Read Chichicapan Zapotec Hechos 28 Bible Online

Hechos 28 - Chichicapan Zapotec bible

Hechos 28

¹Yaque gulaꞌh nu loh guelguhchi, chiꞌchiyi biuꞌnbwaꞌ nu isla nin laa Malta.

²Guhcanee duxa raꞌ bwiinn riꞌchi laꞌhnu bataꞌh raꞌ ba dxih, ya chiꞌchi babihdxyi raꞌ ba laꞌhnu laasii cayahca nahlda duxa nee cayaaba za ñihsadxiah.

³Ya seguihdu gucaꞌha Pahblu tuhbi diꞌdzi yahga, zetachi ban loh dxih nin riigabihdxyi raꞌ ba, nee laꞌn yahga chi biriaꞌtii tuhbi bweꞌlda ñaꞌlaaꞌdzi, ya gudahwyaaꞌ ma naa Pahblu ya ayi guclaaꞌdzi ma ñutaꞌh ma naa ba, bidxiꞌdxiu chihpa man.

⁴Chin bwaꞌha raꞌ bwiinn Malta raꞌ chi gudahwyaaꞌ bweꞌlda chi naa Pahblu nee dxiꞌdxiu chihpa ma naa ba, chiꞌchi rahbi loh lasaaꞌ raꞌ ba: ―Pweda rdxiinn ba bwiinn niꞌchin masque bwiꞌhnn ba gahn gulaꞌh xquelnabahan ba loh ñihsadoꞌ per nahyi bwiꞌhnn Dxiohs lligaaba chiilli ba xtuhlda ba niꞌchin zahchi ba nnah.

⁵Per gudzihbinaa Pahblu ya biaabatiiꞌ bweꞌlda chi loh dxih ya cun ayi xi guhca ba.

⁶Ya riibweeza raꞌ bwiinn raꞌ chi xohra chegadxadxih naa Pahblu o xohra gachi ba, per chin guhca xchih rooꞌ ayi xi rsohn gachi ba chiꞌchi badxyigaaꞌ duxa loh raꞌ ba, chiꞌchiyi rahbi raꞌ ba: ―¡Pweda Dxiohs bwiinn ca!

⁷Ya gahxu riꞌchi naꞌ xuh tuhbi daada nin laa Publiu nin naa gubierna xteenn isla Malta, ya biodxiaꞌhan nu rwaaꞌ yihdzi ba chohnna dxyih, bwen duxa bagachiꞌloh ba laꞌnu neezaa bwen duxa bwiꞌhnn ba laꞌhnu.

⁸Ya cayahcalluꞌhu xtaada Publiu, nuu ba lliaꞌh cun cayahca za ba yoꞌbarihn, ya chiꞌchi gwaguiaꞌha Pahblu hasta naꞌ ba chiꞌchi gudihdxyi-gunaaba Pahblu loh Dxiohs xcweenta ba ya seguihdu biaaca daada chi.

⁹Ya chin guyaꞌzidxiahga raꞌ bwiinn Malta chi basiaca Pahblu xtaada Publiu, seguihdu guzoꞌbaloh badzihnnee raꞌ ba bwiinn raꞌ nin rahcalluꞌhu loh Pahblu tin basiaca ba laꞌh raꞌ bwiinn chi.

¹⁰Niꞌchin guhcanee duxa raꞌ ba laꞌhnu tin baluuꞌyi raꞌ ba bwen duxa naa xmohda raꞌ ba chin bidxuu nu riꞌchi, nee cun neezaa nin bichiꞌhn za nu laꞌn barcu baniꞌhi raꞌ ba. Chin badzihn Pahblu guihdxyi Roma

¹¹Chin guhca chohnna bweꞌhw dxuu nu isla chi, chiꞌchi bacah nu laꞌn tuhbi barcu nin zee nez Alejandria, ya isla chi gahca za batiiꞌdxi barcu chi bweꞌhw raꞌ nin mahzi rahca nahlda, o sea bweꞌhw raꞌ xteenn inviernu. Ya yihca barcu chi caa chiohpa figuhra xteenn chiohpa biñiꞌn cwaachi nin laa Cástor cun Pólux.

¹²Seguihdu badzihnnee barcu chi laꞌhnu pwertu xteenn Siracusa, ya riꞌchi bidxuu nu zigachiꞌh chohnna dxyih,

¹³chiꞌchi biuuꞌgarii gahca nu laꞌn barcu ya zezahneen laꞌhnu loh ñihsadoꞌ para guihdxyi Regiu. Chin barah gueꞌla biꞌ tuhbi bwih nez ñaaꞌ gueeta ya barahyi stuhbi gueꞌla badzihn nu guihdxyi Puteoli.

¹⁴Riꞌchi badxaꞌga nu paaldaa raꞌ xpwiinn Jesucristu nin gunaaba bidxiꞌhannee raꞌnu ba gahdzi dxyih, ya seguihdu badzihn nu hasta Romayi.

¹⁵Chin guhcabwaꞌ raꞌ xpwiinn Jesucristu nin rii raꞌ Roma nahpa zadzihn nu Roma, biꞌ raꞌ ba guihdxyi Foru xteenn Apiu, cun stuhbi guihdxyi nin laa Tres Tabernas par badxaꞌga raꞌ ba laꞌhnu. Ya chin bwaꞌha Pahblu laꞌh raꞌ ba chiꞌchi badiꞌhi ba guelzuxchiilli laꞌh Dxiohs ya biahxi duxa Pahblu.

¹⁶Ya chin badzihn nu guihdxyi Roma, chiꞌchi lwehgu batiꞌdxi capitahn laꞌh raꞌ bwiinn prehsa raꞌ loh comandante nin rnabwaꞌ Roma ya basaaꞌn ba laꞌh Pahblu guyuuꞌ ba tuhbi yuuꞌ ya tuhbi si suldahdu guhpaa laꞌh Pahblu. Pahblu baluuꞌyi xchiꞌdxyi Jesucristu loh raꞌ bwiinn Roma

¹⁷Chin guhca chohnna dxyih nin badzihn nu Roma, chiꞌchi gudihdxyi Pahblu laꞌh raꞌ bwiinn nin rnabwaꞌ loh raꞌ bwiinn Israel nin rii Roma, chiꞌchi rahbi Pahblu loh raꞌ ba: ―Bwihtsi lasaaꞌ raꞌ, ayi xi bwiꞌhnneen laꞌh raꞌ bwiinn Israel, nee nin ayi xi dxyiꞌdxyi dxaaba rñiꞌ zahn xcweenta xlehyi guehtu xtatita roo raꞌ nuꞌh. Pera desde guihdxyi Jerusalehn biuꞌn raꞌ ba ntriehgu naꞌh par laꞌn lahtsi dxiꞌba Romanu.

¹⁸Per chin guzoꞌbaloh rnabadxyiꞌdxyi raꞌ bwiinn Roma loon, guclaaꞌdzi raꞌ ba ñutaꞌh raꞌ ba naꞌh laasii ayi bidxeela raꞌ ba xi ñucaꞌchiah raꞌ ba naꞌh para ñidxiinn raꞌ ba naꞌh.

¹⁹Per bwiinn Israel raꞌ chi gunaaba raꞌ ba ñahchiꞌhn niꞌchin nin gunaꞌbaꞌhn loh rrehyi César dxieꞌtaachi raꞌ ba xquelchiaan, per naꞌh ayi xi pur cwaꞌchihn xquelchiah raꞌ bwiinn laadxyihn.

²⁰Niꞌchin nin gudiidxihn laꞌhtu tin guiñiꞌn loh tu yiꞌbi naaꞌhahn cun cadehn riiꞌ laasii ruuꞌyi dxyiꞌdxyiꞌhn loh raꞌ bwiinn xcweenta nin dxuubweeza nuꞌh ziga naa nuꞌh bwiinn Israel, nee laasii riachii stoꞌ nuꞌh zucwaꞌhn Dxiohs laꞌh raꞌ bwiinn loh guelguhchi.

²¹Chiꞌchi rahbi raꞌ ba loh Pahblu: ―Nin tuhbi dxihtsi nnahyi guixeꞌhla raꞌ guxchiisi guihdxyi Judea loh nu pur yiꞌh, nee nin tuhbi za bwiinn Israel raꞌ nin radzihn riiꞌ ayi xi dxyiꞌdxyi dxaaba rñiꞌ raꞌ ba pur yiꞌh.

²²Xclaaꞌdzi nu gacabwapaꞌh nu xchiꞌdxyi luꞌh laasii rahcabwaꞌ nu ziahan lahta rñiꞌyah raꞌ ba xchiꞌdxyi cuubi Jesucristu.

²³Ya biaꞌhan dxyiꞌdxyi raꞌ ba tuhbi dxyih guluuꞌyi Pahblu xchiꞌdxyi Jesucristu laꞌh raꞌ ba, ya chin guhldaa dxyih chi badiaaꞌha ziahan bwiinn hasta nuu Pahblu. Ya gaduhbi dxyih chi baluuꞌyi Pahblu xa naa xquelrnabwaꞌ Dxiohs. Ya cun dxyiꞌdxyi nin caa loh xlehyi Moisehs cun neezaa dxyiꞌdxyi nin bacaꞌh raꞌ guehtu daada raꞌ nin guñiꞌ xchiꞌdxyi Dxiohs, baluuꞌyi Pahblu laꞌh raꞌ ba Jesuhs nin zeꞌ guihdxyi Nazaret naa Crixtu nin galohyi cabweeza raꞌ ba dxiꞌ.

²⁴Nuu raꞌ nin gwachii stoꞌ raꞌñiꞌh xchiꞌdxyi Dxiohs nin baluuꞌyi Pahblu, ya nuu raꞌza nin ayi gwachii stoꞌ raꞌñiꞌhn.

²⁵Ya pur nin ayi nuu ñuhnn raꞌ ba tuhbisi lligaaba niꞌchin guzaꞌloh ziaa raꞌ ba, chiꞌchi rahbi Pahblu: ―Guchiica dxyiꞌdxyi raꞌ nin badiꞌhi Spíritu Saantu Dxiohs guñiꞌ guehtu Isaías, rahbi ba loh raꞌ guehtu xtatita rooꞌ raꞌnuꞌh:

²⁶Gwah tin guñiꞌ loh raꞌ bwiinn guihdxyi raꞌ; squiiꞌ guhdzi loh raꞌ ba:“Zihn dxiahga tu xchiꞌdxyiꞌhn, per ayi gacabwaꞌ tun, ya nicla gwaꞌha dziꞌtsi za tu per ayi xi dxiin loh tu,

²⁷pwihsi Dxiohs gahca bwiꞌhnn nahda duxa lastoꞌ raꞌ bwiinn guihdxyi riiꞌ,ya neezaa bacweꞌta Ñiꞌh dxiahga raꞌ ba, nee loh raꞌ ba basieꞌw Ñiꞌh tin ayi gwaꞌha raꞌ ba cun loh raꞌ ba nee ayi dxihn za dxiahga raꞌ ba, nee ayi za guiclaaꞌdzi raꞌ ba chechiistoꞌ raꞌ ba xchiꞌdxyiꞌhn tin ñusiaacahn laꞌh raꞌba.”

²⁸Rahbiza Pahblu: ―Gulgacabwaꞌ, desde nnahdxyih par dxyih raꞌ nin zeꞌ guluuꞌyi Dxiohs xchiꞌdxyi Ñiꞌh nicala laꞌh raꞌ bwiinn nin ayi naa bwiinn Israel par taꞌh raꞌ ba loh duhlda, nee bwiinn raꞌ riiꞌ zuzohba dxiahga raꞌ ba xchiꞌdxyi Ñiꞌh.

²⁹Ya chin guyaꞌloh guñiꞌ Pahblu dxyiꞌdxyi raꞌ chi loh raꞌ ba lwehgu badiꞌchii raꞌ ba ya gaduhbi nin ziagazah raꞌ ba ziadxihldxyinee dxyiꞌdxyi lasaaꞌ raꞌ ba.

³⁰Ya chiohpa yihza guyuuꞌ Pahblu yuuꞌ nin rahlla guihdxyi chi, ya bagachiꞌloh ba laꞌh garaa raꞌ bwiinn nin gwaguiaꞌha cuun ba.

³¹Ya ayiru chyu bwiinn bwiꞌhnn llahn laꞌh Pahblu, ya gaduhbi stoꞌ ba gwazah baluuꞌyi ba xchiꞌdxyi Dxiohs cun xchiꞌdxyi xquelrnabwaꞌ Jesucristu laꞌh raꞌ bwiinn chi.