Read Chichicapan Zapotec San Mateo 6 Bible Online

San Mateo 6 - Chichicapan Zapotec bible

San Mateo 6

¹Rahbi za Jesuhs: ―Ayi gutiꞌchi tu dxyiꞌdxyi pur dziꞌn zaꞌca si nin ruhnn tu tin sola gwaꞌha raꞌ bwiinn xi ruhnn tu, laasii sidela sola gutiꞌchi tu dxyiꞌdxyi pur xtsiꞌn zaꞌca tu ayi xi guicaꞌha tu loh Xtaada tu nin nuu dxibaaꞌ,

²niꞌchin chin rudiꞌhi luꞌh guhn laꞌh tuhbi bwiinn prohbi ayi za guuyi luꞌhn loh bwiinn ziahan ziga ruhnn raꞌ bwiinn rusaguiꞌhi raꞌ nez laꞌn guidoꞌ cun loh neziuh raꞌ nezloh raꞌ bwiinn ziahan tin dxiahxinee raꞌ bwiinn chi laꞌh raꞌ ba. Naꞌh rñiꞌn laꞌraꞌ ba gucaꞌha guelnazaꞌca nin ruhn tucahri guicaꞌha raꞌ ba.

³Chin gudiꞌhi luꞌh guhn laꞌh bwiinn prohbi, ayi gusadxihn luꞌh laꞌh chyuulla nin ruchaꞌga luꞌh;

⁴bwiꞌhnnan per sola yiꞌh si naann luꞌh, ya Xtaada luꞌh nin nuu dxibaaꞌ gwaꞌha Ñiꞌh xa cayuhnn luꞌh cweenta chi cun sola yiꞌh si naann luꞌh, pwihsi zadxihlli Ñiꞌh bwen nin guunn luꞌh chi. Jesuhs ruluuꞌyi xa cwidxyi-guinaaba luꞌh loh Dxiohs (Lc. 11.2‑4)

⁵Rahbi za Ñiꞌh: ―Chin cwidxyi-guinaaba tu loh Dxiohs, ayi guunn tu ziga ruhnn raꞌ bwiinn rusaguiꞌhi raꞌ nin riuuꞌstoꞌ raꞌ ñiꞌh gaca lasahca raꞌ nez loh raꞌ bwiinn nee laꞌn guidoꞌ o loh neziuh raꞌ ya rzuꞌnchiigah raꞌ ba rbwihdxyi-rnaaba raꞌ ba loh Dxiohs nicala loh dxiaaꞌ raꞌ laasii riuuꞌstoꞌ raꞌ ba guluuꞌyi raꞌ ba ziga ruhnn raꞌ ba tin guiñiꞌ zaꞌca bwiinn pur laꞌh raꞌ ba, ya guchiin nin rñiꞌn, cun sola ziga ruhnn raꞌ ba riiꞌ laꞌh raꞌ ba bwiꞌhnn gahn nin guicaꞌha raꞌ ba,

⁶per yiꞌh chin cwidxyi-guinaaba luꞌh loh Dxiohs, biuuꞌgarii laꞌñihdzi luꞌh, basieꞌw rwaaꞌ yihdzi luꞌh chihpa ya chiꞌchi gudihdxyi-gunaaba loh Xtaada Dxiohs luꞌh, laasii ziꞌchi laꞌh Ñiꞌh zuunee Ñiꞌh yiꞌh hohra chi, ya gwaꞌha Xtaada luꞌh cayuhnn luꞌh ziga rclaaꞌdzi Ñiꞌh guunn luꞌh zuniꞌhi Ñiꞌh guelnazaꞌca yiꞌh.

⁷Nee loh cabwihdxyi-canaaba luꞌh loh Ñiꞌh ayi guunn ziahan xchiꞌdxyi luꞌh ziga ruhn raꞌ bwiinn nin ayi naa raꞌ bwiinn Israel; ruhnn raꞌ ba lligaaba chin rñiꞌ raꞌ ba ziahan dxyiꞌdxyi loh canaaba raꞌ ba loh Dxiohs, mahzi ru cweenta guunn Dxiohs xchiꞌdxyi raꞌ ba per lliaaꞌ zi niꞌchi.

⁸Niꞌchin ayi gaca tu ziga naa raꞌ ba, laasii laꞌh Xtaada tu nin nuu dxibaaꞌ laꞌh Ñiꞌh naann la cuun nin rchiꞌhn tu galoh nin guinaaba tu loh Ñiꞌh.

⁹Laꞌh tu nahpa cwidxyi tu Dxiohs squiiꞌ:Xtaaꞌdahn nin nuu dxibaaꞌ, xclaaꞌdzihn garaa raꞌ bwiinn guiñiꞌ zaꞌca ziga laa luꞌh,

¹⁰xclaaꞌdzizahn gadzihn dxyih dxiꞌ luꞌh guinabwaꞌ luꞌh loh guidxyiyuh ziga rnabwaꞌ luꞌh dxibaaꞌ.

¹¹Rnaꞌbaꞌhn guillii-guillii guniꞌhi luꞌh guehta guidaꞌw nu,

¹²cun basiaꞌlda gahca stoꞌ luꞌh xtuhlda nu nin rañihchi nu loh Yuꞌbiluꞌh ziga rasaguuꞌdzi stoꞌ nu xcweenta bwiinn nin ruñihchi loh nu,

¹³nee ayi za gusaaꞌn luꞌh coꞌbañuh bwiinndxaaba laꞌh nu chin guiclaaꞌdzi ba sino que guhldaꞌh laꞌh nu loh ba, (laasii xteenn luꞌh naa guelrnabwaꞌ cun gueljweersi, cun llaꞌñih nin naa para tuꞌpazi).

¹⁴’Laasii sidela laꞌh tu gusaguuꞌdzi stoꞌ tu cun bwiinn nin ruñihchi xilla ziꞌchi za Xtaada tu nin nuu dxibaaꞌ ziaꞌlda za stoꞌ Ñiꞌh xtuhlda tu,

¹⁵per sidela ayi gusaguuꞌdzi stoꞌ tu pur bwiinn nin ruñihchi xilla loh tu, pwihsi ayi za dxiaꞌldastoꞌ Xtaada tu nin nuu dxibaaꞌ xtuhlda tu. Jesuhs ruluuꞌyi xa guunn raꞌ bwiinn chin gucwaaꞌhan raꞌ ba

¹⁶Rahbi za Ñiꞌh: ―Chin gucwaaꞌhan tu, ayi guunn nalaasa loh tu ziga ruhnn raꞌ bwiinn nin rusaguiꞌhi bwiinn raꞌ nin ruluuꞌyi nez loh raꞌ bwiinn chin rucwaaꞌhan raꞌ ba ruhnn nalaasa loh raꞌ ba tin gwaꞌha paꞌhcaa bwiinn riigacwaaꞌhan raꞌ ba. Guchiin nin rñiꞌn loh tu cun sola ziga ruhnn raꞌ ba zicaꞌha raꞌ ba nin ruhnn tucahri guicaꞌha raꞌ ba.

¹⁷Niꞌchin yiꞌh chin gucwaaꞌhan luꞌh, gudxiꞌbi zaꞌca loh luꞌh,

¹⁸tin ziꞌchi ayi gacabwaꞌ raꞌ bwiinn nuugacwaaꞌhan luꞌh, tin Xtaada si luꞌh nin nuu dxibaaꞌ gwaꞌha cuun nin cayuhnn luꞌh ya ziꞌchi zuniꞌhi Ñiꞌh guelnazaꞌca yiꞌh. Guelnazaꞌca nin nuu llaaꞌndxibaaꞌ (Lc. 12.33‑34)

¹⁹Rahbi za Ñiꞌh: ―Ayi cwachicwaꞌh tu guelnazaꞌca xteenn tu loh guidxyiyuh riiꞌ, nez rii raꞌ maan nin ruñihchiloh lahdxi cun gubaꞌn,

²⁰sino que cwachicwaꞌh luꞌh xixteenn luꞌh dxibaaꞌ nez ayi maan nin guñihchilohon, nez ayi za gubaꞌn cwaanan.

²¹Pwihsi nez chuu xquelnazaꞌca luꞌh riꞌchi za chuu stoꞌ luꞌh. Biaꞌñih nin nuu tihxi bwiinn (Lc. 11‑34‑36)

²²Rahbi za Ñiꞌh: ―Bizloh bwiinn naa ziga biaꞌñih xteenn tihxi ba; pwihsi sidela laꞌh bizloh luꞌh nazaꞌcan, gaduhbi za tihxi luꞌh gahpa biaꞌñih;

²³per sidela laꞌh bizloh luꞌh rahcan, gaduhbi za tihxi luꞌh nuu loh nacahyi, ¡pwihsi nacahyi duxa guiñah gaduhbi tihxi luꞌh! Dxiohs cun mweeyi

²⁴’Ayi nin tuhbi bwiinn nin guunn dziꞌn loh chiohpa ballwaaꞌn, laasii zidxyiꞌchinee ba tuhbi ballwaaꞌn chi ya stuhbi ba zahca nadziiꞌhi ba, o gucaꞌstoꞌ ba tuhbi ba ya stuhbi ba zibweꞌhestoꞌ ba. Ya niꞌchin ayi nuu gucaꞌstoꞌ ba laꞌh Dxiohs sidela xquelnazaꞌca si ba cadxiꞌhyi ba loh guidxyiyuh riiꞌ. Rahcanee Dxiohs laꞌh raꞌ lliiꞌn Ñiꞌh

²⁵’Niꞌchin nin naꞌh guiñiꞌn loh tu, ayi guunn tu ziahan lligaaba pur nin gahw tu o pur nin guee tu para guibahan tu, nee ayi za chuu tu ziahan lligaaba ca nehza sah xahba tu nin gacu tu. ¿Tayi zirooꞌ ru dxiꞌh lasahca xquelnabahan bwiinn loh ziga nin rahw raꞌ ba, ya neezaa tihxi bwiinn zirooꞌ ru lasahcan loh ziga lahdxi nin rahcu ba?

²⁶Gulguiꞌhnn lligaaba maaniꞌhn raꞌ nin rzuh loh bwih xaloh nabahan raꞌ ma ayi raaꞌn raꞌ ma, ayi za rataaꞌha raꞌ ma guiñaꞌh, nee ayi za rguꞌchaꞌyi raꞌ ma ñihza laꞌn yuuꞌ ziga ruhnn tu, per nicala ayi xi nahpa raꞌ ma, Xtaada Dxiohs tu nin nuu dxibaaꞌ rudiꞌhi xi rahw raꞌ ma. Pwihsi laꞌh tu, ¿tayi ruhn tu lligaaba mahzi ru lasahca tu loh maaniꞌhn raꞌ?

²⁷Pwihsi nicala riuuꞌ ru tu ziahan lligaaba, ¿xa guunn luꞌh guchiooꞌ ru luꞌh xquelnabahan luꞌh mas tuhbi hohra?

²⁸¿Xixnaa chiꞌh riuuꞌ tu lligaaba canehza sah xahba tu? Gulguiꞌhnn lligaaba dxiaꞌ billiiga raꞌ xa rrooꞌ raꞌn loh dahan: ayi xi dziꞌn ruhnn raꞌn, ayi za rdxihba raꞌn lahdxi.

²⁹Pwihsi rñiꞌn loh tu nin rrehyi Salomohn nicala ziahan rooꞌ guelnazaꞌca raꞌ nin guhpa ba, nicala guhta ba lahdxi zaꞌca per ayi guhldaa ñiñah xahba ba ziga paꞌh dxiaꞌ raꞌ riiꞌ.

³⁰Sidela ziꞌchi rzuhchaꞌyi Dxiohs laꞌh raꞌ cwaꞌn nagaa raꞌ nin rñiah joosca raꞌ nin rii loh dahan nee guillii guicaꞌdxihin loh dxih, niꞌchin ¿xilaꞌh xchiꞌh laꞌhtu ayi dxiaꞌn guniꞌhi Ñiꞌh nin rchiꞌhn tu bwiinn nahda raꞌ nin ayi riuuꞌ ayi riaꞌzi dxyiꞌdxyi xcweenta Dxiohs?

³¹Pwihsi ayi chuu tu lligaaba guiñiꞌ tu: “¿Xi guidaꞌw chiꞌh nuꞌh?”, o “¿Canehza sah lahdxi guidxiaacu nu?”,

³²laasii bwiinn nin ayi nuꞌnbwaꞌ Dxiohs riuuꞌ raꞌ ba lligaaba xa guidxeela raꞌ ba garaa raꞌ cohsa riiꞌ, per laꞌh tu nahpa tu tuhbi Xtaada tu nin nuu dxibaaꞌ ya naann Ñiꞌh cuun nin rchiꞌhn tu,

³³niꞌchin gulgadxiꞌhyi loh xquelrnabwaꞌ Ñiꞌh nee gulgazoꞌbadxiahga gahca xchiꞌdxyi Ñiꞌh, ya ziꞌchi zuniꞌhi Ñiꞌh garaa nin guichiꞌhn tu.

³⁴Ayi gusioꞌba yihca tu pur dxyih guillii, laasii guillii ziuuꞌ nin gusioꞌba yihca tu, laasii cada tuhbigah dxyih raꞌ zeꞌnee raꞌn lligaaba nin rusioꞌba yihca bwiinn.