Read Chichicapan Zapotec 2 Corintios 11 Bible Online

2 Corintios 11 - Chichicapan Zapotec bible

2 Corintios 11

¹¡Malaayi gwaꞌha nnah tu loon gaduhbi nin guiñiꞌn tuhbi dxyiꞌdxyi nin naa xilaa-xiilaan! Pwihsi gulgacaꞌdxiahga xchiꞌdxyiꞌhn

²laasii riaꞌllahn stoꞌn cun laꞌhtu ya llahn chi zeꞌ nezloh Dxiohs, laasii ya naa dxyiꞌdxyi gudiꞌhn laꞌhtu nez loh Jesucristu tin guicaꞌha Ñiꞌh laꞌhtu. Nee xclaaꞌdzizahn gudiꞌhn laꞌhtu nez loh Ñiꞌh ziga zi tuhbi dxaꞌpa nin nagahdxi chyu ndxiꞌhw guyihdxitiiꞌ,

³per nin rzaꞌcaꞌhn rdxyiibihn laasii ayi nagah guisaguiꞌhi tu ziga basaguiꞌhi bweꞌlda laꞌh Eva; nagah ziꞌchi za gusaaꞌn tu gusaguiꞌhi bwiinndxaaba laꞌhtu ya guunn ba gahn guidxaꞌh loh xigaaba tu, bachiꞌh guiriaꞌhcaa tu loh xneziuh Jesucristu nin raann tu cun gaduhbi stoꞌ tu.

⁴Laasii nnah rwaꞌhahn mahzi rucaꞌh stoꞌ tu rucaꞌdxiahga tu rwaaꞌ stuhbi bwiinn nin rñiꞌ nuu stuhbi Jesuhs nin ayi naa xchiꞌdxyi Ñiꞌh dxyiꞌdxyi nin raluuꞌyi nu, nee rcaꞌha tu cun gaduhbi stoꞌ tu tuhbi spíritu nin naa guriincaa loh Spíritu nin ya gucaꞌha tu, nee cun ruhnn za tu rcaꞌha tu guriincaa dxyiꞌdxyi loh dxyiꞌdxyi nin ba bihn tu nin gutaꞌh laꞌhtu loh duhlda.

⁵Naꞌh riinstoꞌn ayi naan bwiinn nin gulliaaꞌha lasahca loh garaa raꞌ pooxtla.

⁶Nicala xchiꞌdxyiꞌhn rzahcastoꞌ tu naan dxyiꞌdxyi nin naa xilaa-xilaan, per loh xigaaꞌbahn ayi xi riaꞌdxiꞌhn; nin sola naa bwensi ruluuꞌyiloh garaa raꞌ dxyiꞌdxyi raꞌ nin laꞌn baluuꞌyi loh tu cun dziꞌn nin bwiꞌhnnaꞌhn riꞌca.

⁷O ¿ta bwiꞌhnnaꞌhn duhlda sahca guyuuꞌhuhn lahda tu, ziga tuhbi bwiinn nadoꞌlaadzi tin gaca tu bwiinn roo raꞌ, nee nin tuhbi santahba ayi basadxiillihn laꞌhtu xcweenta nin baluꞌyiꞌhn xchiꞌdxyi Dxiohs?

⁸Gucaꞌhahn mweeyi nin baniꞌhi guriin raꞌ ca bwiinn guidoꞌ naꞌh chin guyuuꞌhuhn loh tu, tin bwiꞌhnnaꞌhn xtsiꞌn Dxiohs loh tu.

⁹Chin guyuuꞌhuhn loh tu, guyuuꞌ xi bichiꞌhnaꞌhn per ayi basioꞌbahn laꞌhtu, laasii chin bieꞌ raꞌ bwihtsi raꞌ nuꞌh nin zieꞌ raꞌ nez guihdxyi Macedonia, laꞌh raꞌ ba baniꞌhi raꞌ ba garaa raꞌ nin bichiꞌhnaꞌhn, niꞌchin nin ayi xi basioꞌbahn laꞌhtu, ya ziꞌchi cheezah guꞌnnahn.

¹⁰Pwihsi ziga naꞌpahn siguhra nuꞌnbwaꞌn xchiꞌdxyi Jesucristu, niꞌchin ayi chyu bwiinn nahpa para guziaꞌtii dxyiꞌdxyi zaꞌca nin calliiꞌdzi par naꞌh, ya garaa raꞌ bwiinn guihdxyi Acaya guiñiꞌ raꞌ ba ruluuꞌyi zihn xchiꞌdxyi Jesucristu ayi chyuloo rzaꞌbi naaꞌhahn para guicaꞌhahn mweeyi.

¹¹¿Xixnaa rñiꞌn loh tu squiiꞌ? ¿Ta laasii ayi guinadziiꞌhihn laꞌhtu? ¡Dxiohs naannloh balaaca chiꞌh rucaꞌh stoꞌn laꞌhtu!

¹²Per nahpa chezaꞌhn loh nin cayuꞌnnahn, tin ayi chuu nehza para laꞌh raꞌ bwiinn raꞌ nin caꞌndxiꞌhyi raꞌ cun dxyiꞌdxyi rusaguiꞌhi xa gaca raꞌ ba ziga naa nu, per ayi gaca ziꞌchi.

¹³Pwihsi laꞌh raꞌ ba ayi naa raꞌ ba pooxtla; laꞌh raꞌ ba sola rusaguiꞌhi zi raꞌ ba, ruhnn zi raꞌ ba ziga naa raꞌ pooxtla xteenn Jesucristu, per ayi chyu naa raꞌ ba.

¹⁴Pwihsi deeꞌ raꞌ ayi rluuꞌyi nagahn raꞌn laasii nee bwiinndxaaba zahca guiñah ba ziga zi tuhbi aanjla xteenn Dxiohs nin rcaꞌbachaꞌh tin gusaguiꞌhi ba laꞌh raꞌ bwiinn.

¹⁵Pwihsi niꞌchin ayi guinagahn ruluuꞌyiloh ziga nin naa raꞌ xpwiinn ba ziga tuhbi bwiinn nin ruhnn dziꞌn zaꞌca, pwihsi bwiinn raꞌ chi ziñihchiloh raꞌ para tuꞌpazi cun xcweenta ziga naa xtsiꞌn raꞌ ba. Rutiꞌdxiloh Pahblu guelrzaꞌcazii xcweenta nin naa ba pooxtla

¹⁶Rñiꞌ zaꞌcaꞌhn loh tu; ayi guunn tu lligaaba yiꞌcahn cazohbayoꞌba, per ziga nin nuu tu lligaaba ca gulgasaaꞌnza guiñiꞌn loh tu ziga tuhbi bwiinn nin rahca naxiin yihca ñiꞌh tin guiñiꞌ loh tu dxyiꞌdxyi zaꞌca pur xcweenta gahcahn.

¹⁷Dxyiꞌdxyi nin cañiꞌn riiꞌ ayi cañiꞌñin cun xquelrnabwaꞌ Dxiohs, sino que cañiꞌñin ziga zi tuhbi bwiinn nin rahca naxiin yihca ñiꞌh, nee naa raꞌ dxyiꞌdxyi zaꞌca raꞌ riiꞌ laꞌhgahca xcweeꞌntahn,

¹⁸laasii ziga nuu za raꞌ bwiinn raꞌ nin rñiꞌ raꞌ dxyiꞌdxyi nayaachi pur laꞌhgahca xcweenta xtsiꞌn raꞌ ba nin ruhnn raꞌ ba loh guidxyiyuh riiꞌ, nee ziꞌchi gahca za ziñiꞌn dxyiꞌdxyi nayaachi xcweenta gaꞌcahn,

¹⁹laasii ziga laꞌhtu nin naa bwiinn nasiin tiiꞌ cayahpa tu paseensi raꞌ laꞌh bwiinn nin rahca naxiin yihca ñiꞌh.

²⁰Laꞌhtu zeezahnee chyu chiꞌh zi tuhbi nin rnabwaꞌ loh tu ziga tuhbi ballwaaꞌn, o rbaaꞌn raꞌ ba xixteenn tu, o rnabwaꞌ raꞌ ba laꞌhtu, o rusaꞌcazii raꞌ ba laꞌhtu, o rgahpaa raꞌ ba loh tu.

²¹¡Xiilla xtuhyi guhca nu ziga zi bwiinn siisii nez loh tu!, per loh xi chiꞌh zi nin ruhnn lasahca raꞌ ba laꞌhgahca raꞌ ba, nicala naꞌh cañiꞌñin ziga zi nin rahca yihca ñiꞌh, pwihsi neezaa naꞌh naꞌpahn dxyiꞌdxyi.

²²¿Sidela naa raꞌ ba bwiinn hebreu? Neezaa naꞌh naañin. ¿Sidela naa raꞌ ba bwiinn Israel? Neezaa naꞌh naañin. ¿Sidela naa raꞌ ba llahga guehtu Abrahn? Neezaa naꞌh naañin.

²³Sidela naa raꞌ ba bwiinn nin ruluuꞌyi xchiꞌdxyi Jesucristu, naꞌh dziꞌbalohru mahzi ruluꞌyiꞌhn xchiꞌdxyi Jesucristu nicala naꞌh cañiꞌn ziga zi tuhbi bwiinn nin rahca yihca ñiꞌh cun ziga dxyiꞌdxyi raꞌ nin cañiꞌn. Pwihsi mahzi ru guelrzaꞌcazii batiꞌdxiloon que laꞌh raꞌ ba; batiꞌdxiloohruhn loh goolpi que laꞌh raꞌ ba, nee bieꞌwruhn laꞌn lahtsi dxiꞌba que laꞌh raꞌ ba.

²⁴Ya loh gaꞌyu bweelta basahcazii raꞌ bwiinn Israel raꞌ naꞌh; bachiehlda raꞌ ba diꞌtsihn galda bitsiꞌh bigaꞌ cwarta,

²⁵ya stuhbi bweelta bacaꞌh dxiah raꞌ ba yiꞌcahn, ya chohnna bweelta guzaꞌbi ñihsa barcu nin zaaꞌhahn laꞌn ñiꞌh loh ñihsadoꞌ per biaꞌhanzahn tuhbi dxyih-tuhbi gueꞌla loh ñihsadoꞌ.

²⁶Nee ziahan za biahje guzuꞌzahn, nee batiꞌdxiloozahn ziahan raꞌ yaꞌdxi nez loh guiꞌw raꞌ; batiꞌdxilohzahn guelnadxyiꞌbi loh raꞌ gubaꞌn, nee cun loh za raꞌ bwiinn guihdxyi laadxyihn, nee cun nez loh raꞌ za bwiinn ziitu raꞌ nez laꞌn ciudahd raꞌ nee nez loh dahan raꞌ nee cun loh ñihsadoꞌ raꞌ za, nee cun nez loh za raꞌ bwiinn rusaguiꞌhi bwiinn nin rñiꞌzi raꞌ naa xpwiinn Jesucristu.

²⁷Batiꞌdxiloduuxazahn loh dziꞌn cun loh dxixiꞌhw; ziahan la za bweelta ayi gutaꞌxgaasihn, cun biaꞌhanahn ayi gudaawuhn, cun ayi za gwaaꞌhahn ñihsa; nee bacwaaꞌnahn ziahan bwelta, batiꞌdxiloozahn loh guelnahlda cun biaꞌdxyi za lahdxi para naꞌh.

²⁸Per garaaloh raꞌ deeꞌ batiꞌdxiloon guelrzaꞌcazii; guillii-guillii nuuꞌhuhn guelrzaaꞌ pur xpwiinn xteenn raꞌ guidoꞌ.

²⁹Sidela chyuulla tuhbi tu naa bwiinn siisiitiiꞌ, pwihsi neezaa naꞌh naan bwiinn siisii; ya sidela tuhbi tu riaaba loh duhlda, naꞌh riuuꞌ duuxaꞌhn guelrzaaꞌ xcweenta tu.

³⁰Sidela nayaachiꞌhn, per gaca nayaachiꞌhn xcweenta cohsa raꞌ nin ruluuꞌyi xcweenta guelsiisii xteꞌnnahn.

³¹Dxiohs nin naa Xtaada Jesucristu nin rgaꞌha chyu guiñiꞌ zaꞌca lah Ñiꞌh tuꞌpazi, naann Ñiꞌh naꞌh cañiꞌn dxyiꞌdxyi nin naa guchii.

³²Chin guyuuꞌhuhn loh guihdxyi Damascu, gubernadohr nin guyuuꞌ riꞌchi, naa ba xpwiinn rrehyi Aretas, gunabwaꞌ ba guhpa raꞌ xcuxchisi ba hasta rwaaꞌ pweerta xteenn guihdxyi chi tin ñanee raꞌ ba naꞌh ñieꞌwꞌhn laꞌn lahtsi dxiꞌba,

³³per bidxeela xa batehta raꞌ xpwiinn Jesucristu naꞌh laꞌn tuhbi tiipi nez tihxi muhru nin nuu gadiidxi guihdxyi chi ya ziꞌchi zi gulaꞌhn loh raꞌ ba tin ayi binaꞌzuꞌhn.