Read Chichicapan Zapotec Apocalipsis 2 Bible Online

Apocalipsis 2 - Chichicapan Zapotec bible

Apocalipsis 2

¹Chiꞌchi nah Ñiꞌh loon: ―Bacaꞌh dxyiꞌdxyi raꞌ riiꞌ loh xaanjla Dxiohs nin rahpa xpwiiꞌnnraꞌn nin rii loh guihdxyi Efesu: “Squiiꞌ rñiꞌ nin caa gahdzi dxih llaaꞌndxibaaꞌ naa derehchu Ñiꞌh, nin caꞌnzaa galaayi gagaadzi raꞌ gandayehru ohro raꞌ.

²Naꞌh nuꞌnbwaꞌn xtsiꞌn tu cun guelrzaꞌcazii nin rutiꞌdxiloh tu loh xtsiꞌn tu nee xa riazahdziꞌtsi tu loh xchiꞌdxyiꞌhn, nee naꞌnnzahn ayi rchaꞌga tu laꞌh raꞌ bwiinn nadxaaba raꞌ, nee ziga laꞌh tu biuuꞌnbwaꞌza tu xcweenta bwiinn raꞌ nin rñiꞌ naa raꞌ xpooxtla Dxiohs per ayi naa raꞌ ba xpwiinn Dxiohs. Sola naann tu naa raꞌ ba bwiinn rusaguiꞌhi raꞌ.

³Pwihsi gwazahdziꞌtsi tu loh xchiꞌdxyiꞌhn, bwiꞌhnn tu waanta batiꞌdxiloh tu guelrzaꞌcazii pur naa tu xpwiiꞌnnraꞌn, nee ayi bietagueeta tu.

⁴Per naꞌpahn tuhbi guelchiah nin rbaꞌchihn xcweenta tu, laasii ayi ru rucaꞌh stoꞌ tu naꞌh ziga bacaꞌstoꞌ tu naꞌh des galoh.

⁵Pwihsi niꞌchin gulgazaꞌstoꞌ tu caa loh guzaꞌbi tu, gulgachaꞌh ziga nabahan tu tin gulgabiaꞌgarii gulguiꞌhnn ziga gubahan tu des galohtiiꞌyi; sinolan lwehgu gahca gadxiꞌhyihn laꞌh tu nee gusiaꞌpitiin xgandayehru tu xnehzan sidela ayi guchaꞌh tu lligaaba guelruhnn chiohpa stoꞌ nin nuu stoꞌ tu.

⁶Per nuu nin ruhnn xnehza tu: ayi riuuꞌstoꞌ tu nin ruhnn raꞌ bwiinn nicolaita raꞌ, ziꞌchi za naꞌh ayi riuuꞌstoꞌn dziꞌn nin ruhnn raꞌ ba.

⁷Bwiinn nin zohballaala dxiahga ñiꞌh chuu ba chaꞌzi ba dxyiꞌdxyi raꞌ nin rñiꞌ Spíritu Saantu xteenn Dxiohs loh raꞌ xpwiiꞌnnraꞌn, ya bwiinn raꞌ nin guunn gahn loh duhlda, zudiꞌhihn ñinahxi nin caa loh yahga nin naa guelnabahan gahw raꞌ ba, yahga ñinahxi nin nuu llaaꞌndxibaaꞌ hasta nuu Dxiohs.” Dxyiꞌdxyi raꞌ nin rñiꞌ loh dxihtsi riiꞌ par laꞌh raꞌ xpwiinn Jesucristu nin rii loh guihdxyi Esmirna

⁸Chiꞌchi nah Ñiꞌh loon: ―Bacaꞌh dxyiꞌdxyi raꞌ riiꞌ loh xaanjla Dxiohs nin rahpa xpwiiꞌnnraꞌn nin rii loh guihdxyi nin laa Esmirna: “Naꞌh nin naan des galohtiiꞌyi nee naꞌh za nin naan par loh dxyih luulchima raꞌ, naꞌh nin guhchiꞌhn per gubiaꞌgarii ba nabahan.

⁹Naꞌh naꞌnnahn xa rutiꞌdxiloh tu guelrzaꞌcazii nee naꞌnnzahn gulliaaꞌhatiiꞌ nin nahpa tu nee nicala naa tu nin nuu ziahan xixteenn ñiꞌh loh Dxiohs, nee naꞌnnzahn nuu nin rñiꞌyah raꞌ laꞌh tu nee rahbi raꞌ ba naa raꞌ ba bwiinn Israel per ayi naa raꞌ ba ziꞌchi; nin naa raꞌ ba laꞌh raꞌ ba naa raꞌ ba xpwiinn xquidoꞌ bwiinndxaaba.

¹⁰Ayi guidxyihbi tu loh xcweenta guelrzaꞌcazii nin laꞌh guhlda gutiꞌdxiloh tu, laasii laꞌh bwiinndxaaba gusieꞌw paaldaa tu laꞌn lahtsidxiꞌba, tin gacabwaꞌ ba guiduꞌhun ta guchii tu gwachiistoꞌ tu xchiꞌdxyiꞌhn, ya zutiꞌdxiloh tu guelrzaꞌcazii tsiꞌh gubihdxyi; gulgasuhchihpa lastoꞌ tu tin chezah dziꞌtsi tu loh xchiꞌdxyiꞌhn nicala gachi tu, per naꞌh guniꞌhihn guelnabahan nin ba naa par tuꞌpazi laꞌh tu ziga tuhbi corohna.

¹¹Nin luꞌh xclaaꞌdzi guzoꞌbadxiahga dxyiꞌdxyi, gucaꞌhdxiahga ba dxyiꞌdxyi nin rñiꞌ Spíritu Saantu xteenn Dxiohs loh raꞌ bwiinn guidoꞌ xteenn Dxiohs: nin guunn raꞌ gahn loh duhlda, ayi xi guunnee guelguhchi nin raroopa laꞌh raꞌ ba.” Dxyiꞌdxyi raꞌ nin rñiꞌ loh raꞌ xpwiinn Jesucristu nin rii loh guihdxyi Pérgamo

¹²Chiꞌchi nah Ñiꞌh loon: ―Bacaꞌh dxyiꞌdxyi raꞌ riiꞌ loh xaanjla Dxiohs nin rahpa xpwiiꞌnnraꞌn nin rii loh guihdxyi Pérgamo: “Naꞌh nin naꞌpahn spahda nin caa duxa garoopa dihtsi ñiꞌh rñiꞌn dxyiꞌdxyi riiꞌ.

¹³Naꞌh naꞌnnahn nuu tu loh guihdxyi nin rnabwaꞌ bwiinndxaaba, per zeezahnee dziꞌtsi tu xchiꞌdxyiꞌhn, ayi cabweꞌhestoꞌ tu xchiꞌdxyiꞌhn nicala laꞌn dxyih nin gudxiinn raꞌ ba laꞌh Antipas, nin guñiꞌ xcweenta xchiꞌdxyiꞌhn, nin gwazahnee zaꞌcapaꞌh xchiꞌdxyiꞌhn nin gudxiinn raꞌ ba hasta rnabwaꞌ bwiinndxaaba,

¹⁴per guyuuꞌ chiohpa-choon xtuhlda tu: loh tu dxaꞌga raꞌ bwiinn raꞌ nin ruhnn ziga bwiꞌhnn guehtu Balaam ba guhca cadxyih rooꞌ; laꞌh ba basiꞌdxi ba laꞌh guehtu Balac xa guunn ba tin dxiaaba raꞌ bwiinn Israel loh duhlda, baluuꞌyi ba laꞌh raꞌ bwiinn Israel tin gahw raꞌ ba cohsa raꞌ nin badiꞌhi guhn raꞌ ba nez loh dxaan, nee basiꞌdxi za ba laꞌh raꞌ bwiinn Israel guidxaꞌga raꞌ ba chyu chiꞌh zi gunnaꞌh.

¹⁵Ziꞌchi gahca za nahpa tu bwiinn raꞌ nin zeezahnee raꞌ dxyiꞌdxyi raꞌ nin ruluuꞌyi raꞌ nin laa nicolaita raꞌ nin rdxyiꞌchihn xcweenta raꞌ ñiꞌh,

¹⁶niꞌchin gulgachaꞌh stoꞌ tu; sino laꞌn seguihdu gahca dxieꞌldahn tin childxineꞌhn niꞌchi raꞌ cun spahda nin nuu rwaaꞌhahn.

¹⁷Nin luꞌh xclaaꞌdzi guzoꞌbadxiahga dxyiꞌdxyi; gucaꞌdxiahga ba dxyiꞌdxyi raꞌ nin rñiꞌ Spíritu Saantu Dxiohs loh raꞌ xpwiiꞌnnraꞌn: nin guunn gahn loh duhlda, niꞌchi raꞌ gudiꞌhihn tuhbi lasaaꞌ pahn nin laa manah gahw raꞌ ba laꞌn nuuchaꞌyi, nee gudiꞌhi zahn tuhbi dxiah labweh laꞌh bwiinn chi ya loh dxiah labweh chi caa tuhbi lah nacuubi nin ayi chyu nuꞌnbwaꞌtiiꞌ sola nuꞌnbwaꞌ nin guicaꞌha dxiah yiꞌhn chi lah nin caa loh dxiahyiꞌhn chi.” Dxyiꞌdxyi raꞌ nin rñiꞌ loh raꞌ xpwiinn Jesucristu nin rii loh guihdxyi Tiatira

¹⁸Chiꞌchi nah Ñiꞌh loon: ―Bacaꞌh dxyiꞌdxyi raꞌ riiꞌ loh xaanjla Dxiohs nin rahpa xpwiiꞌnnraꞌn nin rii loh guihdxyi Tiatira: “Squiiꞌ guñiꞌ Lliiꞌn Dxiohs, nin naa bizloh ñiꞌh ziga zi bwehla ya ñaaꞌ Ñiꞌh ziga zi dxiꞌba nin laa bronce nin rcaꞌbachaꞌh.

¹⁹Naꞌh laꞌn naann la garaa raꞌ nin ruhnn tu; naꞌnnahn xa rantsiiꞌhi lasaaꞌ tu, nee xa riachiistoꞌ tu xchiꞌdxyiꞌhn, nee xa naa xtsiꞌn tu nee xa riazah dziꞌtsi tu, nee naꞌnnahn cayuhnn tu dziꞌn rooꞌ ru nnah loh galoh nin guzoꞌbaloh tu,

²⁰per nuu tuhbi guelchiah nin rdxiꞌchihn pur laꞌh tu; laasii rcahbi tu riuuꞌ tu loh tuhbi gunnaꞌh nin laa Jezabel. Laꞌh ba rñiꞌ si ba naa ba tuhbi profehta, gunnaꞌh nin rñiꞌ xchiꞌdxyi Dxiohs, ya pur nin ruluuꞌyi ba rusaguiꞌhi zi ba laꞌh raꞌ xpwiiꞌnnraꞌn tin rzaꞌbi raꞌ ba loh raꞌ dziꞌn gubwihlli nee tin rahw za raꞌ ba cohsa raꞌ nin rbwih loh dxaan.

²¹Naꞌh laꞌn guleꞌza xchih tin gusaguuꞌdzi stoꞌ ba pur xtuhlda ba, per ayi guclaaꞌdzitiiꞌ ba ñuhnn ban; ayi rbweꞌhestoꞌ ba dziꞌn gubwihlli nin ruhnn ba.

²²Pwihsi naꞌh guꞌnnahn dxiaaba ba loh luꞌhn cun tuhbi gueldxyihdxyi duxa, nee cun garaa raꞌ nin ruhnnee laꞌh ba dziꞌn gubwihlli gutiꞌdxi raꞌn ba loh guelrzaꞌcazii duxa sidela ayi gusaguuꞌdzi stoꞌ raꞌ ba xcweenta xtsiꞌn Jezabel.

²³Zidxiꞌnnahn lliiꞌn ba, ya ziꞌchi zahcabwaꞌ garaa raꞌ xpwiꞌnnraꞌn naꞌh nuꞌnbwaꞌn garaatiiꞌ nin nuu xigaaba tu cun ziga naa stoꞌ tu; ya tuhbigah tu guniꞌhihn nin rgaꞌha guicaꞌha tu ziga naa xtsiꞌn tuhbigah tu.

²⁴Per laꞌh tu garaa raꞌ ru nin nuu loh guihdxyi Tiatira, nin raꞌ ayi zeezah loh dxyiꞌdxyi nin ruluuꞌyi Jezabel nee nin ayi za nuꞌnbwaꞌ tu nin rñiꞌ raꞌ ba naa dxyiꞌdxyi ralaꞌn xteenn bwiinndxaaba, naꞌh nin stuhbi dziꞌn ayi rudziꞌbaꞌhn yihca nin naa tuhbi dxiꞌh xtsiꞌn tu.

²⁵Mas gulgahpa dziꞌtsi xchiꞌdxyiꞌhn nin nahpa tu hastayi chin dxieꞌldahn stuhbi,

²⁶ya bwiinn raꞌ nin guunn gahn loh duhlda nee chezah tu ziga xclaaꞌdzihn hasta laꞌn dxih nin chaꞌloh guidxyiyuh, zudiꞌhihn guelrnabwaꞌ laꞌh raꞌ ba tin guinabwaꞌ raꞌ ba loh raꞌ naciohn raꞌ.

²⁷Pwihsi ziga baniꞌhi Xtaaꞌdahn guelrnabwaꞌ naꞌh, zudiꞌhihn guelrnabwaꞌ laꞌh raꞌ ba tin guinabwaꞌ raꞌ ba loh raꞌ garaa raꞌ bwiinn guidxyiyuh, nee guunn raꞌ za ba guelguxchisi xcweenta raꞌ ba ziga zi cun tuhbi bahra dxiꞌba ziga ruhn nin ruhnnchaꞌyi guihsu bwehn, rutaaꞌha raꞌ ba garaa raꞌ guihsu nin ayi galluꞌyi.

²⁸Zudiꞌhi zahn dxih nin riꞌ rsiiyidoꞌ laꞌh raꞌ ba.

²⁹Nin ayi ñieꞌw dxiahga ñiꞌh, guzoꞌbadxiahga raꞌ ba nin rñiꞌ Spíritu Saantu Dxiohs loh raꞌ xpwiiꞌnnraꞌn.”