Read Chichicapan Zapotec Hechos 21 Bible Online

Hechos 21 - Chichicapan Zapotec bible

Hechos 21

¹Ya chin guyaꞌloh badzihnnee raꞌ xpwiinn Jesucristu laꞌhnu hasta bacah nu laꞌn barcu, ya zoo nu nez guihdxyi Cos, tuhbi isla nin rii loh ñihsadoꞌ, ya chin barah stuhbi gueꞌla badzihn nu stuhbi isla nin laa Rodas, ya de riꞌchi hasta tuhbi pwertu nin laa Pátara.

²Ya pwertu xteenn Pátara bidxuutii nu laꞌn barcu nin guzee nez naciohn Fenicia.

³Ya loh zezahnee barcu chi laꞌhnu bidiaꞌha nu isla nin laa Chipre nin rii loh ñihsadoꞌ; lahdu rabwehsa biaꞌhan isla chiꞌchi gudiiꞌdxinee barcu laꞌhnu riꞌchi, ya zootiiꞌ nu hasta estadu Siria, ya coma nahpaa basiaꞌhan raꞌ ba carga nin nuꞌa barcu chi pwertu xteenn Tiru.

⁴Ya guihdxyi Tiru chi badxiꞌloh nu xpwiinn raꞌ Jesucristu nin nuu raꞌ guihdxyi chi, ya bidxiaꞌhannee nu laꞌh raꞌ ba riꞌchi gahdzi dxyih, ya baluuꞌyi Spíritu Saantu laꞌh raꞌ ba guñiꞌ raꞌ ba loh Pahblu tin ayi chee ba para guihdxyi Jerusalehn.

⁵Ya chin bazaaꞌ gahdzi dxyih, chiꞌchi bagazunehza raꞌ ba laꞌhnu ndxiꞌhw gunnaꞌh raꞌ ba cun neezaa lliiꞌn raꞌ ba, ya loh plahyi xteenn rwaaꞌ ñihsadoꞌ chi bazuꞌnllihbi nu tin gudihdxyi-gunaaba nu loh Dxiohs tin gacanee Ñiꞌh laꞌh raꞌ garaa nin naa raꞌ xpwiinn Ñiꞌh.

⁶Chiꞌchi bagahpaa Dxiohs lasaaꞌ nu, ya seguihdu bacah nu laꞌn barcu ya laꞌh raꞌ xpwiinn Jesucristu nin biaꞌhan raꞌ riꞌchi gubiaꞌgarii raꞌ ba para rwaaꞌ yihdzii raꞌ ba.

⁷Ya chin guluhlla xpiahje nu nin zioꞌpa nu loh ñihsadoꞌ hasta guihdxyi Tiru cun guihdxyi Tolemaida, chiꞌchi biodiaꞌha nu cuun raꞌ xpwiinn Jesucristu nin nuu raꞌ guihdxyi chi, ya bidxiaꞌhannee nu laꞌh raꞌ ba tuhbi dxyih.

⁸Ya chin barah gueꞌla zoonee nu Pahblu para guihdxyi Cesarea, ya chin badzihn nu rwaaꞌ yihdzi Felipe tuhbi daada nin guleꞌhelah raꞌ ba Felipe Evangelista, naa za ba tuhbi ndxiꞌhw nin naa loh gahdzi ndxiꞌhw raꞌ nin rahcanee laꞌn guidoꞌ ya bidxiaꞌhan nu rwaaꞌ yihdzii ba.

⁹Nuu tahpa lliiꞌn dxaꞌpa Felipe nagahdxi guchinaa raꞌ bi, ya ruluuꞌyi raꞌ bi xchiꞌdxyi Jesucristu.

¹⁰Ya ziahanla dxyih dxuu nu rwaaꞌ yihdzi Felipe chin badzihn tuhbi daada nin zeꞌ nez guihdxyi Judea naa ba tuhbi profeta laa ba naa Agabo,

¹¹chiꞌchi gucaꞌha Agabu xsindohra Pahblu, tin bachiꞌbi Agabon ñaaꞌ ba cun naa ba, chiꞌchi nah ba: ―Nah Spíritu Saantu Dxiohs: squiiꞌ guchiꞌbi raꞌ bwiinn Israel raꞌ nin nuu guihdxyi Jerusalehn laꞌh ndxiꞌhw nin naa xteenn Ñiꞌh sindohra riiꞌ tin gutiꞌdxi raꞌ ba laꞌhba lahtsi naa raꞌ bwiinnziitu.

¹²Chin bihn nu dxyiꞌdxyi raꞌ chi, gunaaba duxa nu loh Pahblu cun neezaa bwiinn raꞌ nin nuu raꞌ riꞌchi tin ayi chee ba guihdxyi Jerusalehn,

¹³chiꞌchi nnaa Pahblu loh nu: ―¿Xi naa ruꞌn tu cun rguuꞌlaasa tu stoꞌn? Naꞌh dispwestu nuuꞌhuhn ayi tansola dxiꞌh guchiꞌbi raꞌ ba naꞌh nicla nee gachiꞌhn guihdxyi Jerusalehn pur xcweenta xchiꞌdxyi Xtaada Jesucristu nuꞌh.

¹⁴Ya cun ayiru chyu guiñiꞌ chin bihn nu guñiꞌ Pahblu ziꞌchi mejor bidiꞌtsii nu: ―Mas chaꞌyi chaꞌloh ziga naa xigaaba Dxiohs.

¹⁵Ya chin gudiiꞌdxi dxyih raꞌ chi, biluuꞌchaꞌyi nu xixteenn nu, ya seguihdu bariaꞌh nu guihdxyi Cesarea chi, chiꞌchiyi zoo chiꞌh nu para guihdxyi Jerusalehn.

¹⁶Ya cun nee raꞌ paaldaa xpwiinn Jesucristu nin naa raꞌ bwiinn guihdxyi Cesarea bagasiaꞌhan laꞌhnu guihdxyi Jerusalehn, loh raꞌ ba dxaꞌga tuhbi bwiinn Chipre nin laa Mnasohn, bwiinn chi naa tuhbi xpwiinn zaꞌca Jesucristu desde chieempa rooꞌ ya gwanee raꞌ bwiinn Cesarea chi laꞌhnu rwaaꞌ yihdzi Mnasohn tin biaꞌhan nu rwaaꞌ yihdzii ba. Biuꞌnbwaꞌ Pahblu laꞌh Jacobo

¹⁷Ya chin badzihn nu guihdxyi Jerusalehn, biahxi duxa raꞌ xpwiinn Jesucristu nin nuu raꞌ riꞌchi.

¹⁸Ya chin barah gueꞌla bionee nu Pahblu tin biodiaꞌha nu xa nuu Jacobo, ya riꞌchi rii raꞌ za bwiinn guhla nin rnabwaꞌ raꞌ laꞌh raꞌ xpwiinn Jesucristu nin rii guihdxyi Jerusalehn.

¹⁹Ya chin guyaꞌloh bagahpaa Dxiohs Pahblu laꞌh raꞌ ba, chiꞌchi bwiiꞌyidxyiꞌdxyi ba xcweenta cada tuhbi dziꞌn nin guhcanee Dxiohs laꞌhba bwiꞌhnn ba lahdxi raꞌ bwiinnziitu.

²⁰Ya chin guyaꞌloh bihn raꞌ ba garaa raꞌ dxyiꞌdxyi nin guñiꞌ Pahblu, chiꞌchi rahbi raꞌ ba pur chuhla naa Dxiohs nin nuu nabahan dxibaaꞌ, chiꞌchi rahbi raꞌ ba loh Pahblu: ―Yuꞌbiluꞌh, lasaaꞌ nu laꞌluꞌh naann loh raꞌ bwiinn Israel dxaꞌga raꞌ ziahan duxa raꞌ bwiinn nin riachii stoꞌ raꞌñiꞌh xchiꞌdxyi Jesucristu, ya garaa raꞌ ba xclaaꞌdzi raꞌ ba cheezah raꞌ ba cun xlehyi Moisehs.

²¹Ya rahbi raꞌ ba yiꞌh ruluuꞌyi luꞌh garaa raꞌ bwiinn Israel nin nuu raꞌ loh guihdxyi xteenn raꞌ bwiinnziitu ruuꞌyidxyiꞌdxyi raꞌ ba ruluuꞌyi luꞌh ayi gucaꞌh raꞌ ba bwaꞌ nin laa circuncisión tihxi lliiꞌn raꞌ ba nee ayiza cheezahnee ru raꞌ ba costumbre raꞌ nuꞌh.

²²¿Xa niꞌca guidiꞌhnn nuꞌh? Nahpaa dxihnn raꞌ ba laꞌluꞌh nuu riiꞌ.

²³Mas chaꞌyi guunn luꞌh ziga guiñiꞌ nu loh luꞌh: nuu tahpa ndxiꞌhw loh nu riiꞌ nin nahpa guzaꞌloh dxyiꞌydxyi nin biaꞌhannee raꞌ ba Dxiohs.

²⁴Gwanee raꞌ ba tin gulguiꞌhnn para dxiaa tu nee gudxihlli xgaxtu raꞌ ba tin guigah yihca raꞌ ba; ya garaa raꞌ ba zahcabwaꞌ raꞌ ba cun sehn chi ayi guchii dxiꞌh dxyiꞌdxyi mahla nin rñiꞌ raꞌ ba pur yiꞌh sino que guunn raꞌ ba lligaaba nee yiꞌh ruzoꞌbadxiahga luꞌh xlehyi Moisehs.

²⁵Ya laꞌhnu bacaꞌhla dxihtsi loh raꞌ bwiinnziitu tin ayi xi lligaaba guunn raꞌ ba pur xcweenta xlehyi Moisehs, nadamas nin ayi nuu guunn raꞌ ba ayi nuu gahw raꞌ ba cohsa raꞌ ziga guhn nin rianee raꞌ bwiinn loh raꞌ bwiinn gulaala, nee cun rihn za ayi gahw raꞌ ba, cun neezaa bweꞌhla guꞌa rihn, nee ayiza chuunee raꞌ ba nin ayi naa cheꞌhla raꞌ ba nomas niꞌchi si bacaꞌh nu loh dxihtsi ayi guunn raꞌ ba. Gunaꞌzu raꞌ bwiinn Israel laꞌh Pahblu

²⁶Ya seguihdu zeꞌnee Pahblu ndxiꞌhw raꞌ chi tin guunn raꞌ ba ziga caa loh xlehyi Moisehs, ya chin barah gueꞌla gwaguihtsi raꞌ ba loh bixohza nin rnabwaꞌ laꞌn xquidoꞌ raꞌ bwiinn Israel raꞌ chi xi dxyih chenee tuhbigah raꞌ ba tuhbi maan nin cwachiguhn raꞌ ba loh Dxiohs.

²⁷Ya laꞌh gahdzi dxyih raꞌ chi ya mwehru gazaaꞌ raꞌ la, chin bwaꞌha paaldaa bwiinn Israel raꞌ nin naa raꞌ bwiinn Asia loh Pahblu laꞌn guidoꞌ roo chi, chiꞌchi guñiꞌ raꞌ ba loh raꞌ bwiinn Israel raꞌ nin rii raꞌ laꞌn guidoꞌ chi tin ziꞌchi garaa raꞌ ba gunaꞌzu raꞌ ba laꞌh Pahblu.

²⁸Ya cañiꞌ raꞌ ba jweersi roo rahbi raꞌ ba: ―¡Garaatiiꞌ tu bwiinn Israel raꞌ gultaaꞌ gacanee tu laꞌhnu! ¡Ndxiꞌhw riiꞌ rñiꞌyah laꞌh raꞌ bwiinn Israel cun xcweenta xlehyi guehtu Moisehs cun neezaa xcweenta xquidoꞌ roo nuꞌh riiꞌ loh raꞌ bwiinn nez hastachiꞌhzi caꞌnzaa ba, nnah gulguiaꞌha loh ba xa zeꞌnee ba bwiinn griegu raꞌ laꞌn xquidoꞌ roo nuꞌh tin guxiꞌhn raꞌ ba xcweenta xlehyi xteenn xquidoꞌ roo raꞌ nuꞌh!

²⁹Guñiꞌ raꞌ ba garaa dxyiꞌdxyi raꞌ riiꞌ laasii tuhbi bweelta bwaꞌha raꞌ ba caꞌnzanee Pahblu laꞌh Trófimos nin naa tuhbi bwiinn Efesu ya bwiꞌhnn raꞌ ba lligaaba nee Trófimos canee Pahblu laꞌn guidoꞌ.

³⁰Ya gaduhbi guihdxyi raꞌ bwiinn Israel raꞌ chi badiaaꞌha tin babweꞌhecaa raꞌ ba laꞌh Pahblu laꞌn guidoꞌ roo chi ya gudoꞌballehxa raꞌ ba laꞌh Pahblu,

³¹per gaduhbi nin riiyuhnn raꞌ ba lligaaba gadxiinn raꞌ ba laꞌh Pahblu guyuuꞌ tuhbi nin bwiꞌhnn bihsi laꞌh comandante nin rnabwaꞌ laꞌh batayohn Romanu nin rii guihdxyi Jerusalehn chi tin gacabwaꞌ raꞌ ba laꞌh raꞌ bwiinn guihdxyi gadxiinn laꞌh tuhbi ndxiꞌhw.

³²Ya lwehgu zeꞌnee comandante chi suldahdu raꞌ cun paaldaa capitahn raꞌ nin rnabwaꞌ tuhbi gaywaꞌh suldahdu tin guyuuꞌtii galluꞌhn raꞌ ba lahdaa raꞌ bwiinn raꞌ chi, ya chin bwaꞌha raꞌ bwiinn guihdxyi chi laꞌh comandante cun suldahdu raꞌ lwehgu basaaꞌn raꞌ ba ya ayiru badiꞌhi goolpi raꞌ ba laꞌh Pahblu.

³³Chiꞌchi gwabiiga comandante chi loh Pahblu chiꞌchi gunabwaꞌ ba bachiꞌbi raꞌ xsuldahdu ba chiohpa cadehn naa Pahblu, chiꞌchiyi gunaaba dxyiꞌdxyi ba loh raꞌ bwiinn chi chyu bwiinn Pahblu nee xi bwiꞌhnn za ba.

³⁴Per ayi basaaꞌn raꞌ bwiinn ñucaꞌdxiahga ba nin ñiñiꞌ Pahblu laasii guriin-guriin cabwidxaaꞌ duxa raꞌ ba, mejor zenee raꞌ suldahdu raꞌ chi laꞌh Pahblu para xcwartel raꞌ ba.

³⁵Ya chin badzihnnee raꞌ ba laꞌh Pahblu hasta nuu escalohn rwaaꞌ xcwartel raꞌ ba, nahpa biꞌa raꞌ ba Pahblu hasta guiyaꞌ laasii naꞌhla bwidxidxiah bwiinn raꞌ chi cun neezaa dxiigah rreldaa lasaaꞌ raꞌ ba laasii dxiigah rbihdzi stoꞌ raꞌ ba gachi Pahblu.

³⁶Ya hasta badzihn raꞌ ba rwaaꞌ cwartel chi zeꞌ bwihdxyidxiah raꞌ ba tin rnaaba raꞌ ba gachi Pahblu.

³⁷Ya chin laꞌh raꞌ suldahdu chi ñiguuꞌtii laꞌh Pahblu laꞌn cwartel, chiꞌchi rahbi Pahblu loh comandante nin rnabwaꞌ loh batayohn chi: ―¿Ziziꞌguehdla luꞌh guiñiꞌn? Chiꞌchi rahbi comandante chi loh Pahblu: ―Rwaꞌhahn rahca rñiꞌ luꞌh dxyiꞌzah griegu.

³⁸Uhn, ayi yiꞌhdxiꞌh nin naa tuhbi ndxiꞌhw nin naa tuhbi bwiinn Egiptu nin gudxihldxinee laꞌh gubieerna, ndxiꞌhw chi caꞌnzanee ba tahpa mihyi bwiinn raꞌ loh dahan tin rdxiinn raꞌ bwiinn.

³⁹Chiꞌchi rahbi Pahblu loh comandante chi: ―Naꞌh naan tuhbi bwiinn Israel nin zeꞌ nez guihdxyi Tarsu, tuhbi guihdxyi lasahca loh raꞌ guihdxyi nin rnabwaꞌ Cilicia, niꞌchin rnaꞌbaꞌhn loh yuꞌbiluꞌh guunn luꞌh tuhbi bwen gusaaꞌn luꞌh guiñiꞌn loh raꞌ bwiinn riiꞌ.

⁴⁰Ya chin guziꞌguehlda ba guiñiꞌ Pahblu loh raꞌ bwiinn chi, chiꞌchi guteesa naa Pahblu tin biahcadxyi raꞌ bwiinn chi, ya loh nin babwihdxyi raꞌ ba chiꞌchiyi guñiꞌ Pahblu dxyiꞌzah Hebreu loh raꞌ ba, rahbi ba: