Read Chichicapan Zapotec Gálatas 6 Bible Online

Gálatas 6 - Chichicapan Zapotec bible

Gálatas 6

¹Bwiitsi lasaaꞌ raꞌn, sidela laꞌhtu rdxeela tu tuhbi bwiinn lasaaꞌ tu nin biaaba loh xiilla duhlda, laꞌhtu nin ya rahcabwaꞌ xa naa xcweenta xchiꞌdxyi Dxiohs gulguiñiꞌnee laꞌh bwiinn chi, nee gulgahcanee laꞌh ba tin gariaꞌh ba loh duhlda; gulguiñiꞌ loh ba cun dxyiꞌdxyi naguuꞌdziꞌhngah, nee gulguiaꞌh dziꞌtsi tin ayi nagah nee laꞌhtu dxiaaba tu loh duhlda.

²Gulgadiꞌhi nin rchiꞌhn raꞌ lasaaꞌ tu; gulgahcanee laꞌh raꞌ ba tin ziꞌchi guunn tu guzaꞌloh tu garaa raꞌ dxyiꞌdxyi raꞌ nin naa xlehyi Jesucristu.

³Laasii nin ruhnn lligaaba nuu chyu naa ba; bwiinn chi ayi chyu naa tiiꞌ ba, rusaguiꞌhi ba laꞌh gahca ba.

⁴Tuhbigah tu gulcuuꞌbwaꞌ xa naa xtsiꞌn tu tin gwaꞌha tu gu xnehza naan. Ya ziꞌchi ziinnasaa lastoꞌ tu pur xcweenta nin galuuꞌyi xtsiꞌn tu, ya ayi xtsiꞌn dxiꞌh stuhbi bwiinn,

⁵laasii tuhbigah raꞌ bwiinn chebiiga nez loh Dxiohs tin gutiꞌdxi cweenta raꞌ ba xi bwiꞌhnn raꞌ ba.

⁶Bwiinn nin cagasiꞌdxi xchiꞌdxyi Dxiohs, nahpa gacanee ba bwiinn nin ruluuꞌyi laꞌh ba; gudiꞌhi ba nuhnzi xixteenn ba laꞌh bwiinn nin ruluuꞌyi laꞌh ba.

⁷Ayi gusaguiꞌhi tu laꞌh gahca tu; ayi nin tuhbi nin guunn gusaguiꞌhi laꞌh Dxiohs. Nin ruhnn biñih tuhbi bwiinn niꞌchi dxiꞌh naa liꞌhn nin rutiaaꞌha ba.

⁸Per tuhbi bwiinn nin guunn dziꞌn cweenta tihxi ñiꞌh, ya chin gadzihn dxyih nin guicaꞌha ba guelnazaꞌca, ziñihchiloh tihxi ba nee ayi chuu ba loh xquelrnabwaꞌ Dxiohs; per sidela tuhbi bwiinn guunn dziꞌn nin badiꞌhi Spíritu Saantu Dxiohs laꞌh ba, chin guicaꞌha ba guelnazaꞌca, neezaa guelnabahan nin naa para tuꞌpazi guicaꞌha ba.

⁹Niꞌchin nnah ayi chyu gusaaꞌn loh dziꞌn zaꞌca tin chin gadzihn dxyih nin dxiꞌ guelnazaꞌca, neezaa laꞌhnuꞌh gachicaꞌha raꞌ nuꞌh tuhbi guelnazaꞌca rooꞌ.

¹⁰Niꞌchin cada chin rahldaaguzuh, gachidxiaacanee nuꞌh nee gachidiꞌhnn nuꞌh bwen laꞌh garaa raꞌ bwiinn, nee mahzi ru para laꞌh raꞌ bwihtsi lasaaꞌ raꞌ nuꞌh nin riachii stoꞌ raꞌ ñiꞌh xchiꞌdxyi Jesucristu. Luulchima raꞌ dxyiꞌdxyi xteenn Pahblu nee cun luulchima za guelrgahpaDxiohs xteenn ba

¹¹Gulguiaꞌha naliꞌhi lehtra nin cagacaꞌhn loh tu cun naaꞌhahn.

¹²Garaa raꞌ bwiinn raꞌ nin riuuꞌ stoꞌ ñiꞌh guunn nin xclaaꞌdzi tihxi raꞌ ba gaca, laꞌh raꞌ ba nin xclaaꞌdzi chuu tu tuhbi bwaꞌ; ruhnn raꞌ ba squiiꞌ laasii ayi xclaaꞌdzi raꞌ ba gutiꞌdxiloh raꞌ ba guelrzaꞌcazii xcweenta nin gucah Jesucristu loh cruhzi.

¹³Laꞌh raꞌ bwiinn raꞌ nin nuu bwaꞌ, ayi ruhnn raꞌ ba garaa raꞌ nin caa loh lehyi, per xclaaꞌdzi raꞌ ba chuu tu bwaꞌ chi tin ziꞌchi guunn nayaachi raꞌ ba laꞌh raꞌ ba bwiꞌhnn gahn guyuuꞌtii bwaꞌ chi tihxi tu,

¹⁴per naꞌh ayi xclaaꞌdzihn chuu guelnayaachi stoꞌn xcweenta ziga cohsa raꞌ chi, sino que ziga naa xcweenta nin guhchi Daada Jesucristu loh tuhbi cruhzi, pwihsi pur laꞌh xcruhzi Jesucristu garaa raꞌ cohsa dxaaba xteenn guidxyiyuh guñihchiloh raꞌn para naꞌh, ya para ziga laꞌh raꞌ zahn naan ziga nin guñihchiloh para laꞌh raꞌn.

¹⁵Laasii sidela naa nuꞌh tuhsi cun laꞌh Jesucristu, nicala nuu nuꞌh o nicala ayi chuu nuꞌh bwaꞌ xteenn circuncisión, nin naa mahzi bwen gaca nuꞌh tuhbi bwiinn nin badxaꞌh ya biuuꞌ ba ganaalla lligaaba cuubi raꞌ pur xchiꞌdxyi Jesucristu.

¹⁶Garaa raꞌ bwiinn raꞌ nin nabahan raꞌ ziga ruluuꞌyi xchiꞌdxyi Jesucristu, zibwihdxyii stoꞌ raꞌ ba xcweenta guelralahsa stoꞌ xteenn Dxiohs, nee cun neezaa laꞌh raꞌ bwiinn Israel raꞌ nin gwachii stoꞌ raꞌ ñiꞌh xchiꞌdxyi Jesucristu zahpa raꞌ za ba guelnasaa.

¹⁷Ayiru guunn tu llahn naꞌh nnah loh delaanta; laasii sehn raꞌ xteenn bwaꞌ nin nuu tiꞌxihn rluuꞌyi naan tuhbi xmooza Jesucristu.

¹⁸Bwiitsi lasaaꞌ raꞌn, laꞌh Daada Jesucristu guunntaaꞌyi yihca tu. Ziꞌchi gaca pwihsi.