Read Chimborazo Highland Quichua GÉNESIS 20 Bible Online

GÉNESIS 20 - Chimborazo Highland Quichua bible

GÉNESIS 20

¹Abrahamca pai causacushca llajtamantaca, Neguevmanmi rirca. Chaiman chayashpaca, Cades pueblohuan, Shur nishca shitashca pambahuan chaupipi caj Gerar pueblopimi pasacujlla shina causarca.

²Chaipi causacushpami Abrahamca paipaj huarmi Sarataca: “Ñuca panimi” nirca. Chaimi Gerar pueblota jatun mandaj Abimelecca Sarataca paipajman pushanaman cachashpa paipaj huarmi cachun japirca.

³Ashtahuanpish Taita Diosca chai tutallataj muscuipi ricurishpami Abimelectaca: “Cazarashca cusayuj huarmita cambaj huarmi cachun japishcamanta, cunanca huañugringuimi” nirca.

⁴Abimelecca, Sara huarmipi manaraj chayarishca cashpami cashna nirca: “Jatun Dioslla, ima millaita mana rurashca cajpipish ¿huañuchinguillachu?

⁵Abrahamllatajmi: “Ñuca panimi” nirca. Sara huarmipish: “Ñuca turimi” nijpimi, paitaca ñucapaj cachun japircani. Ñuca maquihuan ima millaita mana rurashpa, alli shunguhuanmi japircani” nircami.

⁶Taita Diosca, chai muscuillapitajmi cashna nirca: “Can chashna alli shunguhuan japishcataca yachanillatajmi. Chai huarmipi chayarishpa ama juchallichunca ñucami jarcarcani. Chaimi imata mana rurarcangui.

⁷Cunanca chai huarmitaca paipaj cusallamantaj tigrachi. Abrahamca ñuca ima nishcata huillaj cashcamanta can causashpa catichun ñucata mañangami. Chai huarmita mana tigrachishpaca, canpish can mandacun llajtapi causajcunapish huañunataj cashcatami yachana cangui” nirca.

⁸Abimelecca, cayandij tutamanta jatarishpaca paipajta rurajcunata cayashpami, muscuipi imallata nishcata tucuita paicunaman huillarca. Chaita uyashpaca chai runacunaca achcatami mancharircacuna.

⁹Chai q'uipami Abimelecca, Abrahamta cayashpaca: — Canca ¿imatataj rurashcanguichu imamí? Ñucapajmanpish, ñuca mandacun llajtamanpish jatun jucha shamuchunca ñucaca cambajca ¿ima millaitataj rurashcaniyari? Canca ñucahuanca manapish ruraipajtamari rurashcangui.

¹⁰Abimelecca Abrahamtaca: Chashna rurashpaca ¿imatataj yuyarcanguiyari? — nircapishmi.

¹¹Chaimi Abrahamca: — Cai llajtapi causajcunaca, Taita Diostaca manataj manchancunachu. Ñuca huarmitaca paicunapaj cachun japingapaj ñucataca huañuchingacunami yuyashpami chashna nircani — nirca.

¹²Paica ñuca mamamanta mana pani cashpapish, ñuca yayamantaca pani cajpimari, ñuca panimi nircani. Chaimi paitaca ñuca huarmi cachun japircani.

¹³Ñuca yayapaj huasimanta llujshishpa caita chaita purichun, Taita Dios mandajpi llujshicushpallatajmi, ñuca huarmitaca: “Can ñucata c'uyashpa ñucapaj allita ruranapajca mai llajtaman chayashpapish, ñucataca paica ñuca turillami nipangui” nircani — nircami.

¹⁴Shina nijpimi Abimelecca, Abrahammanca ovejacunata, vacacunata cushpa paipaj huarmi Sarataca tigrachirca. Abimelecca paipajta ruraj c'aricunatapish, huarmicunatapishmi curca.

¹⁵Abimelecca Abrahamtaca: — Ñuca llajtaca cambaj ñaupajpimi, cambaj causana maipi allicanpi causailla — nircami.

¹⁶Saratapish cashnami nirca: — Cambaj turimanca, 1.000 cullquitami curcani. Chai cushcacunaca canhuan cajcunapaj ñaupajpica, canca ima mana allita mana rurashca cashcatami ricuchinga. Chaimanta cantaca pi mana juchachishpa rimangachu — nircami.

¹⁷Abrahamca Taita Diostami mañarca. Taita Diosca Abimelectaca alliyachircami. Abimelecpaj huarmitapish, paipajta ruraj huarmicunatapish huahuacunayuj tucunatami cutin rurarca.

¹⁸Abrahampaj huarmi Sarata Abimelec paipaj huarmi cachun japishcamantami, Mandaj Diosca Abimelecpaj huarmitapish, paipajta ruraj huarmicunatapish mana huachajta rurashca carca.