Read Chichicapan Zapotec 1 Pedro 2 Bible Online

1 Pedro 2 - Chichicapan Zapotec bible

1 Pedro 2

¹Pwihsi niꞌchin gulgasaaꞌn garaaloh raꞌ cohsa dxaaba raꞌ nin nuu loh guidxyiyuh; ayi gusaguiꞌhi tu lasaaꞌ tu, ayi guiñiꞌ xihn tu loh lasaaꞌ tu, ayi chuudxih tu xixteenn lasaaꞌ tu; nee cun ziahan ru cohsa dxaaba raꞌ ayi guunn tu.

²Mahzi chaꞌyi ziga zi biñiꞌn nin gueꞌdu rahlaa, rdxaꞌgastoꞌ raꞌ bi lehchi; ziꞌchi gahca za gulguiꞌhnn pur guidxaꞌga stoꞌ tu xchiꞌdxyi Dxiohs tin guchiooꞌhon laꞌhtu loh guelnabahan nacuubi nin nahpa tu ya pur laꞌhan taꞌh tu loh duhlda.

³Sidela laꞌhtu guchii tu guhcabwaꞌ tu bwen naa xquelrahcanee xteenn Daada Jesucristu. Jesucristu naa tuhbi dxiah nabahan

⁴Gulchebiiga loh Jesucristu, nin naa ziga zi tuhbi dxiah nin nahpa guelnabahan nin guleꞌhecaa raꞌ bwiinn raꞌ ya para laꞌh Dxiohs naa dxiah chi tuhbi dxiah nin gulii Ñiꞌh nee lasahca duxan para laꞌh Ñiꞌh.

⁵Pwihsi neezaa laꞌhtu, ziga zi dxiah raꞌ nin nahpa guelnabahan; gulgasaaꞌn guunnxtsiꞌn Dxiohs laꞌhtu, tin guunn Ñiꞌh laꞌhtu tuhbi guidoꞌ hasta cweeza Spíritu Ñiꞌh, tin gaca tu xpixohza Dxiohs, nin nayaa rahpa laꞌn lastoꞌ raꞌ ñiꞌh. Laasii naa tu tuhsi cun Jesucristu zibwihdxyi-zinaaba tu loh Dxiohs cun guiñiꞌ zaꞌca za tu pur xcweenta Ñiꞌh, ya dee raꞌ naa ziga tuhbi guhn nin rtahn desde laꞌn lastoꞌ tu nee naa raꞌn nin xclaaꞌdzi Dxiohs,

⁶laasii loh Xchihtsi Dxiohs caa squiiꞌ:Naꞌh guzuun tuhbi dxiah nin naa tuhbi dxiah zaꞌca hasta guihdxyi Siohn, tuhbi dxiah nin bibwiꞌhi suuh mwer xchihn yuuꞌ;pwihsi bwiinn nin chechii stoꞌ raꞌ ñiꞌh xchiꞌdxyi Ñiꞌh ayi dxiaꞌhan xtuhyi raꞌ ba.

⁷Ya para laꞌhtu riachii stoꞌ tu, lasahca duxa dxiah chi, per para laꞌh raꞌ bwiinn raꞌ nin ayi riachii stoꞌ raꞌ ñiꞌh, nahpa zizohba dxyiꞌdxyi ziga rñiꞌ loh Xchihtsi Dxiohs squiiꞌ:Dxiah nin guleꞌhe stoꞌ raꞌ mwehsu albañihyi, dxiah chi naa dxiah nin bibwiꞌhi guzuh mwergaloh xchihn yuuꞌ;

⁸neezaa:Dxiah nin rrehlda raꞌ ba cun dxiahltaa nin ruhnn para riaaba raꞌ ba. Laꞌh raꞌ ba riaaba raꞌ ba laasii ayi ruzoꞌbadxiahga raꞌ ba xchiꞌdxyi Dxiohs, pwihsi niꞌchin guñiꞌ Dxiohs ñichiloh raꞌ ba. Bwiinn raꞌ nin naa raꞌ xpwiinn Dxiohs

⁹Laꞌhtu naa tu tuhbi cwaꞌh bwiinn raꞌ nin gulii Dxiohs, ya tuhbigah tu naa tu bixohza nin naa ziga rrehyi xteenn Dxiohs. Laꞌhtu naa tu tuhbi bwiinn nayaa, tuhbi bwiinn zaꞌca, nin naa raꞌ xpwiinn Ñiꞌh. Pwihsi gulii Ñiꞌh laꞌhtu tin guluuꞌyi tu guelnazaꞌca duxa nin bwiꞌhnn Dxiohs nin gudihdxyi laꞌhtu chin guyuuꞌ tu loh neziuh nacahyi xteenn guidxyiyuh riiꞌ tin biuuꞌ tu loh xneziuh ñaꞌñih xteenn Dxiohs.

¹⁰Laꞌhtu galohyi ayi chyu naa tu nez loh Dxiohs, per nnah naa tu xpwiinn guihdxyi Dxiohs. Cadxyih ayi chyu balahsa stoꞌ ñiꞌh laꞌhtu, per nnah laꞌh Dxiohs balahsa stoꞌ Ñiꞌh laꞌhtu. Gulguibahan loh xneziuh Dxiohs

¹¹Pwihsi bwiitsi raꞌn nin nadziiꞌhi raꞌn; nabahan tu loh guidxyiyuh riiꞌ ziga bwiinn ziitu raꞌ, ayi gusaaꞌn tu xa chuꞌtee ziga lligaaba dxaaba raꞌ xteenn duhlda nin nuu loh guidxyiyuh nin rusiahchi stoꞌ bwiinn nin ruhnn rbweꞌhe stoꞌ raꞌ loh xneziuh Dxiohs.

¹²Gulguibahan zaꞌca nez loh raꞌ bwiinn raꞌ nin ayi naa raꞌ bwiinn Israel raꞌ. Nicala nnah rñiꞌ raꞌ ba dxyiꞌdxyinah pur laꞌhtu ziga bwiinn nin ruhnn cohsa dxaaba, per ya chin gwaꞌha raꞌ ba xcweenta dziꞌn zaꞌca nin ruhnn tu, chiꞌchi ziñiꞌ zaꞌca raꞌ ba pur laꞌh Dxiohs chin gadzihn dxyih guunn Dxiohs guelguxchisi xcweenta cada tuhbigah raꞌ bwiinn.

¹³Pwihsi ziga guyuuꞌ tu guyaꞌzi tu xchiꞌdxyi Jesucristu, ziꞌchi za gulgazoꞌbadxiahga xchiꞌdxyi garaa raꞌ ziga nin rahpa guelrnabwaꞌ loh guidxyiyuh riiꞌ ziga prizdenta rooꞌ pur nin nahpa raꞌ ba guelrnabwaꞌ nin lasahca ru,

¹⁴o ziga gobernador raꞌ nin ruxeꞌhla Dxiohs tin ruhnn raꞌ ba guelguxchisi xcweenta raꞌ bwiinn duhlda raꞌ; ya tin guiñiꞌ zaꞌca za ba pur laꞌh raꞌ bwiinn raꞌ nin ruhnn raꞌ cohsa zaꞌca.

¹⁵Laasii Dxiohs xclaaꞌdzi Ñiꞌh guunn tu cohsa zaꞌca, tin ziꞌchi ayi nuu xa guidxeela raꞌ nin naa raꞌ bwiinn naguꞌñiꞌyah raꞌ cun nin naa bwiinn mbah raꞌ xa pur guiñiꞌ raꞌ ba xilla dxyiꞌdxyi dxaaba pur laꞌhtu.

¹⁶Gulgahca ziga zi bwiinn nin ayi ruzoꞌbadxiahga xlehyi Moisehs, per ayi ziga bwiinn raꞌ nin zuu bariaꞌh loh xlehyi Moisehs para guunn raꞌ ba tuhbi cohsa dxaaba, sino que gulgahca ziga zi tuhbi bwiinn nin chuꞌtiiꞌ nez loh Dxiohs para tuꞌpazi.

¹⁷Gulgahca bwiinn nadoꞌlaadzi loh garaa raꞌ bwiinn. Gulgahca bwiinn nin nadziiꞌhi lasaaꞌ ñiꞌh laꞌh nin riachii stoꞌ ñiꞌh xchiꞌdxyi Dxiohs, gulguidxyihbi laꞌh Dxiohs, nee gulgahpa respehtu laꞌh prizdenta rooꞌ. Batiꞌdxiloh Jesucristu guelrzaꞌcazii tin baluuꞌyi Ñiꞌh xa guidiꞌhnn nuꞌh

¹⁸Laꞌhtu bwiinn raꞌ nin naa mooza, cun gaduhbi xquelnadoꞌlaadzi tu gulgazoꞌbadxiahga garaa raꞌ xchiꞌdxyi xballwaaꞌn tu, nee ayi ballwaaꞌn si dxiꞌh nin naa bwiinn zaꞌca sino que neezaa laꞌh ballwaaꞌn nin nadxaaba naa raꞌ,

¹⁹laasii bwen naa guunn bwiinn gutiꞌdxiloh ba guelrzaꞌcazii laasii pur xcweenta nin zeezahnee ba xchiꞌdxyi Dxiohs.

²⁰Pwihsi sidela laꞌhtu ruhnn tu xilla cohsa dxaaba niꞌchin nin rusaꞌcazii xballwaaꞌn tu laꞌhtu, ayi xi guunn tu gahn dela ruhnn tu waanta rutiꞌdxiloh tu guelrzaꞌcazii chi cun paseensi. Per sidela laꞌhtu rzaꞌcazii tu laasii bwiꞌhnn tu tuhbi cohsa zaꞌca nee ruhnn tu waanta cun paseensi xcweenta guelrzaꞌcazii chi, pwihsi dee naa bwen nez loh Dxiohs.

²¹Pwihsi pur cweenta raꞌ riiꞌ niꞌchin gudihdxyi Dxiohs laꞌhtu, laasii batiꞌdxiloh Jesucristu guelrzaꞌcazii duxa pur laꞌhtu, tin baluuꞌyi Ñiꞌh laꞌhtu ziga cheezah tu loh xneziuh Ñiꞌh.

²²Laꞌh Ñiꞌh ayi xi xtuhlda Ñiꞌh guyuuꞌ, nee nin ayi za chyu basaguiꞌhi Ñiꞌh nin tuhbi.

²³Chin guñiꞌyah raꞌ ba laꞌh Ñiꞌh, ayi za guñiꞌyah Ñiꞌh laꞌh raꞌ ba; chin basaꞌcazii raꞌ ba laꞌh Ñiꞌh ayi guñiꞌ nadxyiꞌchi Ñiꞌh sino que mahzi batiꞌdxi cweenta Ñiꞌh loh Dxiohs Xtaada Ñiꞌh nin ruhnn guelguxchisi zaꞌca.

²⁴Batiꞌdxiloh Jesucristu guelrzaꞌcazii guhchi Ñiꞌh loh cruhzi tin gudxihlli Ñiꞌh xcweenta xtuhlda raꞌ nuꞌh, tin guibahan zaꞌca raꞌ nuꞌh loh xneziuh Dxiohs. Laꞌh Ñiꞌh bidxeeldxyihdxyi tihxi Ñiꞌh tin biaaca tu laꞌhtu,

²⁵laasii laꞌhtu desde galohyi guhca tu ziga zi lliꞌhyi nin bizaꞌbi raꞌ, per nnah laꞌhtu biuuꞌnehza loh Jesucristu, tin naa Ñiꞌh xbaxtohr loh tu, nee laꞌh Ñiꞌh naa Ñiꞌh rahpa xaalma tu.