Read Chimborazo Highland Quichua GÉNESIS 19 Bible Online

GÉNESIS 19 - Chimborazo Highland Quichua bible

GÉNESIS 19

¹Chai ishqui angelcunaca ña tutayacuitami, Sodomaman chayarca. Lotca Sodomaman yaicuna pungullapimi tiyacurca. Paicunata ricushpami Lotca jatarishcahuan tupanaman rishpa paicunapaj ñaupajpi pambaman tupajta cumurishpaca,

²cashna nirca: — Ñuca amitocunalla, cunan tutaca cancunapajta rurajpaj huasiman shamushpa chaipi samarichunmi rogapani. Cancunapaj chaquicunatapish chaipi maillanguichijllami. Cayaca utcata jatarishpa, cancuna maiman ricushca ñanllatataj ringuichijllami — nirca. Shina nijpimi paicunaca: — Chaitaca mana rurai tucunchijchu. Cunan tutaca, cai ñanllapimi pacarishun — nirca.

³Shina nijpipish Lotca paicunata jacupaichij nicujllapimi, paicunaca Lotpaj huasiman rircacuna. Chaipica sumaj micuita rurashpa, levadura illajlla tandata cusashpa carajpimi micurcacuna.

⁴Ashtahuanpish paicuna manaraj dormij siririjpimi, chai pueblopi causaj tucui c'aricunaca huambracunamanta callarishpa yuyajcunacama, Lotpaj huasi muyundijta shayarircacuna. Paicunaca c'aricunapurallataj chayarinacujcunami carca.

⁵Chaimi Lottaca: — Cunan tuta cambaj huasiman shamuj runacunaca ¿maipitaj? Paicunata llujshichi, ñucanchijca paicunahuanmi chayarinacushun ninchij — nishpa caparircacuna.

⁶Chaimi Lotca, paicunahuan rimangapaj llujshishpa, punguta alli huichcashpa shayarishpaca,

⁷cashna nirca: — Huauquicunalla, chashna millaitaca ama ruraichijchu nishpami rogapani.

⁸Riquichij, ñucaca c'arihuan manaraj chayarinacushca ishqui ushushicunatami charini. Cancuna munashcata rurachunca, paicunatami canllaman llujshichigrini. Ashtahuanpish cai runacunaca ñuca cayajllapimari shamurcacuna. Paicunataca ama imata rurapaichijchu — nirca.

⁹Chaimi paicunaca: — ¡Chaimanta anchui! nishpaca cashna nircacuna: ¿Chai maimanta shamuj ñucanchijpurapi causacujllachu ñucanchijta mandasha nin imamí? Paitacarin caishujcunata yallimari llaquichishun — nishcahuanmi, Lottaca aisashpa shitashpa, punguta p'aquingapaj c'uchuyarcacuna.

¹⁰Chaimi Lotpaj huasipi puzacujcunaca paicunapaj maquita chutashpa Lotta huasiman yaicuchishpa pungutaca alli huichcarcacuna.

¹¹Ashtahuanpish canllaman caj c'aricunataca huambracunatapish, yuyajcunatapish ñahui mana ricujcunatami rurarca. Chaimantami paicunaca pungu maipi cashcata mashcacushpalla shaicurcacuna.

¹²Chai q'uipami Lotpaj huasipi puzacujcunaca: — Cambaj quiquin huasi ucupuracunaca ¿caipica ashtahuan tiyanchu? Cai pueblomantaca cambaj yernocunatapish, churicunatapish, ushushicunatapish, can imalla charishcacunatapish llujshichi.

¹³Cai pueblotaca chingachigrinchijmi. Cai pueblopi causajcuna yallitaj millaita rurashcata caparishpa huillashcami Mandaj Diospajman chayarca. Chaimi Mandaj Diosca cai pueblota chingachichun ñucanchijta cacharca — nircacunami.

¹⁴Chaimi Lot rishpaca, paipaj ushushicunahuan cazaranacunataca: — ¡Cai pueblopi causajcunataca, Mandaj Diosca chingachigrinmi. Chaimanta jatarichij caimanta llujshishpa jacuchij! — nirca. Ashtahuanpish Lotpaj yernocunaca pugllacunllami yuyarcami.

¹⁵Ñalla pacarigrijpimi, chai angelcunaca Lottaca: — Jatari, cai pueblopi causajcunata llaquichijpi paicunahuan ama chingaringapajca cambaj huarmitapish, cambaj ishqui ushushicunatapish pushashpa utca ri — nircacuna.

¹⁶Shina nijpipish, Lotca mana utca llujshircachu. Mandaj Dios Lotta llaquishpa chai pueblomanta llujshichinaman cachashcamantami chai angelcunaca Lottapish, paipaj huarmitapish, ishqui ushushicunatapish maquimanta aisashpa chai pueblomanta llujshichishpa canllaman churarca.

¹⁷Pueblomanta ña canllaman cajpica chai angelcunaca: — Cancunapaj causaita quishpichingapajca callpashpa richij. Ama huashaman tigrashpa ricunguichij. Cai pambacunapipish maipi ama pararishpa, urcupi miticunaman utca callpashpa richij. Mana chashna rurashpaca chingachishcami canguichij — nircami.

¹⁸Shina nijpi Lotca: — Ñuca amitocunalla, maitataj chashnaca ninguichijyari. Ashtahuanpish ñucaca caitami rogasha nini.

¹⁹Cancunapajta ruraj ñucaca cancunapaj ñahuipi alli ricurijpimari ñucataca achcata c'uyashpa huañunallapi cajpi quishpichingapaj shamushcanguichij. Shina cajpipish chai urcupi miticugrinamanca mana ri tucushaca. Chai urcuman manaraj chayajpi jatunta llaquichicui japijpica huañushamari.

²⁰Cai chainijllapimari shuj uchilla pueblo tiyan. Chai pueblotaca manapishchari imata ruranguichij. ¿Manachu chai pueblollapi miticugri tucuni? — nirca.

²¹Shina nijpi chaicunamanta shujca: — Can mañashcata uyashcamanta, chai pueblotaca mana chingachishachu.

²²Shinashpaca utca rishpa, chaipi miticugri. Chaiman chayangacama imata mana rurashachu — nirca. Chai puebloca uchilla cashcamantami, Zoar shuti carca.

²³Zoarman Lot ña chayajpica, inti llujshircallami.

²⁴Chai q'uipami Mandaj Diosca Sodoma, Gomorra pueblocunapica azufrehuan rupacuj ninata jahua pachamanta tamyachirca.

²⁵Chai pueblocunataca tucui chai c'uchulla pambacunandij, chai pueblocunapi causajcunandij, chai llajta granocunandijmi tucuita chingachirca.

²⁶Lotpaj huarmica huashaman tigralla ricushcamantami jatun cachi rumi tucushpa saquirirca.

²⁷Abrahamca cayandij tutamantaca, Mandaj Dioshuan maipi cashcallamantajmi rirca.

²⁸Sodoma, Gomorra pueblocunata, tucui chai pambacunata asomashpa ricunapajca, chai pambamantaca hornomanta llujshicuj cushni shina achca cushni llujshicujtami ricurca.

²⁹Chai pueblota chashna chingachigrishpaca, Taita Diosca Abraham mañashcata yuyarishpami Lottaca chai pambapi tiyaj pueblocunata chingachigrishca chaupimanta llujshichirca.

³⁰Ashtahuanpish Lotca, Zoarpi causanata manchashcamantami, paipaj ishqui ushushicunandij urcupi causanaman rirca. Chaipica shuj jutcupimi quimsandijtaj causarcacuna.

³¹Chaipimi Lotpaj punta ushushica, q'uipa ushushitaca: — Ñucanchij yayaca ñamari yuyaj. Tucui cai llajtapi causajcuna shinallataj quiquin aillupuralla ñucanchijhuan cazaranapajca caipica c'aricunaca manamari tiyanchu.

³²Chaimanta cunanca ñucanchij yayaman vinota ubyachishpa machachishpa paihuan dormishpa huahuacunayuj tucushun. Chashna rurajllapimi ñucanchij yayapaj huahua huahuacunaca mana chingaringa — nircami.

³³Chai tutallatajmi vinota ubyachishpa machachishpaca, punta ushushiraj paipaj yayahuan dormirca. Lotca paipaj ushushi paihuan siririshcatapish, jatarishpa rishcatapish mana yacharcachu.

³⁴Chai cayandij punllami punta ushushica, q'uipa ushushitaca: — Ñucaca caina tutaca ñucanchij yayahuanmi dormircani. Cunan tutaca can dormingui. Cunanpish vinota ubyachishpa machachishun. Chashna rurashpa huahuacunayuj tucujllapimi, ñucanchij yayapaj huahua huahuacunaca mana chingaringa — nircami.

³⁵Shina nishpa paicunapaj yayaman vinota ubyachishpa machachishpaca, chai tutaca q'uipa ushushimi yayahuan dormirca. Lotca, q'uipa ushushi paihuan siririshcatapish, jatarishpa rishcatapish mana yacharcachu.

³⁶Lotpaj ishqui ushushicunaca, paicunapaj quiquin yayapajllatatajmi chichurcacuna.

³⁷Punta ushushica shuj c'ari huahuatami huacharca. Chai huahuataca Moabtami shutichirca. Paimi moabitacunapaj punta yayaca.

³⁸Shinallataj q'uipa ushushipish, shuj c'ari huahuata huachashpaca, Ben-ammi shutitami shutichirca. Paimi amonitacunapaj punta yayaca.