Read Chimborazo Highland Quichua GÉNESIS 29 Bible Online

GÉNESIS 29 - Chimborazo Highland Quichua bible

GÉNESIS 29

¹Jacobca pai ricushca ñanta rishpaca, inti llujshin ladoman causajcunapaj llajtamanmi chayarca.

²Chai pambapica shuj pugyuta, chai c'uchupica quimsa canlla ovejacuna siricujtami ricurca. Chai pugyumantami canlla ovejacunamanca yacuta ubyachijcuna carca. Chai pugyuca jatun rumihuan tapashcami carca.

³Michijcunaca tucui canlla ovejacunata ña tandachishpami, pugyuta tapachishca rumita anchuchishpa ovejacunaman yacuta ubyachijcuna carca. Chai pugyutaca rumihuan cutinllataj tapachishpami saquijcuna carca.

⁴Chaipi cajcunatami Jacobca: — Ñuca huauquicuna, ¿maimantataj canguichij? — nijpi paicunaca: — Ñucanchijca Haranmantami canchij — nircacuna.

⁵Chaimi Jacobca: — Nacorpaj nieto Labanta ¿rijsinguichijchu? — nijpi paicunaca: — Ari rijsinchijmi — nircacuna.

⁶— Paica ¿allillachu causacun? — nishpa ashtahuan tapujpimi, michijcunaca: — Ari allillami causacun. Riquiyari, paipaj ushushi Raquelmari, paipaj yayapaj ovejacunahuan chainijta shamucun — nircacuna.

⁷Shina nijpimi Jacobca: — Ovejacunata corralpi huichcanapajca utcarajmi. Yacuta ña ubyachishpaca ¿ima nishpataj mana ashahuan michigringuichij? — nirca.

⁸Chaimi paicunaca: — Tucui michijcuna canlla ovejacunata tandachimungacama mana ubyachi tucunchijchu. Michijcuna canlla ovejacunata tucuicuna ña tandachimushpa tucuicunallataj tandanacushpa pugyuta tapachishca rumita anchuchishpami ovejacunamanca yacuta ubyachinchij — nircacunami.

⁹Jacob paicunahuan rimacujpirajmi, Raquelca paipaj yayapaj canlla ovejacunahuan pugyuman chayamurca. Paica michij huarmimi carca.

¹⁰Jacobca paipaj mamapaj turi Labanpaj ushushi Raquelta, Labanpaj ovejacunata ricushpami, pugyuman c'uchuyashpa pugyuta tapachishca rumita anchuchishpa Labanpaj ovejacunamanraj yacuta ubyachirca.

¹¹Chai q'uipaca Jacobca Raquelta muchashpami huacarca.

¹²Chaipimi Jacobca Raquelmanca paipaj yaya Labanpaj pani Rebecapaj churimi cani nishpa parlajpi, Raquelca callpashpa rishpa paipaj yayaman huillagrirca.

¹³Labanca paipaj pani Rebecapaj churi Jacob shamushcata uyashpami, tupanaman callpashpa rishpaca, allillachu cangui nishpa ugllarishpa muchashpa, paipaj huasiman pusharca. Chaipimi Jacobca pai imalla tucushcata Labanmanca tucuita parlarca.

¹⁴Chaimi Labanca: “Canca ñuca tullullataj, ñuca aichallatajmari cangui” nirca. Jacobca, ñami shuj quillata Labanhuan causarca.

¹⁵Chai q'uipami Labanca Jacobtaca: — Canca ñuca familia cashcallamantachu yangalla ñucapajta rurashpa causanguiyari. Ñucapajta rurashcamantaca ¿mashnatataj pagachun ningui? — nirca.

¹⁶Labanca ishqui ushushitami charirca. Punta ushushica Leami carca, q'uipa ushushica Raquelmi carca.

¹⁷Leapajca ñahui luluncunallami sumaj carca. Ashtahuanpish Raquelca ñahuipish sumaj, munananqui solterami carca.

¹⁸Jacobca, Raquelta c'uyashcamantami Labantaca: — Ñucaca cambaj q'uipa ushushi Raquelmantami canchis huatacama cambajta rurasha nini — nirca.

¹⁹Chaimi Labanca: — Pi shujtajhuan ñuca ushushita cazarachinapaj randica, canhuan cazarachinami alli nishpami ñucahuan causailla — nirca.

²⁰Chashnami Jacobca, Raquelmantaca canchis huatata Labanpajta rurashpa causarca. Raquelta yallitaj c'uyashcamantaca Jacobpajca canchis huatacunaca asha punllacuna shinallami ricurirca.

²¹Shuj punllami Jacobca Labantaca: — Raquelhuan cazarangapaj canchis huatata cambajta rurasha nishcataca ñami pajtachini. Cunanca ñuca huarmi cachun cuilla paihuan shujlla tucungapaj — nirca.

²²Chaimi Labanca, paipaj c'uchullapi causajcunata cayashpa shuj sumaj micuita rurarca.

²³Ña tutayajpica, Labanca paipaj ushushi Leata pushamushpa Jacobman cujpi, Jacobca Leahuanmi dormirca.

²⁴Labanca paipajta ruraj Zilpa huarmitapish Leapajta ruraj cachunmi curca.

²⁵Cayandij tutamanta Jacob ricushpaca, paihuan dormishpa pacarijca Lealla cashcata ricushpami Labantaca: — Canca ñucataca ¿imatataj rurashcanguichu, imamí? ¿Manachu ñucaca Raquelmanta cambajta rurashpa causarcani? ¿Ima nishpataj chashna umarcanguiyari? — nirca.

²⁶Chaimi Labanca: — Ñucanchijca cai llajtapica, punta ushushi manaraj cazarajpica q'uipa ushushitaca mana cazarachinchijchu.

²⁷Cunanca Leahuan cazarashpa, sumaj micuita ruracushca cai semanataca c'uchuyailla. Canchis huatahuan ñucapajta rurajpica, Raqueltapish cushallami — nirca.

²⁸Jacobca chaitapish ari nishpami, Leata cazarashcamanta sumaj micuita rurashpa semanayarca. Chai semana tucurijpimi, Labanca paipaj q'uipa ushushi Raqueltapish Jacobman paipaj huarmi cachun curca.

²⁹Labanca, paipajta ruraj Bilha huarmitapish Raquelpajta rurashpa causachunmi curca.

³⁰Jacobca Raquelhuan chayarinacushpami, paitaca Leata yalli c'uyarca. Raquelmantapish, canchis huatatami Labanpajta rurashpa causarca.

³¹Mandaj Diosca Leata Jacob mana c'uyajta ricushpami, Leamanraj huahuacunata curca. Ashtahuanpish Raquelca mana huachajmi carca.

³²Lea huarmi chichushpaca, shuj c'ari huahuatami huacharca. Paitaca: “Mandaj Diosca ñuca llaquilla cajtaca ricushcami. Cunanca ñuca cusapish ñucataca c'uyahuangami” nishpami, Rubenta shutichirca.

³³Leaca cutinllataj chichushpaca, shujtaj c'ari huahuatami huacharca. Paitaca: “Ñucata mana c'uyajta ricushpami, Mandaj Diosca cai huahuatapish cuhuan” nishpami Simeonta shutichirca.

³⁴Chai q'uipapish Leaca, cutinllataj chichushpaca shujtaj c'ari huahuatami huacharca. Paitaca: “Cunanca cai huahuahuanca ñamari quimsa churicunata charini. Cunantajca ñuca cusaca ñucapimari ashtahuan chayaringa” nishpami, Levita shutichirca.

³⁵Leaca cutinllataj chichushpa shujtaj c'ari huahuata huachashpaca: “Cunanca Mandaj Diostami alabasha” nishpami, chai huahuataca Judata shutichirca. Chai q'uipaca Leaca, ña mana ashtahuan huacharcachu.