Read Chimborazo Highland Quichua GÉNESIS 27 Bible Online

GÉNESIS 27 - Chimborazo Highland Quichua bible

GÉNESIS 27

¹Isaacca ña yuyaj cashpa, ñahuicuna amsayashpa ña mana ricuj tucushcapimi cashna tucurca. Paipaj punta churi Esauta cayashpaca: — ¡Ñuca huahualla! — nijpi Esauca: — Yayito caipimi cani — nirca.

²Chaipimi Isaacca Esautaca: — Ñucaca ñami yuyaj cani. Ñuca huañuna punllataca mana yachanichu.

³Chaimanta cunanca puntajlla caspicunatapish, cara muchilatapish, arcotapish apashpa urcuman rishpa, ima animaltapish huañuchishpa apamugri.

⁴Chai aichataca, ñuca ima shina munaj cashca shinata rurashpa ñucaman carahuai. Ñuca manaraj huañushpa canta alli cashca cachun ningapaj chashna rurahuai — nircami.

⁵Yaya Isaac punta churi Esauta chashna mandacujtaca mama Rebecaca uyarcami. Esauca urcupi animalta japishpa apanamanmi rirca.

⁶Chaimi Rebecaca, Jacobtaca: — Riqui huahua, ñucaca cambaj yayaca cambaj huauqui Esauta cashna nicujtami uyani:

⁷Urcupi animalta japimushpa, sumaj micunata rurashpa apamui. Chai micunata micushpa manaraj huañushpa Mandaj Diospaj ñaupajpi cantaca alli cashca cachun ningapaj ninmi.

⁸Cunanca ñuca huahua, ñuca imata mandashcata uyai.

⁹Cunanca animalcuna maipi canman rishpa, chivo canllamanta ashtahuan alli ishqui chivota apamugri. Chaitaca cambaj yaya munashca shina sumaj micuita ñuca allichishallami.

¹⁰Chaita cambaj yayapajman apajpi, manaraj huañushpa chaita micushpami cantaca alli cashca cachun ninga — nircami.

¹¹Shina nijpica Jacobca, paipaj mama Rebecataca: — Ñuca huauqui Esauca millmasapamari, ñucaca manamari chashna canichu.

¹²Ashtahuanpish ñuca yayaca maquihuan tantiashpa rijsingallatajmari. Chashna rijsishpaca ñucata umacushcangui nishpaca, alli cashca cachun ninapaj randica, imapish tucushca alli canman ningallatajmari — nircami.

¹³Shina nijpi paipaj mamaca: — Ñuca huahualla, canta imapish tucushca canman nishcaca ñuca jahuapi urmachun. Ashtahuanca canca ñuca mandashcata cazushpa apamugrilla — nircami.

¹⁴Chaimi Jacobca, chivocunata apamushpa paipaj mamaman cujpi, paipaj mamaca yaya Isaac munashca shinallatataj sumaj micuita rurarca.

¹⁵Chaimantaca Rebecaca, paipaj punta churi Esaupaj sumaj churanata pai huaquichishpa charicushcata japishpami, paipaj q'uipa churi Jacobman churachirca.

¹⁶Jacobtaca paipaj maquipipish, cungapipish millmata maipi mana charinpimi chivocunapaj carahuan pilluchirca.

¹⁷Chaimantaca Rebecaca pai rurashca sumaj micuitapish, tandatapish Jacobpaj maquipimi churarca.

¹⁸Chaimi Jacobca, paipaj yaya tiyacunman yaicushpa: — Ñuca yayito — nijpi Isaacca: — Caipimi cani ¿maijantaj cangui, ñuca huahualla? — nirca.

¹⁹Shina nijpimi Jacobca: — Cambaj punta churi Esaumi cani. Ñamari can nishca shina sumaj micuita ruramuni. Cunanca ñucata alli cashca cachun ningapaj animalta japimushpa allichishca micuita jatarishpa micupai — nirca.

²⁰Chaimi Isaacca paipaj churitaca: — Ñuca huahualla ¿ima shinataj ñapish japimunguiyari? — nijpi Jacobca: — Canta Mandaj Taita Diosmari tupachun ñuca ñaupajman pushamun — nirca.

²¹Isaacca Jacobtaca: — Ñuca huahualla, ñuca churi Esautaj cashcata, mana pai cashcata tantiashpa rijsingapaj c'uchuyamui — nircami.

²²Paipaj yaya Isaacpajman Jacob c'uchuyajpimi, pai tantiashpaca: — Rimaica Jacobpajmi, maquicunaca Esaupajmi — nirca.

²³Jacobpaj maquicunaca Esaupaj maquicuna shina millmayuj cajpimi, tantiashpapish mana rijsishpa alli cashca cachun nigrishpaca:

²⁴Isaacca cutinllataj: — ¿Canca ñuca churi Esautajchu cangui? — nijpi, Jacobca: — Ari, Esautajmari cani — nirca.

²⁵Chaimi Isaacca: — Canta alli cashca cachun ningapaj ñuca huahua can japimushca animal aichata allichishcata micungapaj apamui — nijpi, Jacob cujpica, Isaacca micurcami, vinotapish apamujpi ubyarcami.

²⁶Yaya Isaacca Jacobtaca: — Ñuca huahualla, cunanca ñucapajman c'uchuyashpa ñucata muchai nijpimi,

²⁷Jacobca c'uchuyashpa mucharca. Yaya Isaacca Jacob churashca churanata mutquishpaca alli cashca cachun nishpami cashna nirca: “Riqui, ñuca huahuaca Mandaj Dios rurashca chagraman shinamari ashnan.

²⁸Taita Diosca jahua pachamanta garhuata cachachun. Allpaca alli granocunata p'ucuchun. Trigotapish, llullu vinotapish yallitaj achcata cuchun.

²⁹Pueblocunapish, llajtacunapish cambajta rurajcuna cachun. Cambaj ñaupajpi cumurichuncuna. Cambaj huauquicunapajpish mandaj cangui. Cambaj huauquicunaca cambaj ñaupajpi cumurichuncuna. Canta imapish tucushca alli canman nijcunaca paicunaraj imapish tucushca cachun. Canta alli cashca cachun nijcunaca, paicunapish alli cashca cachun” nircami.

³⁰Yaya Isaac, paipaj churi Jacobta alli cashca cachun nijpi, Jacob paipaj yayapaj ñaupajmanta llujshincami, Jacobpaj huauqui Esauca animalta japishpa ña chayamurca.

³¹Esauca sumaj micuita rurashpa paipaj yayapajman apamushpaca: — Ñucata alli cashca cachun ningapaj animalta japimushpa cambaj churi ñuca allichishca micuita jatarishpa micupai — nircami.

³²Chaimi paipaj yaya Isaacca: — Canca ¿pitaj cangui? — nijpi paica: — Ñucaca cambaj punta churi Esaumi cani — nirca.

³³Chaipimi Isaacca chujchushpa jatunta mancharishpaca: — Can manaraj chayamujpimari, animalta japishpa sumaj micunata rurashpa maijantajshi ñucapajman shamushpa carajpi chaita micushpa ñucaca paitaca alli cashca cachun nircani. Paimi alli cashca cachun nishca canga — nirca.

³⁴Paipaj yaya shina nijta uyashpami Esauca jatunta llaquirishpa, yallitaj jatunta caparirishpa huacashpaca: — Ñuca yayito, ñucatapish alli cashca cachun nipayari — nirca.

³⁵Isaacca: — Cambaj huauquimari ñucapajman shamushpa canta alli cashca cachun ninataca ñucata umashpa pairaj japishca — nircami.

³⁶Chaimi Esauca: — Chashna cana cajpimari paitaca Jacobta shutichishcanguichij. Paica ñucataca caihuanca ishqui cutinmari ña uman. Sarunca punta churi cashcatami quichurca. Cunancarin ñucata alli cashca cachun ninatamari quichushca nishpami: Yayito ñucata alli cashca cachun ninapajca manachu charinguiraj — nirca.

³⁷Shina nijpimi Isaacca, Esautaca: — Ñucaca Jacobtaca canta mandaj cachunmi churarcani. Paipaj tucui huauquicunapish paipajta rurajcuna cachun nircanimi. Trigotapish, llullu vinotapish achcata charichun nircanimi. Chaimanta cunanca ñuca huahualla, cambajca ¿imatataj rurashari? — nirca.

³⁸Chaimi Esauca paipaj yayataca: — Ñuca yayitolla, alli cashca cachun ninataca ¿shujllatachu charingui? ¡Ñuca yayitolla, ñucatapish alli cashca cachun nillari! — nishpami Esauca jatunta caparishpa huacarca.

³⁹Ashtahuanpish paipaj yaya Isaacca, Esautaca: “Canca alli granocunata p'ucuj allpamanta carupimi causangui. Jahua pachamanta urmaj garhuamantapish carupimi causangui.

⁴⁰Cambaj espadamantami causangui. Cambaj huauquipajta rurajmi cangui. Shina cashpapish ña c'ari c'ari tucushpaca shujtajpajta ruracushca yugomantaca chaspirishpami cachariringui” nircami.

⁴¹Esauca paipaj yaya Isaac Jacobtaraj alli cashca cachun nishcamantami, Jacobtaca yallitaj p'iñashpa paipaj shungupica: “Ñuca yaya huañujpi llaquilla cana punllaca chayamungami. Chaipitajca ñuca huauqui Jacobtaca huañuchishami” nishpa yuyacurca.

⁴²Punta churi Esaú paipaj huauqui Jacobta huañuchisha nicushcataca, Rebecamanmi yachaj chayachircacuna. Chaimi paica q'uipa churi Jacobta cayachishpa: — Cambaj huauqui Esauca paita llaquichishcamantaca cantaca huañuchishpatajmi alli casha nicunmi.

⁴³Ñuca huahualla, cunanca ñuca mandashcata uyashpa, Harán pueblopi causacuj ñuca turi Labanpajman miticushpa ri.

⁴⁴Cambaj huauqui canta p'iñacushcata cungarina punllacunacama paihuan causagri.

⁴⁵Paita can imata rurashcata ña cungarishpa, ña mana p'iña cajpica, cai llajtaman can tigramuchun cayanaman cachashallami. Shuj punllallapi cancuna ishquindij huañujpica, ñucapajca jatun llaquimari canga — nirca.

⁴⁶Rebecaca Isaactaca: — Esaú paipaj huarmi cachun japishca heteo huarmicunamantaca ñuca causaipica llaquitami apacuni. Jacobpish Hetpaj ushushicunata paipaj huarmi cachun japijpi, cai huarmicunamanta shinallataj llaquita apacungapajllaca ¿imapajtaj causashpa catishari? — nircami.