Read Chichicapan Zapotec Apocalipsis 4 Bible Online

Apocalipsis 4 - Chichicapan Zapotec bible

Apocalipsis 4

¹Chin guyaꞌloh bacaꞌhn dxyiꞌdxyi raꞌ nin gunabwaꞌ Ñiꞌh bacaꞌhn, chiꞌchi guteesa loon nez dxibaaꞌ, bwaꞌhahn zohballaala rwaaꞌ ziga tuhbi yuuꞌ nez dxibaaꞌ, chiꞌchi guñiꞌ tuhbi rsiaaꞌha loon, rsiaaꞌha chi naan ziga rsiaaꞌha xteenn tuhbi trompeta nin bihn dxiaagahn galoh, nah rsiaaꞌha chi loon: ―Gucah riiꞌ, tin guluꞌyiꞌhn yiꞌh garaaꞌ raꞌ nin chuu ru gaca chin tuulla gaca cohsa raꞌ riiꞌ.

²Ya chiꞌchi biaꞌhanahn loh guelrnabwaꞌ xteenn Spíritu Saantu, ya bwaꞌhahn tuhbi yahgaxiiyi rooꞌ llaaꞌndxibaaꞌ hasta rbwih raꞌ nin rnabwaꞌ llaaꞌndxibaaꞌ, ya loh yahgaxiiyi chi zohba nin rnabwaꞌ llaaꞌndxibaaꞌ.

³Ya nin zohba loh yahgaxiiyi chi rñah niꞌchi ziga tuhbi dxiah nin rbwiibwehla nin laa jaspe o nin laa za cornalina, ya gadiidxi yahgaxiiyi chi nuu tuhbi guundzihin nin rcaꞌbachaꞌh duxa ziga zi tuhbi dxiah nin laa esmeralda,

⁴ya gadiidxi yahgaxiiyi riiꞌ bwaꞌhahn za galda bitapa yahgaxiiyi raꞌ nin zohba galda bitapa bwiinnguuhla raꞌ, nahcu raꞌ ba ganaalla lahdxi labweh ya nuu tuhbigah raꞌ corona ohro yihca raꞌ ba,

⁵ya nez loh yahgaxiiyi rooꞌ chi riꞌchi rreꞌh duꞌhdxih raꞌ nin naa duꞌhdxih nin rreꞌh chin rdxiꞌñaaꞌ, ya nez loh za yahgaxiiyi rooꞌ chi cacadxih gahdzi bwehla nin naa gahdzi spíritu xteenn Dxiohs,

⁶cun nez lohgahcaza yahgaxiiyi rooꞌ chi nuu ñihsadoꞌ nin rñah ziga zi dxiawahan. Nee cun galaayiza yahgaxiiyi rooꞌ chi cun gadiidxin rii raꞌ tahpa maan raꞌ nin nuu bizloh raꞌ ñiꞌh gadiidxitiiꞌ raꞌ ma tantu nez delanta ziga nez dihtsi raꞌ za ma.

⁷Nin naa mwer tuhbi maan raꞌ chi naa tuhbi bweꞌdzi; ya nin raroopa maan chi naa ziga tuhbi guun; ya nin riohnna chi naa ziga loh tuhbi ndxiꞌhw; ya nin radaapa maan chi naa ziga tuhbi bisiah nin rzuh.

⁸Ya gadaapa raꞌ maan raꞌ chi tuhbigah raꞌ ma zohba xoꞌpagah xiiyi raꞌ ma, ya gaduhbitiiꞌ tihxi raꞌ ma nuu bizloh raꞌ ma; nee dxyih-nagueꞌla ayi rbweeza cañiꞌ raꞌ ma:Saantu, saantu, saantu naa Daada Dxiohs nin nahpa guelrnabwaꞌ rooꞌ, nin nuu des galohtiiꞌyi, nin nuu nnah, cun nin chuu par tuꞌpazi.

⁹Ya chin ruhnn lasahca raꞌ gadapa maan raꞌ chi cun ruzuꞌnllihbi raꞌ ma cun rudiꞌhi raꞌ ma guelzuxchilli loh nin zohba loh yahgaxiiyi nin ba rnabwaꞌ par tuꞌpazi,

¹⁰ya gagalda bitapa raꞌ bwiinn guuhla raꞌ ruzuꞌnllihbi raꞌ ba nez loh nin ba rnabwaꞌ par tuꞌpazi cun raann raꞌ ba laꞌh Ñiꞌh, ya ruzuhcaa raꞌ ba xcurohn raꞌ ba hasta zuu xahgaxiiyi Ñiꞌh, cun rahbiza raꞌ ba:

¹¹Daada Dxiohs Xtaada nu, Yuꞌbi paꞌca luꞌh rgaꞌha guunnlasahca bwiinn lah luꞌh cun guzuꞌnllihbi raꞌ ba loh luꞌh cun guicaꞌha za luꞌh garaa guelrnabwaꞌlaasii Yuꞌbiluꞌh bwiꞌhnnchaꞌyi luꞌh garaatiiꞌ raꞌ nin nuu nnah pur xigaaba luꞌh guhca raꞌn niꞌchin nin gurihxchih raꞌn.