Read Chimborazo Highland Quichua GÉNESIS 2 Bible Online

GÉNESIS 2 - Chimborazo Highland Quichua bible

GÉNESIS 2

¹Jahua pachatapish, cai pachatapish, chaipi tucui imalla tiyajcunatapish chashna rurashpami tucuchirca.

²Taita Diosca pai imalla ruranataca canchis punlla tucunapajca tucuitami tucuchirca. Tucui imalla rurana cashcata tucuchishpaca canchis punllapica samarircami.

³Taita Diosca pai imalla rurana cashcata tucuchishpa canchis punllapica samarishcamantami, chai punllataca paipajlla ch'icanchishca samana punlla cachun alli nirca.

⁴Jahua pachatapish, cai pachatapish chaipi imalla tiyajcunatapish callaripi Taita Dios rurashcacunaca chaicunami. Jahua pachata, cai pachata ña rurashca cajpipish,

⁵allpapica ima yuracuna manaraj tiyarcachu. Verdijlla q'uihuapish manaraj huiñarcachu. Mandaj Dios cai pachapi manaraj tamyachishcamanta, allpapi imata rurajpish manaraj tiyashcamantami chashna carca.

⁶Ashtahuanpish allpamanta yacu p'uyul llujshishpami, tucui cai pachata noyochicurca.

⁷Mandaj Taita Diosca runataca ñutu allpamanta rurashpa, paipaj singapi causaita cuj samaita p'ucujpimi, runaca causaiyuj tucurca.

⁸Mandaj Taita Diosca inti llujshin ladoman caj Edén llajtapi huertata rurashpami, pai rurashca runataca chaipi churarca.

⁹Mandaj Taita Diosca chai huertapica, micunanqui tucui laya sumaj granocunata p'ucuj sumaj yuracunatami huiñachirca. Shinallataj chai huerta chaupipica causaita cuj yuratapish, ima alli cashcata, mana alli cashcata yachaj chayachij granota p'ucuj yuratapishmi huiñachirca.

¹⁰Edén llajtapi caj huertamantaca jatun yacu llujshishpami, chai huertallapitaj chuscu ladoman chaupirishpa regaricurca.

¹¹Chai yacumanta chaupirishca shuj yacuca, Pisón shutimi. Chai yacuca curi tiyaj Havila llajtatami muyun.

¹²Chai llajtapi tiyaj curica alli curimi. Chaipica bedelio shuti yuracunapish, ónice shuti sumaj rumipishmi tiyan.

¹³Q'uipa jatun yacuca Gihón shutimi. Chai yacumi Cus shuti llajtata muyun.

¹⁴Ishquipaj q'uipa jatun yacuca Hidekel shutimi, chai yacuca Asiria llajtatami inti llujshin ladoman ricun. Quimsapaj q'uipa jatun yacuca Éufrates shutimi.

¹⁵Mandaj Taita Diosca, Edén llajtapi pai rurashca huertapimi pai rurashca runataca chaipi trabajashpa, cuidashpa causachun churarca.

¹⁶Mandaj Taita Diosca chai runataca cashnami mandarca: “Cai huertapi tiyaj tucui yuracunapi p'ucushcacunataca micunguilla.

¹⁷Ashtahuanpish huerta chaupipi tiyaj yuraca allita mana allita yachaj chayachijmi. Chai yuramantaca ama micungui. Chai yuramanta micushpaca, chai punllallatajmi huañungui” nircami.

¹⁸Chai q'uipami Mandaj Taita Diosca: “C'arilla canaca mana allichu. Chaimanta paita ayudaj, pai imapaj minishticushcata rurasha” nirca.

¹⁹Mandaj Taita Diosca, cai allpamanta rurashca causaj tucui laya animalcunata, huairata purij alasyuj animalcunataca ima shutilla canata Adán ricushpa shutichichunmi paipajman pushamurca. Causaiyuj caj tucui chaicunaca Adán shutichishca shinallataj chai shutimi saquirirca.

²⁰Adanca sacha animalcunatapish, huairata purij alasyuj animalcunatapish, charina animalcunatapish tucuitami shutichirca. Ashtahuanpish paita ayudaj, pai imapaj minishticushcataca mana japircachu.

²¹Chaimi Mandaj Taita Diosca, Adanta huañuita dormichishpa, paipaj costillamanta shuj tulluta llujshichishpa aichataca ima shina cashca shinallatataj saquirca.

²²Mandaj Taita Diosca Adanmanta llujshichishca tullumantaca shuj huarmita rurashpami paipajman apamurca.

²³Chaimi Adanca: “¡Caica ñuca tullumanta, ñuca aichamanta rurashcami! Paica c'arimanta rurashca cashcamanta “Huarmi” nishcami canga” nirca.

²⁴Chashna cashcamanta c'arica, paipaj yayata mamata saquishpa paipaj huarmihuan tandanacushpa ishquindijmanta shuj aichallami tucunga.

²⁵Adanpish paipaj huarmipish ishquindijtajmi lluchulla carcacuna. Ashtahuanpish mana pinganachircacunachu.