Read Chichicapan Zapotec San Marcos 9 Bible Online

San Marcos 9 - Chichicapan Zapotec bible

San Marcos 9

¹Chiꞌchi rahbi Ñiꞌh loh raꞌ ba: ―Nee guchiin nin rñiꞌn loh tu, nuu raꞌ bwiinn nin dxaꞌga loh tu zwaꞌha raꞌ ba gadzihn xquelrnabwaꞌ Dxiohs galoh nin gachi raꞌ ba. Bidxaꞌh ziga rñah Jesuhs (Mt. 17.1‑13; Lc. 9.28‑36)

²Chin gudiiꞌdxi xoꞌpa dxyih, chiꞌchi gwanee Jesuhs laꞌh dxiꞌh raꞌ Pehdru, Jacobo, cun Jwahn yihca tuhbi dahan rooꞌ, nee riꞌchi bwaꞌha raꞌ xpwiinn Ñiꞌh chi bidxaꞌh ziga rñah Ñiꞌh,

³ya xahba Ñiꞌh biahca labwehen dxyiꞌgah guhcabachaꞌhan, ayi nin tuhbi bwiinn nin guunn gahn gaca labweh ziga guhca labweh nachitsi xahba Ñiꞌh,

⁴ya riꞌchi baluuꞌyiloh Elías cun guehtu Moisehs, cayuuꞌyidxyiꞌdxyinee raꞌ ba laꞌh Ñiꞌh,

⁵chiꞌchi rahbi Pehdru loh Jesuhs: ―¡Mwehsu, bwen gahca dxuu nuꞌh riiꞌ! ¡Laꞌh nu guidiꞌhnnchaꞌyi chohnna yuuꞌ dxillaaꞌ; tuhbin para Yuꞌbiluꞌh, stuhbin para Moisehs, ya stuhbin para laꞌh Elías!

⁶Dxyigah ziꞌchi guñiꞌ Pehdru laasii rdxyihbi duxa ba cun schiohpa lasaaꞌ ba niꞌchin guñiꞌ ba ziꞌchi,

⁷ya hohra chi gahca biꞌ tuhbi xcahyi dxyiꞌgah si biaꞌpa raꞌ ba laꞌn xcahyi chi, ya laꞌn xcahyi chi guñiꞌ tuhbi rsiaaꞌha nin rahbi: ―Dee naa Lliiꞌnahn nin nadziiꞌhihn; gulgazoꞌbadxiahga xchiꞌdxyi bi.

⁸Ya mas balaaquiꞌhn rahca lwehgu bwaꞌha raꞌ ba tuhsi la Jesuhs zuu riꞌchi, ya laꞌn xcahyi chi guñihchiloh Moisehs cun Elías,

⁹ya chin biehtanee Ñiꞌh laꞌh raꞌ ba dahan rooꞌ chi; chiꞌchi rahbi Ñiꞌh loh raꞌ xpwiinn Ñiꞌh chi ayi xi guuyi raꞌ ba cuun nin bwaꞌha raꞌ ba hastayi chin gabahan Lliiꞌn Dxiohs nin naa ndxiꞌhw loh bwiinn guuchi,

¹⁰ya bazoꞌbadxiahga raꞌ ba xchiꞌdxyi Ñiꞌh ayi gudxixteeꞌ raꞌ ba nin bwaꞌha raꞌ ba, per ziahan bwelta gunaabadxyiꞌdxyi loh lasaaꞌ raꞌ ba cuun nin naa nin gabahan loh guelguhchi,

¹¹ya gunaabadxyiꞌdxyi raꞌ ba loh Jesuhs rahbi raꞌ ba: ―¿Xixnaa rahbi raꞌ mwehsu raꞌ nin ruluuꞌyi xlehyi Moisehs nahpa galoh Elías dxiꞌ que no laꞌh Crixtu?

¹²Chiꞌchi rahbi Ñiꞌh loh raꞌ ba: ―Pwihsi guchii galoh Elías dxiꞌ tin dxiuꞌnzaꞌca ba garaatiiꞌ; neezaa rahbi loh Xchihtsi Dxiohs nahpa gutiꞌdxiloh Lliiꞌn Dxiohs trabahjw duxa nee zusaꞌcaloh za raꞌ ba laꞌh Ñiꞌh,

¹³per rñiꞌn loh tu laꞌh Elías biꞌ la ya laꞌh raꞌ bwiinn bwiꞌhnnee raꞌ ba laꞌh ba zigachiꞌzi guclaaꞌdzi raꞌ ba ziga rñiꞌ loh Xchihtsi Dxiohs. Basiaca Jesuhs laꞌh tuhbi ndxiꞌhw nin guyuuꞌ tuhbi bwiinndxaaba stoꞌ ñiꞌh (Mt. 17.14‑21; Lc. 9.37‑43)

¹⁴Ya chin babiaꞌgarii Ñiꞌh hasta rii raꞌ snuhn xpwiinn Ñiꞌh bwaꞌha Ñiꞌh ziahan duxa bwiinn rii gadiidxi raꞌ ba, nee cadxihldxyinee dxyiꞌdxyi paaldaa raꞌ mwehsu nin ruluuꞌyi xlehyi Moisehs laꞌh raꞌ xpwiinn Ñiꞌh,

¹⁵ya chin bwaꞌha raꞌ bwiinn ziahan chi laꞌh Jesuhs, badxyigaaꞌ loh raꞌ ba hasta balluꞌn raꞌ ba bagachiꞌloh raꞌ ba laꞌh Ñiꞌh tin bagaꞌpaDxiohs raꞌ ba laꞌh Ñiꞌh,

¹⁶chiꞌchi rahbi Jesuhs loh raꞌ xpwiinn Ñiꞌh: ―¿Xi niꞌca ruuꞌyidxyiꞌdxyinee tu laꞌh raꞌ ba?

¹⁷Chiꞌchi rahbi tuhbi raꞌ bwiinn chi loh Ñiꞌh: ―Mwehsu, riiꞌ zeꞌldaneꞌhn lliiꞌnahn laasii nuu tuhbi bwiinndxaaba stoꞌ bi nin basiaꞌhan goopa laꞌh bi tin gabweꞌhe luꞌh bwiinndxaaba chi stoꞌ bi,

¹⁸laasii chin rusaꞌcazii bwiinndxaaba chi laꞌh bi, rdxiindxiah bwiinndxaaba chi laꞌh bi loh yuh, rbweꞌhe ba bitsiꞌhn rwaaꞌ bi, nee hasta dxyigah rsihdzi loh lahyi bi. Squiiꞌ ruhnnee ba laꞌh bi nee cagasiuꞌnga gueldxyihdxyi chi laꞌh bi, niꞌchin nin gunaꞌbaꞌhn loh raꞌ xpwiinn luꞌh tin ñabweꞌhe raꞌ ba bwiinndxaaba chi stoꞌ bi per ayi bwiꞌhnn raꞌ ba gahn.

¹⁹Chiꞌchi rahbi Jesuhs loh raꞌ garaa bwiinn ziahan nin rii riꞌchi: ―¡Ayy, bwiinn raꞌ nin ayi riachiistoꞌ raꞌ ñiꞌh! ¡Bwiinn naxihn raꞌ! ¿Balaaca xchiꞌhla nin guꞌnnahn waanta chuuꞌhuhn loh tu? ¡Gultaaꞌnee lliiꞌngaaꞌn luꞌh riiꞌ!

²⁰Ya chiꞌchi gwanee raꞌ ba laꞌh biꞌnxtuhbi chi loh Jesuhs, per chin bwaꞌha bwiinndxaaba chi laꞌh Jesuhs, chiꞌchi gudxiindxiah bwiinndxaaba chi laꞌh bi loh yuh, dxyigah naꞌduꞌbi bi loh yuh zohba bitsiꞌhn rwaaꞌ bi,

²¹chiꞌchi rahbi Jesuhs loh xpah bi: ―¿Dez cuuca gunaꞌzu gueldxyihdxyi riiꞌ laꞌh bi? Chiꞌchi rahbi xpaah bi loh Ñiꞌh: ―Dez chin naa bi biñiꞌn,

²²nee ziahan la xclaaꞌdzi bwiinndxaaba ca gadxiinn laꞌh bi; rulaꞌh bwiinndxaaba ca laꞌh bi loh bwehla, loh ñihsa; per sidela zidxeela xa guunn luꞌh balahsastoꞌ luꞌh laꞌh nu nee bwiꞌhnn ayuda laꞌh nu.

²³Chiꞌchi rahbi Ñiꞌh loh bwiinn chi: ―¿Xa mohda rnaabadxyiꞌdxyi luꞌh sidela, zahca gacaneꞌhn yiꞌh? ¡Garaa zahca gacaneꞌhn laꞌh raꞌ bwiinn nin riachiistoꞌ raꞌ ñiꞌh zahca gacanee Dxiohs laꞌh raꞌ ba!

²⁴Chiꞌchi guzoꞌbaloh jweersi cañiꞌ xpaah biꞌnxtuhbi chi loh Ñiꞌh, rahbi ba: ―¡Riachiistoꞌn! ¡Bwiꞌhnn cumpahñu naꞌh tin mahzi ru chechiistoꞌn!

²⁵Ya chin bwaꞌha Jesuhs cagadiaaꞌha ziahan bwiinn chiꞌchi rahbi Ñiꞌh loh bwiinndxaaba chi: ―Bwiinndxaaba nin bwiꞌhnn gweꞌta cun goopa laꞌh biꞌnxtuhbi riiꞌ, naꞌh canabwaꞌn loh luꞌh tin bariaꞌh stoꞌ bi nee ayi dxiuꞌgarii ru luꞌh stoꞌ bi.

²⁶Chiꞌchi gudidxyidxiah bwiinndxaaba chi cun dxyigah guidxiindxiah ba laꞌh bi, lwehgu bariaꞌh ba stoꞌ bi, ya basaaꞌn ba laꞌh bi zigazi bwiinn guuchi, ya bwiꞌhnn raꞌ bwiinn ziahan nin rii riꞌchi lligaaba guhchi bi,

²⁷per laꞌh Ñiꞌh lwehgu guteesa Ñiꞌh laꞌh bi, ya lwehgu gwasuꞌnchii biꞌnxtuhbi chi.

²⁸Chiꞌchi biuuꞌgarii Ñiꞌh laꞌñuuꞌ, ya riꞌchi gunaabadxyiꞌdxyi ralaꞌn raꞌ xpwiinn Ñiꞌh loh Ñiꞌh tin ayi chyu bwiinn ñwaꞌha ya rahbi raꞌ ba: ―¿Xixnaa laꞌh nu ayi chyu bidiꞌhnn gahn ñabweꞌhe bwiinndxaaba chi?

²⁹Chiꞌchi rahbi Jesuhs loh raꞌ ba: ―Ziga lasaaꞌ bwiinndxaaba riiꞌ, ayi gaca cweꞌhe tu ba sidela ayi cwidxi-guinaaba tu loh Dxiohs, neezaa sidela ayi gucwaaꞌhan tu. Jesuhs guñiꞌ stuhbi laꞌgaꞌh xa gachi Ñiꞌh (Mt. 17.22‑23; Lc. 9.43‑45)

³⁰Chin babii raꞌ ba riꞌchi, badiiꞌdxi raꞌ ba nez loh guihdxyi raꞌ xteenn Galilea, ya guclaaꞌdzi Jesuhs ayi chyu ñahcabwaꞌ canehz nuu Ñiꞌh,

³¹niꞌchin baluuꞌyi Ñiꞌh laꞌh raꞌ xpwiinn Ñiꞌh nee rahbi za Ñiꞌh: ―Nahpa zutiꞌdxi raꞌ bwiinn duhlda naꞌh loh raꞌ nin rnabwaꞌ, ya zidxiinn raꞌ ba naꞌh, per chin dxiohnna dxyih guhchiꞌhn, zabahnaꞌhn loh raꞌ bwiinn guuchi.

³²Per laꞌh raꞌ xpwiinn Ñiꞌh ayi guhcabwaꞌ raꞌ ba xi zee loh dxyiꞌdxyi raꞌ chi, nee bidxyihbi za raꞌ ba ñinaaba dxyiꞌdxyi raꞌ ba xiñin zee loh raꞌn. Jesuhs guñiꞌ chyu mahzi lasahca (Mt. 18.1‑5; Lc. 9.46‑48)

³³Chin badzihnnee Ñiꞌh laꞌh raꞌ xpwiinn Ñiꞌh loh guihdxyi Capernaum, biuuꞌgarii Jesuhs laꞌn tuhbi yuuꞌ, chiꞌchi rahbi Ñiꞌh loh raꞌ ba: ―¿Xiñin zeꞌyuuꞌyidxyiꞌdxyi tu chin zoꞌpa nuꞌh loh neziuh?

³⁴Ya ayi guñiꞌtiiꞌ raꞌ xpwiinn Ñiꞌh, laasii laꞌh raꞌ ba zeꞌyuuꞌyidxyiꞌdxyi raꞌ ba chyu tuhbi raꞌ ba naa nin mahzi lasahca,

³⁵ya lwehgu guzohbagah Ñiꞌh chiꞌchi gudihdxyi Ñiꞌh laꞌh gadziꞌh bichiohpa raꞌ xpwiinn Ñiꞌh chiꞌchi rahbi Ñiꞌh loh raꞌ ba: ―Sidela xclaaꞌdzi tuhbi tu gaca lasahca, nahpa gaca tu tuhbi bwiinn nin nadoꞌlaadzi ru loh raꞌ garaa lasaaꞌ tu.

³⁶Chiꞌchi gucaꞌha Ñiꞌh tuhbi biñiꞌn biꞌtuꞌhn, ya bazuh Ñiꞌh laꞌh bi galaayi raꞌ ba chiꞌchi gudiꞌdzi Ñiꞌh laꞌh biñiꞌniꞌhn chi, chiꞌchi rahbi Ñiꞌh:

³⁷―Chyu chiꞌzi bwiinn nin gacanee tuhbi biñiꞌn squiiꞌ, zahcanee za ba naꞌh, nee bwiinn nin rahcanee naꞌh, ayi naꞌh dxiꞌhn rahcanee ba sino que nee Xtaada Dxiohsaꞌhn nin guluꞌnehza naꞌh rahcanee ba. Bwiinn nin ayi rñiꞌyah laꞌh nuꞌh, xlahdu nuꞌh nuu ba (Lc. 9.49‑50; Mt. 10.42)

³⁸Seguihdu rahbi Jwahn loh Ñiꞌh: ―Mwehsu, bidiaꞌha nu loh tuhbi bwiinn nin rabweꞌhe bwiinndxaaba stoꞌ raꞌ bwiinn cun xquelrnabwaꞌ lah luꞌh, ya bachidiꞌtsi nu loh ba ayi ru guunn ba ziꞌchi laasii ayi nee dxiꞌh ba caꞌnzahnee ba laꞌh nuꞌh.

³⁹Chiꞌchi rahbi Ñiꞌh loh raꞌ ba: ―Gulgasaaꞌn bwiinn chi laasii bwiinn nin ruhn dziꞌn roo raꞌ cun xquelrnabwaꞌ laan ayi xñiꞌyah ba naꞌh,

⁴⁰tin bwiinn raꞌ nin ayi xclaaꞌdzi childxinee laꞌh nuꞌh xlahdu gahca nuꞌh nuu raꞌ ba.

⁴¹Guchiin nin rñiꞌn loh tu, bwiinn nin guniꞌhi nicala tuhbi bahsu ñihsa laꞌh tu laasii naa tu xpwiiꞌnn raꞌn, Dxiohs gudiꞌhi prehmiu laꞌh ba. Rriezgu chuu xtuhlda raꞌ bwiinn (Mt. 18.6‑9; Lc. 17.1‑2)

⁴²Rahbi za Ñiꞌh: ―Chyu chiꞌh zi nin gusiaaba laꞌh biñiꞌn biꞌtuꞌhn raꞌ rii loh duhlda pur nin riachiistoꞌ raꞌ bi naꞌh, mas chaꞌyi gulaꞌha raꞌ ba laꞌh ba loh ñihsadoꞌ cun guchiꞌbi raꞌ ba tuhbi dxiah rooꞌ yahnn ba,

⁴³nee sidela naa luꞌh rutsiigan yiꞌh loh duhlda, mas chaꞌyi guchyuuꞌga luꞌhn; tin mas chaꞌyi chuꞌtii luꞌh loh xquelrnabwaꞌ Dxiohs dxuuca luꞌh xlawaaꞌha chee luꞌh gabihldxyi cun garoopa naa luꞌh hasta ayi dxiuuꞌyitiiꞌ dxih,

⁴⁴hasta tiidxi bwiinn trabahjw duxa para tuꞌpazi.

⁴⁵Ya sidela gadzihn dxyih gutsiiga ñaaꞌ luꞌh yiꞌh loh duhlda bachyuuꞌgan; mas chaꞌyi chuꞌtii luꞌh loh xquelrnabwaꞌ Dxiohs dxuuca luꞌh xlawaaꞌha garoopa ñaaꞌ luꞌh, chee luꞌh loh bwehla xteenn gabihldxi,

⁴⁶hasta tiidxi bwiinn trabahjw duxa para tuꞌpazi.

⁴⁷Nee sidela laꞌh tuhbi bizloh luꞌh gusiaaban yiꞌh loh duhlda, guleꞌhen; mas chaꞌyi chuꞌtii luꞌh loh xquelrnabwaꞌ Dxiohs nicala cun tuhbi si bizloh luꞌh xlawaaꞌha chenee garoopan yiꞌh loh dxih xteenn gabihldxyi

⁴⁸hasta tiidxi bwiinn trabahjw duxa nin ayi chaꞌloh, nee ayi gariaꞌh raꞌ ba riꞌchi,

⁴⁹laasii ziga rrohba zihdxi yihca xi chiꞌh zi guelwahw, ziꞌchi za chioobaa bwehla yihca garaa raꞌ bwiinn.

⁵⁰Bwen naa zihdxi, per sidela guñihchin guelnallii, ¿xaalla guunn chiꞌh tu dxiaca zaꞌcan? Ziꞌchi gahca laꞌh tu, gulgahca ziga zihdxi nin nallii tin gaca galluꞌyi tu loh raꞌ bwiinn guidxyiyuh, nee gulguibahannee zaꞌca lasaaꞌ tu.