Read Chichicapan Zapotec Apocalipsis 19 Bible Online

Apocalipsis 19 - Chichicapan Zapotec bible

Apocalipsis 19

¹Chin guluhlla raꞌ cohsa raꞌ riiꞌ, chiꞌchi biindxiaagahn rsiaaꞌha ziga ziahan rooꞌ raꞌ bwiinn nin cañiꞌ nez llaaꞌndxibaaꞌ squiiꞌ:¡Lasahca duxa naa lah Daada Dxiohs!Cun ziga rutaꞌh Ñiꞌh laꞌh raꞌ bwiinn loh duhlda, cun guelñaꞌñih, cun guelrnabwaꞌ naa xteenn Xtaada Dxiohs nuꞌh,

²laasii xquelguxchisi Ñiꞌh naa gaduhbi laꞌgaꞌhtiiꞌ ziga naa xnehza;laasii laꞌh Ñiꞌh bwiꞌhnn guelguxchisi xcweenta gunnaꞌh dxaaba nin cagaxiꞌn laꞌh raꞌ bwiinn guidxyiyuh cun xcweenta xquelgubwihlli ba;laꞌh Ñiꞌh basadxihlli laꞌh gunnaꞌh dxaaba chi llarihn raꞌ xpwiinn Ñiꞌh.

³Lwehgu guñiꞌ raꞌ ba stuhbi squiiꞌ: ―¡Lasahca duxa naa lah Daada Dxiohs! Laasii guhxa xteenn gunnaꞌh dxaaba cun ziga zohbadxih ba ayi chuu dxih cweezan.

⁴Ya loh galda bitaapa raꞌ bwiinn guuhla cun gadaapa raꞌ maan nabahanpaꞌhcaa raꞌ bazuꞌnllihbi raꞌ nez loh Dxiohs nin zohba loh yahgaxiiyi rooꞌ ya rahbi raꞌ ba squiiꞌ: ―¡Ziꞌchi gaca! ¡Lasahca naa lah luꞌh Daada Dxiohs!

⁵Ya chiꞌchi desde nez loh yagaxiiyi rooꞌ chi biinloh tuhbi rsiaaꞌha nin cañiꞌ squiiꞌ:¡Gulguiꞌhnn lasahca laꞌh Xchiohs nuꞌh, garaa tu nin ruhnn dziꞌn nez loh Ñiꞌh; garaa tu nin ruzuꞌnllihbi nez loh Dxiohs;bwiinn raꞌ nin rnabwaꞌ nee cun bwiinn raꞌ nin ayi xi guelrnabwaꞌ nahpa za! Lañih xteenn saaꞌ Xiꞌhyi Dxiohs

⁶Chiꞌchi biindxiaagahn ziga rsiaaꞌha ziahan rooꞌ raꞌ bwiinn, nee ziga bwih xteenn ziahan guiꞌw chin radxaꞌgalasaaꞌ ñihsa nee ziga bwih xteenn chin rdxiꞌñaaꞌ duxa duꞌguziꞌw; guñiꞌ squiiꞌ:¡Lasahca duxa naa lah Daada Dxiohs!, laasii laꞌh Yuꞌbi Dxiohs, nin naa Daada xteenn nuꞌh, laꞌh Ñiꞌh guzohbaloh canabwaꞌ.

⁷Dxiahxi duxa raꞌ nuꞌh, chuu nasaa duxa stoꞌ raꞌ nuꞌh nee gachidiꞌhnn lasahca nuꞌh laꞌh Ñiꞌh,laasii laꞌh dxyih nin gaca rsaaꞌ Xiꞌhyi Dxiohs badzihn; laꞌh dxaꞌpa xteenn Ñiꞌh guzuhchaꞌyi.

⁸Ya laꞌh dxaꞌpa chi guziꞌguehlda Dxiohs gacu bi lahdxi nin laa linu finu, nin nayaa nin rcaꞌbachaꞌh,pwihsi lahdxi linu finu naa sehn xteenn raꞌ dziꞌn zaꞌca nin bwiꞌhnn raꞌ nin naa raꞌ xpwiinn Dxiohs.

⁹Ya chiꞌchi nnah aanjla chi loon: ―Bacaꞌh squiiꞌ: “Dichohsa raꞌ bwiinn raꞌ nin biduꞌhun dxiꞌ loh saaꞌ xteenn Xiꞌhyi Dxiohs.” Guñiꞌ za aanjla chi loon, nnah ba: ―Dxyiꞌdxyi raꞌ riiꞌ naa dxyiꞌdxyi nin naa guchii xteenn Dxiohs.

¹⁰Chiꞌchi ñuzuꞌnlliibihn loh aanjla chi, per squiiꞌ guñiꞌ ba loon: ―¡Ayi guunn luꞌh ziꞌca!, laasii naꞌh naan ziga gahca yiꞌh; naꞌh naan tuhbi nin ruhnn xtsiꞌn Dxiohs, ziga naa luꞌh yiꞌh cun bwihtsi raꞌ luꞌh nin zezah loh dxyiꞌdxyi guchii xteenn Jesucristu. Mas chaꞌyi guzuꞌnllihbi luꞌh loh Dxiohs; laasii xchiꞌdxyi Jesuhs naa dxyiꞌdxyi nin ruluuꞌyi Dxiohs laꞌh raꞌ bwiinn tin rahpaa raꞌ ba dxyiꞌdxyi guiñiꞌ raꞌ ba. Nin dziꞌba tuhbi maangwahyi labweh

¹¹Chiꞌchi bwaꞌhahn billaala dxibaaꞌ, ya biinloh tuhbi maangwahyi labweh, ya nin zohba dihtsi ma laa Nin ruzaꞌloh xchiꞌdxyi Ñiꞌh, laasii rnabwaꞌ Ñiꞌh nee ruhnn Ñiꞌh guehrru ziga naa xnehza ziga naa guelguxchisi zaꞌca.

¹²Bizloh Ñiꞌh naa raꞌn ziga dxih bwehla, ya yihca Ñiꞌh zohba ziahan rooꞌ raꞌ curohn, ya caa Ñiꞌh tuhbi lah nin sola laꞌh Ñiꞌh naann Ñiꞌh ya ayi chyu ruhnn gahn dxiuꞌnbwaꞌ lah Ñiꞌh.

¹³Nahcu Ñiꞌh tuhbi lahdxi nin nuuchi rihn, ya lah Ñiꞌh naa Xchiꞌdxyi Dxiohs.

¹⁴Ya naꞌhla garaa raꞌ suldahdu dxibaaꞌ xteenn Dxiohs laꞌh Ñiꞌh, nahcu raꞌ ba lahdxi labweh guiiꞌw raꞌ, lahdxi nayaa nee dziꞌba za raꞌ ba maangwahyi labweh raꞌ.

¹⁵Rwaaꞌ Ñiꞌh careꞌh tuhbi spahda nin caa duxa garoopa dihtsi, tin cun laꞌh spahda chi childxinee Ñiꞌh laꞌh raꞌ bwiinn garaa raꞌ guihdxyi raꞌ nin nuu loh guidxyiyuh; naa Ñiꞌh nuꞌa ziga zi tuhbi bahra dxiꞌba nguihdzi. Laꞌh Ñiꞌh zuhnn za Ñiꞌh guelguxchisi loh raꞌ bwiinn raꞌ nin ruhnn malcriahdu nez loh Dxiohs ya zidxihchixquiiꞌ Ñiꞌh yihca raꞌ ba ziga zi uhva raꞌ chin rahcan vihnu, nee zuhnn Ñiꞌh para gutiꞌdxiloh raꞌ ba loh guelguxchisi xteenn Dxiohs nin nuu nabahan dziꞌtsi llaaꞌndxibaaꞌ.

¹⁶Nee loh xahba Ñiꞌh cun cweꞌ cuuꞌdxi Ñiꞌh caa squiiꞌ: “Rehyi xteenn raꞌ rrehyi raꞌ, Daada xteenn raꞌ daada raꞌ.”

¹⁷Ya bwaꞌhazahn loh tuhbi aanjla nin zuunchii nez loh gubihdxyi, nee guñiꞌ aanjla chi cun tuhbi rsiaaꞌha rooꞌ squiiꞌ: ―Loh raꞌ garaa raꞌ maan raꞌ nin zohba xihyi ñiꞌh nin zaꞌbi nez llaaꞌndxibaaꞌ: Gultaaꞌ nee gulgadiaaꞌha riiꞌ, tin gahw tu loh xchih rooꞌ xteenn Dxiohs,

¹⁸tin gahw tu bweꞌhla xteenn rrehyi, neezaa bweꞌhla xteenn capitahn raꞌ, nee cun bweꞌhla xteenn raꞌ za bwiinn raꞌ nin ruhnn naruhla, cun bweꞌhla xteenn raꞌ maangwahyi nee cun nin rzohba za raꞌ dihtsi ma, neezaa bweꞌhla xteenn raꞌ bwiinn; bwiinn nin naa ziga bwiinn nin gudooꞌtiiꞌ raꞌ nee cun bwiinn raꞌ za nin ayi gudooꞌ raꞌ, bwiinn nin nariin raꞌ cun ziga bwiinn nin guyuꞌxa la raꞌ. Gacan rwaaꞌlohchiꞌzi.

¹⁹Chiꞌchi bwaꞌahan loh maan rooꞌ cun loh raꞌ rrehyi loh guidxyiyuh cun garaa raꞌ nin naa raꞌ ziga xsuldahdu raꞌ ba; badiaaꞌha raꞌ ba tin childxinee raꞌ ba laꞌh nin dziꞌba maangwahyi labweh cun neezaa garaa raꞌ nin naa xsuldahdu Ñiꞌh,

²⁰ya binaꞌzu maan rooꞌ chi cun nin guhca profehta xteenn ma nin bwiꞌhnn sehn rooꞌ raꞌ cun milahgru raꞌ nez loh maan rooꞌ chi tin binaꞌzunee ma tuhsi cun nin guhca xprofehta ma. Ya cun milahgru raꞌ chi basaguiꞌhi profeta dxaaba chi laꞌh raꞌ bwiinn raꞌ nin guziꞌguehlda raꞌ guyuuꞌ raꞌ ba xpwaꞌ maan rooꞌ chi nee cun nin bazuꞌnllihbi za raꞌ loh xfiguhra maan rooꞌ chi; ya maan rooꞌ chi cun nin guhca xprofehta ma tuhsi zee raꞌn loh bwehla duxa nin naa asufre,

²¹ya chiꞌchi laꞌh garaa raꞌ nin biaꞌhan, guhchi raꞌ ba pur spahda nin biriaꞌh rwaaꞌ nin dziꞌba maangwahyi labweh, ya garaa raꞌ maan nin zohba xihyi ñiꞌh gudahw xpweꞌhla raꞌ ba.