Read Chichicapan Zapotec San Juan 20 Bible Online

San Juan 20 - Chichicapan Zapotec bible

San Juan 20

¹Ya mwer dxyih xteenn xmahn raꞌ bwiinn Israel, gwah María Magdalena rwaaꞌ baꞌ nez hasta bigaꞌtsi Jesuhs, nee nateyiꞌhnruzan gwah ba rwaaꞌ baꞌ; ya chin badzihn ba riꞌchi bwaꞌha ba bidoꞌba dxiah nin bieꞌw rwaaꞌ baꞌ chi,

²ya chiꞌchi gubiaꞌgarii galluꞌhn ba bwaa ba hasta nuu Simohn Pehdru cun stuhbi xpwiinn Jesuhs nin guhcanadziiꞌhi Jesuhs, chiꞌchi rahbi gunnaꞌh chi: ―¡Pweda bagaleꞌhe raꞌ ba bweꞌltihxi Jesuhs laꞌn baꞌ, per ayi chyu gaann canehza gwanee raꞌ ba laꞌh Ñiꞌh!

³Ya chiꞌchi biriaꞌh Pehdru cun stuhbi bwiinn chi nin naa xpwiinn Jesuhs gwaguiaꞌha raꞌ ba rwaaꞌ baꞌ.

⁴Garoopa raꞌ ba zee raꞌ ba carrih, per stuhbi ba mahzi carrih que laꞌh Pehdru ya galoh ba badzihn ba rwaaꞌ baꞌ hasta bigaꞌtsi Jesuhs.

⁵Chiꞌchi biaꞌchyu ba gudxihxiloh ba laꞌn baꞌ, ya sola bwaꞌha ba lahdxi raꞌ nin biduꞌbi Jesuhs, per ayi guyuuꞌtii ba laꞌn baꞌ.

⁶Ya hasta dihtsiyi ba badzihngaꞌh Pehdru, ya Simohn Pehdru guyuuꞌtii laꞌn baꞌ chi, chiꞌchi bwaꞌhaza ba lahdxi nin naꞌ laꞌn baꞌ chi,

⁷nee bwaꞌhaza ba tuhbi lahdxi nin biyiꞌbiduꞌh yihca Jesuhs per ayi naꞌan tuhsi juunta cun veenda raꞌ, sino que guriin lahta naꞌan diaꞌhan.

⁸Chiꞌchiyi guyuuꞌtii neezaa stuhbi xpwiinn Jesuhs laꞌn baꞌ, bwaꞌhaza ba nin guhca, nee gwachiistoꞌ ba.

⁹Pwihsi nagahdxi gacabwaꞌ ba nin rñiꞌ loh Xchihtsi Dxiohs; laꞌh Jesuhs nahpa gabahan Ñiꞌh loh guelguhchi.

¹⁰Ya chiꞌchi lwehgu gubiaꞌgarii raꞌ xpwiinn raꞌ chi para yihdzi raꞌ ba. Baluuꞌyiloh Jesuhs loh María Magdalena (Mr. 16.9‑11)

¹¹Ya laꞌh María biaꞌhan ba rwaaꞌ baꞌ chi, zohbayuꞌn ba; ya loh zohbayuꞌn ba chi biaꞌchyu ba bwaꞌha ba laꞌn baꞌ chi,

¹²ya bwaꞌha ba chiohpa aanjla nin nahcu lahdxi labweh, zohba raꞌ aanjla raꞌ chi hasta guhta bweꞌltihxi Jesuhs; ya tuhbi aanjla chi zohba nez hasta guhta yihca Jesuhs, ya stuhbi aanjla chi zohba nez hasta guhta ñaaꞌ Ñiꞌh.

¹³Ya chiꞌchi gunaaba dxyiꞌdxyi raꞌ aanjla raꞌ chi loh María, rahbi raꞌ ba: ―Gunnaꞌh, ¿xixnaa ruꞌn luꞌh? Chiꞌchi rahbi María: ―Ruꞌnaꞌhn laasii zeenee raꞌ ba bweꞌltihxi Jesuhs, yannah nin ayi rahcabwaꞌn canehza zeenee raꞌ ban.

¹⁴Ya gueꞌdu guyaꞌloh guñiꞌ ba dxyiꞌdxyi raꞌ riiꞌ chin luꞌh basiaꞌgariiloh ba nehz dihtsi ba, ya hohrchigahca bwaꞌha ba laꞌh Jesuhs zuu riꞌchi, per ayi guhcabwaꞌ ba laꞌh Jesuhs niꞌchi,

¹⁵chiꞌchi rahbi Jesuhs loh ba: ―Gunnaꞌh, ¿xixnaa ruꞌn luꞌh? ¿Chyu radxiꞌhyi luꞌh? Ya laꞌh gunnaꞌh chi bwiꞌhnn ba lligaaba naa Jesuhs tuhbi bwiinn nin rahpa weerta nin nuu riꞌchi, ya rahbi ba loh Ñiꞌh: ―Daada, sidela yiꞌh canehza gwanee luꞌh bweꞌltihxi Jesuhs, gunah canehz gwanee luꞌhn tin chegadxiꞌhyiñin riꞌchi.

¹⁶Chiꞌchi rahbi Jesuhs: ―¡María! Chiꞌchi basiaꞌgariiloh bi bwaꞌha bi ya guñiꞌ bi cun dxyiꞌdxyi hebreu, rahbi bi: ―¡Rabuni! (Nin naa gahca ziga guiñiꞌ luꞌh “Mwehsu”.)

¹⁷Chiꞌchi rahbi Jesuhs: ―Ayi guinaꞌzu luꞌh naꞌh, laasii nagahdxi guziaaꞌhahn nez hasta nuu Xpaaꞌn, per bwaa tin guhdzi loh raꞌ bwiꞌtsihn laꞌn gueꞌdu zuziaaꞌha nez hasta nuu Xpaaꞌn nin naa za Xpaah tu; nee Dxiohs xteꞌnnahn, cun nin naa za Xchiohs tu.

¹⁸Pwihsi chiꞌchi bwaa María Magdalena nez hasta nuu raꞌ xpwiinn Jesuhs ya rahbi ba loh raꞌ bwiinn chi bwaꞌha ba laꞌh Jesuhs, nee guhdzi za ba garaa nin guñiꞌ Jesuhs loh ba. Jesuhs baluuꞌyiloh loh raꞌ xpwiinn Ñiꞌh (Mt. 28.16‑20; Mr. 16.14‑18; Lc. 24.36‑49)

¹⁹Ya chin gurih gueꞌla dxyih chi gahca, mwer dxyih xteenn xmahn, badiaaꞌha raꞌ xpwiinn Jesuhs laꞌn tuhbi yuuꞌ, ya rwaaꞌ pweerta raꞌ chihpa ñeꞌw raꞌn laasii rdxyihbi raꞌ ba laꞌh raꞌ bwiinn Israel raꞌ. Chiꞌchi guyuuꞌtii Jesuhs hasta rii raꞌ ba, tin guzuh Ñiꞌh galaayi raꞌ xpwiinn Ñiꞌh, chiꞌchi guñiꞌ Ñiꞌh loh raꞌ ba, nee cun bagahpaDxiohs Ñiꞌh laꞌh raꞌ ba squiiꞌ: ―¡Gulcwahchidxyii stoꞌ tu!

²⁰Ya chin guyaꞌloh guñiꞌ Ñiꞌh squiiꞌ, chiꞌchi baluuꞌyi Ñiꞌh naa Ñiꞌh hasta guzohba raꞌ clahva cun loh batiꞌ tihxi Ñiꞌh hasta bigaꞌha lahnsa, ya laꞌh raꞌ xpwiinn Ñiꞌh biahxi duxa raꞌ ba chin bwaꞌha raꞌ ba laꞌh Jesuhs.

²¹Chiꞌchi rahbi Jesuhs stuhbi: ―¡Gulcwahchidxyii stoꞌ tu! Ziga guluꞌnehza Xtaaꞌdahn naꞌh, ziꞌchiza rguꞌneezahn laꞌhtu.

²²Chiꞌchi bwiꞌhnn Ñiꞌh bwih yihca raꞌ ba, ya rahbi Ñiꞌh: ―Gulguicaꞌha Spíritu Saantu.

²³Bwiinn raꞌ nin gusiaꞌldastoꞌ tu xtuhlda raꞌ ñiꞌh, zibiaꞌcaa xtuhlda raꞌ ba; ya bwiinn raꞌ nin ayi gusiaꞌldastoꞌ tu xtuhlda ñiꞌh, ziaꞌhannee raꞌ ba xtuhlda raꞌ ba chi. Tomahs bwaꞌha laꞌh Jesuhs babahn Ñiꞌh loh guelguhchi

²⁴Tomahs, tuhbi bwiinn nin naa gadziꞌh bichiohpa xpwiinn Jesuhs, nin rñiꞌh raꞌ ba “Gemelu”, ayi ba loh snuhn raꞌ xpwiinn Jesuhs chin biꞌ Ñiꞌh loh raꞌ ba,

²⁵ya chiꞌchi rahbi raꞌ snuhn raꞌ xpwiinn Jesuhs chi loh Tomahs: ―Laꞌhnu bidiaꞌha loh Jesuhs. Ya chiꞌchi rahbi Tomahs: ―Sidela naꞌh ayi cuꞌtiin bacwiin naaꞌhahn loh naa Ñiꞌh hasta guzohba clahva, cun cuꞌtii naaꞌhahn hasta bigaꞌha Ñiꞌh lahnsa, ayi chechiistoꞌn ziꞌchizi sola gwaꞌhan chiꞌchiyi chechii stoꞌn.

²⁶Ya chin guhca xuhnna dxyih, badiaaꞌha raꞌ xpwiinn Jesuhs stuhbi laꞌn tuhbi yuuꞌ, ya chiꞌchiyi nee Tomahs dxaꞌga loh raꞌ ba chiꞌchi; nee rwaaꞌ yuuꞌ chihpa ñieꞌwun per laꞌh Jesuhs guyuuꞌtii Ñiꞌh, guzuh Ñiꞌh galaayi raꞌ ba ya bagahpaDxiohs Ñiꞌh laꞌh raꞌ ba, chiꞌchi rahbi Ñiꞌh: ―¡Gulcwahchidxyii stoꞌ tu!

²⁷Ya lwehgu rahbi Ñiꞌh loh Tomahs: ―Guluuꞌtii bacwihn naa luꞌh rii, nee bwaꞌha gahca za naaꞌhahn, nee daꞌnee naa luꞌh rii tin guluuꞌtiiꞌhin tiꞌxihn hasta bigaꞌha lahnsa. Ayi rahca luꞌh ziga nin ayi riachii stoꞌ ñiꞌh sino que guhca bwiinn nin riachiistoꞌ ñiꞌh.

²⁸Ya chiꞌchi rahbi Tomahs: ―¡Daada Dxiohs xteꞌnnahn!

²⁹Ya chiꞌchi rahbi Jesuhs loh Tomahs: ―¿Ta riachiistoꞌ luꞌh nnah laasii bwaꞌha luꞌh naꞌh nnah? Per dichohsa raꞌ bwiinn raꞌ nin riachiistoꞌ ñiꞌh nicla ayi bwaꞌha raꞌ ba naꞌh. Xcweenta ziahan ru dziꞌn roo nin bwiꞌhnn Jesuhs aayin loh chihbru riiꞌ

³⁰Ya ziahan ru sehn milagrosa raꞌ nin bwiꞌhnn Jesuhs nez delaanta loh raꞌ xpwiinn Ñiꞌh aayin loh chihbru riiꞌ,

³¹per dee raꞌ gucah raꞌn tin chechiistoꞌ tu laꞌh Jesuhs naa Crixtu, Lliiꞌn Dxiohs, ya tin ziga chechiistoꞌ tu laꞌh Ñiꞌh gaapa tu guelnabahan nin ayi ñichilohtiiꞌ.