Read Chichicapan Zapotec San Juan 11 Bible Online

San Juan 11 - Chichicapan Zapotec bible

San Juan 11

¹Guyuuꞌ tuhbi ndxiꞌhw nin biriaꞌlah Lásaro guhcalluꞌhu ba, guhca ba tuhbi bwiinn guihdxyi Betania, lahdxyi María cun stuhbi bwehldaa bi nin laa Marta.

²María riiꞌ naa bizaaꞌn Lásaro, laꞌh bi nin gudaꞌbi nsehchi ñaaꞌ Jesuhs ya bacwihdzi bin cun dxyichyihca bi.

³Pwihsi garoopa raꞌ gunnaꞌh raꞌ riiꞌ nin naa bizaaꞌn Lásaro guxeꞌhla rsohn loh Jesuhs rahbi raꞌ bi: ―Daada, laꞌh xamihgu luꞌh nin nadziiꞌhi luꞌh cayahcalluꞌhu.

⁴Ya laꞌh Jesuhs chin bihn Ñiꞌh dxyiꞌdxyi raꞌ riiꞌ rahbi Ñiꞌh: ―Gueldxyihdxyi riiꞌ ayi guunnan gachitiiꞌ Lásaro para tuꞌpazi, sino que nahpa zalluꞌyin tin guluuꞌyin xa naa xquelrnabwaꞌ Dxiohs, nee cun xcweenta za xquelrnabwaꞌ Lliiꞌn Ñiꞌh.

⁵Nicala laꞌh Jesuhs nadziiꞌhi duxa Ñiꞌh laꞌh Marta cun bwehldaa bi cun laꞌh Lásaro,

⁶chin rahbi raꞌ bi Lásaro cayahcalluꞌhu ayi gwah Jesuhs biaꞌhanru Ñiꞌh schiohpa dxyih nez hasta nuu Ñiꞌh,

⁷ya seguihdu chin gudiiꞌdxi dxyih raꞌ chi chiꞌchi rahbi Ñiꞌh loh raꞌ xpwiinn Ñiꞌh: ―Gulchooꞌho stuhbi para guihdxyi Judea.

⁸Ya chiꞌchi rahbi raꞌ xpwiinn Ñiꞌh loh Ñiꞌh: ―Mwehsu, gueꞌdugah guclaaꞌdzi raꞌ bwiinn Israel raꞌ nin rii raꞌ riꞌchi ñucaꞌh dxiah yiꞌh tin ñidxiinn raꞌ ba yiꞌh, ¿nee nnah xclaaꞌdzi laꞌgaꞌh luꞌh chee luꞌh riꞌchi stuhbi?

⁹Chiꞌchi rahbi Jesuhs loh raꞌ ba: ―¿Tayi guchiidxiꞌhn tsiꞌh bichiohpa hohra nuu tuhbi dxyih? Pwihsi sidela naꞌh rzaꞌhn radxyii ayi chyu nahpa gugaꞌhla naꞌh laasii rwaꞌha raꞌ ba biaꞌñih nin nuu loh guidxyiyuh riiꞌ,

¹⁰per ziga bwiinn nin rzah loh nacahyi, zireꞌlda ba chyuulla, laasii ayi nahpa ba biaꞌñih.

¹¹Chiꞌchi rahbilaꞌgaꞌh Ñiꞌh: ―Laꞌh xamihgu nuꞌh Lásaro guhtaꞌxgahsi, per nahpa guzoo nuꞌh tin gucwaꞌnaꞌhn bi.

¹²Ya chiꞌchi rahbi raꞌ xpwiinn Ñiꞌh: ―Daada, sidela guhtaꞌxgahsi si bi, ziaaca bi.

¹³Per nin guñiꞌ Jesuhs naa guhchi Lásaro gaduhbi nin riiyuhnn raꞌ xpwiinn Ñiꞌh lligaaba nastoꞌ raꞌ ba guhtaꞌxgahsi si Lásaro,

¹⁴ya chiꞌchi rahbi Jesuhs loh raꞌ ba nayaa-nayaa: ―Laꞌh Lásaro guhchi,

¹⁵riahxiꞌhn laasii ayi guyuuꞌhuhn riꞌchi, laasii ziꞌchi naa bwen para laꞌh tu, tin ziꞌchi chechiistoꞌ tu. Yannah gulchooꞌho tin chodiaꞌhan nuꞌh ba.

¹⁶Ya chiꞌchi laꞌh Tomahs, nin guñiꞌ raꞌ ba badoꞌ cwaachi, rahbi loh spaaldaa raꞌ xpwiinn Ñiꞌh: ―Gulchooꞌho choo nuꞌh nee raꞌ nuꞌh tin gachinee nuꞌh laꞌh ba. Jesuhs naa guelgabahan cun guelnabahan para laꞌh raꞌ bwiinn raꞌ

¹⁷Ya chin badzihn Ñiꞌh riꞌchi, laꞌh tahpa dxyih naala guhchi Lásaro laꞌh ba bigaꞌtsi la.

¹⁸Guihdxyi Betania riaꞌhan ziga chiꞌh chohnna kilómetru gahxu para guihdxyi Jerusalehn,

¹⁹ya ziahan raꞌ bwiinn Israel raꞌ gwaguiaꞌha cuun Marta cun María tin dxiaꞌlda stoꞌ raꞌ bi pur nin guhchi Lásaro,

²⁰ya chin bihn Marta laꞌh Jesuhs zeegadzihn riꞌchi, bireꞌh bi tin bagachiꞌloh bi laꞌh Jesuhs ya María biaꞌhan bi rwaaꞌ yuuꞌ,

²¹chiꞌchi rahbi Marta loh Jesuhs: ―Daada, sidela yiꞌh nuu luꞌh riiꞌ, ayi ñahchi bizaaꞌnahn,

²²per naꞌh naꞌnnahn Dxiohs guniꞌhi yiꞌh garaa raꞌ nin guinaaba luꞌh.

²³Chiꞌchi rahbi Jesuhs: ―Zabiaꞌgarii gabahan bizaaꞌn luꞌh.

²⁴Chiꞌchi rahbi Marta: ―Pwihsi, naꞌh naꞌnnahn nahpa gabahan raꞌ bwiinn raꞌ nin guhchi dxyih nin gaduhbi guidxyiyuh.

²⁵Ya chiꞌchi rahbi Jesuhs: ―Naꞌh naan guelnabahan nin gabahan raꞌ bwiinn loh guelguhchi dxyih chi, ya bwiinn nin chechiistoꞌ ñiꞌh naꞌh, nicala gachi ba per zabahan ba,

²⁶ya garaa raꞌ bwiinn nin nabahan raꞌ nee riachiistoꞌ raꞌ ba naꞌh, pwihsi ayi ñichiloh raꞌ ba par tuꞌpazi. ¿Ta riachiistoꞌ luꞌh dee raꞌ? ―rahbi Jesuhs loh Marta.

²⁷Chiꞌchi rahbi Marta: ―Riachiistoꞌn Daada, naꞌh riachiistoꞌn yuꞌbiluꞌh naa luꞌh Crixtu, Lliiꞌn Dxiohs, Crixtu nin nahpa dxiꞌ loh guidxyiyuh. Biꞌn Jesuhs rwaaꞌ xpaꞌ Lásaro

²⁸Ya chin guyaꞌloh guñiꞌ Marta dxyiꞌdxyi raꞌ riiꞌ, chiꞌchi gwagañiꞌ bi loh bwehldaa bi María, ya guñiꞌ bi loh María dxigah si rahbi bi: ―Laꞌh mwehsu zuu riiꞌ, cabwihdxyi za ba yiꞌh.

²⁹Ya chin bihn María dxyiꞌdxyi raꞌ riiꞌ lwehgu gwaguiaꞌha bi hasta zuu Jesuhs,

³⁰ya laꞌh Jesuhs nagahdxi chuꞌtii Ñiꞌh lahda guihdxyi chi hohra chi sino que zuu Ñiꞌh nez hasta badxiꞌloh Marta laꞌh Ñiꞌh,

³¹ya bwiinn Israel raꞌ nin riinee laꞌh María tin dxiaꞌldastoꞌ bi bizaaꞌn bi Lásaro, chin bwaꞌha raꞌ ba gwasuꞌnchii María, zenaꞌhla raꞌ ba laꞌh María bwiꞌhnn raꞌ ba lligaaba zee bi rwaaꞌ baꞌ zeedxiꞌn bi,

³²ya chin badzihn María hasta zuu Jesuhs, bazuꞌnllihbi bi loh Jesuhs chiꞌchi rahbi bi loh Ñiꞌh: ―Daada, sidela yiꞌh nuu luꞌh riiꞌ, ayi ñahchi bizaaꞌnahn Lásaro.

³³Ya chin bwaꞌha Jesuhs cayuꞌn María cun bwiinn Israel raꞌ nin zeꞌnee bi cayuꞌn za raꞌ ba, guhca nalaasa stoꞌ Ñiꞌh,

³⁴ya chiꞌchi gunaabadxyiꞌdxyi Ñiꞌh rahbi Ñiꞌh: ―¿Canehza bacaꞌtsi tu xcweerpu Lásaro? Ya rahbi raꞌ ba: ―Daada, gudaaꞌguiaꞌha.

³⁵Chiꞌchi biꞌn Jesuhs riꞌchi,

³⁶ya rahbi raꞌ bwiinn Israel raꞌ chi: ―Gulguiaꞌha balaaca riaa ba laꞌh Lásaro.

³⁷Per paaldaa raꞌ ba rahbi: ―Niꞌca dxiꞌh nin basiaca loh bwiinn nin guulaa dxieꞌpa; ¿tayi xiilla ñuhnn ba laꞌh Lásaro tin ayi ñahchi ba? Babahn Lásaro loh guelguhchi

³⁸Gubiaꞌgarii guhca nalaasastoꞌ Jesuhs, chiꞌchi gwabiiga Ñiꞌh hasta bigaꞌtsi Lásaro. Riꞌchi naa tuhbi cwehva dxiah, ya ñieꞌw tuhbi dxiah rooꞌ rwaaꞌ baꞌ chi.

³⁹Chiꞌchi rahbi Jesuhs: ―Gulcooꞌba dxiah ca. Ya chiꞌchi rahbi Marta bizaaꞌn Lásaro loh Jesuhs: ―Daada, xchiaꞌ nadxaaba la tihxi Lásaro, laasii laꞌh tahpa dxyih guhca la guhchi bi.

⁴⁰Chiꞌchi rahbi Jesuhs: ―¿Tayi guñiꞌdxiꞌhn loh luꞌh sidela yiꞌh chechiistoꞌ luꞌh xchiꞌdxyiꞌhn, zwaꞌha luꞌh xquelrnabwaꞌ Dxiohs?

⁴¹Ya chiꞌchi gudooꞌba raꞌ ba dxiah chi, chiꞌchi bwaꞌha Jesuhs nez llaaꞌndxibaaꞌ chiꞌchi rahbi Ñiꞌh: ―Paah, runiꞌhihn guelzuxchiilli loh yuꞌbiluꞌh laasii bihn luꞌh xchiꞌdxyiꞌhn.

⁴²Naꞌh naꞌnnahn ayi chuu dxyih nin ayi dxihn luꞌh chin rñiꞌn loh yuꞌbiluꞌh, pwihsi rñiꞌñin pur bwiinn raꞌ nin rii riiꞌ, tin chechiistoꞌ raꞌ ba yiꞌh guluꞌnehza luꞌh naꞌh.

⁴³Ya chin guyaꞌloh guñiꞌ Ñiꞌh dxyiꞌdxyi raꞌ riiꞌ, guñiꞌ Ñiꞌh jweersi rooꞌ rahbi Ñiꞌh: ―¡Lásaro! ¡Bareꞌh riꞌca!

⁴⁴Ya lwehgu bariaꞌh bwiinn guuchi chi riꞌchi, yiꞌbi naa ba cun ñaaꞌ ba cun lahdxi ya loh ba ñieꞌw tuhbi taaꞌha lahdxi, chiꞌchi rahbi Jesuhs: ―Gulgabweꞌhe lahdxi ca tihxi ba tin gulgasaaꞌn ba guziaa ba. Biaꞌhandxyiꞌdxyi raꞌ bwiinn Israel tin chiꞌhyi raꞌ ba xa gachi Jesuhs (Mt. 26.1‑5; Mr. 14.1‑2; Lc. 22.1‑2)

⁴⁵Ya chiꞌchi ziahan raꞌ bwiinn Israel raꞌ chi nin bieꞌnee laꞌh María gwachiistoꞌ raꞌ ba laꞌh Jesuhs pur nin bwaꞌha raꞌ ba bwiꞌhnn Ñiꞌh,

⁴⁶per snuhn raꞌ ba gwah loh raꞌ bwiinn fariseu tin gwagañiꞌ raꞌ ba loh raꞌ bwiinn raꞌ chi cuun nin bwiꞌhnn Jesuhs,

⁴⁷ya chiꞌchi badiaaꞌha raꞌ bixohza raꞌ nin rnabwaꞌ loh raꞌ bixohza cun bwiinn fariseu raꞌ ya rahbi raꞌ ba: ―¿Xa niꞌca guidiꞌhnn nuꞌh? Ndxiꞌhw riiꞌ zeezah cayuhnn ziahan ru sehn roo raꞌ,

⁴⁸ya sidela laꞌh nuꞌh gasaaꞌn nuꞌh, garaa raꞌ bwiinn chechiistoꞌ ñiꞌh laꞌh ba, ya laꞌh raꞌ guxchisi romano ziꞌ raꞌ ba riiꞌ ya zucwih raꞌ ba xquidoꞌ nuꞌh cun gaduhbi lahdxyi nuꞌh.

⁴⁹Per tuhbi raꞌ ba nin laa Caifahs, laꞌn dxyih raꞌ chi rnabwaꞌ ba loh garaatiiꞌ raꞌ bixohza, naa ba nin naa bixohza rooꞌ loh raꞌ ba laꞌn dxyih raꞌ chi, ya rahbi ba: ―Laꞌh tu nin ayi xi rdxeela yihca tu,

⁵⁰nin ayi rahcabwaꞌ tu naa bwen para laꞌh nuꞌh gachi tuhbi dxiꞌ bwiinn xlawaaꞌha ñichiloh garaa raꞌ bwiinn lahdxyi raꞌ nuꞌh.

⁵¹Per laꞌh Caifahs ayi biinloh dxyiꞌdxyi riiꞌ yihca ba pur xcweenta gahca ba, sino que guñiꞌ ban laasii Dxiohs basiin lohon rwaaꞌ ba, nee pur nin naa za ba bixohzarooꞌ yihza chi niꞌchin guñiꞌxgah ba gachi Jesuhs que no ñahchi garaa raꞌ bwiinn Israel,

⁵²nee ayi sola laꞌh si dxiꞌh bwiinn Israel, sino que tin nee gadiaaꞌha raꞌ garaa raꞌ xpwiinn Dxiohs nin rii raꞌ nezii-neziꞌchi loh gaduhbi guidxyiyuh tin dxiahca raꞌ ba tuhsi guihdxyi xteenn Dxiohs.

⁵³Pwihsi desde dxyih chi guzoꞌbaloh cadxiꞌhyi raꞌ bwiinn Israel raꞌ chi xa chiinn raꞌ ba laꞌh Jesuhs.

⁵⁴Ya pur deeꞌ niꞌchin ayi ru gwazah Jesuhs labwehnutiiꞌ lahda raꞌ bwiinn Israel raꞌ, sino que biriaꞌh Ñiꞌh zee Ñiꞌh loh guihdxyi Judea, tin zee Ñiꞌh loh dahan desiertu, loh tuhbi guihdxyi nin laa Efraín; riꞌchi biaꞌhannee Ñiꞌh laꞌh raꞌ xpwiinn Ñiꞌh,

⁵⁵ya zalliaaꞌyiꞌhn riaꞌdxyi para gadzihn lañih paascu xteenn raꞌ bwiinn Israel raꞌ, niꞌchin ziahan bwiinn raꞌ xteenn raꞌ guihdxyi raꞌ chi zee raꞌ ba guihdxyi Jerusalehn, tin zee gasiaa raꞌ ba lastoꞌ raꞌ ba riꞌchi galoh nin gaca lañih paascu,

⁵⁶ya caꞌngadxiꞌhyi raꞌ ba laꞌh Jesuhs, niꞌchin chin rii raꞌ ba laꞌn guidoꞌ gunaabadxyiꞌdxyi loh lasaaꞌ raꞌ ba, rahbi raꞌ ba: ―¿Ta ruhnn tu lligaaba ziꞌ Jesuhs lañih o ayi dxiꞌ ba?

⁵⁷Ya laꞌh raꞌ bwiinn fariseu raꞌ cun nin rnabwaꞌ loh raꞌ bixohza guñiꞌ raꞌ ba loh raꞌ bwiinn sidela chyuulla tuhbi bwiinn gwaꞌha laꞌh Jesuhs, guiñiꞌ raꞌ ba ca zuu Jesuhs tin guinaꞌzu raꞌ ba laꞌh Ñiꞌh.