Read Chichicapan Zapotec Hechos 4 Bible Online

Hechos 4 - Chichicapan Zapotec bible

Hechos 4

¹Gaduhbi nin cañiꞌ gahca raꞌ ba loh raꞌ bwiinn raꞌ chi, badzihn raꞌ bixohza xteenn Israel cun ninluꞌh rnabwaꞌ laꞌh raꞌ guixaꞌga xteenn guidoꞌ rooꞌ cun nuhn bwiinn guidoꞌ nin laa Saduseu.

²Rdxyiꞌchi duxa raꞌ ba laasii cagaluuꞌyi Pehdru cun Jwahn zabahan bwiinn loh guelguhchi pur nin babahn Jesuhs.

³Niꞌchin gunaꞌzu raꞌ guxchiisi laꞌh raꞌ ba, per ziga gudxyihlan, nee ziga laꞌjusgahdu bieꞌwlaza hohrchi, niꞌchin bieꞌw raꞌ ba. Laꞌn lahtsi dxiꞌba riꞌchi basarah raꞌ ba gueꞌla.

⁴Ya loh bwiinn ziahan roo raꞌ ninluꞌh bihn xchiꞌdxyi raꞌ ba gwachiistoꞌ raꞌ bwiinn chi xchiꞌdxyi Dxiohs. Guhca raꞌ ba ziga gaꞌyu mihyi ndxiꞌhw.

⁵Ya seguihdu chin barah gueꞌla, badxaꞌgalasaaꞌ garaa raꞌ bwiinnguuhla cun nee raꞌ nin rnabwaꞌ raꞌ nez loh guihdxyi Jerusalehn, cun bwiinn raꞌ nin ruluuꞌyi lehyi,

⁶neezaa Anahs nin rnabwaꞌ laꞌh garaa raꞌ bixohza, neezaa Caifahs, Jwahn, Alejandru, nee neezaa garaa nin naa lasaaꞌ raꞌ bixohza rooꞌ raꞌ nin rnabwaꞌ rii raꞌ niꞌchi.

⁷Chiꞌchi gunabwaꞌ raꞌ ba bieꞌ Pehdru cun Jwahn gurih galaayi raꞌ ba tin gunabadxyiꞌdxyi raꞌ ba loh Pehdru cun Jwahn squiiꞌ: ―¿Chyu xquelrnabwaꞌ nahpaa tu? ¿Chyu laa bazeꞌta tu tin basiaca tu ndxiꞌhw riiꞌ?

⁸Per Pehdru, ziga ya gadxah lastoꞌ ba Spíritu Saantu xteenn Dxiohs, niꞌchin rahbi ba loh raꞌ ba: ―Daada guxchiisi raꞌ, cun bwiinn guhla raꞌ xteenn bwiinn Israel,

⁹laꞌh tu rnabadxyiꞌdxyi tu xa mohda bidxiacanee nu laꞌh ndxiꞌhw riiꞌ o xa pur biaca ba,

¹⁰yaque laꞌh tu rnabadxyiꞌdxyi tu niꞌchin nnah gachiñiꞌ xnehza nu loh tu nee neezaa loh garaa raꞌ bwiinn guihdxyi Israel, Jesucristu nin bacaꞌh tu loh cruhzi, laꞌDxiohs bacwaꞌhn laꞌh Ñiꞌh loh guelguhchi ya pur lah Ñiꞌh basiaca nu laꞌh bwiinn nin zuu nez loh tu riiꞌ nazaꞌca nnah,

¹¹ya laꞌhtu ayi gwachiistoꞌ tu xchꞌdxyi Jesucristu. LaꞌhÑiꞌh naa ziga tuhbi dxiah nin luꞌh rbweꞌcaa tu chin ruhnnchaꞌyi tu tuhbi yuuꞌ, per Dxiohs laꞌÑiꞌh bwiꞌhnn naa Jesucristu ziga dxiah ninluꞌh mahziru nazaꞌca nin guyuuꞌ xchihn xteenn yuuꞌ.

¹²Ayi xa taꞌh bwiinn loh duhlda xcweenta zuu zi bwiinn, laasii ayi stuhbi lah bwiinn loh guidxyiyuh riiꞌ ziga nin caꞌha Jesucristu nin gulaꞌloh laꞌh raꞌ bwiinn guidxyiyuh tin para gaca taꞌh nuꞌh loh duhlda.

¹³Chin bihn raꞌ ba dxyiꞌdxyi nin guñiꞌ Pehdru, badxyigaaꞌloh raꞌ ba laasii ayi bidxyihbi Pehdru cun Jwahn, nee ayiza batuhyi loh raꞌ ba guñiꞌ raꞌ ba dxyiꞌdxyi raꞌ chi. Chiꞌchi rahbi loh lasaaꞌ raꞌ bixohza nin lasahcaru: ―Per naꞌnncabwaꞌ ayi gwah raꞌ ba scwehyi, bwiinnzi raꞌ ba. Chiꞌchi guhcabwaꞌ raꞌ ba guzahnee Pehdru cun Jwahn laꞌh Jesucristu,

¹⁴ya niꞌchin ayi xi guñiꞌtiiꞌ raꞌ ru ba laasii bwaꞌhaloh raꞌ ba laꞌbwiinn nin zunee Pehdru cun Jwahn biaca ñaaꞌ ñiꞌh.

¹⁵Chiꞌchi gunabwaꞌ raꞌ bixohza biriaꞌh raꞌ Pehdru cun Jwahn cun nin biaaca ñaaꞌ ñiꞌh chi tuhbi lahdu nez dihtsi yuuꞌ tin bwiiꞌyidxyiꞌdxyi raꞌ bixohza laꞌhsi raꞌ ba.

¹⁶Chiꞌchi rahbi loh lasaaꞌ raꞌ ba: ―¿Xa niꞌca gachidiꞌhnnee nuꞌh ndxiꞌhw raꞌ ca? Garaa raꞌ bwiinn Jerusalehn naann xcweenta dziꞌn roo duxa nin bwiꞌhnn raꞌ ba. Aadxi nuu gaziaꞌtii nu xtsiꞌn raꞌ ba,

¹⁷per tin ayi guidiꞌchii xchiꞌdxyi Jesucristu caallaa stuhbi guihdxyi, mejor gachidiꞌtsi nu loh gadxiohnna raꞌ ba ayiru cheezah guiñiꞌ raꞌ ba xchiꞌdxyi Jesucristu loh cuun chiꞌh zi bwiinn raꞌ.

¹⁸Chiꞌchi gudihdxyi raꞌ bixohza chi laꞌh Pehdru cun Jwahn tin guñiꞌ ba, rahbi raꞌ ba: ―Ayi cheezah ru tu guluuꞌyi tu xchiꞌdxyi Jesucristu, nee ayiru za guzeꞌta tu lah Ñiꞌh.

¹⁹Chiꞌchi guñiꞌ Pehdru cun Jwahn, rahbi raꞌ ba loh raꞌ bixohza chi: ―Gulguiñiꞌ loh nu chyu xchiꞌdxyi mahzi gacaꞌdxiahga nu; ¿ta xchiꞌdxyi tu, o xchiꞌdxyi Dxiohs?,

²⁰tin laꞌhnu ayi chyu gucweꞌza guiñiꞌ nin bidiaꞌha nu cun nin bihn dxiahga nu.

²¹Ya bwaꞌha si bixohza raꞌ chi ayi bidxeela raꞌ ba xa ñuhnnee ru raꞌ ba laꞌh Pehdru cun Jwahn, chiꞌchi guñiꞌchihpa raꞌ ba ayiru cheezah guluuꞌyi raꞌ Jwahn cun Pehdru xchiꞌdxyi Jesucristu laꞌh raꞌ bwiinn, chiꞌchi bataꞌh raꞌ bixohza chi laꞌh raꞌ ba laasii cañiꞌ raꞌ bwiinn bwiꞌhnn raꞌ ba tuhbi dziꞌn zaꞌca. Ziahan raꞌ bwiinn cañiꞌ chuhla naa Dxiohs laasii pur nin guhca riꞌchi.

²²Ya ndxiꞌhw nin biaca pur xquel milahgru Dxiohs nuu ba chywaꞌh yihza. Gudihdxyi-gunaaba raꞌ xpwiinn Jesucristu gacanee Ñiꞌh laꞌh raꞌ ba

²³Yaque gulaꞌh Pehdru cun Jwahn cun neezaa bwiinn nin biaca ñaaꞌ ñiꞌh, gwaguiaꞌha raꞌ ba cuun lasaaꞌ raꞌ ba nin naa xpwiinn Jesucristu, riꞌchi bwiiꞌyidxyiꞌdxyi raꞌ ba garaa nin guñiꞌ raꞌ guxchiisi xteenn raꞌ bixohza cun nin naa raꞌ bwiinn guhla loh raꞌ ba.

²⁴Chin bihn raꞌ xpwiinn Jesucristu dxyiꞌdxyi raꞌ chi, chiꞌchi tuhsi junta cun tuhsi lligaaba bwiꞌhnn raꞌ ba tin gudihdxyi-gunaaba raꞌ ba loh Dxiohs, rahbi raꞌ ba: ―Xtaada Dxiohs nu nin bwiꞌhnnchaꞌyi llaaꞌndxibaaꞌ cun guidxyiyuh, cun ñiꞌhsadoꞌ nee cun nin rii nabahan loh raꞌn,

²⁵Yuꞌbiluꞌh bwiꞌhnn luꞌh bazoꞌbadxiahga guehtu Davihd xchiꞌdxyi Spíritu Saantu niꞌchin nin bacaꞌh ba xchiꞌdxyi luꞌh riiꞌ:¿Xinaa riuuꞌ duxa raꞌ bwiinn guidxyiyuh guelrzaaꞌ xcweenta nin ayi naa siguhra guunn raꞌ ba gahn guunn raꞌ ba?

²⁶Nee badxaꞌgalasaaꞌ raꞌ rrehyi raꞌ loh guidxyiyuh cun guxchiisi xteenn raꞌ guihdxyi tin guziaꞌtee raꞌ ba xtsiꞌn Luꞌh tin ayiru za dxihn raꞌ ba xchiꞌdxyi Jesucristu.

²⁷’Laꞌdxyiꞌdxyi riiꞌ guzohba, laasii loh guihdxyi riiꞌ laꞌh Herodes cun Ponciu Pilahtu cun neezaa bwiinn Israel cun bwiinn ziitu nin ayi naa bwiinn Israel laꞌh raꞌ ba badxaꞌgalasaaꞌ riiꞌ, tin bidxyiꞌchinee raꞌ ba Lliiꞌn luꞌh nin naa Crixtu nin guxeꞌhla luꞌh.

²⁸Niꞌchin nnah babwiꞌhnn raꞌ ba dziꞌndxaaba ziga nin galoh guñiꞌ luꞌh gaca.

²⁹Yannah, bwaꞌha Daada Dxiohs cuun raꞌ cohsadxaaba nin cañiꞌ raꞌ ba gusaꞌcazii raꞌ ba laꞌh nu, per bwiꞌhnn cumpahñu laꞌh nu, tin gacanadxipalaaꞌdzi nu tin ayi guidxyihbi nu gachiñiꞌ nu xchiꞌdxyi luꞌh.

³⁰Daꞌnee xquel rnabwaꞌ luꞌh laꞌh nu tin gasiaca nu bwiinn raꞌ tin guidiꞌhnn zaꞌca nu dziꞌn roo raꞌ, milahgru raꞌ cun xquelrnabwaꞌ Lliiꞌn saantu luꞌh nin laa Jesucristu.

³¹Chin guluhlla gunaaba raꞌ ba gacanee Dxiohs laꞌh raꞌ ba, guzoꞌbaloh cañiꞌbi raꞌ yuuꞌ hasta rii raꞌ ba, cayahca ziga tuhbi lluh. Chiꞌchi badzihn Spíritu Saantu xteenn Dxiohs tin guyuuꞌchihpa ru Ñiꞌh lastoꞌ raꞌ ba tin ayiru bidxyihbi raꞌ ba guñiꞌ raꞌ ba xchiꞌdxyi Dxiohs. Gudxiꞌzi raꞌ ba xixteenn raꞌ ba loh lasaaꞌ raꞌ ba

³²Garaa raꞌ nin luꞌh gwachiistoꞌ raꞌ ñiꞌh xchiꞌdxyi Dxiohs, tuhsi lligaaba bwiꞌhnn raꞌ ba. Ayiru nin tuhbi raꞌ ba nin ñuhnn ñinabwaꞌ xixteenn raꞌ ñiꞌh. Mas bachaꞌga lasaaꞌ raꞌ ba xixteenn raꞌ ba ya nin xchiꞌhnn si raꞌ ba xcaꞌha raꞌ ba.

³³Guhcanee Dxiohs laꞌh raꞌ pooxtla tin baluuꞌyi raꞌ ba guchiipaꞌhcaa babahn Jesucristu loh guelguhchi nee neezaa cayahcanee duxa Dxiohs laꞌh garaa raꞌ xpwiinn Ñiꞌh.

³⁴Nin tuhbi raꞌ ba ayi biaꞌdxyi xixteenn raꞌ ñiꞌh laasii nin gohpaa loh yuh batooꞌ raꞌ ban, chiꞌchi gwanee raꞌ ba mweeyi,

³⁵tin badiꞌhi raꞌ ba mweeyi chi laꞌh raꞌ pooxtla, ya pooxtla raꞌ gudxiꞌzi mweeyi chi loh garaa raꞌ nin luꞌh xchiꞌhnnan.

³⁶Ya guyuuꞌ tuhbi ndxiꞌhw nin laa Joseh, lahdxyi ba naa Chipre, nin rii loh ñihsadoꞌ. Naa ba lasaaꞌ raꞌ xjwamiyi Levita, ya pooxtla raꞌ guleꞌhelah laꞌh ba Bernabeh nin zee loh xchiꞌdxyi raꞌ ba bwiinn nin rbahchidxyiistoꞌ lasaaꞌ raꞌñiꞌh.

³⁷Ya laꞌh Bernabeh batooꞌ ba tuhbi taaꞌha loh xuh ba, chiꞌchi badiꞌhi ba mweeyi nin gucaꞌha ba laꞌh raꞌ pooxtla.