Read Chimborazo Highland Quichua GÉNESIS 18 Bible Online

GÉNESIS 18 - Chimborazo Highland Quichua bible

GÉNESIS 18

¹Mandaj Diosca Abrahammanca, Mamre shuti runapaj encina yuracuna tiyanpimi ricurirca. Abrahamca chaupi punlla shinata yallitaj rupachicujpimi, paipaj carpa huasi punguman llujshishpa tiyacurca.

²Abrahamca paipaj chaininijllapi quimsa runacuna cajta ricushpami, paipaj carpa huasi pungumanta callpashpa tupanaman rishpa paicunapaj ñaupajpi pambaman tupajta cumurishpaca,

³cashna nirca: — Amito, canpi ñuca alli ricurishca cajpica, cambajta rurajpaj c'uchuta pasacushpaca ama pasajta richunmi rogapani.

⁴Cancunapaj chaquicunata maillachun asha yacuta apamuchisha. Chai q'uipaca cai yura ucupi samaringuichijllami.

⁵Cambajta rurajpaj c'uchuta pasacushpatajca, ashata samaripaichij. Ñami asha micunata apamusha, ña micushca q'uipaca fuerzata cutin japishpa ripanguichijllami — nijpi paicunaca: — Can nishca shina rurailla — nircacuna.

⁶Chaimi Abrahamca, carpa huasiman rishcahuan paipaj huarmi Sarataca: — Chuscu chunga libra ashtahuan alli cutata japishpa, utcashpa tandata rurashpa cusai — nirca.

⁷Chai q'uipaca Abrahamca vacacunapajman callpashpa rishpami, tucuimanta yalli huira bizita apamurca. Chaitaca paipajta rurajcunapuramanta shujman cujpimi utca huañuchishpa aichata allichirca.

⁸Abrahamca mantequillatapish, lechetapish, bizi aichata yanushcatapish apashpami chai runacunaman cararca. Chai runacunaman carashpaca, Abrahampish chai yura ucullapitajmi saquirirca.

⁹Chai q'uipaca: — ¿Cambaj huarmi Saraca maipitaj? — nishpa tapujpimi Abrahamca: — Cai carpa huasi ucupimi — nirca.

¹⁰Shina nijpimi paicunapuramanta shujca: — Shamuj huatapish canta ricunaman tigramushami. Chai punllacunapajca cambaj huarmi Saraca, ñami shuj c'ari huahuayuj canga. Chashnatajmi canga — nirca. Chashna parlanacucujtaca Saraca, Abrahampaj carpa huasi huashanijpi caj paipaj carpa huasi pungumantami uyacurca.

¹¹Abrahampish, Sarapish yallitaj yuyajcunami carca. Chaimi huarmicuna unguna quilla ungüitaca Saraca ña mana ungucurca.

¹²Chaimi Saraca paipaj shungullapi asishpaca: “Ñucaca ñamari yallitaj yuyaj cani. C'arihuan chayarina munaitapish mana charishachu. Ñuca amitopish ñamari yallitaj yuyaj” nishpa yuyacurca.

¹³Chaimi Mandaj Diosca, Abrahamtaca: — ¿Ima nishpataj Saraca, ñucaca ña yuyaj cashpapish huachashatajchu imatagari nishpa asicun?

¹⁴Taita Diospajca imapish mana sinchichu. Ña nishca shinallataj shamuj huatami cambajman tigramusha. Chaipajca Saraca ñami shuj c'ari huahuayuj canga — nirca.

¹⁵Shina nijpi Saraca mancharishpami: — Mana asircanichu — nijpi Mandaj Diosca: — Mana chashnachu. Asircanguimi — nirca.

¹⁶Chai runacuna chaimanta jatarishpaca, Sodoma puebloman rina ñantami rircacuna. Abrahampish paicunahuanmi rirca.

¹⁷Chaipimi Mandaj Diosca: “Ñuca imata rurana cashcataca Abrahammanca ricuchinami cani.

¹⁸Abrahamca imatapish rurai tucuj jatun llajtami tucunga. Paimantami cai pachapi tiyaj tucui llajtacunapish alli nishca cangacuna.

¹⁹Abrahamtaca paipaj huahua huahuacunatapish, chaicunapaj huahua huahuacunatapish Mandaj Dios mandashcacunataca cashcata rurashpa causanata, pai nishca shinataj rurashpa pajtachina cashcata yachachinataca yachanimi. Abrahamca Mandaj Dios paiman cusha nishcacunata pajtachichunmi chashna rurana can” nircami.

²⁰Chaipimi Mandaj Diosca Abrahammanca: — Sodoma, Gomorra pueblopi causajcuna yallitaj millaita rurashcacunataca ashtahuan ashtahuanmi caparishpa huillacun. Paicunaca yallitaj jatun millaitami rurashcacuna.

²¹Chaimanta cunanca caparishpa ñucaman huillashcacuna chashnataj cashcata, mana chashna cashcata ricungapajmi uriyagrini — nirca.

²²Chai runacuna Abrahammanta ch'icanyashpaca Sodoma pueblomanmi rircacuna. Abrahamca Mandaj Diospaj ñaupajpimi saquirirca.

²³Chaipimi Abrahamca Mandaj Diospajman c'uchuyashpaca: — ¿Cashcata rurajcunataca, Diosta mana rijsijcunahuanchu chingachigringui?

²⁴Chai pueblopi causajcunapurapi cashcata rurajcuna pichca chungallapish tiyajpica: ¿Chai pueblotaca chingachinguillatajchu? Chai pichca chungacunata c'uyashcallamantapish ¿manachu perdonangui?

²⁵Cashcata rurajcunata Diosta mana rijsijcunahuan llaquichinaca canpica mana tiyanchu. Nunca mana chashna ruranguichu. Canca tucui cai pachapaj Juez cashcamanta imatapish cashcatatajmi rurangui — nircami.

²⁶Shina nijpimi Mandaj Diosca: — Sodomapi causajcunaca cashcata rurajcuna pichca chungallapish tiyajpica, paicunata c'uyashcamanta chai pueblotaca mana chingachishachu — nirca.

²⁷Chaimi Abrahamca cutinllataj: — Ñucaca, Jatun Dioslla ñutu allpa shina ushpa shina cajpipish ñuca mañashcata uyachunmi rogapani.

²⁸Cashcata rurajcuna pichca chunga canapaj pichca illajpica: Chai pichca illashcamanta chai pueblotaca ¿chingachinguillatajchu? — nijpimi Mandaj Diosca: — Cashcata rurajcuna chuscu chunga pichcallapish chai pueblopi tiyajpica mana chingachishachu — nirca.

²⁹Abrahamca cutinllatajmi: — Chai pueblopi chuscu chungalla tiyajpica — nijpi Mandaj Diosca: — Chuscu chungalla tiyajpipish, paicunata c'uyashcamanta mana chingachishachu — nirca.

³⁰Abrahamca cutinpish rogarishpaca: — Ñuca Jatun Dioslla, cashnapish nijpica ama p'iñaripangui: Chai pueblopi quimsa chungalla tiyajpica — nijpi Mandaj Diosca: — Quimsa chungallapish tiyajpica mana chingachishachu — nirca.

³¹Abrahamca cutinllataj rogarishpaca: — Ñuca Jatun Dioslla, ñuca canta chashna nishpaca yallitaj p'iñachijmari cani. Chai pueblopi ishqui chungalla tiyajpica — nijpi Mandaj Diosca: — Ishqui chungallapish tiyajpica paicunata c'uyashcamanta mana chingachishachu — nirca.

³²Abrahamca cutinmi: — Ñuca Jatun Dioslla, ama p'iñaripangui, cai cutinllahuanmi rimagrini. Chai pueblopi chungalla tiyajpica — nijpi Mandaj Diosca: — Chungallapish tiyajpica paicunata c'uyashcamanta mana chingachishachu — nirca.

³³Mandaj Diosca Abrahamman ña tucui huillashca q'uipaca rircallami. Abrahampish, paipaj carpa huasiman tigrarcallami.