Read Chimborazo Highland Quichua GÉNESIS 16 Bible Online

GÉNESIS 16 - Chimborazo Highland Quichua bible

GÉNESIS 16

¹Abrampaj huarmi Saraica mana huachajmi carca. Paica Egiptomanta caj Agar huarmitami paipajta ruraj cachun charirca.

²Saraica Abramtaca: — Mandaj Dios ñucata mana huachaj cachun rurashcataca canllataj yachanguimi. Cunanca ñucapajta ruraj Agar huarmipi chayaripai, paimanta huahuacunayuj tucushapishchari — nijpimi, Abramca paipaj huarmi Sarai nishcata uyarca.

³Canaanpi chashna ña chunga huatata causacushpami, Saraica Egiptomanta caj paipajta ruraj Agar huarmitaca paipaj cusa Abramman, paipaj huarmi cachun curca.

⁴Abram chayarijpica Agar huarmica chichurcami. Ashtahuanpish pai ña chichu cashpaca paipaj ama Saraitaca p'iñanatami callarirca.

⁵Chaimi Saraica paipaj cusa Abramtaca: — Canmantami Agarca ñucata p'iñan. Ñucapajta ruraj huarmitaca ñucamari cambaj huarmi cachun curcani. Ashtahuanpish cunan pai ña chichu cashpaca, ñucata yalli cashcatami yuyan. Cunanca cantapish, ñucatapish Mandaj Dios imatapish nichun — nircami.

⁶Shina nijpimi Abramca, Saraitaca: — Riqui, cambajta ruraj huarmica cambaj maquillapitajmi. Can imata rurasha nishcatapish rurailla — nijpimi Saraica, paipajta ruraj Agartaca sinchita llaquichinata callarijpi Agarca miticushpa rirca.

⁷Chaipimi Mandaj Diospaj angelca, Shur shuti shitashca pamba ñanpi tiyaj pugyu c'uchupi tupashpaca:

⁸— Saraipajta ruraj Agar, ¿maimantataj shamucungui? ¿maimantaj ricungui? — nijpi Agarca: — Ñuca ama Saraita miticushpami ricuni — nirca.

⁹Chaimi Mandaj Diospaj angelca: — Cambaj ama Saraipajllamantaj tigrailla, pai imata mandashcata tucuita cazuilla — nirca.

¹⁰Mandaj Diospaj angelca cashnapishmi nirca: “Cambaj huahua huahuacunataca achcatami mirachisha. Achca cashcamanta pipish mana yupai tucungachu.

¹¹Mandaj Diospaj angelca cashnapish nircarajmi: Canca chichumi cangui. Shuj c'ari huahuatami huachangui. Can llaquihuan cashpa mañashcataca Mandaj Diosca uyarcami. Chaimanta cambaj huijsapi caj huahuataca Ismaelta shutichingui.

¹²Paica sacha animal shinami p'iña canga. Paica maquita alzashpami tucuicunahuan macanacunga. Tucuicunami paihuanpish macanacusha ningacuna. Paipaj huauquicunapaj ch'imbapurapimi causanga” nircami.

¹³Chaimi Agarca paihuan rimaj Mandaj Diostaca: “Ñucata ricuj Taita Diosmi” nishpa shutichirca. Paica: “Taita Diosta ricushpapish mana huañushpa causacunirajmi” nircami.

¹⁴Chaimi chai pugyutaca: “Ñucata Ricuj Causacujpaj Pugyumi” nishpa shutichirca. Chai pugyuca Cades pueblohuan Bered pueblohuan chaupipimi.

¹⁵Agarca Abrampajtaca, shuj c'ari huahuatami huacharca. Chai huahuatami Abramca Ismaelta shutichirca.

¹⁶Abram pusaj chunga sujta huatayuj cajpimi, Agarca Ismaeltaca huacharca.