ba, o xi chiꞌhzi nin ayi gusaaꞌn luꞌh guunn raꞌ ba; zuhnn Dxiohs para soobaa xchiꞌdxyi luꞌh.

²⁰Ya chiꞌchi bacaꞌhpwehn Jesuhs laꞌh raꞌ xpwiinn Ñiꞌh tin ayi chyuloo chixteeꞌ raꞌ ba laꞌh Ñiꞌh naa Ñiꞌh Crixtu. Jesuhs guñiꞌ loh raꞌ xpwiinn Ñiꞌh xa gachi Ñiꞌh (Mr. 8.31‑9.1; Lc. 9.22‑27)

²¹Ya hohra chi gahca guzoꞌbaloh guñiꞌ Jesuhs loh raꞌ xpwiinn Ñiꞌh nahpa chee Ñiꞌh guihdxyi Jerusalehn, laasii riꞌchi nahpa gutiꞌdxiloh Ñiꞌh guelrzaꞌcazii duxa lahtsi naa raꞌ bwiinnguuhla raꞌ, cun bixohza raꞌ nin rnabwaꞌ laꞌh raꞌ bixohza, cun mwehsu raꞌ nin ruluuꞌyi xlehyi Moisehs; neezaa rahbi Ñiꞌh: ―Nahpa zidxiinn raꞌ ba naꞌh, per chin dxiohnna dxyih guhchiꞌhn zabahnahn loh guelguhchi.

²²Ya chiꞌchi biriaꞌcaanee Pehdru laꞌh Ñiꞌh tuhbi lahdu chiꞌchi rahbi ba loh Ñiꞌh: ―¡Per laꞌh Dxiohs ayi naa Ñiꞌh saca luꞌh ziꞌchi!

²³Ya chiꞌchi gubiaꞌgarii Jesuhs rahbi Ñiꞌh loh Pehdru: ―¡Biriaꞌcaa loon bwiinndxaaba!, laasii rusiin luꞌh naꞌh loh lligaaba dxaaba, laasii yiꞌh ayi nuu luꞌh xigaaba Dxiohs laꞌlaꞌgaꞌh xigaaba bwiinn guidxyiyuh ruhnn luꞌh.

²⁴Chiꞌchi rahbi Ñiꞌh loh raꞌ xpwiinn Ñiꞌh: ―Sidela chyu xclaaꞌdzi gaca xpwiiꞌnnahn, nahpa dxiaꞌldastoꞌ ba xquelnabahan ba tin guicaꞌha ba xcruhzi ba (dxyiꞌdxyi riiꞌ nin ruzeꞌta cruhzi naa gutiꞌdxiloh ba trabahjw); pwihsi dela guunn ba ziꞌchi, zahca dxieꞌnaꞌhla ba naꞌh,

²⁵laasii bwiinn nin xclaaꞌdzi guhldaꞌh xquelnabahan ñiꞌh zuñihchi ban, per bwiinn nin siꞌguehlda guñihchi xquelnabahan ñiꞌh pur naꞌh zadxeela ban.

²⁶¿Xix galluꞌyi guicaꞌha tuhbi bwiinn gaduhbi loh guidxyiyuh sidela laꞌh ba guñihchi ba xquelnabahan ba?

²⁷Laasii ziꞌ dxyih nin dxiꞌ Lliiꞌn Dxiohs nin naa ndxiꞌhw loh llaꞌñih xteenn Xtaada Ñiꞌh nin nuu dxibaaꞌ cun neezaa xaanjla Ñiꞌh dxieꞌnee Ñiꞌh, ya chiꞌchi zidxihlli Ñiꞌh laꞌh raꞌ cada tuhbigah bwiinn zigachiꞌh zi nin guhca xtsiꞌn ba dela dziꞌn zaꞌca o dela dziꞌn dxaaba.

²⁸Guchiin nin rñiꞌn loh tu, mas paaldaa raꞌ bwiinn nin rii raꞌ riiꞌ nabahan gahca raꞌ ba chin guibiaꞌgarii Lliiꞌn Dxiohs nin naa ndxiꞌhw, dxiꞌ Ñiꞌh loh guelrnabwaꞌ xteenn Ñiꞌh.