Read Chichicapan Zapotec Apocalipsis 1 Bible Online

Apocalipsis 1 - Chichicapan Zapotec bible

Apocalipsis 1

¹Deeꞌ raꞌ naa dxyiꞌdxyi nin badiꞌhi Dxiohs laꞌh Jesucristu tin baluuꞌyi Ñiꞌhn laꞌh raꞌ xmooza Ñiꞌh xcweenta raꞌ cohsa raꞌ nin zeꞌyahlda gaca. Jesucristu baxeꞌhla laꞌh tuhbi xaanjla Ñiꞌh loh Jwahn tin basagwaꞌ aanjla chi laꞌh Jwahn garaa raꞌ bihsi nin rñiꞌ loh dxihtsi riiꞌ,

²niꞌchin nin bacaꞌh Jwahn loh dxihtsi riiꞌ garaa xchiꞌdxyi Dxiohs nin baluuꞌyi Jesucristu laꞌh ba, nin basagwaꞌ Ñiꞌh laꞌh ba ziga bihsi raꞌ nin bwaꞌha loh ba.

³Dichohsa raꞌ bwiinn raꞌ nin rusiꞌdxi xchiꞌdxyi Dxiohs nin caa loh dxihtsi riiꞌ nee ruzoꞌbadxiahga raꞌ ban, laasii zeꞌgadzihn gahxu dxyih nin chaꞌloh ziga rñiꞌ loh dxihtsi riiꞌ. Jwahn rucaꞌh dxihtsi loh gagaadzi guidoꞌ hasta rii raꞌ xpwiinn Jesucristu

⁴Naꞌh Jwahn, cagacaꞌhn dxihtsi riiꞌ loh raꞌ xpwiinn Jesucristu nin rii gagaadzi guihdxyi raꞌ xteenn Asia. Gulguicaꞌha guelrbwidxyii stoꞌ xteenn laꞌh gahca Dxiohs nin naa nnadxyih, cun desde laꞌn dxyih raꞌ nin zeꞌdiiꞌdxi, nee cun nin nahpa dxiꞌ, nee cun nin banaaza par tuꞌpazi, nee xquelruhnntaaꞌyi cun xquelrbahchidxyii stoꞌ xteenn gagaadzi raꞌ spíritu nin zuu nez hasta rnabwaꞌ Dxiohs,

⁵nee cun neezaa xquelruhnntaaꞌyi xquelrbahchidxyii stoꞌ Jesucristu nin ruluuꞌyi dxyiꞌdxyi nanchii laꞌh nuꞌh, laꞌh Ñiꞌh nin mwer babahn za loh bwiinn guuchi; laꞌh za Ñiꞌh rnabwaꞌ Ñiꞌh loh garaa raꞌ rrehyi raꞌ nin rii raꞌ loh guidxyiyuh. Jesucristu rcaꞌhstoꞌ Ñiꞌh laꞌh raꞌ nuꞌh, nee basiaa Ñiꞌh laꞌh raꞌ nuꞌh loh duhlda cun llarihn Ñiꞌh.

⁶Laꞌh za Ñiꞌh bwiꞌhnn Ñiꞌh gaca nuꞌh tuhbi bwiinn rooꞌ tuhbi guihdxyi rooꞌ, nee gahca za nuꞌh bixohza loh Dxiohs Xtaada Ñiꞌh. ¡Garaatiiꞌ raꞌ bwiinn nahpa guunn lasahca lah Ñiꞌh nee guinabwaꞌ Ñiꞌh par tuꞌpazi! Ziꞌchi gaca, pwihsi.

⁷¡Gulgacabwaꞌ! Ziꞌ Jesucristu loh xcahyi, ya garaa raꞌ bwiinn zwaꞌhaloh raꞌ ba laꞌh Ñiꞌh, hasta bwiinn raꞌ nin baxaala baldiꞌh tihxi Ñiꞌh cun lahnsa zwaꞌha za raꞌ ba laꞌh Ñiꞌh; ya garaa raꞌ bwiinn guidxyiyuh zuꞌn raꞌ ba chin gwaꞌha raꞌ ba loh Ñiꞌh. Ziꞌchi gaca.

⁸―Naꞌh naan des galoh nee cun hasta luulchima za ziga naa raꞌ lehtra A cun Z, ―rñiꞌ Daada Dxiohs―. Naꞌh ziga naan Dxiohs; nabahanahn nnadxyih, cun desde laꞌn dxyih raꞌ nin zeꞌdiiꞌdxila, nee cun nin nahpa dxiꞌ; nee naꞌhza nin naꞌpahn guelrnabwaꞌrooru loh garaatiiꞌ.

⁹Naꞌh Jwahn, naan bwihtsi tu pur nin riachiiza stoꞌn laꞌh Jesucristu, nee pur nin naaza nuꞌh tuhsi loh guelrzahcazii, cun ziga chuuza nuꞌh tuhsi nez loh Dxiohs nee cun ziga gacaza nuꞌh tuhsi loh guelpaseensi xteenn Jesucristu. Pwihsi chin nuuꞌhuhn loh yuh nin nuu galaayi loh ñihsadoꞌ nin laa Patmos, pur nin zegaluuꞌyiꞌhn xchiꞌdxyi Dxiohs, laasii naꞌh naan nin bwaꞌhaloh dziꞌnroo raꞌ nin bwiꞌhnn Jesucristu,

¹⁰pwihsi tuhbi dxyih Dumingu biaꞌhanahn loh xquelrnabwaꞌ Spíritu Saantu xteenn Dxiohs ya bihnaꞌhn nez diꞌtsihn tuhbi rsiaaꞌha ziga xteenn tuhbi trompeta,

¹¹Nin guñiꞌ loon squiiꞌ: ―Naꞌh naan des galohtiiꞌyi nee cun para hasta fihnyi, ziga zi lehtra A cun lehtra Z. Bacaꞌh loh tuhbi chihbru garaa raꞌ nin gwaꞌha loh luꞌh, ya guixeꞌhla luꞌhn para xpwiiꞌnn raꞌn nin rii loh gahdzi guihdxyi xteenn Asia, o sea par loh guihdxyi Efesu, loh guihdxyi Esmirna, loh guihdxyi Pérgamo, loh guihdxyi Tiatira, loh guihdxyi Sardis, loh guihdxyi Filadelfia, nee cun loh guihdxyi Laodicea.

¹²Chiꞌchi basiaꞌgarii loon tin bwaꞌhahn nez diꞌtsihn chyuñin cañiꞌ loon, ya loh bwiꞌhnnaꞌhn ziꞌchi bwaꞌhahn gagaadzi gandayehru ohro,

¹³ya galaayi gagaadzi gandayehru chi bwaꞌhahn zuu tuhbi nin naa Lliiꞌn Dxiohs nin naa ndxiꞌhw, nahcu Ñiꞌh tuhbi lahdxi nin radzihn hasta yihca ñaaꞌ Ñiꞌh, nee cun tuhbi cinturohn nin naa ganaalla ohro lliꞌhiduꞌh laꞌntihxi Ñiꞌh.

¹⁴Yihca Ñiꞌh cun dxyichyihca Ñiꞌh xñah labweh nachiitsin ziga zi dxyihchi lliꞌhyi, o ziga zi labweh guiiꞌga; ya bizloh Ñiꞌh ziga zi bwehla;

¹⁵ya ñaaꞌ Ñiꞌh rcaꞌbachaꞌhan ziga zi dxiꞌba nin laa bronce chin nuuꞌhun loh dxih; ya rsiaaꞌha xteenn xchiꞌdxyi Ñiꞌh naan ziga zi chin riuuꞌbwih ziꞌhyirooꞌ ñihsa;

¹⁶ya xlahdu derehchu naa Ñiꞌh niinloh gahdzi dxih llaaꞌndxibaaꞌ; ya rwaaꞌ Ñiꞌh niinloh tuhbi spahda nin caa duxa garoopa dihtsi ñiꞌh; ya gaduhbi loh Ñiꞌh xñahan ziga loh gubihdxyi chin rziaꞌñih gubihdxyi gaduhbi lagaꞌtiiꞌ.

¹⁷Chin guyaꞌloh bwaꞌhahn loh Ñiꞌh, biaabaꞌhn loh yuh nez hasta zuu ñaaꞌ Ñiꞌh ziga zi bwiinn guuchi, chiꞌchi badziiꞌba naa Ñiꞌh nin naa lahdu derehchu yiꞌcahn, chiꞌchi guñiꞌ Ñiꞌh loon, nah Ñiꞌh: ―Ayi guidxyihbi luꞌh; naꞌh nin nabahanahn des galohtiiꞌyi, nee naꞌh za nin ba nabahan par tuꞌpazi.

¹⁸Naꞌh nin naan nin nabahanahn nnah, guhchiꞌhn per gubiaꞌgarii ba nabahnahn yannah ba nabahnahn par tuꞌpazi; naꞌh naꞌpahn guelrnabwaꞌ loh guelguhchi nee cun loh gabihldxyi za.

¹⁹Niꞌchin nin bacaꞌh xcweenta garaa raꞌ nin bwaꞌha luꞌh, nin cayahca nnah, neezaa cun nin gueꞌdu zeꞌyahlda gaca.

²⁰Deeꞌ naa dxyiꞌdxyi nagaꞌtsi xteenn gagaadzi dxih llaaꞌndxibaaꞌ nin bwaꞌha luꞌh lahdu derehchu naaꞌhahn, nee cun xcweenta za gagaadzi gandayehru ohro raꞌ: gagaadzi dxih llaaꞌndxibaaꞌ chi naa raꞌ xaanjla Dxiohs nin rahpa raꞌ xpwiiꞌnnraꞌn nin rii loh gagaadzi guihdxyi raꞌ, ya gagaadzi gandayehru raꞌ nin naa ohro raꞌ nin bwaꞌha luꞌh chi naa xpwiiꞌnnraꞌn nin rii loh gagaadzi za guihdxyi raꞌ chi.