Read Chichicapan Zapotec 2 Tesalonicenses 1 Bible Online

2 Tesalonicenses 1 - Chichicapan Zapotec bible

2 Tesalonicenses 1

¹Naꞌh Pahblu, cun Silvanu cun neezaa Timoteu; racaꞌh nu dxihtsi riiꞌ loh tu bwihtsi lasaaꞌ raꞌ nu nin naa raꞌ xpwiinn Dxiohs loh guihdxyi Tesalónica, bwiinn raꞌ nin naa tuhsi loh Dxiohs Xtaada nuꞌh cun neezaa loh Daada Jesucristu.

²Dxiohs Xtaada nuꞌh cun Daada Jesucristu gacanee laꞌh tu cun gusacwachidxyii za Ñiꞌh lastoꞌ tu. Dxiohs guunn guelguxchisi laꞌh raꞌ bwiinn duhlda chin dxiꞌ Jesucristu stuhbi

³Bwitsi raꞌ, guillii-guillii radiꞌhi nu guelzuxchilli loh Dxiohs pur laꞌh tu nee ziꞌchi rgaꞌha gaca laasii dihtsi-dihtsi lasaaꞌ cayuuꞌtii guelriachiistoꞌ xteenn xchiꞌdxyi Dxiohs laꞌn lastoꞌ tu, nee cun ziga zeezah za ziga nadziiꞌhi lasaaꞌ tu.

⁴Niꞌchin laꞌgahca nu rachiñiꞌ nu xcweenta tu loh raꞌ xpwiinn Dxiohs, cun ziga guelpaseensi xteenn tu nee ziga ruluuꞌyi xcweenta guelriachii stoꞌ xteenn tu nin nahpa tu laꞌh Dxiohs nee ruluuꞌyi tun loh garaatiiꞌ guelrzahcazii cun guelnalasa nin rutiꞌdxiloh tu.

⁵Dee sihn ruluuꞌyi xquelguxchisi Dxiohs naa guchii paꞌh, niꞌchin nin rñiꞌ Dxiohs zalda loh xquelrnabwaꞌ Ñiꞌh para laꞌh tu niꞌchin cagatiꞌdxiloh tu guelrzaꞌcazii.

⁶Laasii nuu Dxiohs lligaaba zalda chiilli raꞌ bwiinn raꞌ nin basaꞌcazii laꞌh tu xtuhlda raꞌ ba, niꞌchin nin zusagwaꞌha Dxiohs laꞌh raꞌ ba guelrzaꞌcazii,

⁷ya zuniꞌhi Ñiꞌh guelrziꞌlaaꞌdzi laꞌh tu nin cazahcazii, cun laꞌh za nu, loh dxyih nin dxiꞌ Daada Jesucristu, chin dxiꞌ Ñiꞌh nez loh xcahyi loh tuhbi bachaꞌh rooꞌ cun anjla raꞌ nin nahpa guelrnabwaꞌ duxa.

⁸Ziꞌ Ñiꞌh tin gusaꞌcazii Ñiꞌh laꞌh raꞌ bwiinn nin ayi nuꞌnbwaꞌ raꞌ laꞌh Dxiohs nin nuu dxibaaꞌ, nee nin ayiza ruzoꞌbadxiahga dxyiꞌdxyi xteenn Jesucristu.

⁹Garaa raꞌ bwiinn duhlda raꞌ zwaꞌha raꞌ ba guelrzaꞌcazii duxa nin banaa par tuꞌpazi, nee zihtu dxiaꞌhan raꞌ ba loh xquelñaꞌñih guelrnabwaꞌ xteenn Dxiohs.

¹⁰Chin dxiꞌ Daada Jesucristu stuhbi, chiꞌchi zuhnn lasahca raꞌ xpwiinn Ñiꞌh laꞌh Ñiꞌh, ya garaa raꞌ xpwiinn Ñiꞌh zadxyigaaꞌ loh raꞌ ba chin gwaꞌha raꞌ ba loh Jesucristu dxyih chi, neezaa laꞌh tu gadxaꞌga tu loh raꞌ xpwiinn Ñiꞌh laasii gwachiistoꞌ tu xchiꞌdxyi Ñiꞌh nin baluuꞌyi nu laꞌh tu chin bidxuunee nu laꞌh tu.

¹¹Niꞌchin nin guillii-guillii cagazeꞌta nu laꞌh tu loh Dxiohs chin rnaaba nu loh Ñiꞌh tin gaca guluuꞌyi tu ayi lliaaꞌha zi dxiꞌh gulii Ñiꞌh laꞌh tu, nee dxudxiꞌhn za nu guniꞌhi Ñiꞌh lligaaba laꞌh tu guunn tu garaa raꞌ dziꞌn zaꞌca nin xclaaꞌdzi Ñiꞌh guunn tu cun gacanee za Ñiꞌh laꞌh tu cun xquelrnabwaꞌ Ñiꞌh tin guunn tu dziꞌn raꞌ nin ruhnn tu pur nin riachiistoꞌ tu,

¹²tin guzeꞌta zaꞌca raꞌ bwiinn lah Daada Jesucristu pur ziga nabahan xnehza tu, nee laꞌh za Ñiꞌh guzeꞌta zaꞌca Ñiꞌh laꞌh tu ya dee gaca laasii bwenduxa naa Dxiohs Xtaada nuꞌh cun Daada Jesucristu loh garaa nin rahcanee Ñiꞌh laꞌh nuꞌh.