Read Chichicapan Zapotec San Marcos 8 Bible Online

San Marcos 8 - Chichicapan Zapotec bible

San Marcos 8

¹Ya laꞌn dxyih raꞌ chi badiaaꞌha ziahan laꞌgaꞌh bwiinn, ya ayi nahpa raꞌ ba xi gahw raꞌ ba, niꞌchin gudihdxyi Jesuhs laꞌh raꞌ xpwiinn Ñiꞌh rahbi Ñiꞌh:

²―Ralahsa duxa stoꞌn laꞌh raꞌ bwiinn riiꞌ laasii laꞌh chohnna dxyih naa nuunee raꞌ ba naꞌh, nee ayi nahpa raꞌ ba nin gahw raꞌ ba,

³ya sidela naꞌh gaxeꞌhla raꞌn ba rwaaꞌ yihdzi raꞌ ba llahsaa raꞌ ba, zadxahga raꞌ ba loh nezyuh, laasii nuu raꞌ ba zihtu zeꞌ raꞌ ba.

⁴Ya chiꞌchi rahbi raꞌ xpwiinn Ñiꞌh loh Ñiꞌh: ―Per nez riiꞌ ayi chyu nuutiiꞌ, ayi xa guidiꞌhnn nuꞌh guidxeela xi gahw raꞌ ba.

⁵Chiꞌchi rahbi Ñiꞌh: ―¿Paaldaa pahn nahpa tu riꞌca? Chiꞌchi rahbi raꞌ ba loh Ñiꞌh: ―Gahdzin.

⁶Chiꞌchi gunabwaꞌ Ñiꞌh guzohba garaa bwiinn chi, ya chiꞌchi gucaꞌha Ñiꞌh gagaadzii pahn chi tin badiꞌhi Ñiꞌh guelzuxchiilli loh Xtaada Dxiohs Ñiꞌh, ya chiꞌchi gudxiꞌzi Ñiꞌhn loh raꞌ xpwiinn Ñiꞌh tin para gudxiꞌzi raꞌ ban loh raꞌ bwiinn ziahan chi,

⁷ziꞌchi gahca bwiꞌhnn Ñiꞌh cun nuhn bwehlda biꞌtuꞌhn badiꞌhi Ñiꞌh guelzuxchiilli loh Dxiohs, chiꞌchi gudxiꞌzi gahca raꞌ za xpwiinn Ñiꞌh ma loh raꞌ bwiinn ziahan chi,

⁸ya garaa raꞌ ba gudahw raꞌ ba hasta gwadxah raꞌ ba, ya chin guyaꞌloh gudahw raꞌ ba bidiaaꞌha za gahdzi tipi taaꞌha pahn cun bwehlda raꞌ chi,

⁹ya naa raꞌ bwiinn chi ziga tahpa mihyi, ya seguihdu guhdzi Ñiꞌh tin biuuꞌnehza raꞌ ba,

¹⁰ya lwehgu zeenee Ñiꞌh garaa xpwiinn Ñiꞌh laꞌn tuhbi laancha hasta loh guihdxyi xteenn Dalmanuta. Gunaaba raꞌ bwiinn fariseu guunn Jesuhs tuhbi milahgru (Mt. 16.1‑4; Lc. 12.54‑56)

¹¹Chin badzihn raꞌ nuhn bwiinn fariseu hasta zuu Jesuhs guzoꞌbaloh biahyi raꞌ ba gadiidxi Ñiꞌh tin canaaba raꞌ ba loh Ñiꞌh guunn Ñiꞌh tuhbi milahgru nin Dxiohs si nin nuu llaaꞌn dxibaaꞌ zahca guunn, tin guluuꞌyi gu guchii Dxiohs guluꞌnehza laꞌh Jesuhs loh guidxyiyuh, ya cagaldaꞌtsi si raꞌ ba guiduꞌhun xi guunn Ñiꞌh.

¹²Chiꞌchi bibiin laꞌn lastoꞌ Jesuhs, ya rahbi Ñiꞌh loh raꞌ bwiinn fariseu chi: ―¿Xixnaa chiꞌh rnaaba tu guꞌnnahn milahgru raꞌ? Guchiin nin rñiꞌn loh tu, nin tuhbi dziꞌn rooꞌ ayi guꞌnnahn nezloh tu.

¹³Ya cun basaaꞌn Ñiꞌh laꞌh raꞌ ba riꞌchi lwehgu bacah Ñiꞌh laꞌn laancha zeenee chiꞌh Ñiꞌh laꞌh raꞌ xpwiinn Ñiꞌh stuhbi lahdu rwaaꞌ ñihsa. Xcweenta levaduhra raꞌ bwiinn fariseu (Mt. 16.5‑12)

¹⁴Ya biaꞌldastoꞌ raꞌ xpwiinn Ñiꞌh ñuꞌa raꞌ ba pahn, per laꞌn laanchayi nuu raꞌ ba chin bwaꞌha raꞌ ba tuhbi dxiꞌh pahn nahpa raꞌ ba, nee loh ñihsa la za niꞌchi zeenee laancha laꞌh raꞌ ba hohrchi,

¹⁵nee hohrachi gahca za rahbi Ñiꞌh loh raꞌ xpwiinn Ñiꞌh: ―Gulguiaꞌha cuun xlevaduhra raꞌ bwiinn fariseu cun xpwiinn Herodes.

¹⁶Chiꞌchi rahbi loh lasaaꞌ raꞌ xpwiinn Ñiꞌh chi: ―Guchii nin guñiꞌ mwehsu laasii ayi chyu nahpa pahn.

¹⁷Per guhcabwaꞌ Jesuhs ayi guhcabwaꞌ raꞌ xpwiinn Ñiꞌh xa naa dxyiꞌdxyi nin guñiꞌ Ñiꞌh loh raꞌ ba niꞌchin rahbi Ñiꞌh: ―¿Xixnaa rahbi tu ayi nahpa tu pahn? ¿Ta nagahdxi gacabwaꞌ tu? ¡Xiꞌballa nahda stoꞌ tu, nee dxiahga tu ñieꞌwun!

¹⁸¡Nuu dxiahga tu cun bizloh tu, per rluuꞌyi ayi riin loh tu cun dxiahga tu ayi rihnan! ¿Tayi riagannastoꞌ tu?

¹⁹Chin gudxiꞌziꞌhn gagaꞌyu pahn loh gaꞌyu mihyi bwiinn, ¿paaldaa tiipin bidiaaꞌha? ―Tsiꞌh bichiohpan ―rahbi raꞌ xpwiinn Ñiꞌh.

²⁰Chiꞌchi rahbi Ñiꞌh: ―Ya chin gudxiꞌziꞌhn gahdzi pahn loh tahpa mihyi bwiinn, ¿paaldaa tiipin bidiaaꞌha chin guyaꞌloh gudahw raꞌ ba? ―Gahdzin ―rahbi raꞌ xpwiinn Ñiꞌh.

²¹Chiꞌchi rahbi Ñiꞌh: ―¿Ta nagahdxi gacabwaꞌ tu? Basiaca Jesuhs laꞌh tuhbi bwiinn nin ayi riin loh ñiꞌh

²²Ya chin badzihn raꞌ ba tuhbi guihdxyi nin laa Betsaida, riꞌchi gwanee raꞌ bwiinn guihdxyi chi tuhbi bwiinn nin rahca loh ñiꞌh hasta zuu Jesuhs, ya guñiꞌnee raꞌ ba laꞌh Ñiꞌh tin guidxiꞌ Ñiꞌh laꞌh bwiinn nin rahca loh ñiꞌh chi,

²³chiꞌchi gunaꞌzu Jesuhs naa bwiinn nin rahca loh ñiꞌh chi, gwanee Ñiꞌh laꞌh ba hasta rwaaꞌ guihdxyi, chiꞌchi bagahdxyi Ñiꞌh rwaaꞌ bizloh ba cun xihin Ñiꞌh, neezaa badziiꞌba naa Ñiꞌh yihca ba chiꞌchi gunaabadxyiꞌdxyi Ñiꞌh loh ba gu rwaꞌha ba,

²⁴ya guzoꞌbaloh caywaꞌha bwiinn nin rahca loh ñiꞌh chi, chiꞌchi rahbi ba: ―Laꞌn rwaꞌha laꞌh raꞌ ndxiꞌhw raꞌ, rñah raꞌ ba zigazi yahga nagaa raꞌ nin rzah raꞌ.

²⁵Chiꞌchi bacaꞌh garoopa naa Ñiꞌh loh bwiinn chi stuhbi, ya chiꞌchiyi bwaꞌha zaꞌca ba garaatiiꞌ raꞌ cohsa nayaa-nayaa,

²⁶chiꞌchi gunabwaꞌ Ñiꞌh cun rahbi Ñiꞌh loh ba: ―Ayi guziaa loh guihdxyi; mahzi zigazi duꞌh bwaa yihdzi luꞌh nee ayi chyuloo gahbi luꞌh xa biaca luꞌh. Guñiꞌ Pehdru Jesuhs naa Crixtu (Mt. 16.13‑20; Lc. 9.18‑21)

²⁷Ya seguihdu zenee Jesuhs laꞌh raꞌ xpwiinn Ñiꞌh nez lahda guihdxyi raꞌ xteenn guihdxyi Cesarea cun Filipu, ya loh neziuh gunaabadxyiꞌdxyi Jesuhs loh raꞌ xpwiinn Ñiꞌh rahbi Ñiꞌh: ―¿Chyu niꞌca rahbi raꞌ bwiinn naan?

²⁸Chiꞌchi rahbi raꞌ ba loh Ñiꞌh: ―Nuhn raꞌ bwiinn rahbi yiꞌh naa luꞌh Jwahn nin baroꞌbañihsa, ya snuhn raꞌ ba rahbi yiꞌh naa luꞌh Elías, ya snuhn raꞌ ba rahbi yiꞌh naa luꞌh stuhbi raꞌ guehtu profeta raꞌ nin guñiꞌ xchiꞌdxyi Dxiohs.

²⁹Chiꞌchi rahbi Ñiꞌh: ―Ya laꞌh xchiꞌh tu, ¿xi nna tu chyu naan? Chiꞌchi rahbi Pehdru loh Ñiꞌh: ―Yiꞌh nin naa luꞌh Crixtu Lliiꞌn Dxiohs nin dxuleꞌza nu.

³⁰Ya chiꞌchi rahbi Ñiꞌh loh raꞌ xpwiinn Ñiꞌh ayi xi guuyi raꞌ ba chyu naa Ñiꞌh loh nin tuhbi bwiinn. Jesuhs guñiꞌ loh raꞌ xpwiinn Ñiꞌh xcweenta ziga gachi Ñiꞌh (Mt. 16.21‑28; Lc. 9.22‑27)

³¹Chiꞌchi guzoꞌbaloh Jesuhs cagaluuꞌyi Ñiꞌh laꞌh raꞌ xpwiinn Ñiꞌh, rahbi Ñiꞌh: ―Nahpa zidiꞌdxiꞌhn trabahjw duxa, ya bwiinn guhla raꞌ xteenn guidoꞌ cun bixohza raꞌ nin rnabwaꞌ laꞌh raꞌ bixohza, cun mwehsu raꞌ nin ruluuꞌyi xlehyi Moisehs, zusacaloh raꞌ ba naꞌh nee zidxiinn za raꞌ ba naꞌh, per chin dxiohnna dxyih zabanaꞌhn loh raꞌ bwiinnguuchi.

³²Garaa dxyiꞌdxyi raꞌ riiꞌ guñiꞌ Ñiꞌh loh raꞌ ba nayaa-nayaa, ya pur niꞌchi gwanee Pehdru laꞌh Ñiꞌh tuhbi lahdu tin guñiꞌnee ba loh Ñiꞌh tin ayi ñizaꞌca Ñiꞌh ziꞌchi,

³³per chiꞌchi basiaꞌgarii loh Jesuhs bwaꞌha Ñiꞌh loh raꞌ xpwiinn Ñiꞌh, chiꞌchi rahbi Ñiꞌh loh Pehdru: ―¡Gwasuu loh xnezyuun Satanahs! ¡Yiꞌh ayi ruhnn luꞌh xigaaba xteenn Dxiohs, pur xigaaba si bwiinn guidxyiyuh cayuhnn luꞌh!

³⁴Chiꞌchi gudihdxyi Ñiꞌh laꞌh raꞌ bwiinn cun garaa xpwiinn Ñiꞌh, chiꞌchi rahbi Ñiꞌh loh raꞌ ba: ―Sidela chyuulla tuhbi tu xclaaꞌdzi gaca tuhbi xpwiiꞌnnahn, gulgasiaꞌldastoꞌ tu garaa raꞌ nin rzaꞌbistoꞌ tu guunn tu, nee guldxiaꞌ xcruhzi tu (nin zee loh dxyiꞌdxyi riiꞌ naa gusaaꞌn luꞌh gudziiꞌba xquelnabahan luꞌh pur xcweenta Jesucristu) bachiꞌh gultaꞌnaꞌhla naꞌh ―rahbi Ñiꞌh―

³⁵laasii bwiinn nin xclaaꞌdzi ayi guñihchi xquelnabahan ñiꞌh zuñihchi ban, per bwiinn nin guñihchi xquelnabahan ñiꞌh pur naꞌh, nee pur xcweenta xchiꞌdxyi Dxiohs, zibahan ba par tuꞌpazi loh xquelrnabwaꞌ Dxiohs.

³⁶Laasii ¿xi galluꞌyi guicaꞌha tuhbi bwiinn gaduhbi loh guidxyiyuh sidela guñihchi ba xquelnabahan ba?,

³⁷o neezaa ¿balaaca chiilli tuhbi bwiinn xcweenta xquelnabahan ba?

³⁸Neezaa sidela chyuulla tuhbi bwiinn gatuhyi loh ba naꞌh, o pur xchiꞌdxyiꞌhn nezloh raꞌ bwiinn nin rusahcaloh loh Dxiohs cun nin nuu loh raꞌ bwiinn nin nuu xtuhlda raꞌ ñiꞌh, neezaa naꞌh Lliiꞌn Dxiohs nin naa ndxiꞌhw zatuhyi loon pur bwiinn chi chin gabiaꞌgariin stuhbi cun gaduhbi xquelrnabwaꞌ Xtaaꞌdahn cun ziahan xaanjla Ñiꞌh.