Read Chimborazo Highland Quichua GÉNESIS 28 Bible Online

GÉNESIS 28 - Chimborazo Highland Quichua bible

GÉNESIS 28

¹Chaimi Isaacca, Jacobta cayashpa alli cashca cachun nishpa mandashpaca: “Cai Canaán llajtapi causajcunapaj ushushicunataca cambaj huarmi cachunca amataj japinguichu.

²Cunanca Padan-arampi caj cambaj mamapaj yaya Betuelpaj huasiman ri. Chaipica cambaj mamapaj turi Labanpaj ushushicunamanta maijantapish cambaj huarmi cachun japingui.

³Pailla Tucuita Rurai Tucuj Taita Dios, canmanca achca allicunata cuchun. Cambaj huahuacunatapish yallitaj achcata mirachichun. Yallitaj achcacuna tucungacama mirachichun.

⁴Abrahamta alli cashca cachun nishcallatataj canmanpish, cambaj huahua huahuacunamanpish cuchun. Taita Dios Abrahamman cushca cunan ñucanchij causacun llajtataca chashnami quiquin allpataj tucungacama doñoyashpa catingacuna” nircami.

⁵Chashna Isaac Jacobta Padan-aramman cachajpimi, paica arameo Betuelpaj churi Labanpaj huasiman rirca. Labanca Jacobpaj, Esaupaj mama Rebecapaj turimi carca.

⁶Esauca paipaj huauqui Jacobta yaya Isaac alli cashca cachun nishpa Padan-aramman rishpa, chaipi paipaj huarmi cachun huarmita japichun cachashcata, chaiman cachacushpaca: “Cai Canaanpi causajcunapaj ushushicunataca cambaj huarmi cachunca amataj japinguichu” nishpa cachashcatami yacharca.

⁷Esauca Jacobtaca paipaj yaya mama mandashcata cazushpa Padan-arampi causanaman rijta ricushpami,

⁸Canaanpi causajcunapaj ushushicunamantaca paipaj yaya Isaacca mana cushicui cashcata yacharca.

⁹Chaimi Esauca cananea huarmicunata charishca jahuapish Abrahampaj churi Ismaelpajman rishpa, paipaj ushushi Mahalatta paipaj huarmi cachun japirca. Mahalatca Nebaiotpaj panimi carca.

¹⁰Jacobca Beersebamanta llujshishpaca, Haranmanmi rirca.

¹¹Chaiman ricushpaca shuj pambaman chayashpami chaipi dormirca. Inti huashicushpa ña tutayashcamantami paica chai pambapi siricuj rumicunamanta shuj rumita japishpa saunashpa chaipi dormirca.

¹²Paica, pambamanta jahua pachacama shuj jatun escalera paipaj c'uchupi shayacujta, chai escalerapica Taita Diospaj angelcuna huichiyacujta uriyacujtami muscurca.

¹³Mandaj Taita Diosca chai escalera punta jahuallamantatajmi: “Ñucaca cambaj abuelo Abrahampaj, cambaj yaya Isaacpaj Mandaj Taita Diosmi cani. Can siricun llajtataca canmanpish, cambaj huahua huahuacunamanpishmi cusha.

¹⁴Cambaj huahua huahuacunaca, ñutu allpa shinami canga. Inti llujshin ladomantaca, inti huashicun ladocama, janaj ladomantaca, ura ladocamami mirarishpa causangacuna. Canmanta, cambaj huahua huahuacunamantami tucui cai pachapi causajcunaca alli nishca cangacuna.

¹⁵Ñucaca canhuanmi cani. Can maiman rijpipish ñucami pushasha. Cantaca cai llajtallamantajmi tigrachimusha. Canman imata cusha nishcataca cushatajmi. Cantaca manataj saquishachu” nijtami muscurca.

¹⁶Jacobca dormicushcamanta rijcharishpaca: “Mandaj Diosca caipimari cashca. Ñucaca chaitaca manamari yacharcanichu” nircami.

¹⁷Paica achcata mancharishpa caparirishpami: “¡Cai pambaca jatun mancharinamari! ¡Taita Diospaj huasipish, jahua pacha pungupish caipimari cashca!” nirca.

¹⁸Jacobca cayandij tutamanta utcata jatarishpami, pai saunashca rumitaca Taita Diospajlla cashcata ricunapaj cachun nishpa huichiman shayachishpa aceiteta churarca.

¹⁹Ñaupamanca chai puebloca, Luz shuti cashca cajpipish, Jacobca chaitaca, Bet-el shutitami shutichirca.

²⁰Chaipimi Jacobca Mandaj Diosman cuna tucushpa cashna nirca: “Taita Dios ñucahuan rishpa, cunan ñuca maiman ricunpi tucuipi cuidashpa, micunatapish carashpa, churanatapish cushpa,

²¹ñuca yayapaj huasiman sumajta tigrachishpatajca ñuca Mandaj Taita Diosmi canga.

²²Taita Dios caipi cashcata ricuchij cachun ñuca caipi churashca rumi tiyacunpish, Taita Diospaj huasimi canga. Tucui imallata Dios ñucaman cushcacunamantapish, chungamanta shujta ch'icanchishpa cucushallami” nircami.