Read Chichicapan Zapotec 2 Corintios 6 Bible Online

2 Corintios 6 - Chichicapan Zapotec bible

2 Corintios 6

¹Pwihsi ziga naa nuꞌh tuhsi loh xtsiꞌn Dxiohs, rachiñiꞌ nu loh tu ayi cweꞌhe stoꞌ tu nin bwiꞌhnn Dxiohs xcweenta tu, sinolaꞌn lliaaꞌzi ziga gwachii stoꞌ tu xchiꞌdxyi Jesucristu,

²laasii squiiꞌ rñiꞌ loh xchiꞌdxyi Dxiohs:Dxyih nin bwiꞌhnnaꞌhn lligaaba balahsa stoꞌn laꞌhtu,bacaꞌdxiaagahn xchiꞌdxyi tu nin gunaaba tu loon;ya dxyih nin guyahpitii xtuhlda tu, bwiꞌhnnaꞌhn cumpahñu laꞌhtu. ¡Guldxihn dxyiꞌdxyi! Nnah naa tuhbi dxyih nin galahsa stoꞌ Dxiohs laꞌhnuꞌh; nnah naa tuhbi dxyih nin gusiaꞌpitii Ñiꞌh xtuhlda tu.

³Ayi chyu chiꞌhyi guunn dziꞌn nin guunn guidxyiꞌchinee bwiinn laꞌhnu, tin ziꞌchi ayiza guiñiꞌ dxaaba raꞌ bwiinn xcweenta xtsiꞌn nu,

⁴tin mahzi ru galuuꞌyi nu ziga naa nu xmooza Dxiohs; pur pasensi nin nachidxiaapa nu chin rusaꞌcazii raꞌ bwiinn laꞌh nu, chin ratiꞌdxiloh nu xiilla stuhbi guelrzaꞌcazii nee chin ayi rahcabwaꞌ nu cuun nin guidiꞌhnn nu.

⁵Ya chin ayi ruluuꞌyiloh xa guidiꞌhnn nu ziga chin rucaꞌyahga raꞌ bwiinn laꞌhnu, chin rusieꞌw raꞌ ba laꞌhnu laꞌn lahtsi dxiꞌba, cun chin riahsa raꞌ bwiinn rucaꞌnee raꞌ ba laꞌhnu, ziga chin ayi chyu rahsi cun ratiꞌdxiloh za nu guelrchiaꞌhan;

⁶neezaa raluuꞌyi nu naa nu xmooza Dxiohs xcweenta ziga nin nabahan nayaa nu nez loh Dxiohs. Nee cun ziga naann zaꞌca nu xchiꞌdxyi Dxiohs, neezaa xcweenta xquelnadoꞌ laadzi nu, nee laasii pur guelpasensi xteenn nu, neezaa laasii rbweza Spíritu Saantu Dxiohs laꞌn lastoꞌ raꞌ nu, neezaa ziga nadziiꞌhi nu bwiinn raꞌ,

⁷neezaa pur xcweenta dxyiꞌdxyi guchii paꞌh xteenn Dxiohs, nee cun neezaa pur guelrnabwaꞌ xteenn Ñiꞌh. Caꞌha nu tuhbi madxihdu guelnayaa xteenn Ñiꞌh; caꞌha nu guelnayaa chi garoopa naa nu ziga lahdu derehchu cun lahdu rrabwehsa.

⁸Ya ziꞌchiza raluuꞌyi nu naa nu xmooza Dxiohs ziga chaꞌyi naa xquelrnabwaꞌ nu, o riaꞌhan xtuhyi za nu. Nuu bweelta nuu nin rñiꞌ zaꞌca xcweenta nu, ya nuu za bweelta rñiꞌnah za raꞌ ba xcweenta raꞌ nu; nuu za bwelta rñiꞌ raꞌ ba ziga naa nu bwiinn nin rusaguiꞌhi bwiinn, mas nicala naa nu bwiinn nin rñiꞌ dxyiꞌdxyi nin naa guchii.

⁹Ya nuu bweelta rwaꞌha raꞌ bwiinn loh nu ziga zi tuhbi bwiinn ziitu nicala zaꞌbi dxyiꞌdxyi pur laꞌhnu ziahan lahta. Nuu bweelta rahchi tiiꞌ nu, per rbiaꞌgarii riazah tiiꞌ nabahan nu; rzaꞌcazii raꞌ nu per ayi rahchi nu.

¹⁰Nicala nuu nu guelrbiin per garaa dxyih nuu nasaa stoꞌ nu. Nicala naa nu prohbi, per rachidiꞌhnn rricu raꞌ nu ziahan raꞌ bwiinn loh xchiꞌdxyi Dxiohs. Nicala naa nu bwiinn nin ayi xi nahpa tiiꞌ, per nahpa nu garaalohtiiꞌ nin naa xteenn Jesucristu.

¹¹Bwiinn Corintu raꞌ, laꞌhnu bachiñiꞌ garaa nin naa guchii loh tu, garaa gahca raꞌ dxyiꞌdxyi raꞌ nin nuu laꞌn lastoꞌ nu.

¹²Nin tuhbi dxyiꞌdxyi ayi chyu bacaꞌtsi loh tu; sola laꞌhtu rguꞌlaꞌn stoꞌ tu dxyiꞌdxyi nin nahpa guiñiꞌ tu loh nu.

¹³Nnah naꞌh rñiꞌn loh tu ziga zi rñiꞌnee tuhbi daada lliiꞌn ba: “¡Gulguiñiꞌ loh nu dxyiꞌdxyi raꞌ nin nu laꞌn lastoꞌ tu!” Naa nuꞌh xquidoꞌ Dxiohs nin nuu nabahan nez dxibaaꞌ

¹⁴Ayi guchaꞌga tu bwiinn raꞌ nin ayi riachii stoꞌ raꞌ ñiꞌh xchiꞌdxyi Dxiohs, laasii ayi gaca xtsiꞌn tu tuhbiloh, laasii tuhbi tu xclaaꞌdzi guunn dziꞌn zaꞌca, stuhbi nin guiclaaꞌdzi guunn dziꞌn dxaaba, ¿xa gaca loh biaꞌñih ziga naa loh nacahyi?

¹⁵o ¿xa gaca saahnee Jesucristu laꞌh Satanahs? ¿Xa gaca sahnee tuhbi bwiinn nin riachii stoꞌ ñiꞌh xchiꞌdxyi Dxiohs laꞌh tuhbi bwiinn nin ayi riachii stoꞌ ñiꞌh xchiꞌdxyi Dxiohs?

¹⁶¿Xi nah tu? ¿Gu ziga naa xquidoꞌ Dxiohs naa za xquidoꞌ dxaan raꞌ? Laasii laꞌhnuꞌh naa nuꞌh xquidoꞌ Dxiohs nin nuu dxibaaꞌ, ziga gahca guñiꞌ Dxiohs galoh:Ziuuꞌhuhn nez laꞌn lastoꞌ raꞌ ba, zizaꞌneezaaraꞌn ba;Naꞌh gacaꞌhn Xchiohs tu, ya laꞌhtu gaca tu xpwiiꞌnn raꞌn.

¹⁷Pwihsi neezaa guñiꞌ Daada Dxiohs squiiꞌ:Gulgariaꞌh lahda raꞌ bwiinn, gulguiriaꞌhcaa loh raꞌ ba;ayi guinaꞌzu tu cohsa dxaaba tin ziꞌchi gaannloon laꞌhtu ziga lliiꞌn raꞌn.

¹⁸Ya chiꞌchi zahcaꞌhn tuhbi Daada loh tu,ya laꞌhtu gaca tu lliiꞌngaꞌn raꞌn cun lliiꞌn dxaꞌpa raꞌn,rñiꞌ Yuꞌbi Dxiohs nin nahpa garaa tiiꞌ guelrnabwaꞌ.