Read Chichicapan Zapotec Hebreos 8 Bible Online

Hebreos 8 - Chichicapan Zapotec bible

Hebreos 8

¹Dxyiꞌdxyi nin lasahca ru loh raꞌ dxyiꞌdxyi nin cañiꞌ nuꞌh naa squiiꞌ: bixohza nin naa xpixohza rooꞌ nuꞌh laꞌh Ñiꞌh guzohba xlahdu derehchu Dxiohs llaaꞌndxibaaꞌ,

²nee naa Ñiꞌh bixohza laꞌn yuuꞌ nin naa saantu nadaa, hasta bwiꞌhnnchaꞌyi Dxiohs; ayi laꞌn guidoꞌ dxiꞌh nin ruhnn chaꞌyi raꞌ bwiinn loh guidxyiyuh.

³Pwihsi ziga garaa raꞌ bixohza nin lasahca ru bibwiꞌhi raꞌ ba tin batiꞌdxi guhn ba guidxaꞌh cun snuhnru guhn raꞌ loh Dxiohs nin nuu dxibaaꞌ. Pwihsi niꞌchin neezaa laꞌh Jesucristu guhpaa Ñiꞌh ziga batiꞌdxiguhn Ñiꞌh laꞌhgahca Ñiꞌh nez loh Dxiohs.

⁴Sidela laꞌh Ñiꞌh nuu gahca Ñiꞌh loh guidxyiyuh riiꞌ, nin ayi ñahca Ñiꞌh bixohza, laasii loh guidxyiyuh riiꞌ guyuuꞌ gahca raꞌ bixohza raꞌ nin badiꞌhi guhn ziga gunabwaꞌ xlehyi Moisehs,

⁵per dziꞌn raꞌ nin bwiꞌhnn raꞌ bixohza riiꞌ guhca ziga tuhbi bacaala xteenn garaatiiꞌ nin nuu llaaꞌndxibaaꞌ, nee naann nuꞌh naa raꞌn bacaala laasii baluuꞌyi Dxiohs laꞌh guehtu Moisehs chin baguuldaa guunn ba xquidoꞌ Dxiohs, rahbi Dxiohs loh ba:Bwaꞌha zaꞌca tin guunn luꞌh garaatiiꞌ zigapaꞌhcaa nin baluꞌyiꞌhn yiꞌh loh dahan Sinaí.

⁶Per laꞌh Xpixohza nuꞌh ruhnn Ñiꞌh dziꞌn nin lasahca ru, laasii laꞌh Ñiꞌh naa Ñiꞌh nin zuu galaayi loh xneziuh Dxiohs loh raꞌ bwiinn guidxyiyuh, baluuꞌyi Ñiꞌh dxyiꞌdxyi nin guñiꞌ Dxiohs chin bwiꞌhnn Ñiꞌh dxyiꞌdxyi cuubi loh raꞌ bwiinn guidxyiyuh. Per dxyiꞌdxyi cuubi raꞌ lasahca duxa run.

⁷Per sidela ñahca ñusaguuꞌdzi stoꞌ raꞌ bwiinn lehyi nin badiꞌhi Dxiohs galohyi laꞌh Moisehs ayi ñichiꞌhn ñuhnn Dxiohs stuhbi lligaaba cuubi,

⁸per laꞌh Dxiohs bwaꞌha Ñiꞌh ayi bazoꞌbadxiahga raꞌ bwiinn guidxyiyuh xchiꞌdxyi Ñiꞌh, chiꞌchi rahbi Ñiꞌh loh Xchihtsi Ñiꞌh:Naꞌh rñiꞌn zadzihn raꞌ dxyih chin guꞌnnahn stuhbi lligaaba,dxiaꞌhan dxyiꞌdxyineen stuhbi dxyiꞌdxyi laꞌh raꞌ bwiinn Israel neezaa laꞌh raꞌ bwiinn Judah tin guicaꞌha raꞌ ba dxyiꞌdxyi cuubi,

⁹ayi ziga dxiꞌh lligaaba nin bwiꞌhnnaꞌhn chin biaꞌhan dxyiꞌdxyineen laꞌh xtaada guldooꞌ raꞌ tu laꞌn dxyih raꞌ nin gunaꞌzuꞌhn naa raꞌ ba chin babweꞌhehn laꞌh raꞌ ba lahdxyi raꞌ bwiinn Egiptu.Pwihsi ayi bazoꞌbadxiahga raꞌ ba xchiꞌdxyiꞌhn nin basiaꞌhanee raꞌn ba, niꞌchin guleꞌhe stoꞌn laꞌh raꞌ ba,

¹⁰pwihsi dxyiꞌdxyi raꞌ nin ruꞌnnahn lligaaba xclaaꞌdzihn dxiaꞌhan dxyiꞌdxyi loh bwiinn Israel chiꞌchiyi loh dxyih raꞌ chi naa squiiꞌ,zuꞌnnahn para chuꞌtii xlehyiꞌhn loh xquelrihn raꞌ ba, nee zucaꞌh zahn xchiꞌdxyiꞌhn laꞌn lastoꞌ raꞌ ba,chiꞌchi naꞌh gacaꞌhn Xchiohs raꞌ ba, ya laꞌh raꞌ ba gaca raꞌ xpwiinn raꞌn.

¹¹Ya nin tuhbi bwiinn ayi guluuꞌyi ba lasaaꞌ baa, nin bwihtsi ba, gahbi ba:“Guldxiuꞌnbwaꞌ laꞌh Daada Dxiohs”,laasii garaa raꞌ bwiinn ziuꞌnbwaꞌ raꞌ ba naꞌh desde nin biꞌtuꞌhn hasta nin guyuꞌxa,

¹²nee zalahsastoꞌn laꞌh raꞌ ba nee zusiaꞌpitiin xtsiꞌn dxaaba raꞌ ba,nee ayi ru chuu dxyih gusazaꞌstoꞌn xtuhlda raꞌ ba.

¹³Chin luꞌh biaꞌhan dxyiꞌdxyi Dxiohs dxyiꞌdxyi cuubi, pwihsi dxyiꞌdxyi nin biaꞌhan dxyiꞌdxyi Ñiꞌh galoh naan dxyiꞌdxyi yuꞌxa, ya ayi ru xi guilasahcan.