Read Chichicapan Zapotec San Juan 2 Bible Online

San Juan 2 - Chichicapan Zapotec bible

San Juan 2

¹Ya chin guhca chohnna dxyih, guyuuꞌ tuhbi saaꞌ loh guihdxyi Canah, xteenn guihdxyi nin laa Galilea. Neezaa xmah Jesuhs zuu riꞌchi,

²ya Jesuhs cun xpwiinn Ñiꞌh biduꞌhun Ñiꞌh tin gwah Ñiꞌh saaꞌ riꞌchi.

³Ya chin gubihdzi vihnnu nin cayuhnn saaꞌ, chiꞌchi rahbi xmah Jesuhs loh Ñiꞌh: ―Ayiru nahpa raꞌ bwiinn raꞌ riiꞌ vihnnu, laꞌn gubihdzi.

⁴Chiꞌchi rahbi Jesuhs: ―Gunnaꞌh, ¿xixnaa rñiꞌ luꞌh loon ziꞌca? Nagahdxi guigaꞌha xohraꞌhn.

⁵Chiꞌchi rahbi xmah Jesuhs loh raꞌ bwiinn raꞌ nin guzuh gutiꞌdxi nin guichiꞌhn raꞌ bwiinn raꞌ nin rii raꞌ loh mweella: ―Gulguiꞌhnn garaa nin nnaa Jesuhs loh tu.

⁶Riꞌchi zuu xoꞌpa riiꞌdxiah, nin riuuꞌ ñihsa nin rdxiꞌbinaa raꞌ bwiinn Israel raꞌ tin rahca nayaa raꞌ ba tin ziꞌchi rzohba dxyiꞌdxyi ruzaꞌloh raꞌ ba xlehyi guehtu Moisehs. Ya laꞌn tuhbi raꞌ riiꞌdxiah raꞌ chi rdaꞌh ziga chywaꞌh o chwaꞌhbitsiꞌh lihtru ñihsa.

⁷Chiꞌchi rahbi Jesuhs loh raꞌ mooza raꞌ chi: ―Gulgachah ñihsa laꞌn raꞌ riiꞌdxiah raꞌ ca. Ya bachah raꞌ ba ñihsa laꞌn raꞌ riiꞌdxiah chi hasta que no gwadxah raꞌn,

⁸chiꞌchi rahbi Jesuhs loh raꞌ ba: ―Yannah gulcweꞌhe nuhnan gulchenee guicaꞌha bwiinn nin cayuhnn saaꞌ riiꞌ. Ya bwiꞌhnn mooza raꞌ chi ziga guhdzi Jesuhs guunn raꞌ ba.

⁹Chiꞌchi gwaaꞌ bwiinn nin cayuhnn saaꞌ chi nuhn ñihsa nin biahca vihnnu (ya nin ayi gaann ba canehza guzah vihnnu chi, sola laꞌh raꞌ mooza raꞌ chi naann raꞌ ba canehza guzah vihnnu chi). Chiꞌchi gudihdxyi bwiinn nin cayuhnn saaꞌ laꞌh nuꞌbi nbahyi,

¹⁰chiꞌchi rahbi ba: ―Garaatiiꞌ raꞌ bwiinn guee raꞌ mwehrgaloh vihnnu zaꞌca, ya chin laꞌh raꞌ ba gwaaꞌ ziꞌyi vihnnu zaꞌca, chiꞌchi guee raꞌ gaꞌh ba nuhn vihnnu corrienta, per yiꞌh nuu guꞌchaꞌyi luꞌh vihnnu zaꞌca chi hasta nnah.

¹¹Mwer dziꞌn rooꞌ riiꞌ naa nin bwiꞌhnn Jesuhs loh guihdxyi Canah xteenn Galilea, tin baluuꞌyi Ñiꞌh xa naa guelrnabwaꞌ xteenn Ñiꞌh; pwihsi neezaa raꞌ xpwiinn Ñiꞌh gwachiistoꞌ raꞌ ba laꞌh Ñiꞌh.

¹²Ya chin guyaꞌloh bwiꞌhnn Jesuhs deeꞌ, chiꞌchi gunaꞌzunehza Ñiꞌh zee Ñiꞌh para guihdxyi Capernaum, cun xmah Ñiꞌh, cun bwiinn raꞌ nin naa bwihtsi Ñiꞌh, cun xpwiinn za Ñiꞌh; ya loh guihdxyi raꞌ chi biaꞌhannee Ñiꞌh laꞌh raꞌ ba paaldaa dxyih raꞌ. Jesuhs basiaa laꞌn guidoꞌ rooꞌ (Mt. 21.12‑13; Mr. 11.15‑18; Lc. 19.45‑46)

¹³Ya ziga laꞌh xlañih paascu raꞌ bwiinn Israel raꞌ zeꞌgadzihn chin riagannastoꞌ raꞌ ba gueꞌla nin gudiiꞌdxi aanjla guelguhchi loh guihdxyi Egiptu, niꞌchin gunaꞌzunehza Jesuhs, zee Ñiꞌh para loh guihdxyi Jerusalehn.

¹⁴Ya chin badzihn Ñiꞌh riꞌchi, bwaꞌha Ñiꞌh rii raꞌ bwiinn raꞌ nin ruhnn raꞌ guriꞌxi laꞌn guidoꞌ rooꞌ; bwiinn raꞌ nin rutooꞌ raꞌ guidxaꞌh cun palohmma raꞌ, bwiinn raꞌ nin zohba raꞌ hasta zuu raꞌ mwehlla raꞌ hasta ruchaꞌh raꞌ bwiinn mweeyi.

¹⁵Chin bwaꞌha Ñiꞌh garaa raꞌ cohsa raꞌ riiꞌ, chiꞌchi bwiꞌhnnchaꞌyi Jesuhs tuhbi cwaarta duꞌh ya babweꞌhedxiaꞌhla Ñiꞌh laꞌh raꞌ ba hasta nez dihtsi guidoꞌrooꞌ, cun xiꞌhyi raꞌ ba cun ziahan ru raꞌ guidxaꞌh raꞌ. Ya bwiinn raꞌ nin ruchaꞌh mweeyi, bazaꞌh Ñiꞌh xmweeyi raꞌ ba loh yuh, ya xmweella raꞌ ba nezii-nezichi balaꞌha Ñiꞌhn.

¹⁶Ya rahbi Ñiꞌh loh raꞌ bwiinn raꞌ nin rutooꞌ palohmma: ―¡Gulgabweꞌhe niꞌca raꞌ riiꞌ! ¡Ayi guunn tu yihdzi Xtaaꞌdahn ziga tuhbi loh dxiaaꞌ!

¹⁷Ya chiꞌchi bagannaastoꞌ raꞌ xpwiinn Ñiꞌh nin caa loh Xchihtsi Dxiohs squiiꞌ: “Rdiꞌhillahn stoꞌn xcweenta nin ruhnnee raꞌ ba yihdzi luꞌh.”

¹⁸Ya chiꞌchi gunaabadxyiꞌdxyi raꞌ bwiinn Israel loh Jesuhs, rahbi raꞌ ba: ―¿Xi sehn guluuꞌyi luꞌh laꞌhnu tin guidiaꞌha nu nahpa luꞌh guelrnabwaꞌ cayuhnn luꞌh dziꞌn raꞌ ca?

¹⁹Chiꞌchi rahbi Jesuhs loh raꞌ ba: ―Gulgacwih guidoꞌ riiꞌ, ya chin dxiohnna dxyih ziuꞌn nacuubiñin stuhbi.

²⁰Chiꞌchi rahbi raꞌ bwiinn Israel raꞌ chi loh Ñiꞌh: ―Chwaꞌhabi xoꞌpa yihza guhcachaꞌyi guidoꞌ riiꞌ, ¿nee yiꞌh nnaa luꞌh chohnna si dxyih dxiuꞌn zaꞌca luꞌhn?

²¹Per xcweenta guidoꞌ nin guñiꞌ Jesuhs loh raꞌ bwiinn raꞌ chi naa bweꞌltihxi Ñiꞌh.

²²Pwihsi niꞌchin chin babahn Ñiꞌh loh guelguhchi, bagannastoꞌ raꞌ xpwiinn Ñiꞌh xcweenta dxyiꞌdxyi raꞌ riiꞌ, ya ziꞌchi gwachiistoꞌ raꞌ ba ziga caa loh Xchihtsi Dxiohs cun ziga guñiꞌ Jesuhs xchiꞌdxyi Ñiꞌh. Nuꞌnbwaꞌ Jesuhs lastoꞌ garaa raꞌ bwiinn

²³Ya gaduhbi nin zuu Jesuhs loh lañih nin cayahca loh guihdxyi Jerusalehn nin naa xlañih paascu raꞌ bwiinn Israel, ziahan raꞌ bwiinn raꞌ gwachiistoꞌ raꞌ ba xchiꞌdxyi Ñiꞌh laasii bwaꞌha raꞌ ba sehn raꞌ cun dziꞌn roo raꞌ nin bwiꞌhnn Jesuhs riꞌchi.

²⁴Per ayi xi guerzaaꞌ guyuuꞌ Ñiꞌh pur laꞌh raꞌ bwiinn, laasii ya nuꞌnbwaꞌ Ñiꞌh lastoꞌ garaatiiꞌ raꞌ bwiinn.

²⁵Ayi xchiꞌhn Ñiꞌh bweꞌzi chyu ñahbi xcweenta raꞌ bwiinn loh Ñiꞌh, laasii laꞌh gahca Ñiꞌh nuꞌnbwaꞌ Ñiꞌh xa naa lastoꞌ cada tuhbigah raꞌ bwiinn.