Read Chichicapan Zapotec Apocalipsis 17 Bible Online

Apocalipsis 17 - Chichicapan Zapotec bible

Apocalipsis 17

¹Ya chiꞌchi bwaꞌhahn loh raꞌ gahdzi aanjla nin caꞌha gagaadzi cohpa biriaꞌh tuhbi nin guñiꞌ loon squiiꞌ: ―Riiꞌ gudaaꞌ, tin guluꞌyiꞌhn yiꞌh cuun nin naa guelrzaꞌcazii duxa xteenn gunnaꞌh dxaaba riiꞌ nin zohba hasta nuu ziꞌhyi ñihsa raꞌ.

²Garaa raꞌ rrehyi raꞌ nin nuu loh guidxyiyuh guhpa raꞌ ba duhlda pur gunnaꞌh riiꞌ ya basiꞌnaaꞌha xquelrusaguiꞌhi gunnaꞌh riiꞌ laꞌh raꞌ ba pur nin bidxiꞌ duhlda raꞌ ba laꞌh gunnaꞌh riiꞌ.

³Lwehgu ziga loh tuhbi bacaꞌlda gwanee aanjla chi naꞌh loh tuhbi dahan desiertu, ya riꞌchi bwaꞌhahn tuhbi gunnaꞌh zohba ba dihtsi tuhbi maan rooꞌ naxñaa, ya gaduhbitiiꞌ tihxi ma caa dxyiꞌdxyi raꞌ nin rñiꞌyah laꞌh Yuꞌbi Dxiohs nee gahdzi naa yihca ma, zohba za tsiꞌh xcahchu ma.

⁴Gunnaꞌh riiꞌ nahcu ba tuhbi lahdxi nin naa chiohpa culohri; tuhbin naa murahdu cun naxñaaꞌ, ya zuuchaꞌyi ba cun ohro, cun dxiah josca raꞌ nee cun perla raꞌ nin lasahca duxa, ya neezaa nuu naa gunnaꞌh chi tuhbi cohpa nin naa ganaalla tiiꞌ ohro nin gadxah cohsa gubwihlli nin bwiꞌhnn ba cun bwiinn guidxyiyuh raꞌ,

⁵ya gunnaꞌh ca locah ba caa tuhbi dxyiꞌdxyi nin ayi chyu rabweꞌhecaa xa naa dxyiꞌdxyi raꞌ chi, per squiiꞌ rñiꞌ dxyiꞌdxyi chi: “Guihdxyi Babilonia gurooꞌ, nin naa xnaan gunnaꞌh dxaaba raꞌ nee cun garaaloh raꞌ cohsa dxaaba raꞌ nin ruhnn raꞌ bwiinn loh guidxyiyuh.”

⁶Chiꞌchi lwehgu badiꞌhihn cweenta nuullaadxuu yihca gunnaꞌh chi cun llarihn raꞌ xpwiinn Dxiohs nin badxiinn ba, nee cun neezaa llarihn raꞌ bwiinn raꞌ nin baluuꞌyi xchiꞌdxyi Jesucristu. Ya chin bwaꞌhahn cohsa raꞌ chi bidxyiibi duuxaꞌhn,

⁷ya chiꞌchi nnah aanjla chi loon squiiꞌ: ―¿Xixnaa rluuꞌyi cadxyihbi luꞌh? Naꞌh ziñaan loh luꞌh xa naa xcweenta gunnaꞌh ca, nee cun xcweenta maan rooꞌ nin nuu gahdzi yihca ñiꞌh ca nee gahdzi za xcahchu ma.

⁸Maan rooꞌ nin bwaꞌha luꞌh naa ma tuhbi maan nin guyuuꞌ cadxyih rooꞌ, ya ziga nnah ayi ma laꞌn dxyih raꞌ riiꞌ per laꞌh dxyih bigaꞌha gariaꞌh ma gabihldxi, chiꞌchiyi chaꞌlohtiiꞌ ñichiloh ma. Ya bwiinn raꞌ nin nabahan loh guidxyiyuh nin ayi gucah lah raꞌ ñiꞌh loh dxihtsi xteenn guelnabahan xteenn Dxiohs, dxihtsi nin guhcachaꞌyi desdeyi chin nagahdxi cwachixchih Ñiꞌh guidxyiyuh, zidxyihbi duxa raꞌ ba chin gwaꞌha raꞌ ba loh maan ca, maan nin gubahan desde cachieempa rooꞌ, per ayiru ma laꞌn dxyih raꞌ riiꞌ per zibiaꞌgarii dxiꞌ ma stuhbi.

⁹’Riiꞌ nuu tuhbi dxyiꞌdxyi para laꞌh raꞌ nin gacabwaꞌ: Nin naa gahdzi yihca maan chi naa gahdzi dahan raꞌ nin zohba gunnaꞌh chi yihca ñiꞌh;

¹⁰nee naa za raꞌn gahdzi rrehyi: gaꞌyu rrehyi raꞌ chi laꞌh raꞌ ba guñihchiloh raꞌ la, yannah laꞌh tuhbi ba canabwaꞌ nnah, ya stuhbi ba nagahdxi dxiinlon ba. Ya chin dxiꞌ stuhbi raꞌba nin naa luulchima, ayi gacataꞌh ba ziahan dxyih.

¹¹Ya chiꞌchi laꞌh maan rooꞌ nin guyuuꞌ cadxih rooꞌ nee nicala ayiru ma nnah, naa nin rahca xuhnna rrehyi raꞌ per ya luulchimatiiꞌ chaꞌlohtiiꞌ ba para tuꞌpazi.

¹²’Gadziꞌh raꞌ xcahchu ma nin bwaꞌha luꞌh naa tsiꞌh raꞌ rrehyi raꞌ nin nagahdxi guinabwaꞌ, per sola tuhbi hohra si gapa raꞌ niꞌchi guelrnabwaꞌ, tuhsi cun maan rooꞌ.

¹³Gahdziꞌh raꞌ rrehyi raꞌ riiꞌ gaca xigaaba raꞌ ba tuhsi, ya zudiꞌhi raꞌ ba xlajweersi raꞌ ba cun xquelrnabwaꞌ raꞌ ba laꞌh maan rooꞌ chi.

¹⁴Laꞌh raꞌ dee raꞌ nin gucaꞌhnee laꞌh Lliꞌhyi xteenn Dxiohs, per zuhnn Lliꞌhyi chi gahn loh raꞌ cohsa raꞌ chi laasii laꞌh Ñiꞌh naa Ñiꞌh Daada loh garaa raꞌ daada raꞌ nee naa za Ñiꞌh rrehyi loh garaa raꞌ rrehyi raꞌ nin nuu loh guidxyiyuh, ya garaa raꞌ nin naꞌhla laꞌh Ñiꞌh, naa bwiinn raꞌ nin gulii Dxiohs nee naa raꞌ ba bwiinn nayaa nin zeezah dziꞌtsi loh xchiꞌdxyi Ñiꞌh.

¹⁵Neezaa guñiꞌ aanjla chi loon squiiꞌ: ―Ñihsa raꞌ riiꞌ nin bwaꞌha luꞌh hasta zohba gunnaꞌh dxaaba ca, naan garaa raꞌ guihdxyi raꞌ, garaa raꞌ bwiinn raꞌ, garaa raꞌ bwiinn raꞌ nin rñiꞌ guriin-guriin dxyiꞌzah raꞌ cun garaa raꞌ lahdxyi raꞌ bwiinn nin nuu loh guidxyiyuh.

¹⁶Ya gadziꞌh cahchu raꞌ nin bwaꞌha luꞌh yihca maan rooꞌ chi, zidxyiꞌchinee raꞌn laꞌh gunnaꞌh dxaaba chi. Zuuzuh lligabweꞌhla raꞌn laꞌh gunnaꞌh dxaaba ca zahw raꞌn xpweꞌhla gunnaꞌh dxaaba chi, nee zucaꞌdxih za raꞌn laꞌh gunnaꞌh chi.

¹⁷Dxiohs ya badiꞌhi Ñiꞌh para guunn raꞌ ba lligaaba chi, tin guicaꞌha maan rooꞌ chi guelrnabwaꞌ hasta que no chaꞌloh dxyiꞌdxyi raꞌ nin guñiꞌ Dxiohs.

¹⁸Ya gunnaꞌh nin bwaꞌha luꞌh naa guihdxyi rooꞌ nin nugasaguiꞌhi yihca raꞌ rrehyi raꞌ nin nuu loh guidxyiyuh.