Read Chimborazo Highland Quichua GÉNESIS 11 Bible Online

GÉNESIS 11 - Chimborazo Highland Quichua bible

GÉNESIS 11

¹Cai pachapi causajcunaca tucuicunami shuj shinalla, shuj rimaillata rimajcuna carca.

²Inti llujshin ladomanta rishpaca, Sinar llajtapi caj pambamanmi chayarcacuna. Chaipimi causanata callarircacuna.

³Chaipi cashpami caishuj chaishuj: “Jacuchij, ladrillota rurashpa ninapi cusashunchij” ninacurcacuna. Chashnami rumicunapaj randica ladrillota, lodopaj randica breata charircacuna.

⁴Chai q'uipaca cashnapishmi nircacuna: “Shuj pueblota jahua pachaman chayaj torreyujta rurashunchij. Chashnami c'ari c'ari runacuna tiyashcaca tucuipi yacharishun, tucui cai pachata caita chaita rinatapish pararishun” nircacunami.

⁵Mandaj Diosca cai pachapi causajcunaca jahua pachaman chayaj torreyuj pueblota shayachicujpimi, chaita ricungapaj jahuamanta uriyamurca.

⁶Chaimi Mandaj Diosca: “Paicunaca tucuicuna shuj shinalla cashpa, shuj rimaillapi rimajcuna cashpami cashna ruranataca callarishcacuna. Chaimanta cunanca paicuna yuyarishcataca ima mana jarcai tucungachu.

⁷Cunanca caishuj chaishuj imata rimacushcatapish ama entendichun paicunapaj rimaitaca ch'ican ch'icanta rurashun” nirca.

⁸Chashnami Mandaj Diosca, paicunataca chai pambamantaca tucui cai pachata caita chaita cacharca. Chaimi paicunaca jatun pueblota shayachinataca saquircacuna.

⁹Mandaj Dios chai punllapi tucui cai pachapi causajcunapaj rimaita ch'ican ch'icanta rurashpa tucui cai pachata caita chaita cachashcamantami chai pueblotaca, Babelta shutichirca.

¹⁰Sempaj huahua huahua callari yayacunaca caicunami: Semca yacu juillu tiyashca ishqui huata q'uipa ña patsaj huatayuj cashpami, Arfaxad churita charirca.

¹¹Semca Arfaxad churita charishca q'uipaca 500 huatacunahuanmi causarca. Churicunatapish ushushicunatapish charircarajmi.

¹²Arfaxadca quimsa chunga pichca huatayuj cashpami, Sala churita charirca.

¹³Arfaxadca Sala churita charishca q'uipaca, 403 huatacunahuanmi causarca. Churicunatapish, ushushicunatapish charircarajmi.

¹⁴Salaca quimsa chunga huatayuj cashpami, Heber churita charirca.

¹⁵Salaca, Heber churita charishca q'uipaca 403 huatacunahuanmi causarca. Churicunatapish, ushushicunatapish charircarajmi.

¹⁶Heberca quimsa chunga chuscu huatayuj cashpami, Peleg churita charirca.

¹⁷Heberca, Peleg churita charishca q'uipaca 430 huatacunahuanmi causarca. Churicunatapish, ushushicunatapish charircarajmi.

¹⁸Pelegca quimsa chunga huatayuj cashpami, Reu churita charirca.

¹⁹Pelegca, Reu churita charishca q'uipaca 209 huatacunahuanmi causarca. Churicunatapish, ushushicunatapish charircarajmi.

²⁰Reuca quimsa chunga ishqui huatayuj cashpami, Serug churita charirca.

²¹Reuca, Serug churita charishca q'uipaca 207 huatacunahuanmi causarca. Churicunatapish, ushushicunatapish charircarajmi.

²²Serugca quimsa chunga huatayuj cashpami, Nacor churita charirca.

²³Serugca, Nacor churita charishca q'uipaca 200 huatacunahuanmi causarca. Churicunatapish, ushushicunatapish charircarajmi.

²⁴Nacorca ishqui chunga iscun huatayuj cashpami, Taré churita charirca.

²⁵Nacorca, Taré churita charishca q'uipaca 119 huatacunahuanmi causarca. Churicunatapish, ushushicunatapish charircarajmi.

²⁶Tareca canchis chunga huatayuj cashpami, Abram, Nacor, Harán shuti churicunata charirca.

²⁷Tarepaj huahua huahua callari yayacunaca caicunami: Tareca Abram, Nacor, Harán churicunatami charirca. Haranca Lot churitami charirca.

²⁸Haranca paipaj yaya Taré manaraj huañujpimi, pai huacharishca caldeocuna causacun Ur pueblollapitaj huañurca.

²⁹Abramhuan Nacorhuanca paicunapaj huarmicuna cachunca cai huarmicunatami japirca. Abrampaj huarmica Saraimi carca. Nacorpaj huarmica Milcami carca. Haranca Milcapaj, Iscapaj yayami carca.

³⁰Saraica mana huachaj cashpami, huahuacunataca mana charirca.

³¹Tareca paipaj churi Abramtapish, paipaj nuera Saraitapish, paipaj churi Haranpaj churi Lottapish, pushashpami Canaanman ringapaj, caldeocuna causacun Ur pueblomanta llujshishpa rirca. Ashtahuanpish Haranman chayashpaca chaillapimi saquirirca.

³²Tareca, 205 huatayuj cashpami Haranpi huañurca.