Read Chichicapan Zapotec 1 Corintios 6 Bible Online

1 Corintios 6 - Chichicapan Zapotec bible

1 Corintios 6

¹Chin laꞌhtu nahpa tuhbi dxixiꞌhw cun stuhbi lasaaꞌ tu ziga naa tu xpwiinn Jesucristu, ¿xixnaa chiꞌh cheganaaba guxchisi tu lasaaꞌ tu loh tuhbi bwiinn nin ayi naa xpwiinn Dxiohs?

²¿Tayi gaann tu laꞌh raꞌ xpwiinn Dxiohs baguzuh para guunn raꞌ ba guelguxchisi xcweenta raꞌ bwiinn guidxyiyuh? Ya sidela laꞌhtu zuhnn tu guelguxchisi xcweenta raꞌ bwiinn guidxyiyuh, ¿tayi gaca guunn chiꞌh tu guelguxchisi loh lasaaꞌ tu xcweenta tuhbi cohsa biꞌtuꞌhn?

³¿Ta nagahdxi gacabwaꞌ tu zidiꞌhnn za nuꞌh guelguxchisi hasta xcweenta raꞌ xaanjla Dxiohs? ¡Lliaꞌlla chiꞌh xcweenta tuhbi cohsa biꞌtuꞌhn ayi nuu guidiꞌhnn raꞌ nuꞌh guelguxchiisi ziga xcweenta xteenn raꞌ lasaaꞌ raꞌ nuꞌh loh guelnabahan riiꞌ!

⁴Pwihsi sidela laꞌhtu cadxihndxinee lasaaꞌ tu pur xcweenta raꞌ cohsa xteenn loh guidxyiyuh riiꞌ, ¿xa chesuu chiꞌh tu loh raꞌ bwiinn duhlda nin ayi chyu naa loh bwiinn xquidoꞌ Dxiohs?

⁵Dee raꞌ sihn rñiꞌn yihca tu tin gatuhyi loh tu. ¿Tayi guidxeela nin tuhbi lasaaꞌ tu nin nuu lligaaba nasiin yihca ñiꞌh tin guunn ba guelguxchisi xcweenta lasaaꞌ tu?

⁶¿Xixnaa rianee tuhbi bwiinn nin ba gwachiistoꞌ ñiꞌh xchiꞌdxyi Dxiohs xquelchiah bwihtsi ba nin ba gwachii za stoꞌ ñiꞌh xchiꞌdxyi Dxiohs, loh tuhbi guxchisi nin ayi naa xpwiinn Dxiohs?

⁷Yannah laꞌhtu, guchii paꞌh bañihchi tu, laasii bagazaꞌloh xchixiꞌhw tu hasta ayi nahpa ñahnee lasaaꞌ tu lasaaꞌ tu; ¿xixnaa ayi ñuchihpa stoꞌ tu xcweenta raꞌ bwiinn raꞌ nin rguꞌtii duhlda cun laꞌh tu? ¿Xixnaa ayi gusaaꞌn tu zuu guicaꞌha raꞌ ba xixteenn tu?

⁸Per dela nnah, laꞌh gahca tu ruñihchi tu loh gahca raꞌ lasaaꞌ tu ziga naa tu xpwiinn Jesucristu, nee rcaꞌha za tu xixteenn raꞌ lasaaꞌ tu.

⁹¿Tayi gaann tu bwiinn raꞌ nin ayi nabahan xnehza ayi chuꞌtii raꞌ ba loh xquelrnabwaꞌ Dxiohs? Ayi gusaaꞌn tu gusaguiꞌhi raꞌ ba laꞌhtu tin laasii ziga tuhbi lasaaꞌ raꞌ deeꞌ ayi gaca chuꞌtii loh xquelrnabwaꞌ Dxiohs: ziga nin ruhnn guel gubwihlli, garaa raꞌ ziga nin raann raꞌ dxaan raꞌ; garaa raꞌ ziga nin ruyihdxinee cheꞌhla stuhbi bwiinn, garaa raꞌ ndxiꞌhw raꞌ nin ruhnn gunnaꞌh, cun nin naa raꞌ biraalli;

¹⁰garaa raꞌ nin naa raꞌ gubaꞌn, garaa raꞌ nin rzaꞌbi stoꞌ raꞌ ñiꞌh xixteenn bwiinn, garaa raꞌ nin naa raꞌ bwiinn gwaaꞌ, garaa raꞌ nin rñiꞌyah raꞌ, garaa raꞌ nin rusaguiꞌhi laꞌh raꞌ bwiinn tin rcaꞌha raꞌ ba xmweeyi raꞌ ba; pwihsi nin tuhbi raꞌ bwiinn raꞌ squiiꞌ ayi gadzihn nez loh xquelrnabwaꞌ Dxiohs nin nuu dxibaaꞌ.

¹¹Ziga lasaaꞌ raꞌ bwiinn raꞌ riiꞌ guhca raꞌ paaldaa tu, per nnah laꞌh Dxiohs bazuhnayaa lastoꞌ tu, nnah laꞌhtu banaa tu bwiinn nayaa nezloh Ñiꞌh laasii basiaꞌpitii Ñiꞌh xtuhlda tu pur xcweenta Jesucristu nee pur xcweenta za Spíritu Saantu Dxiohs. Niꞌchin nnah ya naa tu xpwiinn Ñiꞌh. Tihxi nuꞌh naa xquidoꞌ Dxiohs

¹²Zaꞌbi dxyiꞌdxyi squiiꞌ: “Naꞌh zahca guꞌnnahn cuun chiꞌh zi nin xclaaꞌdzihn guꞌnnahn”, per ayi garaa raꞌ dxiꞌhn naa bwen para naꞌh. Naꞌh zahca guꞌnnahn cuun chiꞌh zi raꞌ nin xclaaꞌdzihn, per ayi gusaꞌnaꞌhn guinabwaꞌ tuhbi raꞌ cohsa raꞌ riiꞌ naꞌh.

¹³Neezaa nuu dxyiꞌdxyi nin naa squiiꞌ: “Guelwahw naa para laꞌn buuxa stoꞌ bwiinn, ya buuxa stoꞌ bwiinn naa para guelwahw”, per zadzihn dxyih nin guñihchiloh Dxiohs garoopa raꞌn. Per ayi guchii dxiꞌh tihxi nuꞌh naa para guidiꞌhnn nuꞌh cohsa gubwihlli; tihxi nuꞌh naa para laꞌh Dxiohs, ya Dxiohs naa para tihxi nuꞌh.

¹⁴Pwihsi ziga bataꞌh Dxiohs laꞌh Jesucristu loh raꞌ bwiinn guuchi, gucwaꞌhn za Ñiꞌh laꞌh raꞌ nuꞌh loh bwiinn guuchi.

¹⁵Ya ziga laꞌhtu, ¿tayi gaann tu tihxi tu naa xteenn tihxi Jesucristu pur nin gwachii stoꞌ tu xchiꞌdxyi Ñiꞌh? Sidela tihxi nuꞌh naa tihxi xteenn Jesucristu, ¿ta zahca chiꞌh chyu gudiꞌhi tihxi ba loh tuhbi gunnaꞌh dxaaba? Pwihsi ¡ayi nuu chyu guunn ziꞌchi!

¹⁶¿Tayi gaann tu chin rdxaꞌga tuhbi ndxiꞌhw laꞌh tuhbi gunnaꞌh dxaaba, naa garoopa raꞌ ba tuhsi cwerpu?, nee squiiꞌ caa loh Xchihtsi Dxiohs: “Garoopa raꞌ ba naa ziga tuhsi bwiinn.”

¹⁷Per bwiinn nin rudiꞌhi lastoꞌ ñiꞌh nezloh Dxiohs naa za tuhsi cun laꞌh Ñiꞌh laasii rbweeza Spíritu Saantu xteenn Dxiohs nez laꞌn lastoꞌ ba.

¹⁸Niꞌchin ¡gulguiriaꞌcaa loh duhlda xteenn cohsa gubwihlli! Xichiꞌ zi stuhbi duhlda nin ruhnn bwiinn, naan zahca dxiaa tihxi ba, per ziga bwiinn nin ruhnn ziga cohsa gubwihlli rusiaaba duhldan tihxi ba laꞌh ba.

¹⁹¿Tayi gaann tu tihxi tu naa xquidoꞌ Spíritu Saantu Dxiohs nin nuu dxibaa, ya nuu Spíritu Saantu laꞌn lastoꞌ tu? Niꞌchin laꞌhtu ayi nuu guinabwaꞌ tu laꞌh gahca tu,

²⁰laasii laꞌh Jesucristu gudxihllila xcweenta xtuhlda nuꞌh loh cruhzi cun llarihn Ñiꞌh, niꞌchin nnah nahpa guidiꞌhnn nuꞌh dziꞌn zaꞌca nin guunn lasahca laꞌh Dxiohs cun tihxi nuꞌh cun neezaa spíritu nuꞌh.