Read Chimborazo Highland Quichua GÉNESIS 1 Bible Online

GÉNESIS 1 - Chimborazo Highland Quichua bible

GÉNESIS 1

¹Jahua pachata, cai pachata callarichijca Taita Diosmi.

²Cai pachaca imaman mana rijchaj, imapish illaj, yacuhuan junda amsallami carca. Taita Diospaj Espirituca yacu jahuapimi cuyuricurca.

³Chaitami Taita Diosca: “Achijlla tucuchun” nijpi, achijlla tucurca.

⁴Achijllataca alli cashcata ricushpami, Taita Diosca achijllataca amsamanta ch'icanyachun nirca.

⁵Achijllataca “Punllatami” shutichirca. Amsataca “Tutatami” shutichirca. Punllandij tutandijmi shuj punlla tucurca. Chashnami callari punllaca saquirirca.

⁶Chai q'uipaca Taita Diosca: “Yacucunata ucuman, jahuaman ch'icanchij huaira tiyachun” nircami.

⁷Ch'icanyachichun churashpaca Taita Diosca chaupi yacutaca cai pachapi, chaupi yacutaca ch'icanyachij huaira jahuapimi churarca. Chaica chashnami saquirirca.

⁸Taita Diosca chai ch'icanchij huairataca “Jahua Pachatami” shutichirca. Punllandij tutandijmi shuj punlla tucurca. Chashnami ishqui punllapica saquirirca.

⁹Taita Diosca: “Chaquishca allpa tiyachun. Cai pachapi tiyaj yacucunaca shujllaman tandanacuchun” nircapishmi. Chashnami saquirirca.

¹⁰Maillapi chaquishca cajtaca “Allpatami” shutichirca, yacucuna tandanacushcataca “Mama Cuchatami” shutichirca. Taita Diosca tucuitami alli cashcata ricurca.

¹¹Chai q'uipaca Taita Diosca: “Allpamantaca verdijlla q'uihuapish, muyuta cuj q'uihuapish, granota p'ucuj tucui laya yuracunapish huiñachun. P'ucunatapish paicuna imata p'ucuna cashca shinallataj p'ucuchun, muyupish chaillamantataj llujshichun” nircami. Chaica chashnami saquirirca.

¹²Allpamantaca tucui laya q'uihuacunami huiñarca. Chaicunaca paicuna imata p'ucuna cashca shinallatajmi muyucunayuj granocunata p'ucurca. Yuracunapish huiñarcami. Chaicunapish paicuna imata p'ucuna cashca shinallatajmi muyuta charij micunacunata p'ucurca. Taita Diosca tucuitami alli cashcata ricurca.

¹³Punllandij tutandijmi shuj punlla tucurca. Chashnami quimsa punllapica saquirirca.

¹⁴Chai q'uipaca Taita Diosca cashnami nirca: “Jahua pachamanta achijyachishpa punllatapish, tutatapish ch'icanchij tiyachun. Chaicunaca ima quillacuna, ima punllacuna, ima huatacuna cashcatapish ricuchijcuna cachun.

¹⁵Chaicunaca jahua pachamanta cai pachata achijyachijcuna cachun” nircami. Chaica chashnami saquirirca.

¹⁶Taita Diosca ishqui jatun achijyachijcunatami rurarca. Jatun achijyachijtaca punllata achijyachichun. Uchilla achijyachijtaca tutata achijyachichunmi rurarca. Luzerocunatapish rurarcami.

¹⁷Taita Diosca chai achijyachijcunataca allpa pachata achijyachichun jahua pachapimi churarca.

¹⁸Punllatapish, tutatapish achijyachishpa, achijtaca amsamanta ch'icanyachichunmi churarca. Taita Diosca tucuitami alli cashcata ricurca.

¹⁹Punllandij tutandijmi shuj punlla tucurca. Chashnami chuscu punllapica saquirirca.

²⁰Taita Diosca: “Yacupi causai tucuipaj tucui laya animalcuna, huairata purij alasyuj tucui laya animalcuna tiyachun” nircami.

²¹Taita Diosca yacupi causai tucuipaj tucui laya jatun animalcunatapish, tucui laya uchilla animalcunatapish paicuna ima shina cana cashca shinallatatajmi rurarca. Huairapi purij tucui laya animalcunatapish paicuna ima shina cana cashca shinallatatajmi rurarca. Taita Diosca tucuitami alli cashcata ricurca.

²²Taita Diosca chai animalcunata alli cashca cachun nishpaca: “Huahuacunayuj tucushpa, achcata mirarishpa mama cuchapi jundarichij” nircami.

²³Punllandij tutandijmi shuj punlla tucurca. Chashnami pichca punllapica saquirirca.

²⁴Chai q'uipaca Taita Diosca: “Allpapica tucui laya animalcuna paicuna ima shina cana shinallataj tiyachun. Charina animalcunapish, llucashpa purij animalcunapish, sacha animalcunapish tiyachun” nircami. Chaica chashnami saquirirca.

²⁵Taita Diosca sacha animalcunatapish paicuna ima shina cana shinallatataj, charina animalcunatapish paicuna ima shina cana shinallatataj, llucashpa purij animalcunatapish paicuna ima shina cana shinallatatajmi rurarca. Taita Diosca tucuitami alli cashcata ricurca.

²⁶Chai q'uipami Taita Diosca: “Cunanca yacupi causaj animalcunatapish, huairapi purij alasyuj animalcunatapish, charina animalcunatapish, sachapi causaj animalcunatapish mandachunca ñucanchijman rijchaj, ñucanchijtajlla runata rurashun” nirca.

²⁷Taita Diosca paiman rijchaj runatami rurarca. Taita Diosca c'aritapish huarmitapish paiman rijchajtami rurarca.

²⁸Taita Diosca paicunata alli cashca cachun nishpaca: “Huahuacunayuj tucushpa, alli huiñachishpa achcata mirarishpa cai pachapi jundarishpa cai pachata mandanguichij. Yacupi causaj animalcunatapish, huairapi purij alasyuj animalcunatapish, allpapi purij tucui animalcunatapish cancuna mandanguichij” nircami.

²⁹Chai q'uipami Taita Diosca: “Riquichij, cancunamanca allpapi huiñashpa p'ucujmantaca muyuyashpa p'ucuj tucui laya granocunatapish, yurapi p'ucuj tucui laya granocunatapishmi cuni. Tucui chaicunatami micui tucunguichij.

³⁰Sacha animalcunamanpish, huairata purij alasyuj animalcunamanpish, llucashpa purij animalcunamanpish paicuna micuchunca verdijlla tucui laya q'uihuacunatami cuni” nircami. Chaica chashnami saquirirca.

³¹Taita Diosca pai rurashca tucui chaicunaca yallitaj sumaj alli cashcatami ricurca. Punllandij tutandijmi shuj punlla tucurca. Sujta punllapica chashnami saquirirca.