Read Chimborazo Highland Quichua GÉNESIS 12 Bible Online

GÉNESIS 12 - Chimborazo Highland Quichua bible

GÉNESIS 12

¹Mandaj Diosca, Abramtaca: “Can maipi causana llajtataca ñucami ricuchisha. Cunanca can causacun llajtatapish, cambaj huasi ucupuracunatapish, cambaj yayapaj huasi ucupuracunatapish saquishpa rilla.

²Canmantaca shuj jatun llajtatami rurasha. Cambaj shutitaca alli nishca cachun, jatun nishca cachunmi churasha. Canmantami tucui shujtajcunapish alli nishca cangacuna.

³Canta c'uyajcunataca c'uyashami. Canta p'iñajcunataca p'iñashami. Cai pachapi tucui causajcunaca canmantami alli nishca cangacuna” nircami.

⁴Abramca Mandaj Dios nishca shinallataj rircallami. Lot runapish paihuanmi rirca. Abramca Haranmanta llujshinapajca, canchis chunga pichca huatayujmi carca.

⁵Abramca paipaj huarmi Saraita, paipaj huauquipaj churi Lotta, paipajta rurajcuna cachun Haranpi randishca runacunata pushashpa, pai trabajashpa imallata charishcacunataca tucuita apashpami Canaanman rirca. Canaanman chayashpaca,

⁶Abramca tucui chai llajtata rishpami, Siquempi caj More shuti pambapi caj encina yura c'uchuman chayarca. Chai llajtapica cananeocunami causarca.

⁷Chaipimi Mandaj Diosca, Abramman ricurishpaca: “Cambaj huahua huahuacunamanca cai llajtatami cusha” nirca. Chaipimi Abramca, paiman ricurij Mandaj Diospaj shuj altarta rurarca.

⁸Chaimanta rishpaca Bet-elmanta inti llujshin ladoman caj shuj urcuman rishpami, paipaj carpa huasita chaipi shayachishpa tiyarirca. Pai tiyacunmantaca Bet-elca inti huashicun ladomanmi carca. Hai puebloca inti llujshin ladomanmi carca. Chaipipish Mandaj Diospaj shuj altarta rurashpami, Mandaj Diospaj shutipi mañarca.

⁹Abramca chaimanta rishpaca, asha asha caipi chaipi causashpami Neguevman chayarca.

¹⁰Chai llajtacunapica achca yaricaimi tiyarca. Achca yaricai tiyajpimi, Abramca Egiptopi causangapaj chaiman uriyarca.

¹¹Abramca Egiptoman ñalla chayagricushpami, paipaj huarmi Saraitaca: “Canca sumaj ñahui huarmimari cangui.

¹²Egipciocuna canta ricushpaca: Chai huarmica chai runapaj huarmimari yuyachin ningacunami. Chashna nishpaca ñucataca huañuchingami. Ashtahuanpish canhuan saquiringapaj cantaca mana huañuchingacunachu.

¹³Canmanta ñucapaj alli llujshichunca canca: Ñucapajca ñuca panilla cashcata huillangui. Chashna ñucapaj allita rurajpimi, ñucaca mana huañusha” nircami.

¹⁴Egiptoman Abram yaicujpica, Abram nishca shinallatajmi egipciocunaca Saraitaca sumaj huarmi cajta ricurcacuna.

¹⁵Faraón churashca mandajcuna ricushpapish chai huarmica sumaj huarmimari nishpa Faraonman huillashpami, Sarai huarmitaca, faraón mandashpa tiyana huasiman pusharcacuna.

¹⁶Faraonca Sarai huarmimantami Abrampaj allita rurashpa ovejacunata, vacacunata, burrocunata, camellocunata curca. Abrampajta ruraj cachunpish c'aricunata, huarmicunatami curca.

¹⁷Shina cajpipish Mandaj Diosca, Abrampaj huarmi Saraita faraón chashna apashcaca mana pai munashca cajpimi paica faraontapish, paipaj huasipi causajcunatapish jatun llaquicunahuan llaquichirca.

¹⁸Chaimi faraonca Abramta cayachishpaca: “Canca ñucahuanca ¿imatataj rurashcanguichu imamí? ¿Ima nishpataj cambaj huarmi cashcataca mana huillarcangui?

¹⁹Ima nishpataj: Ñuca panillami nircangui. Ñuca huarmi cachun ñuca japishca cajpica, ima shinataj canman carca. Cunanca caipimi cambaj huarmi, paita pushashpa caimanta ri” nirca.

²⁰Chashna nishcahuanmi Faraonca paipaj gentecunataca: “Abramtaca paipaj huarmindij, tucui imalla charishcacunandij cai llajtamanta llujshichishpa cachaichij” nishpa mandarca.