Read Chimborazo Highland Quichua GÉNESIS 25 Bible Online

GÉNESIS 25 - Chimborazo Highland Quichua bible

GÉNESIS 25

¹Abrahampaj caishuj huarmica Cetura shutimi carca.

²Chai huarmipica Abrahamca Zimram, Jocsán, Medán, Madián, Isbac, Súa shuti churicunatami charirca.

³Jocsanca Seba, Dedán shuti churicunatami charirca. Dedanpaj churicunamantami Asurim, Letusim, Leumim nishcacuna mirarircacuna.

⁴Madianpaj churicunaca: Efa, Efer, Hanoc, Abida, Elda shutimi carcacuna. Tucui chaicunami Ceturapaj huahua huahuacuna carca.

⁵Abrahamca tucui pai imalla charishcacunataca Isaacmanmi saquirca.

⁶Paipaj caishuj huarmicunapaj huahuacunamanpish tucuicunamanmi asha ashata convidarca. Abrahamca pai causacushparajmi paipaj caishuj churicunataca paipaj churi Isaacmanta ch'icanyachishpa inti llujshin ladoman caj llajtacunapi causachun cacharca.

⁷Abrahamca, 175 huatacunatami causarca.

⁸Abrahamca uni huatacunata causashpa yallitaj yuyaj tucungacama causashpami huañurca. Huañushpaca paipaj ñaupa yayacunahuanmi tandanacugrirca.

⁹Abrahamtaca paipaj churi Isaacmi caishuj churi Ismaelhuan ishqui tucushpa, heteocunapuramanta caj Zoharpaj churi Efronpaj Macpela shuti allpapi caj jutcupi churarcacuna. Chai allpaca, Mamre pueblo ch'imbapurapimi carca.

¹⁰Chai allpataca Abrahamllatajmi Hetpaj huahuacunapura Efronman randirca. Paipaj huarmi Saratapish, Abrahamtapish chaillapitajmi churarcacuna.

¹¹Abraham huañushca q'uipapish paipaj churi Isaacmanca Taita Diosca achca allicunatami curca. Isaacca: “Ñucata ricuj causacuj Diospaj pugyu” c'uchullapitajmi causarca.

¹²Abrahampaj caishuj churi Ismaelpaj huahua huahua callari yayacunaca caicunami: Ismaeltaca Sarapajta ruraj egipcia Agar huarmimi huacharca.

¹³Ismaelpaj churicunaca, paicuna ima shina huacharishca shinallataj caicunami: Ismaelpaj punta churica Nebaiotmi. Q'uipa churicunaca Cedar, Adbeel, Mibsam,

¹⁴Misma, Duma, Massa,

¹⁵Hadar, Tema, Jetur, Nafis, Cedema shutimi carcacuna.

¹⁶Tucui chaicunami, Ismaelpaj churicunaca. Paicunaca chunga ishqui llajtacuna tucushpami, chai llajtacunataca paicunapaj quiquin shuticunata churashpa paicunapaj quiquin mandajcunata churashpa carpa huasicunapi causarcacuna.

¹⁷Ismaelca, 137 huatacunatami causarca. Huañushpaca paipaj ñaupa yayacunahuanmi tandanacugrirca.

¹⁸Ismaelitacunaca Havila llajtamanta callarishpaca Asiriaman rina ñanta catishpa Egipto ch'imbapurapi caj Shur llajtacamami causarcacuna. Ismaelca tucui paipaj huauquicuna ricucunpimi huañurca.

¹⁹Abrahamca Isaac churitami charirca. Abrahampaj churi Isaacpaj huahua huahua callari yayacunaca caicunami:

²⁰Isaacca chuscu chunga huatayuj cashpami Padan-aram llajtapi causaj arameocunapura Betuelpaj ushushi, Labanpaj pani Rebecataca paipaj huarmi cachun japirca.

²¹Isaacca paipaj huarmi Rebeca mana huachaj cajpimi, Mandaj Diosta mañarca. Pai mañashcata Mandaj Dios uyajpimi, Rebecaca chichurca.

²²Rebecapaj huijsapica huahuacuna macanacujpimi Rebecaca: “Chashna cajpica, imapajtaj ñucaca causasha” yuyashpami Mandaj Diosta tapugrirca.

²³Mandaj Diosca Rebecataca: “Cambaj huijsapica ishqui llajtacunami tiyan. Cambaj huijsamantapachamari, ch'ican ch'ican llajtacuna tucushpa llujshinga. Shuj llajtami caishuj llajtata yalli c'ari c'ari canga. Punta huacharijmi q'uipa huacharijpajta ruranga” nircami.

²⁴Rebecaca huachana punlla pajtajpica, ishqui c'ari huahuatami huacharca.

²⁵Punta huacharij huahuaca tucui cuerpo puca millmayuj huacharijpimi, Esauta shutichirca.

²⁶Q'uipata huacharij huahuaca, paipaj huauqui Esaupaj chaqui talonpi charirashca huacharijpimi, Jacobta shutichirca. Isaacca paipaj huarmi huachanapajca, sujta chunga huatacunayujmi carca.

²⁷Chai huahuacuna huiñashpaca, Esauca urcucunapi purinata munaj, sacha animalcunata huañuchinata alli yachajmi carca. Ashtahuanpish Jacobca maiman rinata mana munaj, carpa huasicuna ucullapi imatapish rurashpa causajmi carca.

²⁸Esaú japimushca animalcunata micuj cashpami Isaacca Esautaca yallitaj c'uyarca. Rebecaca, Jacobtami yallitaj c'uyarca.

²⁹Shuj punllami Jacobca sumaj micuita yanucurca. Paipaj huauqui Esauca urcumanta achca shaicushca shamushpami,

³⁰Jacobtaca: — Ñucaca achca shaicushcamari cani. Can yanucun sumaj puca micuita carachunmi rogapani — nirca. Chaimi Esautaca Edomta shutichircacuna.

³¹Jacobca Esautaca: — Can punta churi cashcata cunan punllataj ñucaman c'atupai — nircami.

³²Chaimi Esauca: — Cunan ñuca yaricaihuan huañucujpica, punta churi cashcaca ñucapajca ima mana canchu — nirca.

³³Shina nijpimi Jacobca: — Cunan punllataj c'atunitajmi niyari — nijpi, Esauca: — Manataj llullanichu, c'atunitajmi — nishpa, punta churi cashcata Jacobman c'aturca.

³⁴Chaimi Jacobca Esaumanca tandatapish, lentejata yanushca sumaj micuitapish carajpi, Esauca micushpa ubyashpa chaimanta jatarishpaca rircalla. Chashnami Esauca punta churi cashcataca yanganchirca.