Read Chichicapan Zapotec San Mateo 18 Bible Online

San Mateo 18 - Chichicapan Zapotec bible

San Mateo 18

¹Ya laꞌn dxyih gahca raꞌ chi gwabiiga raꞌ xpwiinn Ñiꞌh loh Ñiꞌh tin gunaabadxyiꞌdxyi raꞌ ba loh Jesuhs rahbi raꞌ ba: ―¿Chyu mahzi lasahca loh guelrnabwaꞌ xteenn Dxiohs?

²Ya chiꞌchi gucaꞌha Jesuhs tuhbi biñiꞌn gudiꞌdzi Ñiꞌh ya bazuh Ñiꞌh laꞌh bi galaayi raꞌ ba,

³chiꞌchi rahbi Ñiꞌh loh raꞌ ba: ―Guchiin nin rñiꞌn loh tu sidela laꞌh tu ayi guchaꞌh tu loh xigaaba tu tin dxiaca naguꞌdzi lastoꞌ tu ziga naa lastoꞌ biñiꞌn riiꞌ, pwihsi ayi gaca chuꞌtii tu loh guelrnabwaꞌ xteenn Dxiohs.

⁴Nin mahzi lasahca loh guelrnabwaꞌ xteenn Dxiohs naa bwiinn nin rusaguuꞌdzi stoꞌ ñiꞌh loh Dxiohs laasii riahca ba ziga zi biñiꞌn riiꞌ,

⁵ya bwiinn nin gucaꞌstoꞌ ñiꞌh laꞌh tuhbi biñiꞌn ziga biñiꞌn riiꞌ pur laan, neezaa naꞌh zucaꞌstoꞌ ba. Rlluꞌn riezgu dxiaaba bwiinn loh duhlda (Mr. 9.42‑48; Lc. 17.1‑2)

⁶Neezaa rahbi Ñiꞌh: ―Ya cuun chiꞌh zi nin guunn para dxiaaba tuhbi biñiꞌn biꞌtuꞌhn riiꞌ loh duhlda pur nin riachiistoꞌ raꞌ bi naꞌh, mas chaꞌyi guiyiꞌbi tuhbi dxiah rooꞌ nin rucadzii maan dohba yahnn bwiinn chi tin gulaꞌha raꞌ ba laꞌh ba loh ñihsadoꞌ.

⁷¡Gulguiaꞌhagah laꞌh tu bwiinn guidxyiyuh, laasii nuu nin rusiaaba laꞌh bwiinn loh duhlda! Nee Ayi dxiaꞌdxi nin guunn ziꞌca, per ¡prohbi za laꞌh bwiinn nin guunn pur chuu xtuhlda snuhn raꞌ bwiinn!

⁸Pwihsi niꞌchin sidela laꞌh naa luꞌh, o ñaaꞌ luꞌh gusiaaba yiꞌh loh duhlda, mas chaꞌyi guchyuuꞌga luꞌhn ya cuꞌbwih luꞌhn zihtu; mas chaꞌyi chuꞌtii luꞌh loh guelrnabwaꞌ xteenn Dxiohs nicala ayi tuhbi ñaaꞌ luꞌh o tuhbi llehcu luꞌh xlawaaꞌha zohba llehcu luꞌh cun ñaaꞌ luꞌh nin guunn chee luꞌh loh dxih par tuꞌpazi.

⁹Ya sidela neezaa bizloh luꞌh gusiaaba yiꞌh loh duhlda, mas chaꞌyi guleꞌhen bachiꞌh guluꞌbwihin zihtu nez ayi gwaꞌha ru luꞌhn; mas chaꞌyi chuꞌtii luꞌh loh guelnabahan nacuubi nin guniꞌhi Dxiohs cun tuhbi si bizloh luꞌh xlawaaꞌha cun garoopa bizloh luꞌh nin guunn guzaꞌhla yiꞌh loh bwehla duxa xteenn gabihldxyi. Cweenta xteenn lliꞌyi nin bizaꞌbi (Lc. 15.3‑7)

¹⁰Rahbi za Ñiꞌh: ―Pwihsi gulguiaꞌha gah tin ayi cweꞌhestoꞌ tu laꞌh raꞌ bwiinn nin naa ziga biñiꞌn biꞌtuꞌhn raꞌ riiꞌ, pwihsi rñiꞌn loh tu xaanjla raꞌ bi guillii-guillii riiꞌ raꞌ ba loh Xtaaꞌdahn nin nuu dxibaaꞌ,

¹¹laasii laꞌh Lliiꞌn Dxiohs nin naa ndxiꞌhw zeꞌ loh guidxyiyuh tin gutaꞌh Ñiꞌh laꞌh raꞌ bwiinn duhlda raꞌ nin bizaꞌbi loh duhlda.

¹²Rahbi za Ñiꞌh: ―¿Xa lligaaba ruhnn tu sidela laꞌh tuhbi ndxiꞌhw nahpa tuhbi gaywaꞌh lliꞌhyi ya guizaꞌbi tuhbi ma? ¿Tayi cwachigah dxiꞌh ba za noventa y nueve ma loh dahan, bachiꞌh cheegadxiꞌhyi ba lliꞌhyi nin bizaꞌbi?

¹³Ya sidela laꞌh ma gadxeela ma, rñiꞌn loh tu ¿tayi dxiahxinee ru dxiꞌh ba lliꞌhyi chi loh ziga za noventa y nueve ma?

¹⁴Pwihsi ziꞌchi za laꞌh Xtaada tu nin nuu dxibaaꞌ ayi xclaaꞌdzi ba guizaꞌbi nin tuhbi raꞌ nin naa biñiꞌn biꞌtiꞌhn raꞌ riiꞌ loh duhlda. Dxiaꞌlda stoꞌ tu gallee nin guñihchi bwihtsi tu loh tu (Lc. 17.3)

¹⁵Rahbi za Ñiꞌh: ―Sidela laꞌh bwihtsi luꞌh ruñihchi loh luꞌh; guñiꞌnee bi yiꞌh si pur nin bwiꞌhnn bi, ya sidela laꞌh bi guzoꞌbadxiahga bi xchiꞌdxyi luꞌh, ba bwiꞌhnn luꞌh gahn bazoꞌbadxiahga bi xchiꞌdxyi luꞌh.

¹⁶Ya sidela laꞌh bi ayi guzoꞌbadxiahga bi xchiꞌdxyi luꞌh, gudihdxyi bi cun nee tuhbi o chiohpa bwiinn tin ziꞌchi garaa nin guiñiꞌ tu dxihn dxiahga raꞌ bwiinn chi tuhbi ba o chiohpa ba hasta chohnna ba, tin laꞌh raꞌ ba gaca ziga nin dxihn dxiahga garaa nin guiñiꞌ loh lasaaꞌ tu.

¹⁷Ya sidela laꞌh bi ayi guzoꞌbadxiahga gahca bi xchiꞌdxyi raꞌ bwiinn chi, gwaguihtsi luꞌh loh raꞌ bwiinn guidoꞌ xteenn Jesucristu; ya sidela laꞌh za bi ayi guzoꞌbadxiahga gahca bi xchiꞌdxyi raꞌ bwiinn guidoꞌ, ya chiꞌchi bwiꞌhnn laꞌhbi ziga zi tuhbi bwiinn ziitu nin ayi nuꞌnbwaꞌ xchiꞌdxyi Dxiohs, ziga tuhbi nin rteesa mweeyi xteenn Roma.

¹⁸’Pwihsi guchiin nin rñiꞌn loh tu garaa raꞌ xtuhlda bwiinn nin gusiaꞌlda stoꞌ tu loh guidxyiyuh riiꞌ, garaa za niꞌchi raꞌ zusiaꞌlda stoꞌ Dxiohs xcweenta raꞌ ba, ya duhlda raꞌ nin ayi dxiaꞌldastoꞌ tu loh guidxyiyuh riiꞌ ayi za chapitii raꞌn nez llaaꞌndxibaaꞌ loh Dxiohs.

¹⁹’Ziꞌchi gahca za rñiꞌn loh tu, sidela laꞌh chiohpa tu cwih guunn tuhsi xigaaba loh guidxyiyuh riiꞌ tin cwidxyi-guinaaba tu nin guiclaaꞌdzi tu loh Xtaaꞌdahn nin nuu dxibaaꞌ zuniꞌhi Ñiꞌh nin guinaaba tu,

²⁰laasii nez hasta cwih chiohpa o chohnna bwiinn nin riachiistoꞌ raꞌ ñiꞌh naꞌh riꞌchi laꞌn zuꞌh galaayi raꞌ ba.

²¹Ya chiꞌchi gwabiiga Pehdru loh Jesuhs tin gunaabadxyiꞌdxyi ba loh Ñiꞌh rahbi ba: ―Daada, ¿mas paaldaa bweelta guñihchi bwiꞌtsihn loon, ya chiꞌchi gusiaꞌldastoꞌn nin bwiꞌhnnee bi naꞌh? ¿Ta hasta gahdzi?

²²Chiꞌchi rahbi Jesuhs loh Pehdru: ―Ayi gahdzi si dxiꞌh sino que hasta setenta bweelta gahdzi. Cweenta xteenn xmooza rrehyi nin ayi gunah ñaꞌldastoꞌ ñiꞌh xtuhlda bwiinn

²³Laasii guelrnabwaꞌ xteenn Dxiohs naa ziga zi tuhbi rrehyi nin bwiꞌhnn cweenta balaaca nuzaꞌbi raꞌ xmooza ba loh ba.

²⁴Gueꞌdu guzoꞌbaloh guunn ba cweenta chin badzihnnee raꞌ ba tuhbi nin nuzaꞌbi ziahan miyohn loh ba,

²⁵ya laasii laꞌh mooza chi ayi nahpa ba mweeyi tin chiilli ba loh rrehyi chi, chiꞌchi gunabwaꞌ rrehyi chi tin gudooꞌ ba ziga zi tuhbi guidxaꞌh, cun nee xcunnaꞌh ba, cun garaa raꞌ lliiꞌn ba nee cun garaa za nin nahpa ba tin ziꞌchi gadxilli ba garaa nin nuzaꞌbi ba,

²⁶ya chiꞌchi gwah mooza chi bazuꞌnllihbi ba loh rrehyi chi tin gunaaba duxa ba rahbi ba: “Daada, balahsa stoꞌ luꞌh naꞌh guleeza schiohpa-schoon dxyih zidxiillihn nin nuzaꞌbiꞌhn loh luꞌh.”

²⁷Ya chiꞌchi balahsa stoꞌ rrehyi laꞌh mooza chi, pwihsi basiaꞌldastoꞌ ba nin nuzaꞌbi bwiinn chi loh ba ya bataꞌh ba laꞌh mooza chi,

²⁸per chin guyaꞌloh bariaꞌh mooza chi rwaaꞌ yihdzi rrehyi, chiꞌchi badxiꞌloh ba stuhbi xmooza rrehyi, ya bwiinn chi nuzaꞌbi loh ba gulliaaꞌyiꞌhn mweeyi, ya gucaꞌha ba gunaꞌzu ba yahnn bwiinn chi guxiꞌ ban chiꞌchi rahbi ba loh bwiinn chi: “¡Gudxihlli loon nin nuzaꞌbi luꞌh!”

²⁹Chiꞌchi gucaꞌha bwiinn chi bazuꞌnlihbi ba loh mooza chi rahbi ba: “¡Balahsastoꞌ luꞌh naꞌh, guleeza si chiohpa o hasta choon dxyih zidxihllihn loh luꞌh!”

³⁰Ya cun ayi bihn ba dxyiꞌdxyi, cun gunaaba guxchisi ba laꞌh bwiinn chi tin bieꞌw ba laꞌn lahtsidxiꞌba tin gudxihlli ba nin nuzaꞌbi ba.

³¹Pwihsi badiꞌhi duxa llahn laꞌh raꞌ snuhn xmooza rrehyi, ya gwaguihtsi raꞌ ba loh rrehyi garaa nin bwiꞌhnn mooza chi,

³²ya chiꞌchi gudihdxyi rrehyi laꞌh mooza chi ya rahbi rrehyi loh ba: “¡Mooza nin ayi galluꞌyitiiꞌ! Naꞌh basiaꞌldastoꞌn garaa nin nuzaꞌbi luꞌh loon.

³³Pwihsi ziꞌchi za yiꞌh nahpa ñalahsastoꞌ luꞌh laꞌh bwiinn lasaaꞌ luꞌh ziga za balahsastoꞌn yiꞌh.”

³⁴Ya loh nin bagaduhbi llahn duxa rrehyi chi lwehgu gunabwaꞌ ba laꞌh raꞌ xpwiinn ba tin basaꞌcazii raꞌ ba laꞌh mooza chi tin chiilli ba garaa nin nuzaꞌbi ba.

³⁵Chiꞌchi rahbi Jesuhs: ―Ziꞌchi za guunnee Xtaaꞌdahn nin nuu dxibaaꞌ laꞌh tu sidela laꞌh cada tuhbigah tu ayi gusiaꞌldastoꞌ tu xtuhlda raꞌ bwihtsi tu, per desde laꞌn lastoꞌ tu.