Read Chimborazo Highland Quichua GÉNESIS 21 Bible Online

GÉNESIS 21 - Chimborazo Highland Quichua bible

GÉNESIS 21

¹Mandaj Diosca pai nishca shinallatajmi Sara huarmitaca ricuj shamurca. Mandaj Diosca pai cusha nishpa ari nishca shinallatajmi pajtachirca.

²Saraca paipaj cusa Abraham yuyaj cai pachapi chichushpami shuj c'ari huahuata huacharca. Chai huahuaca Taita Dios cusha nishca huata pajtajpimi huacharirca.

³Abrahamca paipaj huarmi Sara huachashca huahuataca, Isaactami shutichirca.

⁴Abrahamca paipaj churi Isaactaca Taita Dios mandashca shinallatajmi huacharishcamanta pusaj punllapi circuncisionta rurarca.

⁵Abrahamca paipaj churi Isaac huacharinapajca patsaj huatayujmi carca.

⁶Sara huarmica cashnami nirirca: “Taita Diosmari ñucataca asichin. Ñuca huahuayuj tucushcata pipish uyajcunaca cushicushpami ñucahuan asingacuna.

⁷Abrahamtaca pitaj Saraca huahuayuj tucushpa huahuata chuchuchingamari ninman carcari. Pai ña yuyaj cajpipish paipaj shuj huahuatamari huachani” nircami.

⁸Huahua Isaac huiñajpica, chuchucushcamanta raquircami. Isaacta chuchumanta raqui punllami Abrahamca sumaj micuita rurarca.

⁹Egiptomanta caj Agarpi charishca Abrahampaj churi Ismaeltaca, Saraca paipaj churi Isaacta imatapish nishpa p'iñachicujlla cashcatami ricurca.

¹⁰Chaimi Saraca, Abrahamtaca: “Ñucanchijpajta ruraj huarmitaca paipaj churindij caimanta llujshichishpa cachai. Ñucanchijpajta ruraj huarmipaj churica, ñuca churi Isaac-huanca imata mana japingachu” nirca.

¹¹Sara chashna nishcaca Abrahamtaca Ismaelpish paipaj quiquin churillataj cashcamantami paitaca jatunta llaquichirca.

¹²Chaimi Taita Diosca, Abrahamtaca: “Chai churimantapish, cambajta ruraj huarmimantapish ama yalli llaquirichu. Cambaj huarmi Sara imallata nishcata rurailla. Isaacmanta mirarishcacunallami, cambaj huahua huahuacuna canga.

¹³Cambajta ruraj huarmipi huacharishca churipish, cambaj quiquin churi cashcamanta paimantapish jatun llajtatami rurasha” nirca.

¹⁴Abrahamca, cayandij tutamanta utcata jatarishpami Agarmanca tandatapish, capachu yacutapish apachishpa paipaj churi Ismaeltapish cushpaca ripailla caya minchacama nishpa cacharca. Chaimanta rishpaca Agarca Beerseba shuti shitashca pambapimi caiman chaiman puricurcalla.

¹⁵Agarca capachu yacu ña tucurijpimi, paipaj churitaca shuj yura ucupi sirichishpa,

¹⁶rishpaca arcohuan shitajpi caspi urmana shinapi tiyarigrirca. Paica: “Cai huambra huañujtaca mana ricusha ninichu” nishpa chaipi tiyacujpimi huambraca sinchita huacarca.

¹⁷Taita Diosca chai huambra caparijta uyarcami. Chaimi Taita Diospaj angelca Agartaca jahua pachamanta cayashpaca: “Agar, ¿imataj tucungui? Ama manchaichu, cambaj huahua caparijtaca Taita Diosca uyarcami.

¹⁸Jatari, cambaj churitaca maquimanta japishpa jatarichi. Ñucaca paimantaca jatun llajtatami rurasha” nirca.

¹⁹Taita Dios Agarpaj ñahuita pascajpi, shuj pugyu yacuta ricushpami, paica chaiman rishpa capachupi yacuta jundachishpa paipaj churiman ubyachirca.

²⁰Chai huambraca Taita Dios paihuan cajpimi, shitashca pambapi huiñashpa chaipi causarca. Chai huambraca arcohuan shitanata alli yachajmi carca.

²¹Paica Parán shuti shitashca pambapimi causarca. Ismaeltaca paipaj mamami, egipcia huarmihuan cazarachirca.

²²Chai punllacunallatajmi Abimelecca, paipaj soldadocunata mandaj Ficolndij Abrahampajman rishpaca: — Taita Dios canhuan cajpi can tucui imata rurashcapish alli cashcatami ricunchij.

²³Chaimanta cunanca ñucatapish, ñuca churitapish, ñuca nietotapish imata mana llaquichinata ari nipai. Ashtahuanpish ñuca cambaj ima shinami allita rurarcani, chai shinallataj canca ñucapajpish, can causacun cai llajtapajpish allita ruranata Mandaj Diospaj ñaupajpi ari nipai — nircami.

²⁴Chaimi Abrahamca: — Chashna rurashatajmi — nirca.

²⁵Chashna nishpapish Abrahamca, Abimelecpajta rurajcuna shuj yacu pugyuta quichushcata yuyarishpami Abimelectaca rimarca.

²⁶Chaimi Abimelecca: — Pi chashna rurashcataca mana yachanichu. Canpish ñucamanca imata mana huillashcanguichu. Cunancama ñucaca chaitaca imata mana yachashcanichu — nirca.

²⁷Chaipimi Abrahamca ovejacunata, vacacunata Abimelecman cushpa, mana p'iñanacushpalla causanata ishquindijtaj ari ninacurca.

²⁸Chai q'uipaca Abrahamca, paipaj canlla ovejacunamanta canchis huarmi ovejacunata ch'icanchijpimi,

²⁹Abimelecca Abrahamtaca: — Can ch'icanchishca canchis ovejacunaca ¿imatataj ricuchin? — nirca.

³⁰Chaimi Abrahamca: — Cai canchis ovejacunataca, ñuca allashpa cai pugyuta surcushcata ricuchichunmi canmanca cuni — nirca.

³¹Mana p'iñanacushpalla causanata ishquindijtaj ari ninacushcamantami, chai pambataca Beersebata shutichircacuna.

³²Mana p'iñanacushpalla causanataca Beersebapimi ari ninacurca. Chai q'uipaca Abimelecca, paipaj soldadocunata mandaj Ficolndij filisteocuna causacun quiquin llajtallamantaj tigrarcallami.

³³Abrahamca Beerseba pambapi shuj tamarisco yurata tarpushpami, huiñaita causacuj Mandaj Taita Diosta chaipi mañaj carca.

³⁴Abrahamca filisteocunapaj llajtapica uni huatacunatami causarca.